trollkhmer news

World Cup

Edinson Cavani រកបាន២គ្រាប់ឲ្យអ៊ុយរុយហ្គាយឈ្នះព័រទុយហ្គាល់២ទល់នឹង១ក្នុងវគ្គ១៦ក្រុមចុងក្រោយ

ថ្ងៃទី ០១ ខែ កក្តដា ឆ្នាំ ២០១៨ ម៉ោង ០៣:០៤

ក្រុមជម្រើសជាតិអ៊ុយរុយហ្គាយបានយកឈ្នះក្រុមជម្រើសជាតិព័រទុយហ្គាល់២ទល់នឹង១ក្នុងការប្រកួតពានរង្វាន់បាល់ទាត់ពិភពលោក FIFA World Cup 2018​ វគ្គ១៦ក្រុមចុងក្រោយ។២គ្រាប់របស់ក្រុមជើងឯក២សម័យរកបានដោយខ្សែប្រយុទ្ធ Edinson Cavani នៅវគ្គទី១មួយគ្រាប់ និង វគ្គទី២មួយគ្រាប់ ខណៈគ្រាប់បាល់តែមួយគត់របស់ក្រុមជើងឯក Euro 2016 រកបានដោយខ្សែការពារ Pepe។គួរបញ្ចាក់ថា ក្រោយពីទទួលបានជ័យជម្នះ អ៊ិយរុយហ្គាយនឹងបន្តដំណើររបស់ខ្លួនទៅប៉ះជាមួយក្រុមជើងឯកឆ្នាំ១៩៩៨បារាំងនៅវគ្គ៨ក្រុមចុងក្រោយជាបន្តទៀត។

ក្រោយចាញ់យប់មិញ កីឡាករអាហ្សង់ទីនមួយរូបប្រកាសចូលនិវត្តន៍ពីក្រុមជម្រើសជាតិ

ថ្ងៃទី ០១ ខែ កក្តដា ឆ្នាំ ២០១៨ ម៉ោង ០២:២៥

ខ្សែបម្រើកណ្តាល Jaiver Mascherano បានប្រកាសចូលនិវត្តន៍ពីក្រុមជម្រើសជាតិអាហ្សង់ទីន ក្រោយពេលធ្លាក់ចេញពីព្រឹត្តិការណ៍ FIFA World Cup 2018 កាលពីម្សិលមិញ។កីឡាករវ័យ៣៤ឆ្នាំបានបង្ហាញខ្លួនជាមួយក្រុមរហស្សនាមពពកស១៤៧ប្រកួត រាប់ទាំងជំនួបដែលបរាជ័យក្រោមថ្វីជើងក្រុមមាន់គកបារាំងនៅវគ្គ១៦ក្រុមចុងក្រោយ ដោយលទ្ធផល៤ទល់នឹង៣។អតីតសមាជិក West Ham, Liverpool និង Barcelona បានឲ្យដឹងថា៖ "ជាការពិត, សម្រាប់ខ្ញុំគឺដល់ពេលវេលាហើយ។ ចាប់ពីឥឡូវនេះខ្ញុំគឺជាអ្នកគាំទ្រមួយរូបរបស់ក្រុមជម្រើសជាតិអាហ្សង់ទីន។"គួរបញ្ជាក់ថា កីឡាករដែលប្រកបអាជីពនៅ Hebei China Fortune ចូលលេងឲ្យក្រុមជម្រើសជាតិអាហ្សង់ទីនចាប់តាំងពីឆ្នាំ២០០៣មកម្ល៉េះ ហើយបានឈ្នះពានរង្វាន់មេដាយមាសអូឡាំពិកចំនួន២លើកផងដែរ។

Mbappe បរិច្ចាគ​លុយ​​ទាំង​អស់ដែល​បាន​ពី​ការ​ប្រកួត​នៅ FIFA World Cup ទៅជួយ​ក្មេង​កំព្រា

ថ្ងៃទី ០១ ខែ កក្តដា ឆ្នាំ ២០១៨ ម៉ោង ០២:០៥

ខ្សែប្រយុទ្ធវ័យក្មេង Kylian Mbappe ទើបតែស៊ុត២គ្រាប់កាលពីម្សិលមិញឲ្យក្រុមបាល់ទាត់ជម្រើសជាតិបារាំង យកឈ្នះអាហ្សង់ទីន ដោយ​លទ្ធផល ៤ទល់នឹង៣ ក្នុងការប្រកួត FIFA World Cup 2018 វគ្គ១៦ក្រុមចុងក្រោយ។ដោយឡែកអ្វីដែលគួរឲ្យចាប់អារម្មណ៍នោះគឺ សមាជិករបស់ PSG បាន​យក​លុយ​ដែល​បាន​ពី​ការ​ប្រកួត​សម្រាប់ពានរង្វាន់បាល់ទាត់ពិភពលោក​ឆ្នាំ២០១៨ទាំង​អស់នេះ ​ទៅ​ជួយ​ដល់​អង្គការ​ក្មេង​កំព្រា ​ដោយ​សំអាង​លើ​ហេតុ​ផល រូបគេ​លេង​បាល់​មិន​មែន​ដើម្បី​លុយ​ទេ។Mbappé ​ខ្សែ​ប្រយុទ្ធ​វ័យ​ក្មេង​របស់​បារាំង ​ទទួល​បាន​ប្រមាណ​២​ម៉ឺន​អឺរ៉ូ ​ក្នុង​១​ប្រកួត​នៅ​ព្រឹត្តិការណ៍ World Cup 2018 ​នេះ។ បើ​យោង​តាម​កាសែត​នៅ​បារាំង ​បាន​ចុះ​ផ្សាយ​ថា ​ប្រាក់​ដែល​កីឡាករ​លេង​នៅ​ក្លឹប​អាជីព PSG ​នេះ​បាន ​ពី​ការ​ប្រកួត ​នឹង​ផ្ដល់​ជូន​ទៅ​ខាង​អង្គការ​ក្មេង​កំព្រា​ទាំង​អស់។គួរបញ្ជាក់ថា ក្រុមមាន់គកបារាំងបានក្លាយជាក្រុមដំបូងគេបង្អស់ដែលកក់កៅអីវគ្គ៨ក្រុមចុងក្រោយ បន្ទាប់ពីបានយកឈ្នះអាហ្សង់ទីន៤ទល់នឹង៣។

ស៊ុត២គ្រាប់ម្សិលមិញ Mbappe បំបែកកំណត់ត្រាមួយតាំងពីជំនាន់របស់ Pele (មានវីដេអូ)

ថ្ងៃទី ០១ ខែ កក្តដា ឆ្នាំ ២០១៨ ម៉ោង ០១:៣១

ក្រុមបាល់ទាត់ជម្រើសជាតិបារាំង បានយកឈ្នះអាហ្សង់ទីន ដោយ​លទ្ធផល ៤ទល់នឹង៣ ក្នុងការប្រកួត FIFA World Cup 2018 វគ្គ១៦ក្រុមចុងក្រោយ នៅថ្ងៃសៅរ៍ ទី៣០ មិថុនា។ក្នុងជំនួបនាកីឡដ្ឋាន Kazan Arena ៣គ្រាប់របស់ក្រុមពពកស​រកបានដោយបាន Angel Di Maria, Mercado និង Sergio Aguero ដោយឡែក៤គ្រាប់របស់ក្រុមមាន់គកបារាំងរកបានដោយ Antoine Griezmann, Pavad និង Kylian Mbappe ២គ្រាប់។ក្រោយពីស៊ុតបាន២គ្រាប់កាលពីយប់មិញ ខ្សែប្រយុទ្ធ Kylian Mbappe បានបំបែកកំណត់ត្រាមួយប្រចាំព្រឹត្តិការណ៍ FIFA World Cup ពោលគឺជាយុវជនដំបូងគេបង្អស់ដែលស៊ុតបញ្ចូលទីបាន២គ្រាប់នៅក្នុងការប្រកួតវគ្គចាញ់ធ្លាក់ (Knock-out Stage) ចាប់តាំងពីជំនាន់វីរបុរសប្រេស៊ីល Pele នៅឆ្នាំ១៩៥៨មកម្ល៉េះ។គួរបញ្ជាក់ថា បារាំងក្លាយជាក្រុមដំបូងគេបង្អស់ដែលកក់កៅអីនៅវគ្គ៨ក្រុមចុងក្រោយ បន្ទាប់ពីយកឈ្នះអាហ្សង់ទីន៤ទល់នឹង៣។ទស្សនាវីដេអូ៖

Kylian Mbappe ស៊ុត២គ្រាប់ម្នាក់ឯងឲ្យបារាំងស៊ីអាហ្សង់ទីន ៤-៣ ឡើងវគ្គ១/៤ (មានវីដេអូ)

ថ្ងៃទី ០១ ខែ កក្តដា ឆ្នាំ ២០១៨ ម៉ោង ០០:៤៨

ក្រុមបាល់ទាត់ជម្រើសជាតិបារាំង បានយកឈ្នះអាហ្សង់ទីន ដោយ​លទ្ធផល ៤ទល់នឹង៣ ក្នុងការប្រកួត FIFA World Cup 2018 វគ្គ១៦ក្រុមចុងក្រោយ នៅថ្ងៃសៅរ៍ ទី៣០ មិថុនា។ក្នុងជំនួបនាកីឡដ្ឋាន Kazan Arena ខ្សែប្រយុទ្ធ Antonie Griezmann ស៊ុតបាល់១១ម៉ែត្រឲ្យក្រុមមាន់គកនាំមុខ១ទល់នឹង០ នៅនាទី១៣ មុន Angel Di Maria ស៊ុតពីចម្ងាយផុតដៃអ្នកចាំទី Hugo Lloris តាមស្មើនៅនាទី៤១។លុះឈានចូលដល់វគ្គទី២ Gabriel Mercado រកគ្រាប់បាល់ឲ្យអាហ្សង់ទីនាំមុខ២ទល់នឹង១ នៅនាទី៤៨ ហើយនៅនាទី​៥៧ Bavard បាន​រក​គ្រាប់​បាល់​ជួយ​បារាំង​តាម​ស្មើ​ ២-២។ ដោយឡែកនៅនាទីទី៦៤ និង នាទី៦៨ Kylian Mbappe ស៊ុតគ្រាប់ឲ្យបារាំង នាំមុខ៤ទល់នឹង២។ ដល់នាទី៩០បូក៣ Sergio Aguero តែតបញ្ចូលទីតាមពីក្រោយ៤ទល់នឹង៣ តែយឺតពេលអស់ទៅហើយ ដោយក្រុមមាន់គកបារាំងជាអ្នកឡើងទៅកាន់វគ្គ៨ក្រុមចុងក្រោយ៕ទស្សនាវីដេអូ៖​

Carvajal ថា លោក Fernando Hierro ជាមនុស្សសាកសមបំផុតសម្រាប់តំណែងគ្រូជម្រើសជាតិអេស្ប៉ាញ

ថ្ងៃទី ២៩ ខែ មិថុនា ឆ្នាំ ២០១៨ ម៉ោង ០៣:៥០

ខ្សែការពារ Dani Carvajal ថា លោក Fernando Hierro ជាមនុស្សសាកសមបំផុតសម្រាប់តំណែងគ្រូជម្រើសជាតិអេស្ប៉ាញនៅក្នុងព្រឹត្តិការណ៍ FIFA World Cup 2018។សមាជិករបស់ Real Madrid បានបន្ថែមថា៖ សម្រាប់គំនិតខ្ញុំ លោក Hierro គឺជាមនុស្សដ៏សាកសមបំផុតសម្រាប់ការដឹកនាំក្រុមជម្រើសជាតិ គាត់គឺជាអ្នកដឹកនាំដល់មានភាពទទួលខុសត្រូវបំផុត គាត់គឺជាគ្រូបង្វឹកដ៏ល្អហើយពួកយើងនឹងគាំទ្រគាត់រហូតដល់ទីបញ្ចប់។លោក Julen Lopetegui ត្រូវបានដកតំណែងជាគ្រូបង្គោល មិនដល់២៤ម៉ោងផង ក្រោយយល់ព្រមដឹកនាំ Real Madrid ហើយសហព័ន្ធបាល់ទាត់អេស្ប៉ាញចាត់ទុកថា ការយល់ព្រមទៅក្រុមជើងឯក Champions League ចំពេលសមាជិកទាំងអស់កំពុងតែផ្ដោតលើ World Cup នេះ ជារឿងទង្វើមិនសមរម្យ។លោក Hierro ដែលបញ្ចប់អាជីពបាល់ទាត់នៅ Bolton កាលឆ្នាំ២០០៤/២០០៥ បានដឹកនាំក្រុមគោជល់ឆ្លងផុតក្នុងពូល B នៅព្រឹត្តិការណ៍​ FIFA World Cup 2018 ដោយត្រូវបន្តជួបជាមួយម្ចាស់ផ្ទះរុស្ស៊ីនៅវគ្គ១៦ក្រុមចុងក្រោយ។

ក្រោយឈ្នះបិទវគ្គបែលហ្ស៊ិកបន្តឡើងទៅប៉ះជប៉ុន ដោយឡែកអង់គ្លេសត្រូវជួបកូឡុំប៊ីនៅវគ្គ១៦ក្រុម

ថ្ងៃទី ២៩ ខែ មិថុនា ឆ្នាំ ២០១៨ ម៉ោង ០៣:៤៥

ក្រោយឈ្នះ១ទល់នឹង០នៅថ្ងៃបិទវគ្គចែកពូល G បែលហ្ស៊ិកបន្តឡើងទៅប៉ះជប៉ុន ដោយឡែកអង់គ្លេសត្រូវជួបកូឡុំប៊ីនៅវគ្គ១៦ក្រុមនៃព្រឹត្តិការណ៍ FIFA World Cup 2018។ក្នុងជំនួបរវាងក្រុមបិសាចក្រហម និង ក្រុមតោកំណាចបានបញ្ចប់ទៅដោយការស៊ុត១គ្រាប់របស់ខ្សែបម្រើ Adnan Januzaj នៅវគ្គទី២ ដោយជួយឲ្យក្រុមជម្រើសជាតិបែលហ្ស៊ិកឈរនៅកំពូលតារាងពូល G ដោយមាន៩ពិន្ទុនៅក្នុងដៃ ខណៈអង់គ្លេសនៅលេខ២មាន៦ពិន្ទុ។នៅក្នុងពេលដំណាលគ្នានោះ ក្រុមជម្រើសជាតិទុយណេស៊ីបានវាយបកយកឈ្នះក្រុមជម្រើសជាតិប៉ាណាម៉ា២ទល់នឹង១។ កីឡាករ Yassine Meriah បានភ្លាត់ស្នៀតធ្វើឲ្យចូលទីខ្លួនឯងនៅនាទីទី៣៣ដោយធ្វើឲ្យប៉ាណាម៉ាជាអ្នកនាំមុខបានមុន ប៉ុន្តែកីឡាករ Ben Youssef និង Wahbi Khazri បានរកគ្រាប់បាល់ម្នាក់១គ្រាប់មកវិញឲ្យទុយណេស៊ីស្រវ៉ា៣ពិន្ទុតែម្តង។ទស្សនាវីដេអូ៖

Messi អ៊ីរ៉ង់ចូលនិវត្តន៍ពីជម្រើសជាតិក្នុងវ័យ២៣ឆ្នាំដោយតែម្តាយត្រូវគេជេរប្រទេច

ថ្ងៃទី ២៩ ខែ មិថុនា ឆ្នាំ ២០១៨ ម៉ោង ០២:២៥

ខ្សែប្រយុទ្ធជួរមុខអ៊ីរ៉ង់ Sardar Azmoun ដែលត្រូវបានហៅថា«Messi អ៊ីរ៉ង់»បានប្រកាសចូលនិវត្តន៍ពីក្រុមជម្រើសជាតិក្នុងវ័យត្រឹម២៣ឆ្នាំ ដោយអះអាងថាម្ដាយរបស់គេធ្លាក់ខ្លួនឈឺធ្ងន់ព្រោះតែការជេរប្រទេចដែលរូបគេទទួលរង។អតីតយុវជន Sepahan អះអាងថា៖ “ម្ដាយរបស់ខ្ញុំបានសះស្បើយពីជំងឺធ្ងន់មួយហើយខ្ញុំសប្បាយចិត្ត។ តែជាអកុសល ដោយសារតែភាពគ្មានមេត្តារបស់មនុស្សមួយចំនួននិងការជេរប្រទេចដែលខ្ញុំនិងមិត្តរួមក្រុមមិនសមនឹងទទួលទាល់តែសោះនោះ ជំងឺរបស់គាត់បានរើឡើងកាន់តែធ្ងន់។ ការណ៍នេះបានធ្វើឱ្យខ្ញុំស្ថិតក្នុងទីតាំងពិបាកមួយដែលខ្ញុំត្រូវតែជ្រើសរើសមួយក្នុងចំណោមជម្រើស២ ហើយជាលទ្ធផលខ្ញុំជ្រើសរើសម្ដាយខ្ញុំ”។ខ្សែប្រយុទ្ធក្លិប Rubin Kazan រូបនេះរកបាន២៣គ្រាប់ពីការចូលលេង៣៣ដងសម្រាប់អ៊ីរ៉ង់ពីឆ្នាំ២០១៤ដល់២០១៨មុន World Cup 2018 ចាប់ផ្ដើម។ ប៉ុន្តែ៣ប្រកួតនៅ World Cup ពូល B ដែលគេលេងពេញ៩០នាទី ទល់នឹង ម៉ារ៉ុក, អេស្ប៉ាញ និងព័រទុយហ្គាល់ រូបគេមិនបានស៊ុតចូលឡើយ។ អំឡុងវគ្គជម្រុះប្រចាំទ្វីបអាស៊ី Azmoun រកបាន១១គ្រាប់ពី១៤ប្រកួត។ជ័យលាភីកីឡាករឆ្នើមជាងគេរបស់ក្លិប Rostov ក្នុងរដូវកាល២០១៥-១៦ និយាយថាពាក្យរិះគន់លើរូបគេបានបណ្ដាលឱ្យម្ដាយរបស់គេធ្លាក់ខ្លួនឈឺធ្ងន់។

ខ្សែការពារ Yerry Mina តែត១គ្រាប់ឲ្យកូឡុំប៊ីទម្លាក់សេណេហ្គាល់នៅវគ្គចែកពូល (មានវីដេអូ)

ថ្ងៃទី ២៩ ខែ មិថុនា ឆ្នាំ ២០១៨ ម៉ោង ០២:២០

កូឡុំប៊ី បានផ្ដួល សេណេហ្គាល់ ១-០ ដោយជួយឲ្យជប៉ុន ឡើងទៅវគ្គ១៦ក្រុមចុងក្រោយ FIFA World Cup 2018 ទោះបីចាញ់ ប៉ូឡូញ ០-១ ក្នុងថ្ងៃបញ្ចប់ពូល H កាលពីម្សិលមិញ។សម្រាប់ជំនួបរវាង កូឡុំប៊ី និង សេណេហ្គាល់ គ្រាប់បាល់ជ័យជម្នះរបស់កូឡុំប៊ីរកបានតាមរយៈគ្រាប់បាល់តែតរបស់ខ្សែការពារ Yerry Mina ក្នុងនាទី៧៤។ដូច្នេះកូឡុំប៊ីឈរលេខ១ពូល H មាន៦ពិន្ទុ, ជប៉ុន ឈរលេខ២មាន៤ពិន្ទុ។ សេណេហ្គាល់ មាន៤ពិន្ទុស្មើជប៉ុន រួមទាំងស្មើសំណល់គ្រាប់បាល់ និងគ្រាប់ស៊ុតចូលគូប្រកួត ប៉ុន្តែចាញ់ប្រៀបត្រង់ពិន័យកាត ដោយជប៉ុនមានកាតលឿងតិចជាង៕ទស្សនាវីដេអូហាយឡាយ៖