Real Madrid ចេញមុខបដិសេធរឿងតាមទិញយកខ្សែប្រយុទ្ធមួយរូបដែលកំពុងតែរះនៅ World Cup
ក្រុមអធិរាជស Real Madrid កាលពីម្សិលមិញ បានចេញមុខបដិសេធពីរបាយការណ៍ដែលថា ក្លឹបបានព្រមព្រៀងក្នុងការទិញខ្សែប្រយុទ្ធវ័យក្មេង Kylian Mbappe ដែលកំពុងតែលេចធ្លោនៅព្រឹត្តិការណ៍ FIFA World Cup ពីក្លឹប PSG។យោងតាមសារព័ត៌មានក្នុងប្រទេសអេស្ប៉ាញបានរាយការណ៍ថា ក្រុមជើងឯក UEFA Champion League ១៣សម័យបានព្រមព្រៀងជាមួយ PSG ក្នុងការទិញយកកីឡាករបារាំងខាងលើក្នុងតម្លៃ ២៧២ លានអឺរ៉ូ (ប្រមាណ ៣១៦ លានដុល្លារសហរដ្ឋអាមេរិក)។យ៉ាងណាមិញ ក្រុមរបស់ប្រធានក្លឹប Florentino Perez បានចេញសេចក្តីថ្លែងការណ៍មួយថា៖ "ក្លឹប Real Madrid សូមបញ្ជាក់ថារបាយការណ៍ដែលបានចែកចាយប៉ុន្មានម៉ោងទៅនេះ ដែលថា ក្លឹបបានព្រមព្រៀងជាមួយ PSG ដើម្បីផ្ទេរ Kylian Mbappe គឺខុសពីការពិតទាំងស្រុង។ ក្លឹប Real Madrid មិនបានធ្វើសំណើផ្ទេរទៅក្លឹប PSG ឬទៅកីឡាករឡើយ ហើយសូមថ្កោលទោសចំពោះរបាយការណ៍ខាងលើ"។គួររំលឹកថា កាលពីពេលថ្មីៗនេះ ពាក្យចចាមអារ៉ាមស្តីអំពីការចាកចេញរបស់តួឯក Cristiano Ronaldo ទៅកាន់ក្រុមនារីវ័យចំណាស់ Juventus កាន់តែសាយភាយឡើង ដែលជាហេតុធ្វើឲ្យព័ត៌មានក្នុងការចរចារ Kylian Mbappe ពី PSG ផ្ទុះឡើងតែម្តង។
ខ្សែការពារ Yerry Mina បង្កើតកំណត់ត្រាអស្ចារ្យមួយនៅ World Cup ទោះបីជាកូឡុំប៊ីធ្លាក់ក្តី
ក្រុមជម្រើសជាតិកូឡុំប៊ីបានធ្លាក់ចេញពីព្រឹត្តិការណ៍ FIFA World Cup 2018 ក្រោយពីចាញ់ក្រោមថ្វីជើងក្រុមតោកំណាចអង់គ្លេសនៅវគ្គ១៦ក្រុមចុងក្រោយ ដោយសារការទាត់បាល់កាត់សេចក្តី១១ម៉ែត្រ។ក្នុងការប្រកួត៩០នាទី Harry Kane ជាអ្នកទាត់បញ្ចូលទីនាំមុខឲ្យក្រុមតោកំណាច មុន Yerri Mina តាមស្មើនៅចុងម៉ោងនៃវគ្គទី២ ហើយលទ្ធផលនេះក៏បន្តរហូតដល់ចប់ម៉ោងបន្ថែម។ទោះជាយ៉ាងណាក្តី Yerry Mina ក៏បានបង្កើតកំណត់ត្រាមួយផងដែរ ដោយក្លាយទៅជាខ្សែការពារដំបូងគេបង្អស់ក្នុងរយៈពេល៥២ឆ្នាំ ដែលតែតបញ្ចូលទីបាន៣គ្រាប់ក្នុងព្រឹត្តិការណ៍ World Cup។បន្ថែមពីលើនេះ ខ្សែការពារវ័យ២៣ឆ្នាំក៏បានក្លាយទៅជាកីឡាករទីពីរបស់ក្រុមជម្រើសជាតិកូឡុំប៊ីដែលអាចរកគ្រាប់បាល់បញ្ចូលទីគូប្រកួតបានបីប្រកួតជាប់ៗគ្នា ដោយខ្សែបម្រើ James Rodriguez គឺជាកីឡាករដំបូងគេបង្អស់ដែលបង្កើតប្រវត្តិសាស្ត្រនេះឡើងនៅព្រឹត្តិការណ៍ FIFA World Cup 2014៕
Toni Kroos អាចចូលនិវត្តន៍ពីក្រុមជម្រើសជាតិអាល្លឺម៉ង់ ក្រោយធ្លាក់ចេញពីព្រឹត្តិការណ៍ FIFA World Cup
ខ្សែបម្រើ Toni Kroos កំពុងតែពិចារណាចូលនិវត្តន៍ពីក្រុមជម្រើសជាតិអាល្លឺម៉ង់ ក្រោយពីក្រុមការពារជើងឯកបានធ្លាក់ចេញពីព្រឹត្តិការណ៍ FIFA World Cup 2018 ត្រឹមវគ្គចែកពូល។សមាជិករបស់ Real Madrid ត្រូវបានគេរាយការណ៍មកថា បានប្រាប់ទៅកាន់មិត្តភក្តិខ្លួនថា ខ្លួនអាចនឹងចូលនិវត្តន៍ពីជម្រើសជាតិ ដោយសារតែមិនអាចទ្រាំទ្រនឹងការរិះគន់ពីសំណាក់ជនរួមជាតិអំពីបរាជ័យរបស់ក្រុមនៅប្រទេសរុស្ស៊ី។ កីឡាករវ័យ២៨ឆ្នាំ នៅតែសោកសៅក្រោយធ្លាក់ចេញពីព្រឹត្តិការណ៍ FIFA World Cup ហើយមិនតែប៉ុណ្ណោះការចាញ់ប្រកួតចុងក្រោយពេលប៉ះជាមួយកូរ៉េខាងត្បូងបានធ្វើឲ្យរូបគេកាន់តែពិចារណាអំពីអនាគតជាមួយជម្រើសជាតិម្តងហើយម្តងទៀត។គួររំលឹកថា ក្រុមឥន្រ្ទីដែកអាល្លឺម៉ង់បានជ្រុះចេញពីការប្រកួតពានរង្វាន់បាល់ទាត់ពិភពលោកឆ្នាំ២០១៨ ត្រឹមវគ្គចែកពូលក្នុងនាមជាក្រុមការពារជើងឯក ដោយឋិតនៅបាតតារាងក្រោយពីប្រកួតឈ្នះ១ និង ចាញ់២លើក។
Diego Maradona ថា សុខចិត្តដឹកនាំក្រុមជម្រើសជាតិអាហ្សង់ទីនម្តងទៀតដោយមិនយកលុយឡើយ
វីរបុរសបាល់ទាត់ Diego Maradona បាននិយាយកាលពីពេលថ្មីៗនេះថា លោកសុខចិត្តដឹកនាំក្រុមជម្រើសជាតិអាហ្សង់ទីនសារជាថ្មីម្តងទៀត ដោយមិនយកប្រាក់បៀរវត្ត៍ឡើយ។បុរសវ័យ៥៧ឆ្នាំបានបន្ថែមទៀតថា៖ " ជាការពិត! ខ្ញុំនឹងព្រមធ្វើដូច្នេះ។ ខ្ញុំនឹងដឹកនាំដោយមិនយកប្រាក់ឈ្នួលឡើយ ព្រោះខ្លួនគ្រាន់តែចង់ឃើញជម្រើសជាតិមានទម្រង់លេងល្អជាងនេះ។"ក្រុមរហស្សនាមពពកសបានជ្រុះចេញពីព្រឹត្តិការណ៍ FIFA World Cup 2018 ក្រោមថ្វីជើងរបស់ក្រុមមាន់គកបារាំងក្នុងលទ្ធផល៤ទល់នឹង២ ដែលជាហេតុធ្វើឲ្យតំណែងរបស់គ្រូបង្វឹក Jorge Sampaoli កំពុងតែមានសម្ពាធ ជាពិសេសគឺលើទម្រង់លេងរបស់ក្រុមទាំងមូលតែម្តង។គួរបញ្ជាក់ថា លោក Diego Maradona ក៏ធ្លាប់បានធ្វើជាគ្រូបង្វឹកក្រុមជម្រើសជាតិអាហ្សង់ទីនផងដែរ គឺពីឆ្នាំ២០០៨ ដល់ឆ្នាំ២០១០ ដោយលោកបានដឹកនាំក្រុមឲ្យឡើងបានដល់វគ្គ៨ក្រុមចុងក្រោយនៃ World Cup ឆ្នាំ២០១០ ប៉ុន្តែអាហ្សង់ទីនត្រូវបានធ្លាក់ចេញពីព្រឹត្តិការណ៍បាល់ទាត់ពិភពលោកនេះក្រោមដៃជម្រើសជាតិអាល្លឺម៉ង់៕
Kylian Mbappe៖ ខ្ញុំរំភើបដែលគ្រប់គ្នាប្រដូចខ្ញុំជាមួយ Pele ប៉ុន្តែគាត់ឋិតនៅកម្រិតមួយផ្សេងទៀត
ខ្សែប្រយុទ្ធវ័យក្មេង Kylian Mbappe បានរួមចំណែកដឹកនាំក្រុមបាល់ទាត់ជម្រើសជាតិបារាំងទៅកាន់វគ្គ៨ក្រុមចុងក្រោយ FIFA World Cup ក្រោយបង្ហាញសមត្ថភាពយ៉ាងអស្ចារ្យទម្លាក់អាហ្សង់ទីនរបស់ Lionel Messi។ជំហរ និង ជំនាញរបស់សមាជិកក្លិប Paris Saint Germain បានដាក់សម្ពាធទៅលើខ្សែការពារអាហ្សង់ទីន ដោយហេតុនេះហើយបានជាមតិមួយចំនួនបានប្រដូចរូបគេទៅនឹងស្ដេចបាល់ទាត់ប្រេស៊ីល លោក Pele។អតីតយុវជនក្លិប AS Monaco លើកឡើងបែបនេះ ៖"ខ្ញុំពិតជាសប្បាយចិត្តចំពោះការប្រៀបផ្ទឹមនេះ តែគាត់ស្ថិតនៅកម្រិតខ្ពស់មួយផ្សេងទៀតពីខ្ញុំ តែខ្ញុំរីករាយដែលអាចឈានទៅកាន់ចំណោមនេះបាន"។
អង់គ្លេសទើបឈ្នះការទាត់ប៉េណាល់ទីជាលើកទី២ទេ បើគិតពីតាំងពីឆ្នាំ១៩៩៦មក
ក្រុមបាល់ទាត់ជម្រើសជាតិអង់គ្លេស បានទម្លាក់កូឡុំប៊ី នៅវគ្គ១៦ក្រុមចុងក្រោយ FIFA World Cup 2018 តាមរយៈបាល់កាត់សេចក្ដី១១ម៉ែត្រ ក្រោយស្មើគ្នា១ទល់នឹង១ នៅថ្ងៃអង្គារ ទី០៣ មិថុនា។នេះគឺជាការឈ្នះដោយបាល់ប៉េណាល់ទីសម្រាប់អង់គ្លេសេ ជាលើកទីចាប់តាំងពីឆ្នាំ១៩៩៦មក ដោយនៅក្នុងព្រឹត្តិការណ៍ Euro 1996 ដោយអង់គ្លេសឡើងទៅដល់វគ្គពាក់កណ្តាលផ្តាច់ព្រ័ត។គួររំលឹកថា ក្នុងការប្រកួត៩០នាទី Harry Kane ជាអ្នកទាត់បញ្ចូលទីនាំមុខឲ្យក្រុមតោកំណាច មុន Yerri Mina តាមស្មើនៅចុងម៉ោងនៃវគ្គទី២ ហើយលទ្ធផលនេះក៏បន្តរហូតដល់ចប់ម៉ោងបន្ថែម។Eric Dier ជាអ្នកទាត់គ្រាប់ជ័យជម្នះ១១ម៉ែត្រ ក្រោយ Jordan Picford សង្គ្រោះបាល់ទាត់ដោយ Carlos Bacca។ ជ័យជម្នះនេះ ធ្វើឲ្យក្រុមលោក Gareth Southgate ប៉ះស៊ុយអែត នៅថ្ងៃសៅរ៍ ទី០៧ មិថុនា។
អ្នកចាំទីអង់គ្លេសទម្លាយថាបានរៀនសូត្រពីការស៊ុតបាល់ប៉េណាល់ទីរបស់កីឡាករកូឡុំប៊ីទាំងអស់
ក្រុមបាល់ទាត់ជម្រើសជាតិអង់គ្លេសបានយកឈ្នះកូឡុំប៊ីដោយការទាត់បាល់កាត់សេចក្តី១១ម៉ែត្រ ហើយបានឡើងទៅវគ្គ៨ក្រុមចុងក្រោយក្នុងព្រឹត្តិការណ៍ FIFA World Cup លើកដំបូងក្នុងរយៈពេល១២ឆ្នាំចុងក្រោយ។អ្នកចាំទី Jordan Pickford គឺជាអ្នកសង្រ្គោះគ្រាប់បាល់ចុងក្រោយពីការស៊ុតរបស់ខ្សែប្រយុទ្ធ Carlos Bacca ដោយជួយឲ្យអង់គ្លេសឈានទៅជុំបន្ទាប់។ យ៉ាងណាមិញ សមាជិករបស់ Everton បានទម្លាយថា ថាខ្លួនបានស្រាវជ្រាវទាំងអស់ពីការស៊ុតប៉េណាល់ទីរបស់ក្រុមកូឡុំប៊ីទាំងមូល។ អតីតយុវជន Sunderland បានបន្ថែមទៀតថា៖ “ខ្បានញុំមើលវីដេអូ និងស្រាវជ្រាវការស៊ុតទាំងអស់របស់ពួកគេ។ Falcao គឺជាកីឡាករតែម្នាក់គត់ដែលស៊ុតខុសទម្លាប់ដែលធ្លាប់ស៊ុតកាលពីមុនៗ"។ Carlos Bacca ទាត់បាល់ទី៥ ហើយខ្ញុំគិតស្រេចថាគេនឹងសំដៅទៅរកខាងឆ្វេងតាមទម្លាប់ ហើយជាលទ្ធផលខ្ញុំសង្គ្រោះបានមែន។"គួរបញ្ជាក់ថា អង់គ្លេសនឹងត្រូវបន្តជួបជាមួយស៊ុយអែតនៅវគ្គ១/៤ជាបន្តទៀតក្នុងក្នុងព្រឹត្តិការណ៍ FIFA World Cup 2018។
លោក Joachim Low ថានឹងកសាងក្រុមឲ្យកាន់តែល្អជាងមុន ក្រោយបន្តដឹកនាំក្រុមឥន្រ្ទីដែកអាល្លឺម៉ង់
លោក Joachhim Low នឹងបន្តកាន់តំណែងជាគ្រូបង្គោលក្រុមបាល់ទាត់ជម្រើសជាតិអាល្លឺម៉ង់ ទោះបីពួកគេជ្រុះចេញពី FIFA World Cup 2018 នៅត្រឹមវគ្គចែកពូល ក្នុងនាមជាក្រុមការពារតំណែងជើងឯកក្តី។លោក Low និយាយថា ទោះបីមានការរិះគន់ច្រើន តែលោកក៏ទទួលបានការគាំទ្រ និង លើកទឹកចិត្តពីប្រិយមិត្តដ៏ទៃទៀតផងដែរ។ លោកប្ដេជ្ញាថានឹងកសាងក្រុមឲ្យកាន់តែល្អឡើងវិញសម្រាប់ការប្រកួតនាព្រឹត្តិការណ៍ក្រោយៗទៀត។ក្រុមការពារតំណែងជើងឯកបានបញ្ចប់នៅបាតតារាងពូល G ក្រោយចាញ់កូរ៉េខាងត្បូង ២ទល់នឹង០ និង ជាលើកដំបូងចាប់ពីឆ្នាំ១៩៣៨ មកដែលពួកគេជ្រុះតាំងពីជុំទីមួយ។
អង់គ្លេសទម្លាក់កូឡុំប៊ីត្រឹមវគ្គ១៦ក្រុមចុងក្រោយដោយការទាត់បាល់កាត់សេចក្តី១១ម៉ែត្រ បន្ទាប់ពីស្មើគ្នា១២០នាទី
ក្រុមតោកំណាចអង់គ្លេសទម្លាក់កូឡុំប៊ីត្រឹមវគ្គ១៦ក្រុមចុងក្រោយដោយការទាត់បាល់កាត់សេចក្តី១១ម៉ែត្រ បន្ទាប់ពីស្មើគ្នាដោយលទ្ធផល១ទល់នឹង១ក្នុង១២០នាទី។ក្នុងការប្រកួតនាកីឡដ្ឋាន Sparktar ខ្សែប្រយុទ្ធ Harry Kane គឺជាអ្នកបើកគណនេយឲ្យក្រុមលោក Gareth Southgate បានមុននៅនាទីទី៥៧ដោយការស៊ុតបាល់ពិន័យ១១ម៉ែត្រ ខណៈកូឡុំប៊ីរកគ្រាប់បាល់តាមស្មើមកវិញនៅនាទីទី៩០+៣។លុះចូលមកដល់ម៉ោងបន្ថែម១៥នាទី២ដងក៏ក្រុមទាំង២នៅតែមិនអាចមានឱកាសទម្លុះសំណាញ់ទីគ្នាបានឡើយ។ ដោយការប្រកួតឈានមកដល់ការទាត់បាល់កាត់សេចក្តី១១ម៉ែត្រ ដោយជាលទ្ធផលគឺក្រុមជម្រើសជាតិអង់គ្លេសគឺជាអ្នកឈ្នះដោយលទ្ធផល៤ទល់នឹង៣។ ដូចនេះ ក្រុមជើងឯកបាល់ទាត់ពិភពលោក១សម័យនឹងត្រូវបន្តដំណើរទៅប៉ះជាមួយស៊ុយអែតនៅវគ្គ៨ក្រុម។
