trollkhmer news

សង្គមនិងជីវិត

តុលាការចេញដីកាឃុំខ្លួន អធិការរងនគរបាលក្រុងបាវិត ក្រោយបាញ់ប្រហារស្រ្តីម្ចាស់ហាង «តន្រ្តីសំណាងដាណេ» បណ្តាលឲ្យស្លាប់

ថ្ងៃទី ២៣ ខែ ធ្នូ ឆ្នាំ ២០១៩ ម៉ោង ១០:៤៨

ស្វាយរៀង៖ សាលាដំបូងខេត្តស្វាយរៀង បានចេញដីកាបង្គាប់ឲ្យឃុំខ្លួនអធិការរងនគរបាលក្រុងបាវិត ដាក់ពន្ធនាគារជាបណ្តោះអាសន្ន ពាក់ព័ន្ធការប្រហារស្រ្តីម្ចាស់ហាង «តន្រ្តីសំណាងដាណេ» បណ្តាលឲ្យស្លាប់ នាំឲ្យកក្រើកពេញក្រុងបាវិត នារយៈពេលប៉ុន្មានថ្ងៃនេះកន្លងមកនេះ។ នេះបើតាមដីការបស់ចៅក្រមស៊ើបសួរសាលាដំបូងខេត្តស្វាយរៀង ដែលភ្នាក់ងារព័ត៌មាន Fresh News ទទួលបាននាព្រឹកថ្ងៃទី២៣ ខែធ្នូ ឆ្នាំ២០១៩នេះ។នៅក្នុងដីកាឃុំខ្លួនរបស់ចៅក្រម ឃុន ដាវី អធិការរងនគរបាលរូបនេះ ត្រូវបានតំណាងអយ្យការចោទប្រកាន់ពីបទ «ឃាតកម្ម និងកាន់កាប់អាវុធដោយគ្មានការអនុញ្ញាត»។ ម្ចាស់ហាង «តន្រ្តីសំណាងអាណេ» សឿន ស្រីណេ អាយុ ៣៨ឆ្នាំ ជាស្រ្តីមេម៉ាយកូនស្រីម្នាក់ មានស្រុកកំណើតភូមិក្រាំងអាត ឃុំកំពង់សិលា ស្រុកកំពង់សិលា ខេត្តព្រះសីហនុ ប៉ុន្តែនាងបានទៅបើកហាងរកស៊ី នៅក្រុងបាវិតនាប៉ុន្មានឆ្នាំមកហើយ។ ដោយសារតែស្ថានភាពរបួសធ្ងន់ធ្ងរពេក នៅវេលាថ្ងៃត្រង់ថ្ងៃទី២១ ខែធ្នូ ឆ្នាំ២០១៩ ស្ដ្រីរងគ្រោះបាន ស្លាប់បាត់បង់ជីវិតនៅមន្ទីរពេទ្យប្រទេសវៀតណាម។ស្រ្តីរងគ្រោះត្រូវបានអធិការរងនគរបាលក្រុងបាវិត កែវ ចិត្រា បានបាញ់ប្រហារបណ្តាលឲ្យស្លាប់ក្រោយរបួសធ្ងន់ពេក។ ជនដៃដល់ជាកូនប្រុសរបស់អធិការនគរបាលក្រុងបាវិត កែវ គង់ ដែលទើបឡើងតួនាទីក្នុងរយៈពេលមួយសប្តាហ៍នេះទេ។ អធិការរងក្រុងបាវិតឈ្មោះ កែវ ចិត្រា អាយុជិត ៣០ឆ្នាំ ដែលជាកូនប្រុសបង្កើតអធិការនគរបាលក្រុងបាវិត លោក កែវ គង់ បានដកកាំភ្លើងបាញ់ចំនួន ២គ្រាប់ ដោយមួយគ្រាប់បាញ់ឡើងលើ និងមួយគ្រាប់ទៀតបាញ់ចំស្ត្រីជាម្ចាស់ហាង។ ករណីនេះបានកើតឡើងនៅក្នុង ហាងភោជនីយដ្ឋាន តន្ត្រីសំណាងអាណេ ក្នុងភូមិតាពៅ សង្កាត់បាវិត ក្រុងបាវិត ខេត្តស្វាយរៀង។បើតាមបុគ្គលិកបម្រើការងារហាងតន្ត្រីសំណាងដាណេ បានឲ្យដឹងថា នៅមុនពេលកើតហេតុមានបុរសម្នាក់ បានចូលមកក្នុងហាងនៅកញ្ចុះលេខ៦៦៦៦ ហើយកម្ម៉ង់មីស្រុះមួយចាន បន្ទាប់មកទៀតបានប្រាប់បុគ្គលិក ឲ្យហៅម្ចាស់ហាងមកជួបស្រាប់ តែបុរសនោះបានដកកាំភ្លើងបាញ់ឡើងលើមួយគ្រាប់ និងមួយគ្រាប់ទៀតបាញ់តម្រង់ក្បាលស្ត្រីរងគ្រោះតែម្តង បណ្តាលឲ្យរងរបួសធ្ងន់ ត្រូវបានសាច់ញាតិ និងភ្ញៀវជួយលើកជនរងគ្រោះ ទៅសង្គ្រោះបន្ទាន់នៅប្រទេសវៀតណាម។ បន្ទាប់ពីធ្វើសកម្មភាពបាញ់ប្រហាររួច បុរសដែលឃាតក បានដើរចេញពីហាងគេចខ្លួនបាត់ តែត្រូវបានឃាត់ខ្លួននៅពេលបន្ទាប់មក។លោកឧត្តមសេនីយ៍ស្នងការបានបញ្ជាក់ថា មូលហេតុដែលនាំឲ្យមានការបាញ់ប្រហារនេះ ដោយសារជនដៃដល់ខឹងម្ចាស់ហាងយកម្ហូបមកយឺតពេក។ ក្រោយការបាញ់ប្រហារជនដៃដល់ កែវ ចិត្រា ត្រូវបានសមត្ថកិច្ចឃាត់ខ្លួនភ្លាមៗ។ អធិការរងនគរបាលរូបនេះ ត្រូវបានគេរាយការណ៍ថា ទើបតែត្រូវបានប្រកាសឲ្យចូលកាន់តំណែងតែប៉ុន្មានថ្ងៃមកនេះទេ។ នៅអធិការដ្ឋាននគរបាលក្រុងបាវិត ក៏ត្រូវបានសមត្ថកិច្ចមូលដ្ឋានមួយចំនួន លួចបង្ហើបថា ម្នាក់ៗមិនពេញចិត្តនឹងការដឹកនាំរបស់អធិការក្រុង កែវ គង់ នោះឡើយ ប៉ុន្តែមិនហ៊ានប្តឹងមកថ្នាក់លើចេះតែទ្រាំទៅ។ជនសង្ស័យនេះ ត្រូវបានអ្នកក្រុងបាវិតមួយចំនួន ស្គាល់ថា ជាមនុស្សមានចរឹកមិនល្អ និងធ្លាប់ជាក្មេងទំនើង ស្រាប់តែមានសំណាងបានធ្វើជាអធិការរងនគរបាលក្រុង ក្រោមការជួយជ្រោមជ្រែងពីឪពុក របស់ខ្លួន៕

លោកត្រាំនឹងត្រូវថ្លែងសុន្ទរកថាប្រចាំឆ្នាំទៅកាន់សភា ចំពេលលោកកំពុងត្រូវបានចោទប្រកាន់

ថ្ងៃទី ២១ ខែ ធ្នូ ឆ្នាំ ២០១៩ ម៉ោង ១១:៥៣

អាមេរិក៖ អ្នកប្រជាធិបតេយ្យកំពូលនៅក្នុងសភាអាមេរិក គឺលោក Nancy Pelosi បានសរសេរលិខិតទៅកាន់លោកដូណាល់ត្រាំ ដើម្បីអញ្ជើញលោកឲ្យថ្លែងសុន្ទរកថារដ្ឋសហភាពរបស់លោកនៅថ្ងៃទី៤ ខែកុម្ភៈ ចំពេលប្រធានាធិបតីរូបនេះកំពុងមានការចោទប្រកាន់។សុន្ទរកថាប្រចាំឆ្នាំនឹងត្រូវធ្វើឡើងក្នុងកំឡុងពេល ឬឆាប់ៗ បន្ទាប់ពីការកាត់ក្តីរបស់លោកត្រាំ នៅក្នុងព្រឹទ្ធសភាជាទីដែលលោកទំនងជាត្រូវបានលើកលែងការចោទប្រកាន់។ លោកត្រូវបានចោទប្រកាន់ជាផ្លូវការដោយសភាតំណាងរាស្ត្រកាលពីថ្ងៃពុធពីបទរំលោភអំណាច  និងរារាំងការការស៊ើបអង្កេតរបស់សភា។ប្រធានសភាលោក Pelosi បានប្រាប់សារព័ត៌មាន Associated Press ថា លោកនឹងត្រូវគេចោទប្រកាន់ជារៀងរហូតមិនថាព្រឹទ្ធសភាធ្វើអ្វីក៏ដោយ។ ការបោះឆ្នោតចោទប្រកាន់នេះ បានធ្វើឡើង កាលពី ២ថ្ងៃមុននៅក្នុងសភាដែលមានសមាជិកភាគច្រើនជាគណបក្សប្រជាធិបតេយ្យ។ក្រុមអ្នកប្រជាធិបតេយ្យ និងសាធារណរដ្ឋនៅតែមិនទាន់ឯកភាពគ្នាថាតើការកាត់ក្តីព្រឹទ្ធសភានាពេលខាងមុខនឹងប្រព្រឹត្តទៅនៅពេលណានៅឡើយទេ៕

រថយន្តដឹកស៉ីម៉ង់ត៍ រេចង្កូតបុករថយន្តសាំយ៉ុងពេញទំហឹង បណ្តាលឲ្យស្លាប់ ២នាក់ និងរបួស៥នាក់

ថ្ងៃទី ២១ ខែ ធ្នូ ឆ្នាំ ២០១៩ ម៉ោង ១០:៤៩

កំពង់ឆ្នាំង៖ មនុស្ស២នាក់បានស្លាប់ និង ៥នាក់ផ្សេងទៀត បានរងរបួសធ្ងន់-ស្រាល ក្នុងហេតុការគ្រោះថ្នាក់ចរាចរណ៍មួយ ដែលបង្កឡើងរវាងរថយន្ត និងរថយន្ត។ ហេតុការណ៍នេះ បានកើតឡើងកាលពីវេលាម៉ោង ១០៖៣០នាទីយប់ ថ្ងៃទី២០ ខែធ្នូ ឆ្នាំ២០១៩ នៅលើកំណាត់ផ្លូវជាតិលេខ៥ ចន្លោះគីឡូម៉ែត្រលេខ១២០ និង១២១ ស្ថិតក្នុងភូមិអង្គ ឃុំពពេល ស្រុកបរិបូណ៌ ខេត្តកំពង់ឆ្នាំង។សមត្ថកិច្ចនគបាលចរាចរណ៍ស្រុកបរិបូរណ៍ ដែលចុះដល់កន្លែងកើតហេតុ បានឲ្យដឹងថា ករណីគ្រោះថ្នាក់ចរាចរណ៍នេះ កើតឡើងរវាងរថយន្តម៉ាកសាំយ៉ុង ដឹកអ្នកដំណើរ ពាក់ស្លាកលេខភ្នំពេញ 2AA 3073 និងរថយន្តម៉ាក SCANIA ដឹកស៊ីម៉ង់ត៍ ពាក់ស្លាកលេខខាងមុខ ភ្នំពេញ 3E9532 ស្លាកលេខខាងក្រោយ ភ្នំពេញ 4A7116 បើកបរក្នុងទិសដៅបញ្រ្ចាសទិសគ្នា។សមត្ថកិច្ចនគបាលចរាចរណ៍ បានបន្តថា លុះមកដល់ចំណុចកើតហេតុ បានបុកគ្នាពេញទំហឹង បណ្ដាលឱ្យស្លាប់មនុស្សប្រុសម្នាក់ភ្លាមៗនៅកន្លែងកើតហេតុ និងអ្នកបើកបររថយន្តសាំយ៉ុងម្នាក់ទៀត រងរបួសធ្ងន់បានដាច់ខ្យល់ស្លាប់។ រីឯអ្នករងរបួសទាំង ៥នាក់ កំពុងតែត្រូវបានសង្គ្រោះបន្ទាន់ នៅក្នុងមន្ទីរពេទ្យបង្អែកខេត្តកំពង់ឆ្នាំងផងដែរ។ក្នុងហេតុការណ៍គ្រោះថ្នាក់ខាងលើនេះ គឺរថយន្តក្រឡុកស៉ីម៉ង់ត៍បានរេចង្កូត ចូលមកចំណែកផ្លូវខាងស្កាំរបស់រថយន្តសាំយ៉ុង ខណៈដែលរថយន្តសាំយ៉ុងបើកគេចស្ទើតែធ្លាក់ផ្លូវទៅហើយនោះ។ក្រោយពេលកើតហេតុអ្នកបើកបររថយន្តក្រឡុកស៊ីម៉ង់ត៍ បង្កគ្រោះថ្នាក់បានរត់គេចខ្លួនបាត់ ដោយទុករថយន្តចោលនៅកន្លែងកើតហេតុ។ ដោយឡែក រថយន្តទាំង ២គ្រឿង ត្រូវបានសមត្ថកិច្ចយកទៅរក្សាទុកនៅអធិការរដ្ឋាននគរបាលស្រុកបរិបូរណ៌ រង់ចាំធ្វើការដោះស្រាយតាមនីតិវិធីនៅពេលក្រោយ៕

តុលាការខេត្តប៉ៃលិន ចេញដីកាបង្គាប់ឲ្យឃុំខ្លួនយុវជនម្នាក់ ដែលប្រើអំពើហិង្សាលើតារាចម្រៀង នាយចឺម

ថ្ងៃទី ២១ ខែ ធ្នូ ឆ្នាំ ២០១៩ ម៉ោង ០៩:៤៨

ប៉ៃលិន៖ យុវជនម្នាក់ដែលប្រើប្រាស់អំពើហិង្សាលើតារាចម្រៀងនាយចឺម ត្រូវបានតុលាការខេត្តប៉ៃលិន ចេញដីកាបង្គាប់ឲ្យឃុំខ្លួនដាក់ពន្ធនាគារ។ នេះបើតាមដីកាបង្គាប់ឲ្យឃុំខ្លួន របស់លោក តាន់ គឹមហៀក ចៅក្រមស៊ើបសួរ នៃសាលាដំបូងខេត្តប៉ៃលិន ដែលបណ្ដាញព័ត៌មាន Fresh News ទទួលបាននៅព្រឹកថ្ងៃទី២១ ខែធ្នូ ឆ្នាំ២០១៩។ជនត្រូវចោទ ង៉ែត លីទី ដែលត្រូវសម្រេចឲ្យឃុំខ្លួននេះ ត្រូវដាក់ក្រោមការពិនិត្យពីបទ «ហិង្សាដោយចេតនាមានស្ថានទម្ងន់ទោស និងធ្វើឲ្យខូចខាតដោយចេតនា» ប្រព្រឹត្តនៅចំណុចបុរីម្កុដពេជ្រ ភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិន កាលពីថ្ងៃទី១៨ ខែធ្នូ ឆ្នាំ២០១៩ តាមមាត្រា២១៨ និងមាត្រា៤១០ នៃក្រមព្រហ្មទណ្ឌ។គួរជម្រាបថា តារាចម្រៀងនាយចឺម ត្រូវបានយុវជនម្នាក់ប្រើប្រាស់អំពើហិង្សា បណ្ដាលឲ្យរងរបួសត្រូវក្បាល និងដងខ្លួន នៅខេត្តប៉ៃលិន ហើយត្រូវបានគេបង្ហោះចែកចាយវីដេអូពេញក្នុងបណ្ដាញសង្គម Facebook។ ខណៈមូលហេតុយ៉ាងណានោះ មិនទាន់មានសមត្ថកិច្ចណា បញ្ជាក់ឲ្យដឹងច្បាស់នៅឡើយទេ ប៉ុន្ដែព័ត៌មានដែលចែកចាយនោះ អះអាងថា ពាក់ព័ន្ធរឿងស្នេហាត្រីកោណ៕

កម្មវិធីរាត្រីសមោសរ ABC Lions of Fashion អបអរសាទរអ្នកច្នៃម៉ូដ និងអ្នកបង្ហាញម៉ូដដ៏លេចធ្លោនៅកម្ពុជា

ថ្ងៃទី ២០ ខែ ធ្នូ ឆ្នាំ ២០១៩ ម៉ោង ១៧:១០

វិស័យឧស្សាហកម្មម៉ូដនៅកម្ពុជា បានទទួលការលើកតម្កើង បន្ទាប់ពីអ្នកច្នៃម៉ូដ និងអ្នកបង្ហាញម៉ូដដែលបានទទួលជ័យលាភីនៃកម្មវិធី ABC Lions of Fashion បានគ្រងរាជ្យក្នុងកម្មវិធីរាត្រីសមោសរដ៏ល្បីល្បាញមួយនៅរាជធានីភ្នំពេញ។កាលពីថ្ងៃទី ៥ ខែធ្នូ ទស្សនិកជនលំដាប់ថ្នាក់ខ្ពស់បានជួបជុំគ្នានៅសាលកោះពេជ្រ ក្នុងកម្មវិធីរាត្រីសមោសរ ABC Lions of Fashion។ កម្មវិធីពោរពេញទៅដោយការកោតសរសើរបានឈានទៅដំណាក់កាលចុងក្រោយនៃបេសកម្មរបស់ស្រាបៀរ ABC Extra Stout ក្នុងការស្វែងរកអ្នកច្នៃម៉ូត និងអ្នកបង្ហាញម៉ូតវ័យក្មេងដ៏លេចធ្លោក្នុងប្រទេសនេះ ហើយមានកម្មវិធីប្រកាសឈ្មោះបេក្ខជនបេក្ខនារីជ័យលាភីប្រចាំកម្មវិធីប្រកួតប្រជែងអស្ចារ្យនេះ។ កម្មវិធីរាត្រីពោរពេញទៅដោយភាពរស់រវើក ភាពរីករាយ និងទាន់សម័យបានឃើញអ្នកនាង Leap Sreypov និងលោក Pov Sithan ឡើងឆាកទទួលពានដែលខ្លួនបានប៉ងប្រាថ្នាចង់បានជាយូរណាស់មកហើយ។ ទស្សនិជន លំដាប់ វីអាយភី បានទស្សនាកម្មវិធីដើរម៉ូដដ៏វិសេសវិសាល។ អ្នកបង្ហាញម៉ូដទាំងដប់រូប បានដើរបង្ហាញម៉ូតដោយបង្អួតសម្លៀកបំពាក់ និងគ្រឿងលម្អដែលបានច្នៃម៉ូដដោយអ្នកច្នៃម៉ូដជ័យលាភី។ ស្នាដៃច្នៃម៉ូដដ៏ស្រស់ស្អាត និងរចនាបថគួរឲ្យទាក់ទាញរបស់អ្នកច្នៃម៉ូតល្បីឈ្មោះក្នុងស្រុក និងក្រៅស្រុក ក៏បានត្រូវដាក់តាំងបង្ហាញពេញមួយរាត្រីកាលនោះ ដែលមានកម្មវិធីកម្សាន្តសប្បាយដែលមានការអញ្ជើញចូលរួមពីសំណាក់តារាល្បីបំផុតប្រចាំព្រះរាជាណាចក្រកម្ពុជា។ កម្មវិធី ABC’s Lions of Fashion បានបើកដំណើរការចាប់តាំងពីខែឧសភា ដែលជាកម្មវិធីដំបូងបង្អស់ ដែលពុំធ្លាប់មានពីមុនមកនៅក្នុងព្រះរាជាណាចក្រកម្ពុជា។ កម្មវិធីនេះរួមមានកម្មវិធីជាច្រើន ដែលរៀបចំឡើងក្នុងគោលបំណងលើកស្ទួយវិស័យឧស្សាហកម្មម៉ូដនៃព្រះរាជាណាចក្រកម្ពុជា តាមរយៈការផ្តល់វេទិកាមួយដែលលើកតម្កើងសហគ្រិនម៉ូដដែលមានទេពកោសល្យបញ្ចេញស្នាដៃដ៏ឆ្នើម។ បេក្ខជនបេក្ខនារីផ្នែកបង្ហាញម៉ូដចំនួន ១៣១៨ នាក់ និងបេក្ខជនបេក្ខនារីផ្នែកច្នៃម៉ូដចំនួន ១២៧ នាក់ បានដាក់ពាក្យចូលរួមប្រឡងក្នុងកម្មវិធីពិសេសនេះ ហើយត្រូវបានជម្រុះយកបេក្ខជនបេក្ខនារីផ្នែកបង្ហាញម៉ូដចំនួន ២២២ នាក់ និងបេក្ខជនបេក្ខនារីផ្នែកច្នៃម៉ូដចំនួន ៤០ នាក់។ គណៈកម្មាការវិនិច្ឆ័យមកពីទស្សនាវដ្តី សូវរីន ទីភ្នាក់ងារ Arise Agency វិទ្យាស្ថានបណ្ដុះបណ្ដាលវិស័យកាត់ដេរនៅកម្ពុជា (CGTI) និង ABC Extra Stout បានសម្រេចជ្រើសរើសយកបេក្ខជនបេក្ខនារីចុងក្រោយចំនួនដប់រូបតាមផ្នែកជំនាញនីមួយៗខាងលើ។ បេក្ខជនបេក្ខនារីផ្នែកបង្ហាញម៉ូដត្រូវបានល្បងសមត្ថភាពច្នៃម៉ូដបីសម្រាប់អ្នកបង្ហាញម៉ូតពាក់ ព្រមទាំងចូលរួមក្នុងការប្រកួតប្រជែងច្នៃម៉ូដ និងវីដេអូបង្ហោះលើបណ្តាញទំនាក់ទំនងសង្គម ដែលទទួលការពេញនិយមពីអ្នកមើលជាច្រើន។ កម្មវិធីពិសេសនេះកាន់តែផ្តល់ភាពរីករាយអស្ចារ្យដោយមានរៀបចំកម្មវិធីបង្ហាញម៉ូដពិសេស ដែលបង្ហាញម៉ូដច្នៃប្រឌិតថ្មីៗជាច្រើនម៉ូដ ដែលបេក្ខជនបេក្ខនារីផ្នែកបង្ហាញម៉ូដបានពាក់បង្អួតលើឆាក។ អ្នកនាង Leap Sreypov និងលោក Pov Sithan ដែលជាអ្នកបង្ហាញម៉ូដជ័យលាភី និងអ្នកច្នៃម៉ូដជ័យលាភីលេខ១ ម្នាក់ៗទទួលបានរង្វាន់ទឹកប្រាក់ចំនួន $3,000 (បីពាន់ដុល្លារអាមេរិក) សំបុត្រយន្តហោះរ៉ាប់រងការចំណាយទាំងអស់សម្រាប់ធ្វើដំណើរទៅចូលរួមកម្មវិធីសប្តាហ៍ម៉ូដអន្តរជាតិ (International Fashion Week) និងបង្ហាញវត្តមាននៅលើគម្រមុខ និងប្រាំមួយទំព័រនៅក្នុងទស្សនាវដ្តី សូវរីន។ អ្នកនាង Meas Chanrou និងអ្នកនាង Sok Panha អ្នកបង្ហាញម៉ូដជ័យលាភី និងអ្នកច្នៃម៉ូដជ័យលាភីលេខ ២ ទទួលបានរង្វាន់ទឹកប្រាក់ចំនួន $2,000 (ពីរពាន់ដុល្លារអាមេរិក) និងបង្ហាញវត្តមានប្រាំមួយទំព័រនៅក្នុងទស្សនាវដ្តី សូវរីន។ អ្នកនាង Lev Socheata និងលោក Kong Sothea អ្នកបង្ហាញម៉ូដជ័យលាភី និងអ្នកច្នៃម៉ូដជ័យលាភីលេខ ៣ ទទួលបានរង្វាន់ទឹកប្រាក់ចំនួន $1,000 (មួយពាន់ដុល្លារអាមេរិក) និងបង្ហាញវត្តមានពីរទំព័រនៅក្នុងទស្សនាវដ្តី សូវរីន។ បេក្ខជនជ័យលាភីទាំងអស់ទទួលបានកិច្ចសន្យារយៈពេលបីឆ្នាំជាមួយទីភ្នាក់ងារ Arise។កម្មវិធី ABC Lions of Fashion ក៏បានប្រគល់ប្រាក់រង្វាន់ទឹកលើកទឹកចិត្តចំនួន $500 (ប្រាំរយដុល្លារអាមេរិក) ជូនអ្នកបង្ហាញម៉ូដអ្នកនាង Leap Sreypov ដែលឈ្នះពានតាមរយៈការបោះឆ្នោតជ្រើសរើសដោយសាធារណជន។ កម្មវិធី ABC Lions of Fashion ត្រូវបានរៀបចំឡើង ដោយសហការជាមួយសមាគមរោងចក្រកាត់ដេរនៅកម្ពុជា (GMAC) ដែលលើកកម្ពស់នូវស្តង់ដារសមស្របនៅក្នុងវិស័យឧស្សាហកម្មផលិតសម្លៀកបំពាក់ ទស្សនាវដ្តី សូវរីន ដែលជាទស្សនាវដ្តីម៉ូដដែលជាប់ចំណាត់ថ្នាក់លេខ១ នៅកម្ពុជា Arise Agency ដែលជាទីភ្នាក់ងារបង្ហាញម៉ូដ និងវិទ្យាស្ថានបណ្ដុះបណ្ដាលវិស័យកាត់ដេរនៅកម្ពុជា (CGTI), NOMI និង Nata Footwear។សូមរីករាយទទួលទាន ABC អិចស្ត្រាស្តោត ដោយការទទួលខុសត្រូវ! 

ក្មេង២នាក់លក់ទឹកស្រះស្លាប់ ក្នុងបរិវេណបន្ទាយកងវរសេនាតូចលេខ១ នៅស្រុកទឹកផុស ខេត្តកំពង់ឆ្នាំង (មានវីដេអូ)

ថ្ងៃទី ២០ ខែ ធ្នូ ឆ្នាំ ២០១៩ ម៉ោង ១២:០៩

កំពង់ឆ្នាំង៖ ក្មេងប្រុសស្រី២នាក់ បានលង់ទឹកស្លាប់ ខណៈដែលពួកគេបានចុះលេងទឹកស្រះមួយកន្លែង ស្ថិតនៅក្នុងបរិវេណបន្ទាយកងវរសេនាតូចលេខ១ ស្ថិតក្នុងភូមិស្រែតាជៃ ឃុំអភិវឌ្ឍន៍ ស្រុកទឹកផុស ខេត្តកំពង់ឆ្នាំង។ ហេតុការណ៍នេះ បានកើតឡើងនៅល្ងាចថ្ងៃទី១៩ ខែធ្នូ ឆ្នាំ២០១៩។ប្រភពព័ត៌មានពីកន្លែងកើតហេតុ បានឲ្យដឹងថា ក្មេងទាំងពីរនាក់ឈ្មោះ សន ផាតម៉េងលៀង ភេទប្រុស អាយុ១០ឆ្នាំ និងឈ្មោះ ឯម ម៉ារីយ៉ា ភេទស្រី អាយុ១២ឆ្នាំ ដោយនៅមុនពេលកើតហេតុ ពួកគេទាំងពីរនាក់បាននាំគ្នាទៅចុះលេងទឹកស្រះខាងលើ បន្ទាប់មកក៏បានលង់ស្លាប់ទាំងពីរនាក់តែម្ដង មិនអាចជួយសង្គ្រោះបាន។សពកុមាររងគ្រោះទាំងពីរនាក់បន្ទាប់ពីសមត្ថកិច្ចនគរបាលជំនាញ នៃអធិការដ្ឋាននគរបាលស្រុកទឹកផុស បានធ្វើកោសល្យវិច័យទៅតាមបច្ចេកទេសរួចមក សមត្ថកិច្ចបានកំណត់ថា ការស្លាប់របស់កុមារទាំងពីរនាក់ខាងលើនេះ គឺពិតជាស្លាប់ដោយសារលង់ទឹកប្រាកដមែន និងបានប្រគល់សាកសពជូន ទៅក្រុមគ្រួសារដើម្បីយកទៅចាត់ចែងធ្វើបុណ្យតាមប្រពៃណី៕

មន្ត្រីនគរបាលវរការពារព្រំដែនគោកលេខ៨២៥ កាប់ប្រពន្ធស្លាប់ភ្លាមៗ រួចគេចខ្លួនបាត់

ថ្ងៃទី ២០ ខែ ធ្នូ ឆ្នាំ ២០១៩ ម៉ោង ០៩:៥៦

ពោធិ៍សាត់៖ នាវេលាម៉ោង៧ និង៣០នាទីយប់ ថ្ងៃទី១៩ ខែធ្នូ ឆ្នាំ២០១៩នេះ មានករណីឃាតកម្មដ៏រន្ធត់មួយ ដែលបង្កឡើងដោយបុរសម្នាក់ មានតួនាទីជាមន្ត្រីនគរបាលវរៈការពារព្រំដែនគោកលេខ៨២៥ នៃស្នងការដ្ឋាននគរបាលខេត្តពោធិ៍សាត់ បានប្រើកាំបិតភ្កាក់កាប់សម្លាប់ មកលើស្ត្រីជាប្រពន្ធ រហូតដល់ដេកស្លាប់ក្នុងថ្លុកឈាម រួចរត់គេចខ្លួនដោយសុវត្ថិភាព។ករណីនេះបានកើតឡើង នៅផ្ទះក្រោយទីបញ្ជាការវរៈការពារព្រំដែនគោកលេខ៨២៥ ស្ថិតក្នុងភូមិឯកភាព ឃុំថ្មដា ស្រុកវាលវែង ខេត្តពោធិ៍សាត់។ ស្ត្រីរងគ្រោះជាប្រពន្ធ មានឈ្មោះ ឆន ជីវ័ន្ត អាយុ២០ឆ្នាំ ចំណែកជនសង្ស័យ ឈ្មោះ អ៉ឹម ផល្លី (ហៅតឿ) បច្ចុប្បន្នរស់នៅភូមិឃុំកើតហេតុខាងលើ។សូមបញ្ជាក់ដែរថា ក្រោយធ្វើសកម្មភាពសម្លាប់ ទៅលើស្ត្រីរងគ្រោះជាប្រពន្ធរួចមក ជនសង្ស័យបានរត់គេចខ្លួនចូលព្រៃបាត់ស្រមោល។ រហូតមកដល់ពេលនេះ សមត្ថកិច្ចនគរបាលបាននឹងកំពុងធ្វើកោសលវិច្ច័យ និងឡោមព័ទ្ធជុំវិញតំបន់នោះ ដើម្បីតាមចាប់ខ្លួនជនដៃដល់ យកមកផ្តន្ទាទោសតាមផ្លូវច្បាប់៕

ឃាតកម្មសម្លាប់អ្នកគ្រូបង្រៀនម្នាក់នៅស្រុកសំឡូត ជនដៃដល់ត្រូវសមត្ថកិច្ចចាប់ខ្លួនបានហើយ គឺជាប្ដីរបស់ស្ដ្រីរងគ្រោះ

ថ្ងៃទី ១៩ ខែ ធ្នូ ឆ្នាំ ២០១៩ ម៉ោង ០៩:៥២

បាត់ដំបង៖ ករណីឃាតកម្មសម្លាប់អ្នកគ្រូបង្រៀនម្នាក់ នៅភូមិបឹងរុន ឃុំសំឡូត ស្រុកសំឡូត ខេត្តបាត់ដំបង ត្រូវកម្លាំងសមត្ថកិច្ចស្រាវជ្រាវ និងចាប់បានជនដៃដល់ហើយ គឺជាប្ដីរបស់ជនរងគ្រោះ និងជាមនុស្សដែលប្រើប្រាស់គ្រឿងញៀន។ស្នងការនគរបាលខេត្តបាត់ដំបង លោកឧត្តមសេនីយ៍ទោ អ៊ុច សុខុន បានប្រាប់បណ្ដាញព័ត៌មាន Fresh News ឲ្យដឹងនៅរសៀលថ្ងៃទី១៨ ខែធ្នូ ឆ្នាំ២០១៩នេះថា ក្រោយកើតហេតុភ្លាម និងមានការស្រាវជ្រាវយ៉ាងយកចិត្ដទុក ទីបំផុតកម្លាំងជំនាញរបស់លោកបានកំណត់មុខសញ្ញា និងឈានដល់ការចាប់ខ្លួន បានជនដៃដល់តែម្ដង នៅយប់ថ្ងៃទី១៦ ខែធ្នូ ឆ្នាំ២០១៩ គឺជាប្ដីរបស់ជនរងគ្រោះ។លោកឧត្តមសេនីយ៍ស្នងការ បានបន្ថែមទៀតថា ជនដៃដល់ឈ្មោះ ព្រំ សួសសំណាង អាយុ ៣១ឆ្នាំ។ ដោយឡែក មូលហេតុដែលនាំឲ្យកើតអំពើឃាតកម្មនេះ ដោយសារតែជនដៃដល់ប្រច័ណ្ឌជនរងគ្រោះជាមួយអតីតសង្សា ហើយជនដៃដល់ក៏ជាមនុស្សមានសារធាតុញៀន នៅក្នុងខ្លួនផងដែរ។ បន្ទាប់ពីបញ្ចប់ការសួរនាំ កម្លាំងជំនាញបានកសាងសំណុំរឿងបញ្ជូនទៅតុលាការនៅរសៀលនេះ ដើម្បីផ្ដន្ទាទោសតាមផ្លូវច្បាប់។សូមជម្រាបថា សពអ្នកគ្រូបង្រៀនម្នាក់ ត្រូវបានគេប្រទះឃើញដេកស្លាប់ផ្កាប់មុខក្នុងភូមិបឹងរុន ឃុំសំឡូត ស្រុកសំឡូត ខេត្តបាត់ដំបង ដោយសង្ស័យករណីរំលោភសម្លាប់ ក្រោយបាត់ខ្លួនកាលពីវេលាម៉ោងជាង ៩ព្រឹកថ្ងៃទី១៦ ខែធ្នូ ឆ្នាំ២០១៩ ខណៈដែលអ្នកគ្រូ បានសុំទៅនាយកសាលាចេញមុនម៉ោងថា កូនឈឺ។ សមត្ថកិច្ចមូលដ្ឋាន បានឲ្យដឹងថា ជនរងគ្រោះឈ្មោះ អូន ចន្ថា មានកូនម្នាក់ ជាមុខរបរជាគ្រូបង្រៀនបឋមសិក្សាភូមិអំពិលលើ ប្ដីឈ្មោះ ណាង ទីលំនៅភូមិបឹងរុន ឃុំសំឡូត៕

បណ្ដាញក្រុមចាប់ជំរិតយកប្រាក់ និងជួញដូរអាវុធខុសច្បាប់ នៅខេត្តព្រះសីហនុ ត្រូវកម្លាំងនគរបាលតាមបង្ក្រាបបាន ៧នាក់ទៀត

ថ្ងៃទី ១៧ ខែ ធ្នូ ឆ្នាំ ២០១៩ ម៉ោង ១៤:២៥

ព្រះសីហនុ៖ បន្ទាប់ពីចាប់ខ្លួនជនជាតិចិន ៧នាក់ ហើយត្រូវបានបញ្ជូនទៅតុលាការ ពាក់ព័ន្ធករណីចាប់បង្ខាំងមនុស្ស និងនាំចូលអាវុធដោយខុសច្បាប់ នៅខេត្តព្រះសីហនុហើយនោះ, កម្លាំងនគរបាលជំនាញ បានបន្ដស្រាវជ្រាវស៊ើបអង្កេតយ៉ាងយកចិត្តទុកដាក់ រហូតឈានដល់ការចាប់ខ្លួនជនសង្ស័យ ៧នាក់ បន្ថែមទៀត ក្នុងនោះជនជាតិចិន ៣នាក់ និងខ្មែរ ៤នាក់ ពាក់ព័ន្ធករណីនេះ។ស្នងការនគរបាលខេត្តព្រះសីហនុ លោកឧត្តមសេនីយ៍ទោ ជួន ណារិន្ទ បានប្រាប់បណ្ដាញព័ត៌មាន Fresh News ឲ្យដឹងនៅរសៀលថ្ងៃទី១៧ ខែធ្នូ ឆ្នាំ២០១៩នេះ ប្រតិបត្តិការដ៏ក្ដៅគគុកជាបន្ដបន្ទាប់នេះ ត្រូវបានធ្វើឡើងក្រោមការបញ្ជាផ្ទាល់ពី នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ , លោក គួច ចំរើន អភិបាលខេត្ត និងជាប្រធានគណៈបញ្ជាការឯកភាពខេត្ត និងក្រោមការសម្របសម្រួលពីលោក សៀង សុខ ព្រះរាជអាជ្ញាអមសាលាដំបូងខេត្ត។បើតាមលោកឧត្តមសេនីយ៍ស្នងការ ប្រតិបត្តិការនេះធ្វើឡើងនៅថ្ងៃទី ១៣-១៤ ខែធ្នូ ដោយកម្លាំងជំនាញតាមចាប់ជនសង្ស័យនៅរាជធានីភ្នំពេញផង និងនៅក្រុងព្រះសីហនុផង បានជាបន្តបន្ទាប់សរុបចំនួន ៧នាក់ បន្ថែមទៀត (ជនជាតិខ្មែរ ៤នាក់,ជនជាតិចិន ៣នាក់ ស្រីម្នាក់) ព្រមទាំងចាប់យកវត្ថុតាង កាំភ្លើង ៥ដើម (កាំភ្លើងវែង ១ដើម និងកាំភ្លើងខ្លី ៤ដើម) និងគ្រាប់រំសេវមួយចំនួនទៀត។វត្ថុតាងចាប់យកបានរួមមាន៖ កាំភ្លើងវែង AK47 ១ដើម, កាំភ្លើងខ្លី៤ដើម (ម៉ាកGLOCK17 ១ដើម ពណ៌ខ្មៅ, ម៉ាក GLOCK19 ១ដើម ពណ៌ខ្មៅ, ម៉ាក GLOCK19 KILLER ១ដើម ពណ៌ខ្មៅ និងម៉ាកK59 ១ដើម ពណ៌ខ្មៅ, បង់កាំភ្លើងប្រភេទ ១៥គ្រាប់ ចំនួន ៤បង់, បង់កាំភ្លើងប្រភេទ ៣០គ្រាប់ ចំនួន២បង់ (ថ្មីមិនទាន់ហែកប្រើ), គ្រាប់កាំភ្លើង ១៨១គ្រាប់ (គ្រាប់ប្រភេទ ៩mm ចំនួន ៦៦គ្រាប់, គ្រាប់ប្រភេទ K59 ចំនួន៥គ្រាប់), រឺស័របង់កាំភ្លើងចំនួន ២ (ថ្មីមិនទាន់ហែកប្រើ), តួកាំភ្លើងម៉ាក GLOCK ចំនួន១ និងគ្រឿងបន្លាស់កាំភ្លើងមួយចំនួន (សម្រាប់កែឆ្នៃកាំភ្លើងខ្លីម៉ាក GLOCK ធម្មតា ទៅជាអូតូរ៉ាស់ហ្វាល់) និងម៉ាស៉ីនស្វាន ១គ្រឿង និងគ្រឿងបន្លាស់ ១ប្រអប់។គួរជម្រាបថា កាលពីថ្ងៃទី០៦ ខែធ្នូ ឆ្នាំ២០១៩កន្លងទៅ កម្លាំងជំនាញផែននគរបាលព្រហ្មទណ្ឌ បានធ្វើការស្រាវជ្រាវបង្ក្រាបឃាត់ខ្លួនបានជនសង្ស័យ ជនជាតិចិនចំនួន ៧នាក់ ដែលជាប់ពាក់ព័ន្ធ ករណីចាប់ឃុំឃាងបង្ខាំងមនុស្សខុសច្បាប់, ផ្តល់ទីតាំងប្រព្រឹត្តិបទល្មើសឧក្រិដ្ឋ និងនាំចូលអាវុធ ដោយគ្មានការអនុញ្ញាតិ នៅចំណុចផ្ទះសំណាក់ស៊ែងឆីង ស្ថិតនៅភូមិ២ សង្កាត់២ ក្រុងព្រះសីហនុ ព្រមទាំងដកហូតបានកាំភ្លើងខ្លីចំនួន ២ដើម, កាំភ្លើងវែង ១ដើម (M16) គ្រាប់កាំភ្លើង និងគ្រឿងញៀនមួយចំនួនធំ។ ជនសង្ស័យរួមទាំងវត្ថុតាង កម្លាំងជំនាញបានកសាងសំណុំរឿង បញ្ជូនទៅសាលាដំបូងខេត្តព្រះសីហនុ៕