Cavani មិនទាន់ច្បាស់ថាអាចចូលលេងពេលប៉ះជាមួយបារាំងបាននៅយប់នេះដោយសាររបួស
ខ្សែប្រយុទ្ធ Edinson Cavani មានឱកាសស្ដួចស្ដើងក្នុងការចូលលេងទល់នឹងបារាំង ក្នុងវគ្គ៨ក្រុមចុងក្រោយ FIFA World Cup 2018 ដោយសាររបួសកំភួនជើងកើតឡើងក្នុងអំឡុងការប្រកួតវគ្គ១៦ក្រុមចុងក្រោយទល់ព័រទុយហ្គាល់។សមាជិករបស់ Paris St Germain រូបនេះរកបាន២គ្រាប់ម្នាក់ឯងឱ្យអ៊ុយរុយហ្គាយទម្លាក់ជើងឯក Euro 2016 នៅវគ្គ១/៨ តែត្រូវបានប្ដូរចេញមុនចប់វគ្គទី២។ អតីតសមាជិក Napoli វ័យ៣១ឆ្នាំ មិនបានចូលហាត់ឡើយកាលពីថ្ងៃពុធ ហើយក្ដីសង្ឃឹមចូលលេងរបស់គេដែលសល់នៅពេលនេះគឺក្នុងនាមកីឡាករបម្រុង។គួរបញ្ជាក់ថា ក្រុមជើងឯក២សម័យអ៊ុយរុយហ្គាយនឹងត្រូវជួបជាមួយក្រុមជើងឯក១សម័យបារាំងនៅរាត្រីនេះនាវេលាម៉ោង៩យប់ក្នុងវគ្គ៨ក្រុមចុងក្រោយពានរង្វាន់ FIFA World Cup 2018 ដោយនឹងមានផ្សាយបន្តផ្ទាល់តាមកញ្ចក់ទូរទស្សន៍ CBS (CTN, CNC & MYTV) ផងដែរ។
គ្រូបែលហ្សិកសរសើរខ្សែបម្រើ Kevin De Bruyne ថាជាអ្នកដឹកនាំដ៏សំខាន់ក្នុងក្រុមជម្រើសជាតិ
គ្រូបង្វឹកក្រុមជម្រើសជាតិបែលហ្ស៊ិក លោក Roberto Martinez បាននិយាយថាថាខ្សែបម្រើ Kevin De Bruyne គឺជា "អ្នកដឹកនាំ" ដ៏សំខាន់នៅក្នុងក្រុមជម្រើសជាតិ។បុរសជនជាតិអេស្ប៉ាញបានលើកឡើងថា នៅក្នុងក្រុមជម្រើសជាតិ De Bruyne គឺជាអ្នកនាំលេងតាំងពីក្រោមរហូតដល់តំបន់ប្រយុទ្ធ។ ការណ៍នេះ ធ្វើឲ្យខ្សែបម្រើប្រយុទ្ធ ជាកីឡាករដែលមាន "ឥទ្ធិពល" និង ជា "អ្នកដឹកនាំ" ក្នុងក្រុម។ តួនាទីដ៏សំខាន់ក្នុងក្រុមជម្រើសជាតិរបស់ De Bruyne ច្រើនត្រូវបានមជ្ឈដ្ឋានជាច្រើនមើលរំលង។គួរបញ្ជាក់ថា ក្រុមរហស្សនាមបិសាចក្រហមនឹងត្រូវមានភារកិច្ចធ្ងន់នៅវគ្គ១/៤ ក្នុងព្រឹត្តិការណ៍ FIFA World Cup 2018 ដោយពួកគេត្រូវជួបជាមួយក្រុមជើងឯក៥សម័យ ប្រេស៊ីល។
ក្រុមសាម៉ូរ៉ៃជប៉ុនសម្រេចចែកផ្លូវគ្នាជាមួយគ្រូបង្វឹកក្រោយធ្លាក់ចេញពីព្រឹត្តិការណ៍ World Cup
កាលពីម្សិលមិញ សហព័ន្ធបាល់ទាត់ជប៉ុនបានប្រកាសអំពីការចែកផ្លូវគ្នាជាមួយគ្រូបង្វឹកក្រុមជម្រើសជាតិ Akira Nishino ក្រោយពីក្រុមរហស្សនាមសាម៉ូរ៉ៃបានធ្លាក់ចេញពីព្រឹត្តិការណ៍ FIFA World Cup 2018 ត្រឹមវគ្គ១៦ក្រុមចុងក្រោយ។លោក Nashino ត្រូវបានផ្ដល់កុងត្រារយៈពេលខ្លី ២ ខែមុនព្រឹត្តិការណ៍ World Cup ក្នុងការកាន់តួនាទីជាគ្រូបង្វឹកក្រុមជម្រើសជាតិជប៉ុន ជំនួសលោក Vahid Halilhodzic។គួររំលឹកថា ក្រុមជម្រើសជាតិជប៉ុនធ្វើបានយ៉ាងល្អនៅក្នុងព្រឹត្តិការណ៍ FIFA World Cup 2018 ក្រោយពីឆ្លងផុតវគ្គចែកពូល ប៉ុន្តែហាលអាវត្រឹមវគ្គ១៦ក្រុមចុងក្រោយ ក្រោមថ្វីជើងក្រុមបិសាចក្រហមបែលហ្ស៊ិកដោយលទ្ធផល៣ទល់នឹង២។ជាមួយគ្នានេះ កីឡាករជប៉ុនសំខាន់ពីររូប រួមមាន Keisuke Honda និង Makoto Hasebe បានប្រកាសចូលនិវត្តន៍ពីក្រុមជម្រើសជាតិផងដែរ។
Real Madrid ចេញមុខបដិសេធរឿងតាមទិញយកខ្សែប្រយុទ្ធមួយរូបដែលកំពុងតែរះនៅ World Cup
ក្រុមអធិរាជស Real Madrid កាលពីម្សិលមិញ បានចេញមុខបដិសេធពីរបាយការណ៍ដែលថា ក្លឹបបានព្រមព្រៀងក្នុងការទិញខ្សែប្រយុទ្ធវ័យក្មេង Kylian Mbappe ដែលកំពុងតែលេចធ្លោនៅព្រឹត្តិការណ៍ FIFA World Cup ពីក្លឹប PSG។យោងតាមសារព័ត៌មានក្នុងប្រទេសអេស្ប៉ាញបានរាយការណ៍ថា ក្រុមជើងឯក UEFA Champion League ១៣សម័យបានព្រមព្រៀងជាមួយ PSG ក្នុងការទិញយកកីឡាករបារាំងខាងលើក្នុងតម្លៃ ២៧២ លានអឺរ៉ូ (ប្រមាណ ៣១៦ លានដុល្លារសហរដ្ឋអាមេរិក)។យ៉ាងណាមិញ ក្រុមរបស់ប្រធានក្លឹប Florentino Perez បានចេញសេចក្តីថ្លែងការណ៍មួយថា៖ "ក្លឹប Real Madrid សូមបញ្ជាក់ថារបាយការណ៍ដែលបានចែកចាយប៉ុន្មានម៉ោងទៅនេះ ដែលថា ក្លឹបបានព្រមព្រៀងជាមួយ PSG ដើម្បីផ្ទេរ Kylian Mbappe គឺខុសពីការពិតទាំងស្រុង។ ក្លឹប Real Madrid មិនបានធ្វើសំណើផ្ទេរទៅក្លឹប PSG ឬទៅកីឡាករឡើយ ហើយសូមថ្កោលទោសចំពោះរបាយការណ៍ខាងលើ"។គួររំលឹកថា កាលពីពេលថ្មីៗនេះ ពាក្យចចាមអារ៉ាមស្តីអំពីការចាកចេញរបស់តួឯក Cristiano Ronaldo ទៅកាន់ក្រុមនារីវ័យចំណាស់ Juventus កាន់តែសាយភាយឡើង ដែលជាហេតុធ្វើឲ្យព័ត៌មានក្នុងការចរចារ Kylian Mbappe ពី PSG ផ្ទុះឡើងតែម្តង។
ខ្សែការពារ Yerry Mina បង្កើតកំណត់ត្រាអស្ចារ្យមួយនៅ World Cup ទោះបីជាកូឡុំប៊ីធ្លាក់ក្តី
ក្រុមជម្រើសជាតិកូឡុំប៊ីបានធ្លាក់ចេញពីព្រឹត្តិការណ៍ FIFA World Cup 2018 ក្រោយពីចាញ់ក្រោមថ្វីជើងក្រុមតោកំណាចអង់គ្លេសនៅវគ្គ១៦ក្រុមចុងក្រោយ ដោយសារការទាត់បាល់កាត់សេចក្តី១១ម៉ែត្រ។ក្នុងការប្រកួត៩០នាទី Harry Kane ជាអ្នកទាត់បញ្ចូលទីនាំមុខឲ្យក្រុមតោកំណាច មុន Yerri Mina តាមស្មើនៅចុងម៉ោងនៃវគ្គទី២ ហើយលទ្ធផលនេះក៏បន្តរហូតដល់ចប់ម៉ោងបន្ថែម។ទោះជាយ៉ាងណាក្តី Yerry Mina ក៏បានបង្កើតកំណត់ត្រាមួយផងដែរ ដោយក្លាយទៅជាខ្សែការពារដំបូងគេបង្អស់ក្នុងរយៈពេល៥២ឆ្នាំ ដែលតែតបញ្ចូលទីបាន៣គ្រាប់ក្នុងព្រឹត្តិការណ៍ World Cup។បន្ថែមពីលើនេះ ខ្សែការពារវ័យ២៣ឆ្នាំក៏បានក្លាយទៅជាកីឡាករទីពីរបស់ក្រុមជម្រើសជាតិកូឡុំប៊ីដែលអាចរកគ្រាប់បាល់បញ្ចូលទីគូប្រកួតបានបីប្រកួតជាប់ៗគ្នា ដោយខ្សែបម្រើ James Rodriguez គឺជាកីឡាករដំបូងគេបង្អស់ដែលបង្កើតប្រវត្តិសាស្ត្រនេះឡើងនៅព្រឹត្តិការណ៍ FIFA World Cup 2014៕
Toni Kroos អាចចូលនិវត្តន៍ពីក្រុមជម្រើសជាតិអាល្លឺម៉ង់ ក្រោយធ្លាក់ចេញពីព្រឹត្តិការណ៍ FIFA World Cup
ខ្សែបម្រើ Toni Kroos កំពុងតែពិចារណាចូលនិវត្តន៍ពីក្រុមជម្រើសជាតិអាល្លឺម៉ង់ ក្រោយពីក្រុមការពារជើងឯកបានធ្លាក់ចេញពីព្រឹត្តិការណ៍ FIFA World Cup 2018 ត្រឹមវគ្គចែកពូល។សមាជិករបស់ Real Madrid ត្រូវបានគេរាយការណ៍មកថា បានប្រាប់ទៅកាន់មិត្តភក្តិខ្លួនថា ខ្លួនអាចនឹងចូលនិវត្តន៍ពីជម្រើសជាតិ ដោយសារតែមិនអាចទ្រាំទ្រនឹងការរិះគន់ពីសំណាក់ជនរួមជាតិអំពីបរាជ័យរបស់ក្រុមនៅប្រទេសរុស្ស៊ី។ កីឡាករវ័យ២៨ឆ្នាំ នៅតែសោកសៅក្រោយធ្លាក់ចេញពីព្រឹត្តិការណ៍ FIFA World Cup ហើយមិនតែប៉ុណ្ណោះការចាញ់ប្រកួតចុងក្រោយពេលប៉ះជាមួយកូរ៉េខាងត្បូងបានធ្វើឲ្យរូបគេកាន់តែពិចារណាអំពីអនាគតជាមួយជម្រើសជាតិម្តងហើយម្តងទៀត។គួររំលឹកថា ក្រុមឥន្រ្ទីដែកអាល្លឺម៉ង់បានជ្រុះចេញពីការប្រកួតពានរង្វាន់បាល់ទាត់ពិភពលោកឆ្នាំ២០១៨ ត្រឹមវគ្គចែកពូលក្នុងនាមជាក្រុមការពារជើងឯក ដោយឋិតនៅបាតតារាងក្រោយពីប្រកួតឈ្នះ១ និង ចាញ់២លើក។
Diego Maradona ថា សុខចិត្តដឹកនាំក្រុមជម្រើសជាតិអាហ្សង់ទីនម្តងទៀតដោយមិនយកលុយឡើយ
វីរបុរសបាល់ទាត់ Diego Maradona បាននិយាយកាលពីពេលថ្មីៗនេះថា លោកសុខចិត្តដឹកនាំក្រុមជម្រើសជាតិអាហ្សង់ទីនសារជាថ្មីម្តងទៀត ដោយមិនយកប្រាក់បៀរវត្ត៍ឡើយ។បុរសវ័យ៥៧ឆ្នាំបានបន្ថែមទៀតថា៖ " ជាការពិត! ខ្ញុំនឹងព្រមធ្វើដូច្នេះ។ ខ្ញុំនឹងដឹកនាំដោយមិនយកប្រាក់ឈ្នួលឡើយ ព្រោះខ្លួនគ្រាន់តែចង់ឃើញជម្រើសជាតិមានទម្រង់លេងល្អជាងនេះ។"ក្រុមរហស្សនាមពពកសបានជ្រុះចេញពីព្រឹត្តិការណ៍ FIFA World Cup 2018 ក្រោមថ្វីជើងរបស់ក្រុមមាន់គកបារាំងក្នុងលទ្ធផល៤ទល់នឹង២ ដែលជាហេតុធ្វើឲ្យតំណែងរបស់គ្រូបង្វឹក Jorge Sampaoli កំពុងតែមានសម្ពាធ ជាពិសេសគឺលើទម្រង់លេងរបស់ក្រុមទាំងមូលតែម្តង។គួរបញ្ជាក់ថា លោក Diego Maradona ក៏ធ្លាប់បានធ្វើជាគ្រូបង្វឹកក្រុមជម្រើសជាតិអាហ្សង់ទីនផងដែរ គឺពីឆ្នាំ២០០៨ ដល់ឆ្នាំ២០១០ ដោយលោកបានដឹកនាំក្រុមឲ្យឡើងបានដល់វគ្គ៨ក្រុមចុងក្រោយនៃ World Cup ឆ្នាំ២០១០ ប៉ុន្តែអាហ្សង់ទីនត្រូវបានធ្លាក់ចេញពីព្រឹត្តិការណ៍បាល់ទាត់ពិភពលោកនេះក្រោមដៃជម្រើសជាតិអាល្លឺម៉ង់៕
Kylian Mbappe៖ ខ្ញុំរំភើបដែលគ្រប់គ្នាប្រដូចខ្ញុំជាមួយ Pele ប៉ុន្តែគាត់ឋិតនៅកម្រិតមួយផ្សេងទៀត
ខ្សែប្រយុទ្ធវ័យក្មេង Kylian Mbappe បានរួមចំណែកដឹកនាំក្រុមបាល់ទាត់ជម្រើសជាតិបារាំងទៅកាន់វគ្គ៨ក្រុមចុងក្រោយ FIFA World Cup ក្រោយបង្ហាញសមត្ថភាពយ៉ាងអស្ចារ្យទម្លាក់អាហ្សង់ទីនរបស់ Lionel Messi។ជំហរ និង ជំនាញរបស់សមាជិកក្លិប Paris Saint Germain បានដាក់សម្ពាធទៅលើខ្សែការពារអាហ្សង់ទីន ដោយហេតុនេះហើយបានជាមតិមួយចំនួនបានប្រដូចរូបគេទៅនឹងស្ដេចបាល់ទាត់ប្រេស៊ីល លោក Pele។អតីតយុវជនក្លិប AS Monaco លើកឡើងបែបនេះ ៖"ខ្ញុំពិតជាសប្បាយចិត្តចំពោះការប្រៀបផ្ទឹមនេះ តែគាត់ស្ថិតនៅកម្រិតខ្ពស់មួយផ្សេងទៀតពីខ្ញុំ តែខ្ញុំរីករាយដែលអាចឈានទៅកាន់ចំណោមនេះបាន"។
អង់គ្លេសទើបឈ្នះការទាត់ប៉េណាល់ទីជាលើកទី២ទេ បើគិតពីតាំងពីឆ្នាំ១៩៩៦មក
ក្រុមបាល់ទាត់ជម្រើសជាតិអង់គ្លេស បានទម្លាក់កូឡុំប៊ី នៅវគ្គ១៦ក្រុមចុងក្រោយ FIFA World Cup 2018 តាមរយៈបាល់កាត់សេចក្ដី១១ម៉ែត្រ ក្រោយស្មើគ្នា១ទល់នឹង១ នៅថ្ងៃអង្គារ ទី០៣ មិថុនា។នេះគឺជាការឈ្នះដោយបាល់ប៉េណាល់ទីសម្រាប់អង់គ្លេសេ ជាលើកទីចាប់តាំងពីឆ្នាំ១៩៩៦មក ដោយនៅក្នុងព្រឹត្តិការណ៍ Euro 1996 ដោយអង់គ្លេសឡើងទៅដល់វគ្គពាក់កណ្តាលផ្តាច់ព្រ័ត។គួររំលឹកថា ក្នុងការប្រកួត៩០នាទី Harry Kane ជាអ្នកទាត់បញ្ចូលទីនាំមុខឲ្យក្រុមតោកំណាច មុន Yerri Mina តាមស្មើនៅចុងម៉ោងនៃវគ្គទី២ ហើយលទ្ធផលនេះក៏បន្តរហូតដល់ចប់ម៉ោងបន្ថែម។Eric Dier ជាអ្នកទាត់គ្រាប់ជ័យជម្នះ១១ម៉ែត្រ ក្រោយ Jordan Picford សង្គ្រោះបាល់ទាត់ដោយ Carlos Bacca។ ជ័យជម្នះនេះ ធ្វើឲ្យក្រុមលោក Gareth Southgate ប៉ះស៊ុយអែត នៅថ្ងៃសៅរ៍ ទី០៧ មិថុនា។
