trollkhmer news

សង្គមនិងជីវិត

ចិនចង់បង្កើនចំនួនជើងហោះហើរទៅអាមេរិក តែអាមេរិកបដិសេធ ដោយបញ្ជាក់មូលហេតុមួយចំនួន

ថ្ងៃទី ២០ ខែ មិថុនា ឆ្នាំ ២០២០ ម៉ោង ១០:៣៤

(វ៉ាស៊ីនតោន)៖ សហរដ្ឋអាមេរិកនៅថ្ងៃសុក្រសប្តាហ៍នេះ (ពេលវេលានៅវ៉ាស៊ីនតោន) បានច្រានចោលសំណើរបស់ក្រុមហ៊ុនអាកាសចរណ៍ចិន ដែលចង់បន្ថែមជើងហោះហើរប្រចាំសប្តាហ៍​រវាងប្រទេសទាំងពីរបន្ថែមទៀត។ ទោះជាយ៉ាងណា ទីក្រុងវ៉ាស៊ីនតោនបានបញ្ជាក់ថា សម្រេចចិត្តនេះមិនមែនមានន័យថា អាមេរិកចង់បង្កើនភាពតានតឹង​ជុំវិញការរឹតត្បិតការធ្វើដំណើរ ដែលមានស្រាប់រវាងប្រទេសទាំងពីរនោះទេ។ នេះបើយោងតាមការចេញផ្សាយ​ដោយសារព័ត៌មាន CNA នាព្រឹកថ្ងៃសៅរ៍ ទី២០ ខែមិថុនា ឆ្នាំ២០២០។នៅក្នុងសេចក្តីថ្លែងការណ៍មួយ ក្រសួងដឹកជញ្ជូនអាមេរិកបាននិយាយថា ការសម្រេចចិត្តត្រូវបានធ្វើឡើងដើម្បី «រក្សាភាពស្មើភាពគ្នា» នៅក្នុងសេវាកម្មដឹកអ្នកដំណើររវាងប្រទេសទាំងពីរ ដោយបានគូសបញ្ជាក់ថា សហរដ្ឋអាមេរិកគឺមានឆន្ទៈជានិច្ច ក្នុងការពិនិត្យឡើងវិញនូវការសម្រេចចិត្តនេះ ប្រសិនបើអាជ្ញាធរអាកាសចរណ៍ចិន ព្រមកែតម្រូវគោលនយោបាយរបស់ខ្លួនមួយចំនួន ដែលធ្វើឲ្យប៉ះពាល់ដល់ក្រុមហ៊ុនដឹកជញ្ជូនអាមេរិក។ជាមួយគ្នានោះ ក្រសួងដឹកជញ្ជូនអាមេរិកបានសង្កត់ធ្ងន់ទៀតថា «ការសម្រេចចិត្តបែបនេះ គឺជាកិច្ចការផ្នែកនីតិវិធីសុទ្ធសាធ ដូច្នេះវាមិនគួរត្រូវបានចាត់ទុកថា ជាការបង្កើនភាពតានតឹង​បន្ថែមរវាងប្រទេសទាំងពីរនោះទេ»។គួរជម្រាបថា កាលពីដើមសប្តាហ៍នេះ សហរដ្ឋអាមេរិក និងប្រទេសចិនបានប្រកាសថា ពួកគេបានអនុញ្ញាតឲ្យមានជើងហោះហើររវាងប្រទេសទាំងពីរចំនួន ៤លើកក្នុងមួយសប្តាហ៍។ ក្នុងចំណោមក្រុមហ៊ុនអាកាសចរណ៍អាមេរិក ដូចជាក្រុមហ៊ុន Delta Air Line និង United Airlines បានព្យាយាមបើកដំណើរការ ជើងរហោះហើរដឹកអ្នកដំណើរជារៀងរាល់ថ្ងៃ​ទៅកាន់ប្រទេសចិន នៅក្នុងខែមិថុនានេះតែម្តង ប៉ុន្តែផែនការរបស់ពួកគេនេះបានផ្លាស់ប្តូរវិញ ដោយសារតែគ្មានការយល់ព្រមពីរដ្ឋាភិបាល៕

ប្រេស៊ីល ក្លាយជាប្រទេសទី ២ ដែលមានអ្នកឆ្លង COVID-19 ជាង ១ លានករណី

ថ្ងៃទី ២០ ខែ មិថុនា ឆ្នាំ ២០២០ ម៉ោង ០៩:១១

ប្រេស៊ីល បានក្លាយជាប្រទេសទី ២ នៅលើពិភពលោកដែលមានអ្នកឆ្លង COVID-19 ជាង ១ លានករណីដែលនៅតែបន្តរីករាលដាល។ក្រសួងសុខាភិបាលក៏បានប្រកាសនូវចំនួនករណីថ្មីក្នុងរយៈពេល ២៤ ម៉ោងកន្លងមកដែលមានចំនួនជាង ៥៤.០០០ នាក់។គួរបញ្ជាក់ផងដែរថា ប្រេស៊ីលមានអ្នកស្លាប់ជាង ១.២០០ នាក់សម្រាប់ថ្ងៃទី ៤ ជាប់គ្នាដែលសរុបទៅជិត ៤៩.០០០ នាក់៕

បើករថយន្ដឆ្លងផ្លូវរថភ្លើងមិនផុត ត្រូវរថភ្លើងបុកអូសជាង១០០ម៉ែត្រ សំណាងមិនមានអ្នករងរបួស

ថ្ងៃទី ១៩ ខែ មិថុនា ឆ្នាំ ២០២០ ម៉ោង ១៦:៣២

(កណ្ដាល)៖ វីដេអូឃ្លីបមួយបានចែកចាយពេញបណ្ដាញសង្គម Facebook ដោយរថយន្ដមួយគ្រឿង បើកឆ្លងកាត់ផ្លូវរថភ្លើង តែមិនផុតត្រូវរថភ្លើងបុកចំ ផ្នែកខាងក្រោយពេញទំហឹង អូសជាង១០០ម៉ែត្រ ប៉ុន្ដែសំណាងល្អមិនមានអ្នកណារងគ្រោះថ្នាក់នោះទេ។ហេតុការណ៍នេះ បានកើតឡើងនៅរសៀលថ្ងៃទី១៩ ខែមិថុនា ឆ្នាំ២០២០នេះ ស្ថិតក្នុងភូមិត្រពាំងត្នោត ឃុំម្កាក់ ស្រុកអង្គស្នួល ខេត្តកណ្ដាល។ តាមរយៈវីដេអូនេះ បានបង្ហាញថា រថយន្ដនៅខាងមុខបានឈប់ដើម្បីឲ្យរថភ្លើងមួយខ្សែឆ្លងកាត់ បន្ទាប់រថយន្ដមួយគ្រឿង ម៉ាក Ford Ranger ពណ៌ទឹកប្រាក់ ពាក់ផ្លាកលេខភ្នំពេញ 2AC-2252 មិនបានឈប់នោះទេ ដោយព្យាយាមបើកទៅមុខឲ្យផុត ដើម្បីបានទៅមុនរថភ្លើង ប៉ុន្ដែមិនបានសម្រេចក៏ត្រូវរថភ្លើង បើកចំផ្នែកខាងក្រោយពេញទំហឹងតែម្ដង។ក្រោយបុកអូសជាង១០០ម៉ែត្រ រថយន្ដបានធ្លាក់ទៅម្ខាងទៀតនៃកំណាត់ផ្លូវដែក ដោយរងការខូចខាតពេញទំហឹងផ្នែកខាងក្រោយ ប៉ុន្ដែសំណាងល្អខ្លាំងណាស់ ដោយក្នុងរថយន្ដនោះ មិនបណ្ដាលឲ្យនរណាម្នាក់រងគ្រោះថ្នាក់នោះទេ។ ហេតុការណ៍គ្រោះថ្នាក់នេះ បានផ្ដល់ជាបទពិសោធន៍បន្ថែម ដល់អ្នកបើកបរដែលបើកឆ្លងកាត់ផ្លូវរថភ្លើងទាំងអស់ ត្រូវឈប់ដើម្បីផ្ដល់សិទ្ធិឲ្យរថភ្លើងបានធ្វើដំណើរទៅមុន ព្រោះថារថភ្លើងមិនអាចជាន់ហ្វ្រាំងឈប់ភ្លាមៗដូចរថយន្ដនោះទេ៕

ចិនរកឃើញអ្នកឆ្លង COVID-19 ថ្មីៗ​៣២នាក់ទៀតនៅក្នុងរបាយការណ៍ថ្ងៃនេះ

ថ្ងៃទី ១៩ ខែ មិថុនា ឆ្នាំ ២០២០ ម៉ោង ១៤:០០

(ប៉េកាំង)៖ នៅក្នុងរបាយការណ៍ស្តីអំពីស្ថានការណ៍ COVID-19 សម្រាប់ថ្ងៃសុក្រ ទី១៩ ខែមិថុនា ឆ្នាំ២០២០នេះ អាជ្ញាធរសុខាភិបាលចិនបានគូសបញ្ជាក់ថា នៅក្នុងរយៈពេលពេញមួយថ្ងៃព្រហស្បតិ៍ម្សិលមិញ ខ្លួនបានកត់ត្រាករណីឆ្លងថ្មីៗនៃជំងឺ COVID-19 ចំនួន ៣២ករណីបន្ថែមទៀត ដោយក្នុងនោះមាន ២៨ករណីជាប្រភេទករណីឆ្លងក្នុងស្រុក និង ០៤ករណីទៀតជាករណីនាំចូលពីបរទេស។ នេះបើយោងតាម ការចុះផ្សាយដោយ ទីភ្នាក់ងារសារព័ត៌មានស៊ីនហួរ។បើតាមការបញ្ជាក់ពីគណៈកម្មការសុខភាពជាតិចិនបានឲ្យដឹងថា ក្នុងចំណោមប្រភេទករណីឆ្លងក្នុងស្រុកទាំង ២៨ករណីខាងលើនេះ រដ្ឋធានីប៉េកាំងបានរ៉ាប់រ៉ងចំនួន ២៥ករណីតែឯង។ ចំណែកឯ ០៣ករណីគឺមានខេត្តហ៊ូប៉ី (Hebei) ចំនួន ០២ករណី និងខេត្តឡៅនីង (Liaoning) ០១ករណី។ នៅក្នុងរបាយការណ៍តែមួយនេះ អាជ្ញាធរសុខាភិបាលចិនបានបញ្ជាក់ទៀតថា ខ្លួនក៏បានរកឃើញអ្នកជាសះស្បើយឡើងវិញពីជំងឺ COVID-19 ចំនួន ០៤នាក់បន្ថែមទៀតផងដែរ ដែលនាំឲ្យចំនួនអ្នកជាសះស្បើយសរុប នៅទូទាំងប្រទេសចិនកើនដល់ ៧៨,៣៩៨នាក់។ គិតត្រឹមពេលនេះចិនមានករណីឆ្លង COVID-19 សុរប ៨៣,៣២៥ករណី ខណៈតួលេខនៃអ្នកស្លាប់គឺនៅរក្សាបានត្រឹម ៤,៦៣៤នាក់ដដែល។គួរបញ្ជាក់ថា គិតត្រឹមថ្ងៃព្រហស្បតិ៍ម្សិលមិញនេះ នៅក្នុងទីក្រុងប៉េកាំងបានរាយការណ៍ពីករណីឆ្លងសរុបចំនួន ៦០៣នាក់ហើយ ដោយក្នុងនោះអ្នកជំងឺ ៤១១នាក់បានជាសះស្បើយឡើងវិញ និង ០៩នាក់ស្លាប់បាត់បង់ជីវិត។ ចំណែកឯករណីប្រភេទនាំចូលពីបរទេសវិញ រហូតមកទល់ពេលនេះប៉េកាំងបានកត់ត្រាចំនួន ១៧៤នាក់ព្យាបាលជាសះស្បើយទាំងអស់ លើកលែងតែម្នាក់ប៉ុណ្ណោះ ដែលកំពុងស្ថិតក្នុងដំណាក់កាលព្យាបាលនៅឡើយ ខណៈករណីស្លាប់វិញ គឺមិនមានឡើយសូម្បីតែម្នាក់៕

ប្រេស៊ីលមានមនុស្សស្លាប់ដោយសារ COVID-19 រហូតដល់ជាង​១,០០០នាក់ក្នុងមួយថ្ងៃ

ថ្ងៃទី ១៩ ខែ មិថុនា ឆ្នាំ ២០២០ ម៉ោង ១៣:០៩

(រីយ៉ូ)៖ ប្រទេសប្រេស៊ីលបានជួបប្រទះអត្រាស្លាប់ដោយសារ COVID-19 ជាង​១,០០០នាក់ក្នុងមួយថ្ងៃ អស់រយៈពេល​០៣ថ្ងៃជាប់ៗគ្នាមកហើយ ដែលវាជាអត្រាស្លាប់គួរឲ្យព្រួយបារម្ភបំផុត នៅក្នុងប្រទេសដែលមានប្រជាជន ២១០លាននាក់មួយនេះ។ នេះបើតាមការចេញផ្សាយ ដោយទីភ្នាក់ងារព័ត៌មានចិនស៊ីនហួរ នារសៀលថ្ងៃសុក្រ ទី១៩ ខែមិថុនា ឆ្នាំ២០២០។អាជ្ញាធរសុខាភិបាលប្រេស៊ីលបានរាយការណ៍ថា មនុស្សស្លាប់ចំនួន ១,២៣៨នាក់​ និងអ្នកឆ្លង COVID-19 ថ្មីៗ ២២,៧៦៥នាក់​ត្រូវបានកត់ត្រាក្នុងរយៈពេល ២៤ម៉ោងមុន ដែលធ្វើឲ្យអ្នកស្លាប់សរុប​ក្នុងប្រទេសអាមេរិកឡាទីនមួយនេះកើនដល់ ៤៧,៧៤៨នាក់ ក្នុងចំណោមករណីឆ្លងសរុប ៩៧៨,១៤២ករណី ជាមួយនឹងអត្រាមរណប្រមាណ ៤.៩ភាគរយ។គួរបញ្ជាក់ថា រដ្ឋសៅប៉ូឡូនៅតែជាតំបន់​ដែលមានការចម្លងខ្លាំងបំផុតនៅប្រេស៊ីល ជាមួយនិងករណីឆ្លង ១៩២,៦២៨ករណី ក្នុងនោះមានអ្នកស្លាប់ ១១,៨៤៦នាក់ ហើយទីក្រុងរឺយ៉ូវិញគឺតាមពីក្រោយដោយមានករណីឆ្លង ៨៧,៣១៧ករណី ក្នុងនោះស្លាប់ ៨,៤១៤នាក់។ ប្រេស៊ីលបច្ចុប្បន្នឈរនៅលេខ ១ ប្រចាំតំបន់អាមេរិកឡាទីន និងលេខ ២ លើពិភពលោកបន្ទាប់ពីសហរដ្ឋអាមេរិក ជាប្រទេសមានករណីឆ្លង COVID-19 ច្រើនជាងគេបំផុត៕

ទាហានឥណ្ឌា ១០ នាក់ត្រូវបានដោះលែង ដោយប្រទេសចិន ក្រោយផ្ទុះជម្លោះព្រំដែន

ថ្ងៃទី ១៩ ខែ មិថុនា ឆ្នាំ ២០២០ ម៉ោង ១០:៣៥

ប្រទេសចិនបានដោះលែងកងទ័ពឥណ្ឌា ១០នាក់់ដែលត្រូវបានចាប់ខ្លួនអំឡុងការផ្ទុះអាវុធដាក់គ្នា នៅឯតំបន់ព្រំដែនជម្លោះរវាងប្រទេសទាំង ២ នៃតំបន់ជួរភ្នំហិម៉ាល័យ (Himalayas) ដែលបណ្ដាលឱ្យកងទ័ពឥណ្ឌាយ៉ាងហោច ២០នាក់បានស្លាប់។ បើតាមទីភ្នាក់ងារព័ត៌មានឥណ្ឌា Press Trust of India កងទ័ពឥណ្ឌា ១០នាក់ត្រូវបានដោះលែង​កាលពីថ្ងៃព្រហស្បតិ័ម្សិលមិញ ហើយការដោះលែងនេះទៀតសោត ធ្វើឡើងបន្ទាប់ពីមានកិច្ចប្រជុំ​ដើម្បីបន្ធូរបន្ថយភាពតានតឹងជាបន្តបន្ទាប់ រវាងមន្ត្រីជាន់ខ្ពស់ចិន និងឥណ្ឌា។ រដ្ឋាភិបាលទីក្រុងញូដេលី មិនបានទទួលស្គាល់សេចក្ដីរាយការណ៍នេះទេ ប៉ុន្តែខាងកងទ័ពឥណ្ឌាបានចេញសេចក្ដីថ្លែងការណ៍មួយ ដោយនិយាយថា គ្មានកងទ័ពឥណ្ឌាណាម្នាក់បាត់ខ្លួន នៅក្នុងជម្លោះជាមួយចិន​នៅឯតំបន់ជ្រលងភ្នំហ្គាល់វ៉ាន (Galwan Valley) ក្នុងតំបន់ជម្លោះ អាកសៃ ជីនឡាដាក (Aksai Chin-Ladakh) កាលពីយប់ថ្ងៃចន្ទដើមសប្ដាហ៍កន្លងទៅឡើយ។គួរបញ្ជាក់ថា បើតាមភាគីឥណ្ឌា កងទ័ពរបស់ខ្លួនយ៉ាងហោច ២០នាក់បានស្លាប់ និង ១៨នាក់ទៀតកំពុងសម្រាកព្យាបាលនៅមន្ទីរពេទ្យ ដោយរងរបួសធ្ងន់។ ចំណែកឯចិនវិញក៏បានទទួលស្គាល់ថា កងទ័ពរបស់ខ្លួនមានអ្នកស្លាប់ និងរបួសផងផងដែរ ប៉ុន្តែមិនបានបញ្ចេញតួលេខលម្អិតឡើយ៕

ចំនួនអ្នកឆ្លង COVID-19 លើពិភពលោកកើនដល់ជាង ៨.៥លាននាក់ ស្លាប់ជិត ៤៦ម៉ឺននាក់ និងជាសះស្បើយជាង ៤.៥លាននាក់

ថ្ងៃទី ១៩ ខែ មិថុនា ឆ្នាំ ២០២០ ម៉ោង ០៨:៥៤

(បរទេស)៖ គិតត្រឹមម៉ោង ៧ព្រឹកថ្ងៃសុក្រ ទី១៩ ខែមិថុនា ឆ្នាំ២០២០នេះ ចំនួនអ្នកឆ្លងជំងឺ COVID-19 នៅទូទាំងពិភពលោក បានកើនឡើងដល់ ៨,៥៦៧,២៨០នាក់ហើយ។ ក្នុងនោះអ្នកស្លាប់មានចំនួន ៤៥៥,៥៥៨នាក់ និងជាសះស្បើយឡើងវិញ ៤,៥០៨,២៣០នាក់។យោងតាមទិន្នន័យពីគេហទំព័រអន្តរជាតិ Worldometer បានបង្ហាញថា ការរីករាលដាលនៃជំងឺកូវីដ១៩ នៅតែមានសភាពស្រួចស្រាវចំនួនអ្នកឆ្លង និងស្លាប់ថ្មីនៅតែមានចំនួនច្រើន។សហរដ្ឋអាមេរិក នៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ។ សហរដ្ឋអាមេរិក មានអ្នកឆ្លងជំងឺ COVID-19 ចំនួន ២,២៦២,៦០២នាក់ ស្លាប់ចំនួន ១២០,៦៨៧នាក់ និងជាសះស្បើយចំនួន ៩២៩,៧៥៦នាក់។ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺកូវីដ១៩ គឺប្រទេសប្រេស៊ីល។ ប្រេស៊ីលមានអ្នកឆ្លង ៩៨៣,៣៥៩នាក់ ស្លាប់ចំនួន ៤៧,៨៦៩នាក់ និងជាសះស្បើយ ៥០៣,៥០៧នាក់។ប្រទេសឈរនៅចំណាត់ថ្នាក់ទី៣ គឺប្រទេសរុស្ស៉ី។ រុស្ស៉ី មានអ្នកឆ្លង ៥៦១,០៩១នាក់ ស្លាប់ ៧,៦៦០នាក់ និងជាសះស្បើយ ៣១៣,៩៦៣នាក់។ខាងក្រោមជាទិន្នន័យប្រទេសចំនួន២០ ដែលមានអ្នកឆ្លងជំងឺ COVID-19 ច្រើនជាងគេ៖

ប្រធានាធិបតីហុងឌូរ៉ាស ធ្វើតេស្ដ៍វិជ្ជមានចំពោះ COVID-19

ថ្ងៃទី ១៧ ខែ មិថុនា ឆ្នាំ ២០២០ ម៉ោង ១៤:៤៨

(ហុងឌូរ៉ាស)៖ ប្រធានាធិបតីហុងឌូរ៉ាសលោក ហ្ស័ន អូឡេនដូ ហឺណាន់ដែស ( Juan Orlando Hernandez) បានប្រកាសតាមកញ្ចក់ទូរទស្សន៍រដ្ឋដោយផ្ទាល់ នៅល្ងាចថ្ងៃអង្គារសប្តាហ៍នេះ (ពេលវេលានៅអាមេរិកកណ្តាល) ថា លោកបានឆ្លងជំងឺ COVID-19 ។ នៅក្នុងសេចក្តីថ្លែងការណ៍ដោយផ្ទាល់ទៅកាន់ប្រជាជាតិ ប្រធានាធិបតីហុងឌូរ៉ាសរូបនេះ ក៏បានបញ្ជាក់អំពីអការៈនៃជំងឺ COVID-19 របស់លោកផងដែរថា លោកមានរោគសញ្ញាស្រាកប៉ុណ្ណោះ និងកំពុងទទួលការព្យាបាលតាមក្បួនខ្នាតវេជ្ជសាស្ត្រ។ ជាធម្មតាអ្នកធ្លាប់ស្និទ្ធស្នាលជាមួយ ប្រធានាធិបតីវ័យ ៥១ឆ្នាំនេះទាំងអស់ ក្នុងរយៈពេល ១៤ថ្ងៃចុងក្រោយ នឹងតម្រូវឲ្យទៅធ្វើតេស្តរក COVID-19 រួចស្នាក់នៅដាច់ដោយឡែករយៈពេល ១៤ថ្ងៃ ដើម្បីតាមដានអការៈ។គួរបញ្ជាក់ថា ប្រទេសហុងឌូរ៉ាសដែលមានប្រជាជនសរុបជិត ១០លាននាក់ ត្រូវបានចាត់ចូលទៅក្នុងតំបន់អាមេរិកភាគខាងជើង ឬកណ្តាល ។ គិតត្រឹមថ្ងៃអង្គារសប្តាហ៍នេះ ហុងឌូរ៉ាសមានករណីឆ្លង COVID-19 សរុប ៩,៦៥៦ករណី ក្នុងនោះស្លាប់ ៣៣០នាក់ និងជាសះស្បើយវិញ ១,០៧៥នាក់៕

ប្រទេសប្រេស៊ីល រកឃើញអ្នកឆ្លងថ្មីជាង ៣៥.០០០ ករណីក្នុងរយៈពេល ២៤ ម៉ោង

ថ្ងៃទី ១៧ ខែ មិថុនា ឆ្នាំ ២០២០ ម៉ោង ១៣:៣០

ប្រទេសប្រេស៊ីលបានរាយការណ៍ថា មានករណីឆ្លងវីរុសថ្មីចំនួន ៣៤,៩១៨ ករណីដែលគួរឱ្យភ្ញាក់ផ្អើលកាលពីថ្ងៃអង្គារ ហើយនេះជាតួលេខប្រចាំថ្ងៃខ្ពស់បំផុត។វាកើតឡើងនៅថ្ងៃតែមួយដែលមន្ត្រីជាន់ខ្ពស់របស់ខ្លួនបាននិយាយថាស្ថានភាពស្ថិតក្រោមការគ្រប់គ្រង។ លោក Walter Braga Netto ប្រធានការិយាល័យរបស់ប្រធានាធិបតីបាននិយាយថា «យើងកំពុងមានវិបត្តិ យើងអាណិតអាសូរក្រុមគ្រួសារដែលបាត់បង់ជីវិត ប៉ុន្តែវាត្រូវបានគ្រប់គ្រង»។គួរបញ្ជាក់ផងដែរថា ប្រទេសប្រេស៊ីលមានចំនួនករណីខ្ពស់បំផុតទី ២ នៅលើពិភពលោក បន្ទាប់ពីសហរដ្ឋអាមេរិកដែលមានចំនួនជាង ៩២៣.០០០ ករណី៕