trollkhmer news

សង្គមនិងជីវិត

ក្រសួងសុខាភិបាល៖ អ្នកជំងឺ ៣នាក់បានជាសះស្បើយ ខណៈមិនមានអ្នកឆ្លងកូវីដ១៩ ករណីថ្មីនោះទេ

ថ្ងៃទី ២៥ ខែ ធ្នូ ឆ្នាំ ២០២០ ម៉ោង ០៩:០៣

(ភ្នំពេញ)៖ ក្រសួងសុខាភិបាល នៅព្រឹកថ្ងៃទី២៥ ខែធ្នូ ឆ្នាំ២០២០នេះ បានចេញសេចក្តីប្រកាសព័ត៌មានបញ្ជាក់ពីការ មិនមានរកឃើញករណីឆ្លងជំងឺកូវីដ១៩ ថ្មីនៅកម្ពុជានោះទេ ខណៈអ្នកជំងឺចំនួន៣នាក់ថែមទៀត ត្រូវបានព្យាបាលជាសះស្បើយ និងអនុញ្ញាតឲ្យចេញពីមន្ទីរពេទ្យ។អ្នកជាសះស្បើយទាំង៣នាក់ ជាអ្នកជំងឺដែលឆ្លងក្នុងព្រឹត្តិការណ៍ «សហគមន៍២៨វិច្ឆិកា» រួមមាន៖១៖ ស្ត្រីជនជាតិខ្មែរ អាយុ២៨ឆ្នាំ ស្នាក់នៅភូមិម៉ាក់ក្លឿង សង្កាត់ច្បារអំពៅ១ ខណ្ឌច្បារអំពៅ រាជធានីភ្នំពេញ ជាបុគ្គលិកហាង Pedro ផ្លូវព្រះសីហនុ ត្រូវបានព្យាបាលជាសះស្បើយ។២៖ បុរសជនជាតិខ្មែរ អាយុ២៧ឆ្នាំ ស្នាក់នៅបឹងទំពន់ ខណ្ឌមានជ័យ រាជធានីភ្នំពេញ ជាអ្នកចូលហាង Pedro ផ្លូវព្រះសីហនុ ត្រូវបានព្យាបាលជាសះស្បើយ។៣៖ ស្ត្រីជនជាតិខ្មែរ អាយុ២៦ឆ្នាំ ស្នាក់នៅខណ្ឌដូនពេញ រាជធានីភ្នំពេញ ជាមិត្តភក្តិរបស់បុរសជនជាតិខ្មែរ អាយុ៣៥ឆ្នាំ ដែលបានរកឃើញវិជ្ជមានកូវីដ១៩ នៅថ្ងៃទី០៨ ខែធ្នូ ឆ្នាំ២០២០ ត្រូវបានព្យាបាលជាសះស្បើយ។សូមជម្រាបថា គិតត្រឹមម៉ោង៧៖០០នាទីព្រឹកថ្ងៃទី២៥ ខែធ្នូ ឆ្នាំ២០២០នេះ នៅកម្ពុជាបានរកឃើញអ្នកឆ្លងកូវីដ១៩ សរុបចំនួន ៣៦៣នាក់ ក្នុងនោះព្យាបាលជាសះស្បើយចំនួន ៣៥៤នាក់ និងអ្នកជំងឺ៩នាក់កំពុងសម្រាកនៅមន្ទីរពេទ្យវិញ។ សម្រាប់អ្នកឆ្លងក្នុងព្រឹត្តិការណ៍ «សហគមន៍២៨វិច្ឆិកា» វិញ មានចំនួនសរុប៤១នាក់ ក្នុងព្យាបាលជាសះស្បើយចំនួន ៣៦នាក់ និងកំពុងសម្រាកព្យាបាលនៅមន្ទីរពេទ្យចំនួន ៥នាក់៕

ប្រទេសថៃ រកឃើញអ្នកឆ្លងកូវីដ-១៩ ករណីថ្មី ៦៧នាក់ទៀតក្នុងនោះ ៥៨នាក់ជាករណីឆ្លងក្នុងសហគមន៍

ថ្ងៃទី ២៤ ខែ ធ្នូ ឆ្នាំ ២០២០ ម៉ោង ១៥:២៧

(បាងកក)៖ ក្រសួងសុខាភិបាលថៃនាថ្ងៃព្រហស្បតិ៍នេះ បានប្រកាសពីការរកឃើញករណីឆ្លងថ្មីៗនៃជំងឺ COVID-19 ចំនួន ៦៧នាក់ទៀត ក្នុងនោះមាន ០៩ករណី ដែលជាករណីនាំចូលពីក្រៅប្រទេស។ នេះបើតាមការចេញផ្សាយ ដោយសារព័ត៌មាន CNA នៅរសៀលថ្ងៃព្រហស្បតិ៍ ទី២៤ ខែធ្នូ ឆ្នាំ២០២០។លោក ថាវីស៊ីន វិសានុយោធិន (Taweesin Wisanuyothin) ជាអ្នកនាំមជ្ឈមណ្ឌលគ្រប់គ្រងស្ថានភាព COVID-19 នៃក្រសួងសុខាភិបាលថៃបាននិយាយថា ក្នុងចំណោមករណីវិជ្ជមាន COVID-19 ទាំង ៥៨ករណីដែលជាករណីឆ្លងក្នុងសហគមន៍ គឺលើកលែងតែ ០៣ករណីប៉ុណ្ណោះ ដែលមិនជាប់ពាក់ព័ន្ធជាមួយការឆ្លងរាលដាល ដែលត្រូវបានរកឃើញ ពាក់ព័ន្ធទីផ្សារលក់គ្រឿងសមុទ្រមួយកន្លែងក្នុងខេត្ត សាមុត សាខន (Samut Sakhorn) នៅភាគនិរតីរាជធានីបាងកក កាលពីសប្តាហ៍មុន។គួរបញ្ជាក់ថា បើគិតចាប់តាំងតែពីសប្តាហ៍មុនមក ករណីឆ្លង COVID-19 ថ្មីៗត្រូវបានរកឃើញនៅខេត្ត-ក្រុងចំនួន ២៧ នៅទូទាំងប្រទេសថៃ ដែលមកទល់ពេលនេះមានសរុបច្រើនជាង ១,៣០០ករណី ទាក់ទងនឹងការរាតត្បាតនៅទីតាំងផ្សារខាងលើ ខណៈក្នុងចំណោមនោះទៀតសោត ភាគច្រើនជាពលករចំណាកស្រុក មកពីប្រទេសមីយ៉ាន់ម៉ា។ គិតត្រឹមថ្ងៃព្រហស្បតិ៍នេះ ប្រទេសថៃមានករណីឆ្លង COVID-19 សរុប ៥,៨២៩ករណី ក្នុងនោះស្លាប់ ៦០នាក់ និងជាសះស្បើយវិញ ៤,១១៦នាក់៕

សហរដ្ឋអាមេរិក ចាក់វ៉ាក់សាំងកូវីដ-១៩ ដូសដំបូងជូនប្រជាជនសរុបបានជាង ១លាននាក់ហើយ

ថ្ងៃទី ២៤ ខែ ធ្នូ ឆ្នាំ ២០២០ ម៉ោង ១៣:៣៧

(វ៉ាស៊ីនតោន)៖ មន្ត្រីជាន់ខ្ពស់អាមេរិកមួយរូប នៅថ្ងៃពុធសប្ដាហ៍នេះ (ពេលវេលានៅវ៉ាស៊ីនតោន) បាននិយាយថា ជនជាតិអាមេរិកជាង ១លាននាក់បានទទួលចាក់ការវ៉ាក់សាំង ប្រឆាំងវីរុសកូរ៉ូណា (COVID-19) សម្រាប់ដូសដំបូងរួចហើយ ខណៈសហរដ្ឋអាមេរិកកំពុងទន្ទឹងរង់ចាំ ការវិលត្រឡប់មករកសភាពធម្មតាវិញ នៅនារដូវក្តៅខាងមុខនេះ។ នេះបើតាមការចេញផ្សាយដោយសារព័ត៌មាន CNA នៅព្រឹកថ្ងៃព្រហស្បតិ៍ ទី២៤ ខែធ្នូ ឆ្នាំ២០២០។ ដំណឹងនេះបានកើតឡើង ខណៈចំនួនករណីឆ្លង COVID-19 បានកើនឡើងជាច្រើនករណីគួរឲ្យកត់សម្គាល់នៅនារដូវរងារនេះ និងបានឆក់យកជីវិតមនុស្សជាង ៣៣៤,០០០នាក់នៅទូទាំងសហរដ្ឋអាមរិក។វ៉ាក់សាំង COVID-19 ដែលអភិវឌ្ឍឡើងដោយក្រុមហ៊ុនអាមេរិក-អាល្លឺម៉ង់ Pfizer-BioNTech ប្រមាណ ៣លានដូស ត្រូវបានដាក់ឲ្យប្រើប្រាស់កាលពីសប្តាហ៍មុន ប៉ុន្តែគោលដៅផ្លូវការសម្រាប់សប្តាហ៍នេះ គឺវ៉ាក់សាំង COVID-19 របស់ក្រុមហ៊ុន Pfizer ចំនួន ២លានដូស និងវ៉ាក់សាំង COVID-19 របស់ក្រុមហ៊ុន Moderna ចំនួន ៦លានដូសផ្សេងទៀត។ បន្ថែមពីខាងកើនេះ រដ្ឋាភិបាលអាមេរិកនឹងចែកចាយវ៉ាក់សាំង COVID-19 របស់ក្រុមហ៊ុន Pfizer និង Moderna ចំនួន ៤.៦៧លានដូសនៅសប្តាហ៍ក្រោយ ដែលនាំឲ្យវ៉ាក់សាំងសរុបប្រហែល ២០លានដូស នឹងត្រូវដឹកជញ្ជូននៅឆ្នាំ២០២០នេះ។ ទោះជាយ៉ាងណា ដំណើរការចែកចាយវ៉ាក់សាំង COVID-19 ចំនួន ២០លានដូសដំបូងនេះ នឹងបន្តប្រើពេលរហូតដល់ដើមខែមករា ឆ្នាំ២០២១ខាងមុខនេះ។ជុំវិញបញ្ហានេះប្រធានទីប្រឹក្សា នៃកម្មវិធីវ៉ាក់សាំងរបស់ រដ្ឋបាលប្រធានាធិបតីអាមេរិក លោក ដូណាល់ ត្រាំ គឺលោក ម៉ុនសេហ្វ ស្លារី (Moncef Slaoui) បានគូសបញ្ជាក់ថា «គោលដៅចាក់វ៉ាក់សាំង COVID-19 ដល់មនុស្សចំនួន ២០លានដូសនៅក្នុងខែនេះ គឺហាក់បីដូចជាមិនត្រូវបានបំពេញទាន់ពេលទេ។ ទោះជាយ៉ាងនេះក្តី ការប្ដេជ្ញាចិត្តរបស់យើង គឺយើងអាចធ្វើទៅបាន ដោយមើលតាមចំនួននៃវ៉ាក់សាំង។ ល្បឿននៃការចាក់វ៉ាក់សាំងនេះ កំពុងដំណើរការយឺតជាងអ្វីដែលយើងគិត ប៉ុន្តែយើងមានទំនុកចិត្តថា យើងនឹងអាចប្រមូលម្ដុំមនុស្សប្រហែល ១០០លាននាក់នៅក្នុងត្រីមាសទី១ និង ១០០លាននាក់ទៀតនៅក្នុងត្រីមាសទី២ ឆ្នាំ២០២១ខាងមុខនេះបាន»។គួរបញ្ជាក់ថា បើតាមការលើកឡើងរបស់ អ្នកជំនាញជាន់ខ្ពស់ផ្នែកសុខាភិបាល ប្រចាំសហរដ្ឋអាមេរិក លោក អាន់ថូនី ហ្វាស៊ី (Anthony Fauci) ប្រសិនបើការចាក់វ៉ាក់សាំង COVID-19 នេះ អាចដំណើរការទៅបានយ៉ាងរលូន វាអាចទៅរួចដែលយើងអាចសម្រេចបាន នូវភាពស៊ាំនៅក្នុងសហគមន៍ នៅទូទាំងសហរដ្ឋអាមេរិកបាន នារដូវក្ដៅខាងមុខនេះ (អំឡុងខែមិថុនា ដល់ខែកញ្ញា ឆ្នាំ២០២០)៕

សិង្ហបុរី រកឃើញមនុស្សម្នាក់ មានផ្ទុកវីរុសកូវីដ-១៩ទម្រង់ថ្មី ក្រោយត្រលប់មកពី ចក្រភពអង់គ្លេស

ថ្ងៃទី ២៤ ខែ ធ្នូ ឆ្នាំ ២០២០ ម៉ោង ១០:២៤

(សិង្ហបុរី)៖ ក្រសួងសុខាភិបាលសិង្ហបុរី នៅយប់់ថ្ងៃពុធសប្ដាហ៍នេះ បានប្រកាសទទួលស្គាល់ពីការរកឃើញ អ្នកផ្ទុកវីរុស COVID-19 ទម្រង់ថ្មីដំបូងបំផុត ដែលជាវីរុសកំពុងឆ្លងរាតត្បាត នៅក្នុងចក្រភពអង់គ្លេស។ បើតាមក្រសួងសុខាភិបាលសិង្ហបុរី វីរុស COVID-19 ទម្រង់ថ្មី ឬគេស្គាល់ថា B117 ត្រូវបានរកឃើញលើស្ត្រីម្នាក់មានអាយុ ១៧ឆ្នាំ ដែលបានទៅបន្តការសិក្សាក្នុងចក្រភពអង់គ្លេស ចាប់តាំងពីខែសីហា កន្លងទៅ។ ស្ត្រីរូបនេះបានត្រឡប់មកដល់សិង្ហបុរីវិញ កាលពីថ្ងៃទី០៦ ខែធ្នូ និងបានអនុវត្តវិធានការធ្វើចត្តាឡីស័ក ហើយរូបនាងមានអាការៈក្ដៅខ្លួន នៅថ្ងៃទី០៧ ខែធ្នូ ព្រមទាំងត្រូវបានធ្វើតេស្ដវិជ្ជមាន COVID-19 ទម្រង់ថ្មី នៅថ្ងៃទី០៨ ខែធ្នូ។ក្រសួងសុខាភិបាលសិង្ហបុរីបន្ថែមទៀតថា បច្ចុប្បន្នខាងក្រសួងក៏កំពុងរង់ចាំ លទ្ធផលចុងក្រោយនៃមនុស្ស ១១នាក់ផ្សេងទៀត ដែលត្រូវបានធ្វើតេស្ដវិជ្ជមាន COVID-19 ទម្រង់ថ្មីនេះដូចគ្នា ក្នុងការធ្វើតេស្ដបឋមផងដែរ។ បើតាមគេហទំព័រ worldometers គិតត្រឹមថ្ងៃពុធសប្ដាហ៍នេះ សិង្ហបុរីមានអ្នកឆ្លង COVID-19 សរុប ៥៨,៤៨២នាក់ ក្នុងនោះស្លាប់ ២៩នាក់ និងជាសះស្បើយ ឡើងវិញ ៥៨,៣២២នាក់។គួរបញ្ជាក់ថា ការបញ្ជាក់របស់សិង្ហបុរីខាងលើនេះ បានកើតមានឡើងស្របពេលដែល ទម្រង់ថ្មីមួយផ្សេងទៀត (ទម្រង់ថ្មីទី២) នៃវីរុសកូរ៉ូណា (COVID-19) ត្រូវបានរកឃើញនៅក្នុងចក្រភពអង់គ្លេស ដោយមានជាប់ពាក់ព័ន្ធនឹងអ្នកដំណើរពីរនាក់ មកពីប្រទេសអាហ្វ្រិកខាងត្បូង។ អាជ្ញាធរសុខាភិបាលអង់គ្លេស កំពុងបន្តតាមដានវីរុសទម្រង់ថ្មីទីពីរនេះ យ៉ាងល្អិតល្អន់បំផុត៕

ក្រសួងសុខាភិបាល៖ មិនមានអ្នកឆ្លងកូវីដ១៩ករណីថ្មីនោះទេ ខណៈអ្នកជំងឺចំនួន ២នាក់បានជាសះស្បើយ

ថ្ងៃទី ២៤ ខែ ធ្នូ ឆ្នាំ ២០២០ ម៉ោង ០៨:៥៤

(ភ្នំពេញ)៖ ក្រសួងសុខាភិបាល នៅព្រឹកថ្ងៃទី២៤​ ខែធ្នូ ឆ្នាំ២០២០នេះ បានចេញសេចក្តីប្រកាសព័ត៌មានបញ្ជាក់ថា មិនមានរកឃើញករណីឆ្លងជំងឺកូវីដ១៩ ថ្មីនោះទេ ខណៈអ្នកជំងឺចំនួន២នាក់ ថែមទៀត បានជាសះស្បើយ។ អ្នកជំងឺទាំង២នាក់ ដែលព្យាបាលជាសះស្បើយនោះរួមមាន៖១៖ ស្ត្រីជនជាតិខ្មែរ អាយុ៣០ឆ្នាំ ស្នាក់នៅសង្កាត់និរោធ ខណ្ឌច្បារអំពៅ រាជធានីភ្នំពេញ ជាភរិយាបុរសជនជាតិខ្មែរ អាយុ៣៤ឆ្នាំ ធ្វើការនៅក្រសួងមហាផ្ទៃ ដោយជាសះស្បើយកាលពីថ្ងៃទី១៤ ខែធ្នូ ឆ្នាំ២០២០។ ស្ត្រីរូបនេះ ត្រូវបានព្យាបាលជាសះស្បើយ ដោយទទួលលទ្ធផលតេស្ត អវិជ្ជមានវីរុសកូវីដ១៩ ចំនួន២លើក ត្រូវបានអនុញ្ញាឲ្យចេញពីមន្ទីរពេទ្យមិត្តភាពខ្មែរ-សូវៀត។២៖ បុរសជនជាតិខ្មែរ-អាមេរិក អាយុ៥៥ឆ្នាំ ស្នាក់នៅសង្កាត់ផ្សារថ្មី ខណ្ឌដូនពេញ រាជធានីភ្នំពេញ ជាអ្នកដំណើរមកពីប្រទេសចិន តាមជើងហោះហើរ មកដល់កម្ពុជានៅថ្ងៃទី២០ ខែវិច្ឆិកា ឆ្នាំ២០២០ ត្រូវបានព្យាបាលជាសះស្បើយ ដោយទទួលបានលទ្ធផលតេស្តអវិជ្ជមានកូវីដ១៩ ចំនួន២លើក ត្រូវបានអនុញ្ញាឲ្យចេញពីមន្ទីរពេទ្យមិត្តភាពខ្មែរ-សូវៀត។សូមជម្រាបថា គិតត្រឹមម៉ោង៧៖០០នាទី ព្រឹកថ្ងៃទី២៤ ខែធ្នូ ឆ្នាំ២០២០នេះ នៅកម្ពុជាបានរកឃើញអ្នកឆ្លងកូវីដ១៩ សរុបចំនួន ៣៦៣នាក់ ក្នុងនោះព្យាបាលជាសះស្បើយចំនួន ៣៥១នាក់ និងអ្នកជំងឺចំនួន ១២នាក់ កំពុងសម្រាកព្យាបាលនៅមន្ទីរពេទ្យ។ សម្រាប់ព្រឹត្តិការណ៍ «សហគមន៍២៨វិច្ឆិកា» មានអ្នកឆ្លងសរុបចំនួន៤១នាក់ ក្នុងនោះបានព្យាបាលជាសះស្បើយចំនួន ៣៣នាក់៕

រដ្ឋាភិបាលកូរ៉េខាងត្បូង រងសម្ពាធកាន់តែខ្លាំង ពាក់ព័ន្ធការចាត់ចែង វ៉ាក់សាំងកូវីដ-១៩ និងការផ្ទុះករណីឆ្លងរលកថ្មី

ថ្ងៃទី ២៣ ខែ ធ្នូ ឆ្នាំ ២០២០ ម៉ោង ១៤:៣៦

(សេអ៊ូល)៖ ប្រទេសកូរ៉េខាងត្បូងបានកត់ត្រានូវ ករណីឆ្លងជំងឺ COVID-19 ថ្មីៗកម្រិតខ្ពស់បន្ថែមទៀត ខណៈដែលការស្ទង់មតិថ្មីមួយបានបង្ហាញពី «ភាពមិនពេញចិត្ត» ដែលកំពុងកើនឡើងជុំវិញវិធានការឆ្លើយតបរបស់ លោកប្រធានាធិបតី មូន ចេអ៊ីន (Moon Jae-in) ចំពោះរលកឆ្លងចុងក្រោយបង្អស់ ដែលកំពុងវាយប្រហារនៅក្នុងប្រទេស។ នេះបើតាមការចេញផ្សាយដោយ សារព័ត៌មាន CNA នៅរសៀលថ្ងៃពុធ ទី២៣ ខែធ្នូ ឆ្នាំ២០២០។យោងតាមការស្ទង់មតិរបស់ក្រុមហ៊ុនស្រាវជ្រាវ Realmeter ដែលបានចេញផ្សាយនៅថ្ងៃពុធនេះបានបង្ហាញថា ពលរដ្ឋកូរ៉េខាងត្បូង ០៦នាក់ ក្នុងចំណោម ១០នាក់យល់ថា រដ្ឋាភិបាលគួរតែត្រូវបានផ្តល់អាទិភាព ទៅលើសុវត្ថិភាពរបស់វ៉ាក់សាំង COVID-19 ហើយការចាក់វ៉ាក់សាំងគួរតែចាប់ផ្តើម ឲ្យបានឆាប់បំផុតតាមដែលអាចធ្វើទៅបាន ស្របពេលដែលករណីឆ្លងថ្មីៗ កំពុងកើនឡើងយ៉ាងគំហុក។ ប្រព័ន្ធផ្សព្វផ្សាយក្នុងស្រុកបានរិះគន់រដ្ឋាភិបាល ចំពោះភាពធូររលុងក្នុងការ ធានាសុវត្ថិភាពរបស់វ៉ាក់សាំង ហើយបែរជាពឹងផ្អែកយ៉ាងខ្លាំង ទៅលើវ៉ាក់សាំងដែលកំពុងអភិវឌ្ឍក្នុងស្រុក ដែលនឹងត្រូវចំណាយពេលច្រើន ជាងជម្រើសវ៉ាក់សាំងពីបរទេស។ជាការឆ្លើយតប ការិយាល័យប្រធានាធិបតីកូរ៉េខាងត្បូង កាលពីថ្ងៃអង្គារសប្តាហ៍នេះ បានចេញសេចក្តីថ្លែងការណ៍មួយថា កម្មវិធីចាក់វ៉ាក់សាំងនឹងចាប់ផ្តើមក្នុងពេលឆាប់ៗនេះ។ រដ្ឋាភិបាលធ្លាប់បានបញ្ជាក់ម្តងរួចទៅហើយថា ការចាក់វ៉ាក់សាំងអាចនឹងចាប់ផ្តើម នៅដើមខែកុម្ភៈ ឆ្នាំ២០២១ខាងមុខ។នៅថ្ងៃពុធនេះទីភ្នាក់ងារត្រួតពិនិត្យ និងបង្ការជំងឺឆ្លង ឬហៅកាត់ថា KDCA បានរាយការណ៍ថា ប្រទេសកូរ៉េខាងត្បូងបានកត់ត្រាករណីឆ្លងថ្មីៗចំនួន ១,០៩២នាក់បន្ថែមទៀត ដែលនាំឲ្យករណីឆ្លងសរុបកើនដល់ ៥២,៥៥០ ករណីក្នុងនោះមនុស្ស ៧៣៩នាក់បានស្លាប់។ នៅចំពោះមុខការកើនឡើងយ៉ាងគំហុកបែបនេះ ទីក្រុងសេអ៊ូល និងតំបន់ជុំវិញនោះបានប្រកាសហាមឃាត់ ការប្រមូលផ្តុំដែលមានមនុស្សច្រើនជាង ៥នាក់ ដែលនឹងចូលជាធរមានចាប់ពីថ្ងៃទី២៣ ខែធ្នូ រហូតដល់ថ្ងៃទី០៣ ខែមករា ឆ្នាំ២០២១។បន្ថែមពីលើនេះ ម្ចាស់ភោជនីយដ្ឋាន និងម្ចាស់ហាងនានា អាចប្រឈមនឹងការផាកពិន័យរហូតដល់ ៣លានវ៉ុន (ប្រហែលជា ២,៧០០ដុល្លារអាមេរិក) ប្រសិនបើរកឃើញថា បានរំលោភលើបទបញ្ជានេះ។ អាជ្ញាធរកូរ៉េខាងត្បូង ក៏បានបញ្ជាឲ្យបិទរមណីយដ្ឋានជិះស្គី និងកន្លែងទេសចរណ៍រដូវរងារទាំងអស់ ក្នុងគោលបំណងដើម្បីបញ្ឈប់ ការឆ្លងរីករាលដាល នៅអំឡុងថ្ងៃឈប់សម្រាកបុណ្យណូអែល និងចូលឆ្នាំសកល ដែលជិតឈានមកដល់។ដោយឡែក នាយករដ្ឋមន្ត្រីកូរ៉េខាងត្បូងលោក ជុង សេគ្យុន (Chung Sye-kyun) នៅថ្ងៃពុធនេះបានកត់សម្គាល់ថា រហូតមកដល់ពេលនេះ រដ្ឋាភិបាលអាចធានាបានគ្រែមន្ទីរពេទ្យប្រហែល ៨,០០០គ្រែបន្ថែមទៀត សម្រាប់អ្នកជំងឺ COVID-19 ថ្មីៗ ដោយមានជំនួយពីមន្ទីរពេទ្យឯកជន៕

វ៉ាក់សាំងរបស់ក្រុមហ៊ុន AstraZeneca អាចមានប្រសិទ្ធភាពទប់ទល់វីរុសកូវីដ-១៩ ទម្រង់ថ្មីនៅចក្រភពអង់គ្លេស

ថ្ងៃទី ២៣ ខែ ធ្នូ ឆ្នាំ ២០២០ ម៉ោង ១០:២៥

(ឡុងដ៍)៖ ក្រុមហ៊ុនផលិតឱសថអង់គ្លេស AstraZeneca បានឲ្យដឹងកាលពីថ្ងៃអង្គារថា វ៉ាក់សាំង COVID-19 របស់ខ្លួនដែលកំពុងស្ថិតនៅក្នុងការធ្វើតេស្ដ ដំណាក់កាលចុងក្រោយ គួរតែអាចមានប្រសិទ្ធភាពខ្ពស់ប្រឆាំងនឹង COVID-19 ទម្រង់ថ្មី ហើយការសិក្សាស្រាវជ្រាវបន្ថែមកំពុងដំណើរការ ដើម្បីកំណត់ថាតើទម្រង់ថ្មីនៃវីរុសនេះ អាចនឹងបំផ្លាញប្រសិទ្ធភាពវ៉ាក់សាំងបានដែរឬទេ។ នេះបើតាមការចេញផ្សាយ ដោយទីភ្នាក់ងារព័ត៌មាន Reuters នៅព្រឹកថ្ងៃពុធ ទី២៣ ខែធ្នូ ឆ្នាំ២០២០។តំណាងក្រុមហ៊ុន AstraZeneca ម្នាក់បានថ្លែងប្រាប់ទីភ្នាក់ងារព័ត៌មាន Reuters តាមសារអេឡិចត្រូវនិចថា វ៉ាក់សាំង AZD1222 ដែលជាបេក្ខភាពវ៉ាក់សាំង COVID-19 របស់ក្រុមហ៊ុន AstraZeneca មានផ្ទុកសម្ភារៈសេនេទិចប្រូតេអ៉ីន «S» ឬ «spike protein» នៃវីរុសកូរ៉ូណា SARS-CoV-2 (COVID-19) ហើយការផ្លាស់ប្ដូរ ទម្រង់សេនេទិចនៅក្នុងវីរុស COVID-19 ទម្រង់ថ្មី ទំនងជានឹងមិនអាចផ្លាស់ប្ដូររចនាសម្ព័ន្ធនៃប្រូតេអ៉ីន «S» បាននោះទេ។អ្នកតំណាងក្រុមហ៊ុនផលិតឱសថអង់គ្លេសខាងលើនេះ បានបន្ថែមទៀតថា ដោយមានវ៉ាក់សាំង AZD1222 ប្រព័ន្ធភាពសុំានឹងត្រូវជំរុញសមត្ថភាព ឱ្យទទួលស្គាល់ផ្នែកផ្សេងៗគ្នាជាច្រើននៃប្រូតេអ៉ីន «S»។ ដូច្នេះវ៉ាក់សាំងនេះគួរតែអាចមានប្រសិទ្ធភាពប្រឆាំងនឹង COVID-19 ទម្រង់ថ្មី។គួរបញ្ជាក់ថា COVID-19 ទម្រង់ថ្មី ឬមានលេខកូតសម្គាល់ B.1.1.7 ត្រូវបានគេជឿជាក់ថា មានសមត្ថភាពចម្លងជំងឺបានយ៉ាងឆាប់រហ័ស ពោលគឺ ៧០ភាគរយលើស COVID-19 បច្ចុប្បន្ន ហើយកុមារអាចនឹងប្រឈមមុខ នឹងការឆ្លងវីរុសទម្រង់ថ្មីនេះខ្ពស់ជាងគេ។ ទោះជាយ៉ាងណា មកទល់នឹងពេលនេះមិនទាន់មានការបញ្ជាក់ថា តើវីរុស COVID-19 ទម្រង់ថ្មី មានភាពកាចសាហាវជាងទម្រង់ចាស់ ឬក៏មានសមត្ថភាពប្រឆាំងនឹងវ៉ាក់សាំងបច្ចុប្បន្ន ឬក៏យ៉ាងណានោះទេ៕

ក្រសួងសុខាភិបាល៖ អ្នកជំងឺ ២នាក់បានជាសះស្បើយ ខណៈមិនមានអ្នកឆ្លងកូវីដ១៩ ករណីថ្មីនោះទេ

ថ្ងៃទី ២៣ ខែ ធ្នូ ឆ្នាំ ២០២០ ម៉ោង ០៩:០៤

(ភ្នំពេញ)៖ នៅថ្ងៃទី២៣ ខែធ្នូ ឆ្នាំ២០២០នេះ ក្រសួងសុខាភិបាល បានចេញសេចក្តីប្រកាសព័ត៌មានបញ្ជាក់ថា មិនមានរកឃើញអ្នកឆ្លងជំងឺកូវីដ១៩ ថ្មីនៅកម្ពុជានោះទេ ខណៈអ្នកជំងឺកូវីដ១៩ ចំនួន២នាក់ថែមទៀត ត្រូវបានព្យាបាលជាសះស្បើយ និងអនុញ្ញាតឲ្យចេញពីមន្ទីរពេទ្យ។អ្នកជាសះស្បើយទាំង២នាក់នោះរួមមាន៖១៖ ស្ត្រីជនជាតិខ្មែរ អាយុ២១ឆ្នាំ ស្នាក់នៅសង្កាត់វាលស្បូវ ខណ្ឌច្បារអំពៅ រាជធានីភ្នំពេញ ជាបុគ្គលិកធនាគារមួយ ក្នុងរាជធានីភ្នំពេញ ត្រូវបានព្យាបាលជាសះស្បើយ ដោយទទួលលទ្ធផលអវិជ្ជមាន២លើក និងបានអនុញ្ញាតឲ្យចេញពីមន្ទីរពេទ្យមិត្តភាពខ្មែរ-សូវៀត។២៖ បុរសជនជាតិខ្មែរ អាយុ២៦ឆ្នាំ មានស្នាក់នៅស្រុកដងទង់ ខេត្តកំពត ធ្វើដំណើរមកពីប្រទេសជប៉ុន បន្តជើងហោះហើរនៅប្រទេសកូរ៉េខាងត្បូង មកដល់កម្ពុជា នៅថ្ងៃទី១៨ ខែវិច្ឆិកា ឆ្នាំ២០២០ ត្រូវបានព្យាបាលជាសះស្បើយ ដោយទទួលលទ្ធផលអវិជ្ជមាន២លើក និងបានអនុញ្ញាតឲ្យចេញពីមណ្ឌលសុខភាពចាក់អង្រែ រាជធានីភ្នំពេញ។សូមជម្រាបថា គិតត្រឹមម៉ោង៧៖០០នាទីព្រឹកថ្ងៃទី២៣ ខែធ្នូនេះ នៅកម្ពុជាបានរកឃើញអ្នកឆ្លងសរុបចំនួន ៣៦៣នាក់ ក្នុងនោះអ្នកព្យាបាលជាសះស្បើយ ចំនួន៣៤៩នាក់ និងអ្នកកំពុងសម្រាកព្យាបាលនៅមន្ទីរពេទ្យចំនួន ១៤នាក់។ សម្រាប់ឆ្លងក្នុងព្រឹត្តិការណ៍ «សហគមន៍២៨ វិច្ឆិកា» រកឃើញសរុបចំនួន ៤១នាក់ ក្នុងនោះអ្នកជំងឺព្យាបាលជាសះស្បើយចំនួន ៣២នាក់ និងអ្នកកំពុងសម្រាកព្យាបាល នៅមន្ទីរពេទ្យមានចំនួន ៩នាក់៕

សហភាពអឺរ៉ុប អនុម័តឲ្យប្រើវ៉ាក់សាំងកូវីដ-១៩ របស់ក្រុមហ៊ុន Pfizer-BioNTech ជាផ្លូវការ

ថ្ងៃទី ២២ ខែ ធ្នូ ឆ្នាំ ២០២០ ម៉ោង ១៣:៥៩

សហភាពអឺរ៉ុប (EU) នៅយប់ថ្ងៃចន្ទ (ពេលវេលានៅព្រុចសែល) បានធ្វើការអនុម័តភ្លាមៗតែម្តង ឲ្យបណ្តារដ្ឋទាំង ២៧ របស់ខ្លួនប្រើប្រាស់ វ៉ាក់សាំងប្រឆាំងវីរុសកូរ៉ូណា (COVID-19) ដែលផលិតឡើងដោយក្រុមហ៊ុន អាមេរិកសហការជាមួយអាល្លឺម៉ង់ នោះគឺក្រុមហ៊ុន Pfizer និង BioNTech។ ប្រធានគណៈកម្មការអឺរ៉ុប លោកស្រី យូស៊ូឡា វ៉ុន ដឺ ឡេយែន (Ursula von der Leyen) បានថ្លែងនៅយប់ថ្ងៃចន្ទនោះថា «យើងបានអនុម័តឲ្យប្រើប្រាស់ នូវវ៉ាក់សាំងប្រឆាំង COVID-19 ដំបូង ដែលប្រកបដោយប្រសិទ្ធភាព និងសុវត្ថិភាព។ វ៉ាក់សាំងបន្ថែមទៀត នឹងមកដល់ក្នុងពេលឆាប់ៗ។ វ៉ាក់សាំងជាច្រើនដូស ដែលយើងបានអនុម័តរួចនោះ នឹងត្រូវផ្តល់ដល់ប្រទេសជាសមាជិកទាំងឡាយ នៅក្នុងពេលតែមួយ និងលក្ខខណ្ឌតែមួយ»។សហភាពអឺរ៉ុបបានផ្តល់សញ្ញាថា ខ្លួននឹងអនុម័តឲ្យប្រើប្រាស់វ៉ាក់សាំងប្រឆាំង COVID-19 របស់ក្រុមហ៊ុន Pfizer និង BioNTech តាំងតែពីសប្តាហ៍មុនមកម្ល៉េះ ប៉ុន្តែការសម្រេចជាផ្លូវការ ទើបតែត្រូវបានធ្វើឡើងក្រោយពី ទីភ្នាក់ងារត្រួតពិនិត្យឱសថអឺរ៉ុប (EMA) បានអនុម័តទទួលស្គាល់វ៉ាក់សាំងនេះ ជាផ្លូវការនៅថ្ងៃចន្ទដើមសប្តាហ៍នេះ។ តែប៉ុន្មានម៉ោងប៉ុណ្ណោះក្រោយការសម្រេចរបស់ EMA គណៈកម្មការអឺរ៉ុប បានប្រកាសអនុម័តជាផ្លូវការឲ្យបណ្តាប្រទេសជាសមាជិក ប្រើប្រាស់វ៉ាក់សាំងនោះតែម្តង។គួរបញ្ជាក់ថា វ៉ាក់សាំង COVID-19 នឹងត្រូវធ្វើការចែកចាយទៅកាន់ បណ្តាប្រទេសអឺរ៉ុបនៅថ្ងៃទី២៦ ខែធ្នូ ឆ្នាំ២០២០ (ក្រោយថ្ងៃបុណ្យណូអែល) ហើយការចាប់ផ្តើមចាក់ជាផ្លូវការ នឹងត្រូវធ្វើឡើងនៅថ្ងៃទី២៧ ខែធ្នូ។ អឺរ៉ុបទាំងមូលនឹងទទួលបានវ៉ាក់សាំងរហូតដល់ ២០០លានដូស នៅត្រឹមខែកញ្ញា ឆ្នាំ២០២១។ មិនខុសពីប្រទេសដទៃទៀតឡើយ ការចាក់វ៉ាក់សាំង COVID-19 នឹងត្រូវផ្តល់អាទិភាពដល់ បុគ្គលិកសុខាភិបាលជួរមុខ និងមនុស្សមានវ័យចំណាស់៕