trollkhmer news

សង្គមនិងជីវិត

អេស្ប៉ាញ៖ មនុស្សជាង ៥០,០០០នាក់បានស្លាប់ដោយសារកូវីដ-១៩

ថ្ងៃទី ២៩ ខែ ធ្នូ ឆ្នាំ ២០២០ ម៉ោង ១៣:២០

(ម៉ាឌ្រីដ)៖ ទិន្នន័យដែលត្រូវបានចេញផ្សាយ ដោយក្រសួងសុខាភិបាលអេស្ប៉ាញ នៅដើមសប្ដាហ៍នេះបានបង្ហាញថា ចំនួនអ្នកស្លាប់ដោយសារ COVID-19 បានកើនឡើងដល់ជាង ៥ម៉ឺននាក់ហើយ ខណៈចំនួនអត្រាឆ្លងបានធ្លាក់ចុះជាលើកដំបូង មិនធ្លាប់មានក្នុងរយៈពេលជិត ៣សប្តាហ៍មកនេះ។ ករណីឆ្លង COVID-19 ថ្មីៗសរុប ២៤,៤៦២ករណី ត្រូវបានរាយការណ៍ គិតចាប់តាំងពីថ្ងៃព្រហស្បតិ៍សប្ដាហ៍មុន ដែលធ្វើឲ្យចំនួនករណីឆ្លងសរុប នៅទូទាំងប្រទេសកើនឡើងដល់ជិត ១.៨៨លានករណី ក្នុងនោះមានអ្នកស្លាប់សរុប ៥០,១២២នាក់។ នេះគឺជាទិន្នន័យផ្លូវការដំបូងបង្អស់ ដែលរដ្ឋាភិបាលអេស្ប៉ាញបានចេញផ្សាយ ចាប់តាំងពីប្រទេសនេះ បានបើកយុទ្ធនាការចាក់វ៉ាក់សាំងប្រឆាំងវីរុសកូរ៉ូណា (COVID-19) កាលពីថ្ងៃអាទិត្យសប្តាហ៍មុន។ប្រធានមជ្ឈមណ្ឌលសុខាភិបាលសង្គ្រោះបន្ទាន់អេស្ប៉ាញ លោក ហ្វឺណាន់ដូ សាយមិន (Fernando Simon) បានគូសបញ្ជាក់ ក្នុងសន្និសីទសារព័ត៌មានមួយថា ទិន្នន័យក្នុងរយៈពេល ១៤ថ្ងៃចុងក្រោយនេះ បានបង្ហាញពីស្ថេរភាព នៅក្នុងការគ្រប់គ្រងកម្រិតនៃការឆ្លង និងការកាត់បន្ថយចំនួនអ្នកស្លាប់។ តែទោះយ៉ាងណាលោក Simon បានព្រមានថា តួលេខអាចត្រូវបានកែប្រែនៅប៉ុន្មានថ្ងៃខាងមុខទៀត ព្រោះថ្ងៃឈប់សម្រាកបុណ្យណូអែលកាលពីប៉ុន្មានថ្ងៃមុន អាចធ្វើឲ្យអត្រាឆ្លងកើនឡើងវិញ៕

ក្រសួងអប់រំ ប្រកាសបើកដំណើរការ សាលារៀនឯកជនឡើងវិញចាប់ពីថ្ងៃនេះតទៅ ខណៈសាលារដ្ឋបើកបវេសនកាលឆ្នាំថ្មី ចាប់ពីថ្ងៃទី១១ មករាតទៅ

ថ្ងៃទី ២៩ ខែ ធ្នូ ឆ្នាំ ២០២០ ម៉ោង ១០:២០

(ភ្នំពេញ)៖ ក្រសួងអប់រំ យុវជន និងកីឡា នៅព្រឹកថ្ងៃទី២៩ ខែធ្នូ ឆ្នាំ២០២០នេះ បានចេញសេចក្តីណែនាំ ដោយអនុញ្ញាតឲ្យគ្រឹះស្ថានសិក្សាឯកជន (សាលាឯកជន) បើកដំណើរការឡើងវិញ នៅចាប់ពីថ្ងៃនេះតទៅ ខណៈការបើកបវេសនាកាលឆ្នាំសិក្សា ២០២០-២០២១ សម្រាប់គ្រឹះស្ថានសិក្សាចំណេះទូទៅសាធារណៈ (សាលារដ្ឋ) កំណត់យកចាប់ពីថ្ងៃទី១១ ខែមករា ឆ្នាំ២០២១។ការប្រកាសឲ្យសិស្សចូលរៀនឡើងវិញនេះ ធ្វើឡើងបន្ទាប់ពីបិទបញ្ចប់ព្រឹត្តិការណ៍ «សហគមន៍២៨វិច្ឆិកា»។ជាមួយគ្នានេះ ក្រសួងអប់រំតម្រូវជាចាំបាច់ ឲ្យគ្រឹះស្ថានសិក្សាទាំងអស់ ត្រូវបន្តអនុវត្តគោលការណ៍ប្រតិបត្តិស្តង់ដា (SOP) សម្រាប់ដំណើរការសាលារៀនឡើងវិញ ក្នុងបរិបទកូវីដ១៩ និងរក្សាគម្លាតសុវត្ថិភាពសង្គម និងបុគ្គល។ ក្នុងករណីចាំបាច់ ត្រូវពាក់ម៉ាសការពារនៅក្នុងបរិវេណរបស់គ្រឹះស្ថានសិក្សា៕

ក្រសួងសុខាភិបាល៖ មិនមានអ្នកឆ្លងកូវីដ១៩ ករណីថ្មីនោះទេ ហើយអ្នកជាសះស្បើយក៏គ្មានដែរ

ថ្ងៃទី ២៩ ខែ ធ្នូ ឆ្នាំ ២០២០ ម៉ោង ០៩:០៥

(ភ្នំពេញ)៖ ក្រសួងសុខាភិបាល នៅព្រឹកថ្ងៃទី២៩ ខែធ្នូ ឆ្នាំ២០២០នេះ បានចេញសេចក្តីប្រកាសព័ត៌មានបញ្ជាក់ថា មិនមានរកឃើញករណីឆ្លងជំងឺកូវីដ១៩ ថ្មីនៅកម្ពុជានោះទេ ខណៈអ្នកជាសះស្បើយក៏គ្មានដែរ។គិតមកត្រឹមម៉ោង៧៖០០នាទី ព្រឹកថ្ងៃទី២៩ ខែធ្នូ ឆ្នាំ២០២០នេះ កម្ពុជាបានរកឃើញអ្នកឆ្លងកូវីដ១៩ ចំនួន៣៦៤នាក់ ក្នុងនោះអ្នកព្យាបាលជាសះស្បើយចំនួន ៣៦០នាក់ និងអ្នកកំពុងសម្រាកព្យាបាល នៅមន្ទីរពេទ្យចំនួន៤នាក់។ សម្រាប់អ្នកជាប់ពាក់ព័ន្ធព្រឹត្តិការណ៍ «សហគមន៍២៨វិច្ឆិកា» វិញ រកឃើញវិជ្ជមានចំនួន ៤១នាក់ ក្នុងនោះបានជាសះស្បើយ៣៨នាក់ និង៣នាក់ទៀតកំពុងសម្រាកនៅមន្ទីរពេទ្យ៕

អ្នកឆ្លង COVID-19 លើលោកកើនដល់ជាង ៨១លាននាក់ ស្លាប់ជាង ១លាន ៧៧ម៉ឺននាក់ និងជាសះស្បើយជាង ៥៧លាននាក់

ថ្ងៃទី ២៨ ខែ ធ្នូ ឆ្នាំ ២០២០ ម៉ោង ១០:៣៥

(បរទេស)៖ គិតត្រឹមម៉ោង ៨ព្រឹកថ្ងៃចន្ទ ទី២៨ ខែធ្នូ ឆ្នាំ២០២០នេះ ចំនួនអ្នកឆ្លងជំងឺ COVID-19 នៅទូទាំងពិភពលោក បានកើនឡើងដល់ ៨១,១៣៣,៨២៤នាក់ហើយ។ ក្នុងនោះអ្នកស្លាប់មានចំនួន ១,៧៧១,៤២៤នាក់ និងជាសះស្បើយឡើងវិញ ៥៧,២៨១,៥២៩នាក់។យោងតាមទិន្នន័យពីគេហទំព័រអន្តរជាតិ Worldometer បានបង្ហាញថា ការរីករាលដាលនៃជំងឺកូវីដ១៩ នៅតែមានសភាពស្រួចស្រាវចំនួនអ្នកឆ្លង និងស្លាប់ថ្មីនៅតែមានចំនួនច្រើន។សហរដ្ឋអាមេរិក នៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ។ សហរដ្ឋអាមេរិក មានអ្នកឆ្លងជំងឺ COVID-19 ចំនួន ១៩, ៥៧៣,៨៤៧នាក់ ស្លាប់ចំនួន ៣៤១,១៣៨នាក់ និងជាសះស្បើយចំនួន ១១,៤៩៥,៨៧៥នាក់។ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺកូវីដ១៩ គឺប្រទេសឥណ្ឌា។ ឥណ្ឌាមានអ្នកឆ្លង ១០,២០៨,៧២៥នាក់ ស្លាប់ចំនួន ១៤៧,៩៤០នាក់ និងជាសះស្បើយ ៩,៧៨១,៩៤៥នាក់។ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល។ ប្រេស៊ីល មានអ្នកឆ្លង ៧,៤៨៤,២៨៥នាក់ ស្លាប់ ១៩១,១៤៦នាក់ និងជាសះស្បើយ ៦,៥១៥,៣៧០នាក់៕

ក្រសួងសុខាភិបាល៖ អ្នកជំងឺ ៤នាក់បានជាសះស្បើយ ខណៈមិនមានឆ្លងកូវីដ១៩ ករណីថ្មីនោះទេ

ថ្ងៃទី ២៨ ខែ ធ្នូ ឆ្នាំ ២០២០ ម៉ោង ០៨:៥៦

(ភ្នំពេញ)៖ ក្រសួងសុខាភិបាល នៅព្រឹកថ្ងៃទី២៨ ខែធ្នូ ឆ្នាំ២០២០នេះ បានចេញសេចក្តីប្រកាសព័ត៌មានបញ្ជាក់ពីការ មិនមានរកឃើញករណីឆ្លងជំងឺកូវីដ១៩ ថ្មីនោះទេ ខណៈអ្នកជំងឺចំនួន៤នាក់ថែមទៀត បានជាសះស្បើយ និងអនុញ្ញាតឲ្យចេញពីមន្ទីរពេទ្យ។អ្នកជាសះស្បើយទាំង៤នាក់រួមមាន៖១៖ បុរសជនជាតិខ្មែរ អាយុ៣៥ឆ្នាំ ស្នាក់នៅសង្កាត់បឹងកេងកក៣ ខណ្ឌបឹងកេងកង រាជធានីភ្នំពេញ បានទៅហាង Zando សាខាបឹងកេងកង កាលពីថ្ងៃទី២៧ ខែវិច្ឆិកា ឆ្នាំ២០២០ ត្រូវបានព្យាបាលជាសះស្បើយ និងអនុញ្ញាតឲ្យចេញពីមន្ទីរពេទ្យមិត្តភាពខ្មែរ-សូវៀត។២៖ បុរសកជនជាតិហ៊្សកដានី អាយុ៤៧ឆ្នាំ ស្នាក់នៅសណ្ឋាគារមួយ ក្នុងរាជធានីភ្នំពេញ ជាអ្នកដំណើរមកពីប្រទេសហ៊្សកដានី បន្តជើងហោះហើរនៅប្រទេសកូរ៉េខាងត្បូង មកដល់កម្ពុជា នៅថ្ងៃទី០១ ខែធ្នូ ឆ្នាំ២០២០ ត្រូវបានព្យាបាលជាសះស្បើយ និងអនុញ្ញាតឲ្យចេញពី មជ្ឈមណ្ឌលជាតិកំចាត់រោគរបេង និងហង់សិន រាជធានីភ្នំពេញ។៣៖ ស្ត្រីជនជាតិជប៉ុន អាយុ២៩ឆ្នាំ ស្នាក់នៅសណ្ឋាគារមួយ ក្នុងរាជធានីភ្នំពេញ ជាអ្នកដំណើរមកពីប្រទេសជប៉ុន បន្តជើងហោះហើរនៅប្រទេសកូរ៉េខាងត្បូង មកដល់កម្ពុជា នៅថ្ងៃទី១៣ ខែធ្នូ ឆ្នាំ២០២០ ត្រូវបានព្យាបាលជាសះស្បើយ និងអនុញ្ញាតឲ្យចេញពីមន្ទីរពេទ្យមិត្តភាពខ្មែរ-សូវៀត។៤៖ ស្ត្រីជនជាតិខ្មែរ-អាមេរិកាំង អាយុ៥៥ឆ្នាំ ស្នាក់នៅសណ្ឋាគារមួយ ក្នុងរាជធានីភ្នំពេញ បានធ្វើដំណើរមកពីអាមេរិក បន្តជើងហោះហើរនៅប្រទេសចិន (តៃវ៉ាន់) មកដល់កម្ពុជា នៅថ្ងៃទី២០ ខែធ្នូ ឆ្នាំ២០២០ ត្រូវបានព្យាបាលជាសះស្បើយ និងអនុញ្ញាតឲ្យចេញពី មជ្ឈមណ្ឌលជាតិកំចាត់រោគរបេង និងហង់សិន រាជធានីភ្នំពេញ។សូមជម្រាបថា គិតត្រឹមម៉ោង៧៖០០នាទី ព្រឹកថ្ងៃទី២៨ ខែធ្នូ ឆ្នាំ២០២០នេះ កម្ពុជាបានរកឃើញអ្នកឆ្លងកូវីដ១៩ ចំនួន៣៦៤នាក់ ក្នុងនោះអ្នកព្យាបាលជាសះស្បើយចំនួន ៣៦០នាក់ និងអ្នកកំពុងសម្រាកព្យាបាល នៅមន្ទីរពេទ្យចំនួន៤នាក់។ សម្រាប់អ្នកជាប់ពាក់ព័ន្ធព្រឹត្តិការណ៍ «សហគមន៍២៨វិច្ឆិកា» វិញ រកឃើញវិជ្ជមានចំនួន ៤១នាក់ ក្នុងនោះបានជាសះស្បើយ៣៨នាក់ និង៣នាក់ទៀតកំពុងសម្រាកនៅមន្ទីរពេទ្យ៕

ជប៉ុន រកឃើញវីរុសកូវីដ-១៩ទម្រង់ថ្មី ជាលើកដំបូងលើមនុស្ស ៥នាក់

ថ្ងៃទី ២៦ ខែ ធ្នូ ឆ្នាំ ២០២០ ម៉ោង ១០:៤១

(តូក្យូ)៖ ក្រសួងសុខាភិបាលជប៉ុនបានប្រកាស នៅព្រឹកថ្ងៃសៅរ៍ ទី២៦ ខែធ្នូ ឆ្នាំ២០២០នេះថា ខ្លួនបានរកឃើញករណីឆ្លងដំបូងៗនៃវីរុស COVID-19 ទម្រង់ថ្មី ដែលបានផ្ទុះឡើងមុនគេនៅចក្រភពអង់គ្លេស។ នេះបើតាមការចេញផ្សាយ ដោយសារព័ត៌មាន CNA។ករណីឆ្លងវីរុស COVID-19 ទម្រង់ថ្មីខាងលើនេះ ត្រូវបានរកឃើញទៅលើមនុស្ស ០៥នាក់ ដែលបានធ្វើដំណើរមកដល់ប្រទេសជប៉ុន កាលពីចន្លោះថ្ងៃទី១៨-២១ ខែធ្នូ ឆ្នាំ២០២១ គឺនៅមុនពេលដែលប្រទេសដីកោះមួយនេះ ចាប់ផ្តើមអនុវត្តវិធានការរឹតបន្តឹង ការធ្វើដំណើរទៅមក ជាមួយចក្រភពអង់គ្លេស កាលពីថ្ងៃសុក្រម្សិលមិញ។បើតាមក្រសួងសុខាភិបាលជប៉ុន ករណីឆ្លងសរុប ០៥នាក់ខាងលើនេះ គឺម្នាក់ជាបុរសវ័យ ៦៥ឆ្នាំមានចេញអការៈអស់ខ្លាំង ខណៈមនុស្ស ០៤នាក់ទៀត គឺមិនមានចេញរោគសញ្ញាអ្វីឡើយ។ បច្ចុប្បន្នអ្នកជំងឺ COVID-19 ទាំង ០៥រូបកំពុងបន្តធ្វើចត្តាឡីស័ក និងទទួលការព្យាបាល។គួរបញ្ជាក់ថា វីរុស COVID-19 ទម្រង់ថ្មីនេះ ត្រូវបានរកឃើញមុនគេនៅចក្រភពអង់គ្លេស ដោយដំណាក់កាលដំបូង វាត្រូវបានក្រុមអ្នកវិទ្យាសាស្ត្រអង់គ្លេសអះអាងថា មានសមត្ថភាពចម្លងលើសវីរុសធម្មតា រហូតដល់ទៅ ៧០%។ ទោះជាបែបនេះក្តី ការសិក្សាលម្អិតអំពីវាកំពុងប្រព្រឹត្តទៅនៅឡើយ ហើយអង្គការសុខភាពពិភពលោក (WHO) ក៏ធ្លាប់បានបកស្រាយផងដែរថា វាជារឿងធម្មតានោះទេ ដែលវីរុសតែងតែវិវឌ្ឍខ្លួន៕

ក្រសួងសុខាភិបាល៖ មិនមានឆ្លងកូវីដ១៩ ថ្មីករណីនោះទេ ខណៈអ្នកជំងឺម្នាក់ជាសះស្បើយ

ថ្ងៃទី ២៦ ខែ ធ្នូ ឆ្នាំ ២០២០ ម៉ោង ០៩:០៨

(ភ្នំពេញ)៖ ក្រសួងសុខាភិបាល នៅព្រឹកថ្ងៃទី២៦ ខែធ្នូ ឆ្នាំ២០២០នេះ បានចេញសេចក្តីប្រកាសព័ត៌មានបញ្ជាក់ពីការ មិនមានរកឃើញករណីឆ្លងកូវីដ១៩ ថ្មីនៅកម្ពុជានោះទេ ខណៈជំងឺកូវីដ១៩ ម្នាក់ថែមទៀត បានជាសះស្បើយ និងត្រូវបានអនុញ្ញាតឲ្យចេញពីមន្ទីរពេទ្យ។អ្នកជាសះស្បើយ គឺជាស្ត្រីជនជាតិខ្មែរ អាយុ៤៥ឆ្នាំ ស្នាក់នៅសង្កាត់និរោធ ខណ្ឌច្បារអំពៅ រាជធានីភ្នំពេញ ជាម្តាយមីរបស់បុរស អាយុ៣៦ឆ្នាំ ដែលបានជាសះស្បើយ កាលពីថ្ងៃទី១៥ ខែធ្នូ ឆ្នាំ២០២០។ ស្ត្រីខាងលើនេះ ត្រូវបានព្យាបាលជាសះស្បើយ ដោយទទួលបានលទ្ធផលតេស្ត អវិជ្ជមានវីរុសកូវីដ១៩ ចំនួន០២លើក ត្រូវបានអនុញ្ញាតឲ្យចេញពីមន្ទីរពេទ្យមិត្តភាពខ្មែរ-សូវៀត រាជធានីភ្នំពេញ។សូមជម្រាបថា គិតត្រឹមម៉ោង៧៖០០នាទី ព្រឹកថ្ងៃទី២៦ ខែធ្នូ ឆ្នាំ២០២០នេះ នៅកម្ពុជាបានរកឃើញអ្នកឆ្លងកូវីដ១៩ ចំនួន ៣៦៣នាក់ ក្នុងនោះអ្នកព្យាបាលជាសះស្បើយចំនួន ៣៥៥នាក់ និងអ្នកកំពុងសម្រាកព្យាបាលនៅមន្ទីរពេទ្យចំនួន ៨នាក់។ សម្រាប់អ្នកឆ្លងក្នុងព្រឹត្តិការណ៍ «សហគមន៍២៨វិច្ឆិកា» មានចំនួន ៤១នាក់ ក្នុងអ្នកព្យាបាលជាសះស្បើយចំនួន ៣៧នាក់ និងអ្នកកំពុងសម្រាកនៅមន្ទីរពេទ្យចំនួន ៤នាក់៕

ថៃ រកឃើញអ្នកឆ្លងកូវីដ-១៩ចំនួន ៨១នាក់ទៀត ក្នុងនោះ៧២នាក់ជាករណីឆ្លងសហគមន៍

ថ្ងៃទី ២៥ ខែ ធ្នូ ឆ្នាំ ២០២០ ម៉ោង ១៣:៣៦

(បាងកក)៖ នៅថ្ងៃសុក្រ ទី២៥ ខែធ្នូ ឆ្នាំ២០២០នេះ ប្រទេសថៃបានរកឃើញអ្នកឆ្លងជំងឺ COVID-19 ចំនួន ៨១នាក់ថ្មីទៀតដោយក្នុងនោះ ៧២នាក់ជាករណីឆ្លងក្នុងសហគមន៍ និង ០៩នាក់ជាករណីនាំចូលពីក្រៅប្រទេស។ នេះបើតាមការទីភ្នាក់ងារព័ត៌មាន Reuters ដកស្រង់ប្រភពពីក្រសួងសុខាភិបាលថៃ។ក្រសួងខាងលើនេះបានគូសបញ្ជាក់ថា នៅក្នុងចំណោមករណីឆ្លងសហគមន៍ទាំង ៧២នាក់ខាងលើនេះ ពាក់កណ្តាលមានជាប់ពាក់ព័ន្ធទៅនឹងករណីផ្ទុះការឆ្លង COVID-19 ក្នុងទីផ្សារលក់អាហារសមុទ្រ នៅក្នុងខេត្ត សាមុត សាខន (Samut Sakhorn) ភាគនិរតីប្រទេសថៃ។ ទោះជាបែបនេះក្តី អាជ្ញាធរថៃពុំបានបញ្ជាក់ព័ត៌មានលម្អិតបន្ថែម ជុំវិញអត្តសញ្ញាណ ឬខេត្តក្រុងដែលអ្នកឆ្លងជំងឺថ្មីៗនេះ រស់នៅនោះឡើយ ប៉ុន្តែបណ្តាញសង្គមនានានៅក្នុងប្រទេសថៃ ត្រូវបានគេរាយការណ៍ថា កំពុងតែពោពេញដោយការរិះគន់ចំពោះពលករមីយ៉ាន់ម៉ា ដែលត្រូវបានគេចោទប្រកាន់ថា បានលួចចូលមកក្នុងប្រទេសថៃដោយខុសច្បាប់ និងបានបង្កឲ្យផ្ទុះករណីឆ្លង COVID-19 យ៉ាងគំហុកនេះ។គួរបញ្ជាក់ថា គិតត្រឹមថ្ងៃសុក្រនេះ ប្រទេសថៃមានករណីឆ្លង COVID-19 សរុប ៥,៩១០ករណី ក្នុងនោះស្លាប់ ៦០នាក់ និងជាសះស្បើយវិញ ៤,១៣០នាក់។ ក្នុងចំណោមករណីឆ្លងថ្មីៗចុងក្រោយនេះ ភាគច្រើនបំផុតគឺជាពលករចំណាកស្រុក ស្ថិតនៅក្នុងខេត្ត សាមុត សាខន ប៉ុន្តែនៅក្នុងរយៈពេលពីរទៅបីថ្ងៃមកនេះ អាជ្ញាធរថៃមិនបានបង្ហើបព័ត៌មានលម្អិត អំពីករណីឆ្លងក្នុងចំណោមពលករបរទេសនេះឡើយ៕

អង់គ្លេស ចាក់វ៉ាក់សាំងកូវីដ-១៩ ជូនប្រជាជនបានជាង ៦០ម៉ឺននាក់ហើយសម្រាប់ដូសដំបូង

ថ្ងៃទី ២៥ ខែ ធ្នូ ឆ្នាំ ២០២០ ម៉ោង ១០:១៨

(ឡុងដ៍)៖ រដ្ឋាភិបាលអង់គ្លេសបានប្រកាសថា ប្រជាជនជាង ៦០០,០០០នាក់នៅចក្រភពអង់គ្លេស បានទទួលការចាក់វ៉ាក់សាំងប្រឆាំងវីរុសកូរ៉ូណា (COVID-19) ដែលអភិវឌ្ឍឡើងដោយ ក្រុមហ៊ុនផលិតឱសថអាមេរិក-អាល្លឺម៉ង់ Pfizer-BioNTech សម្រាប់ដូសដំបូងរួចហើយ គិតចាប់តាំងពីការចាប់ផ្តើមយុទ្ធនាការចាក់វ៉ាក់សាំង នៅក្នុងប្រទេសកាលពីដើមខែធ្នូនេះមកម្ល៉េះ។ នាយកដ្ឋានសុខាភិបាលអង់គ្លេស បានគូសបញ្ជាក់នៅក្នុងសេចក្តីថ្លែងការណ៍មួយថា «ថ្ងៃនេះរដ្ឋាភិបាលអង់គ្លេស បានរាយការណ៍ឲ្យដឹងថា អ្នកដែលបានទទួលការចាក់វ៉ាក់សាំង COVID-19 ចន្លោះពីថ្ងៃទី០៨ ខែធ្នូ ដល់ថ្ងៃទី២០ ខែធ្នូនៅចក្រភពអង់គ្លេសមានចំនួន ៦១៦,៩៣៣នាក់ហើយ»។ កាលពីដើមខែធ្នូនេះ ចក្រភពអង់គ្លេសបានក្លាយជាប្រទេស ដំបូងគេបង្អស់នៅលើពិភពលោក ដែលបានទទួលការចាក់វ៉ាក់សាំង COVID-19 ដែលអភិវឌ្ឍឡើងដោយ ក្រុមហ៊ុនផលិតឱសថអាមេរិក-អាល្លឺម៉ង់ Pfizer-BioNTech។ចក្រភពអង់គ្លេស បានបញ្ជាទិញវ៉ាក់សាំង COVID-19 របស់ក្រុមហ៊ុនផលិតឱសថ Pfizer ចំនួន ៤០លានដូស ដោយរដ្ឋមន្ត្រីសុខាភិបាលអង់គ្លេស លោក ម៉ាត់ ហានខក់ (Matt Hancock) បាននិយាយថា លោករំពឹងថា នឹងទទួលបានដូសរាប់លានដូសទៀតនៅចុងឆ្នាំ២០២០នេះ។គួរបញ្ជាក់ថា បើតាមគេហទំព័រ Worldometers ចក្រភពអង់គ្លេស បានកត់ត្រានូវករណីឆ្លង COVID-19 សរុបនៅទូទាំងប្រទេស ២,១៨៨,៥៨៧ករណី ក្នុងនោះមានអ្នកស្លាប់ ៦៩,៦២៥នាក់ និងជាសះស្បើយមិនទាន់មានទិន្នន័យច្បាស់លាស់ឡើយ៕