មនុស្សជិត៤០០០ នាក់រត់គេចចេញពីជម្លោះនៅភាគខាងជើងប្រទេសមីយ៉ាន់ម៉ា
ទីភ្នាក់ងារសារព័ត៌មានចិនស៊ីនហួបានឱ្យដឹងថា មនុស្សច្រើនជាង ៣៩០០បានផ្លាស់ទីលំនៅដោយសារតែការប៉ះទង្គិចគ្នាថ្មីៗ រវាងក្រុមប្រដាប់អាវុធនៅភាគខាងជើងរដ្ឋសានរបស់ប្រទេសមីយ៉ាន់ម៉ា កាលពីខែឧសភា។បើយោងតាមរបាយការណ៍មួយរបស់ការិយាល័យអង្គការសហប្រជាជាតិទទួលបន្ទុកសម្របសម្រួលកិច្ចការមនុស្សធម៌ (UNOHCA) ក្នុងប្រទេសមីយ៉ាន់ម៉ានៅថ្ងៃសុក្រនេះបានឱ្យដឹងថា មនុស្សប្រមាណជា ១៦០០ នាក់បានចាកចេញពីភូមិរបស់ពួកគេក្នុងក្រុង Kyaukme និង Hsipaw កាលពីដើមខែឧសភា។របាយការណ៍នេះបានឱ្យដឹងថា ចំនួនប្រជាជនសរុបដែលផ្លាស់ទីលំនៅបានកើនដល់១១១០០ គិតចាប់ពីខែកុម្ភៈ មកត្រឹមខែឧសភា ដែលជាលទ្ធផលបណ្តាលមកពីការប្រយុទ្ធគ្នារវាងក្រុមប្រឹក្សាស្តាររដ្ឋសាន (RCSS) / រដ្ឋសានកងទ័ពខាងត្បូង (SSA-S) និងកងទ័ពរំដោះជាតិ Ta'ang ( TNLA) ។បច្ចុប្បន្ននេះប្រជាជនផ្លាស់ទីលំនៅកំពុងស្នាក់នៅក្នុងជម្រក វត្តអារាមនានា និងនៅជំរំដែលមានស្រាប់។ អាជ្ញាធរនិងអង្គការក្នុងស្រុកកំពុងផ្តល់ជំនួយម្ហូបអាហារដល់ពួកគេ៕
កងកម្លាំងយោធាឥណ្ឌូនេស៊ី បាញ់អាវុធគំរាមទូកនេសាទខុសច្បាប់វៀតណាម និងហ្វីលីពីន
កាលពីពេលថ្មីៗនេះ កម្លាំងយោធាឥណ្ឌូនេស៊ី បានរឹបអូស និងឃាត់ទុកទូកនេសាទពីរគ្រឿង បន្ទាប់ពីបានប្រតិបត្តិការតានដាន១៣ម៉ោងមក ទូកនេសាទពីរគ្រឿងនោះ មានមួយជារបស់ហ្វីលីពីន ដែលមានផ្ទុកនាវិក១០នាក់ និងមួយទៀតជារបស់វៀតណាមដែលមានផ្ទុកនាវិក១៣នាក់។ប្រភពសារព័ត៌មាន Jakarta Globe បានឱ្យដឹងទៀតថា អ្នកនាំពាក្យកងទ័ពជើងទឹក លោក Maman Sulaeman បានរាយការណ៍អំពីទូកដែលមានទម្ងន់១២ និង១៤តោននោះ ត្រូវបានស្ទាក់ទុកក្រោយ ទូកទាំងនោះមិនគោរពតាមបទបញ្ជាដែលបានបង្គាប់ឲ្យទូកនោះឈប់ ហើយយោធា ក៏បានបាញ់គំរាមបីគ្រាប់ផងដែរ។នៅពេលយុទ្ធនាការចាប់បង្រ្កាបចាប់ផ្ដើម ក្រុមទូកទាំងនោះ មិនមានឆន្ទៈក្នុងការឈប់ដំណើរ នោះទេ និងថែមបានព្យាយាមរុលចូលទៀត។ តែក្រោយពីប្រតិបត្តិការស្វិតស្វាញជាយូរមក ទើបក្រុមទូកទាំងនោះ ព្រមប្រគល់ខ្លួន។ យោធា ក៏បានរាប់អូសបានសត្វសមុទ្រមួយចំនួននៅលើទូកផងដែរ។គួររម្លឹកផងដែរថា កាលពីខែកុម្ភៈ និងមេសាកន្លងទៅ អាជ្ញាធរឥណ្ឌូនេស៊ី ក៏បានកម្ទេចទូកនេសាទរបស់ ហ្វីលីពីន វៀតណាម ម៉ាឡេស៊ីនិងមីយ៉ាន់ម៉ាសរុប៥០គ្រឿង ដោយចោទថាចូលនេសាទដោយខុសច្បាប់ក្នុងដែនអធិបតេយ្យរបស់ខ្លួន៕
មើលទូរស័ព្ទ LG themed X-Men នេះក៏មិនចាញ់ Galaxy S7 Batman Edition ប៉ុន្មានដែរ
ខ្សែភាពយន្តវីរៈបុរសជាច្រើនឥឡូវបានទទួលការគាំទ្រច្រើនពីសំណាក់ទស្សនិកជនហើយវាក៏អាចនឹងមានឥទ្ធិពលមកលើទូរស័ព្ទស្មាតហ្វូនដែរដូចជាខ្សែភាពយន្ត Batman V. Superman ដែលមាន themed Batman នៅលើទូរស័ព្ទ Samsung Galaxy S7 Edge ទើបចេញពេលថ្មីៗនេះចឹង។ឥឡូវនេះដោយសារតែភាពល្បីល្បាញរបស់កំពូលខ្សែភាពយន្ត X-Men: Apocalypse ក្រុមទូរស័ព្ទធំមួយនៅប្រទេសក៉ូរេ LG ក៏បានត្រៀមនឹងចេញទូរស័ព្ទត្រកូលសេរី X របស់ខ្លួនដែលនឹងមាន Theme របស់តួអង្គ X-Men នីមួយៗផងដែរដែលគ្រោងនឹងចេញជាផ្លូវការនៅប៉ែក អាមេរិច អាមេរិចឡាទីននិងអឺរ៉ុប នាខែកក្កដាខាងមុន។ក្នុងនោះទូរស័ព្ទពីរម៉ូដែលបានចេញកាលពីម្សិលមិញនេះគឺ LG X Power នឹងមាន Theme តួអង្គ Professor X ("Long Lasting Power") ចំណែក LG X Style នឹងមាន Theme តួអង្គ Mystique ("Fabulously Flawless Looks") ។ចំណែកទូរស័ព្ទពីរម៉ូដែលផ្សេងទៀតគឺ LG X Cam នឹងមាន Theme តួអង្គ Cyclops ("Extraordinary Vision") ចំណែក LG X Screen នឹងមាន Theme តួអង្គ Nightcrawler ("Agile and Swift") ។ចំពោះទូរស័ព្ទពីរម៉ូដែលទៀតគឺមិនទាន់បានប្រកាសចេញជាផ្លូវការឡើយគឺមាន LG X Max នឹងមាន Theme តួអង្គ Beast ("Big Beauty") ចំណែក LG X Mach នឹងមាន Theme តួអង្គ Quicksilver ("Extreme Super Speed") ។យើងអាចរំពឹងបានថា LG X Max នោះអាចនឹងជាទូរស័ព្ទដែលមានអេក្រង់ធំជាងទូរស័ព្ទត្រកូលផ្សេងៗរបស់ LG។ចំពោះ LG X Mach វិញគឺអាចនឹងមានដំណើររបស់ទូរស័ព្ទបានលឿនជាងធម្មតាឬក៏អាចមានកាមេរ៉ាល្បឿនលឿន (ឧទាហរណ៍ថា: មុខងារ Slow motion អាចនឹងមានកម្រិត fps ខ្ពស់ដើម្បីថតឬចាប់យកសកម្មភាពលឿនៗ ដូចនឹងតួអង្គ Quicksilver នេះចឹង)។
វិធិសាស្រ្តទប់ស្កាត់ពេលមានរបួស កុំអោយមានស្លាកស្នាមនៅលើសាច់
មិនថា អ្នកជាមនុស្សដែលមានការយកចិត្តទុកដាក់ ពីស្នាមដែលអាចនឹងកើតមាននៅលើស្បែក បន្ទាប់ពីមានរបួស មុត មុន ឬការវះកាត់តិចតួច ឬអត់ក្តី ក៏ការខិតខំបង្ការកុំឱ្យវាកើតមាន បន្ទាប់ពីរបួសជាសះស្បើយ នៅតែជារឿងដ៏សំខាន់មួយដែលអ្នកគួរតែធ្វើ។ មិនចាំបាច់ត្រូវប្រុងប្រៀបអីច្រើន ហើយក៏មិនពិបាករហូតដល់ អ្នកមិនអាចធ្វើបាននោះដែរ។ សូមព្យាយាមចងចាំសកម្មភាពខាងក្រោមនេះ ដើម្បីគ្រប់ពេលនៃការមានរបួស នឹងបន្សល់ទុកស្នាមតិចតួចបំផុត។1. សម្អាតមុខរបួសចេញ ពេលមានរបួសថ្មីៗ ៈ បន្ទាប់ពីមានរបួសភ្លាមៗ សូមយកទឹកត្រជាក់មកលាងសម្អាតបរិវេណរបួសនោះឱ្យបានស្អាត បន្ទាប់មកសឹមចាប់ឆ្កឹះ ឬលាងកម្ទេចដីចេញឱ្យអស់ ជាមួយនឹងទឹកអាល់កុល។2. គ្របរបួសឱ្យស្អាត ជាប់ជានិច្ច ៈ ការគ្របស្នាមរបួសឱ្យជិត គឺជាការជួយរារាំងមេរោគ ធូលីដី អាការរមាស់ផ្សេងៗ ពីខាងក្រៅកុំឱ្យជ្រាបចូលមកក្នុងរបួស ហើយក៏ជាការជួយរបួស ឱ្យមានជាតិសំណើម ដើម្បីជួយពន្លឿនការព្យាបាល ក្នុងរយៈពេល 2-3ថ្ងៃដំបូងផងដែរ។ អ្នកអាចប្រើក្រែម ដែលមានជាតិថ្នាំអង់ទីប៊ីយូទិក ឬប្រេងលាបស្បែក ដើម្បីរក្សាសំណើម និងអនាម័យដល់មុខរបួសក៏បាន។ រឿងសំខាន់មួយទៀតការដែលអ្នកគ្រប ឬបិទមុខរបួសឱ្យជិតបែបនេះ គឺជាការជួយកាត់បន្ថយការកើតមានសន្លាកបន្ទាប់ពីរបួសជាសះស្បើយ យ៉ាងមានប្រសិទ្ធភាពផងដែរ។3. កុំឆ្កឹះរបួស ៈ បន្ទាប់ពីមានរបួស ឬសូម្បីតែមុននៅលើស្បែកមុខក៏ដោយ ក៏អ្នកមិនត្រូវឆ្កឹះវាដែរ ព្រោះថាពេលវេលានេះរាងកាយរបស់អ្នកកំពុងធ្វើការយ៉ាងសកម្ម ក្នុងការព្យាបាលមុខរបួស។ កោសិកាឈាមស កំពុងរារាំងការលុកលុយរបស់មេរោគ ចំណែកឯកោសិកាឈាមក្រហម សុទ្ធតែកំពុងធ្វើឱ្យឈាម នៅមុខរបួសកកកុំឱ្យហូរមកទៀត ដូច្នេះបើអ្នកកេះ ឬឆ្កឹះវាមិនឈប់នោះ មិនត្រឹមតែធ្វើឱ្យមេរោគ មានឱកាសជ្រាបចូលទៅក្នុងមុខរបួសទេ តែវាក៏អាចធ្វើឱ្យរបួសស្នាមកាន់តែធំឡើងទៀតផង។ដូច្នេះអ្នកត្រូវតែចៀសវាង ឱ្យបាននូវចំណុចទាំងប៉ុន្មានខាងលើនោះ នោះឱកាសនៃការកើតមានស្នាមក្រោយ របួសនឹងមានកាន់តែតិចសម្រាប់អ្នក។ តែបើស្លាកស្នាមបានកើតមានទៅហើយនោះ មានតែស្វែងរកថ្នាំបំបាត់សន្លាកស្នាមមកលាបទេ ទើបជាវិធីដ៏ល្អ និងមានប្រសិទ្ធភាពបំផុត៕
ប្រធានាធិបតីថ្មីរបស់ប្រទេសហ្វ៊ីលីពីនថា ការសម្លាប់អ្នកកាសែតដែលពុករលួយគឺជារឿងត្រឹមត្រូវ
បណ្តាសារព័ត៌មានហ្វ៊ីលីពីនកាលពីថ្ងៃទី១ មិថុនា សម្តែងពីការក្តៅក្រហាយរបស់ពួកគេចំពោះពាក្យពេចន៍របស់ប្រធានាធិបតីទើបជាប់ឆ្នោត លោក RODRIGO DUTERTE ដែលវិនិច្ឆ័យថា ជារឿងត្រឹមត្រូវការសម្លាប់ពួកអ្នកកាសែតពុករលួយ ។ សារព័ត៌មានទាំងនេះយល់ថា ពាក្យពេចន៍បែបនេះហាក់ដូចជាការអំពាវនាវមួយឱ្យសម្លាប់មនុស្ស ។មេធាវីអាយុ៧១ឆ្នាំរូបនេះ បានឈ្នះក្នុងការបោះឆ្នោតប្រធានាធិបតីហ្វ៊ីលីពីន កាលពីខែឧសភា បន្ទាប់ពីយុទ្ធនាការឃោសនាមួយប្រើវោហាសាស្ត្រផ្សេងៗ ហើយសន្យាលុបបំបាត់ចោលឧក្រិដ្ឋកម្ម ដោយសម្លាប់ពួកជនឧក្រិដ្ឋច្រើនសិបពាន់នាក់ ។ លោក RODRIGO DUTERTE ត្រូវបានគេផ្តល់រហស្សនាមថា DONALD TRUMP ហ្វ៊ីលីពីន ។កាលពីថ្ងៃទី៣១ ឧសភា កន្លងមកនេះ លោក DUTERTE វិនិច្ឆ័យថា ការសម្លាប់ពួកអ្នកកាសែតពុករលួយអាចជារឿងត្រឹមត្រូវ ។ លោកថា ពុំមែនព្រោះតែពួកអ្នកជាអ្នកកាសែត ដែលរួចពីការធ្វើឃាតឡើយ ប្រសិនពួកអ្នកជាកូនមនុស្សអាក្រក់ ។ លោកពោលបែបនេះជាការឆ្លើយតបនឹងសំនួរថាតើ លោកប្រុងធ្វើបែបណាប្រឈមមុខនឹងការធ្វើឃាតពួកអ្នកកាសែត ក្រោយការធ្វើឃាតអ្នកយកព័ត៌មានម្នាក់នៅក្រុងម៉ានីល កាលពីសប្តាហ៍មុន ។សហភាពជាតិអ្នកកាសែតហ្វ៊ីលីពីន NUJP ក្នុងសេចក្តីប្រកាសមួយនិយាយថា ខ្លួនមានការស្រឡាំងកាំងចំពោះភាសានេះ ។ NUJP ទទួលស្គាល់ថា ពិតជាមានបញ្ហាពុករលួយក្នុងចំណោមសារព័ត៌មានហ្វ៊ីលីពីន ក៏ប៉ុន្តែគេមិនអាចលើកថា ជាភាពត្រឹមត្រូវចំពោះការសម្លាប់មនុស្សឡើយ ។ តាមពិតទៅ លោក DUTERTE បានប្រកាសដោយចំហពីការប្រមាញ់ដើម្បីបំបិទមាត់សារព័ត៌មានទាំងចំពោះពួកអ្នកកាសែតជាបុគ្គល ក៏ដូចជាចំពោះស្ថាប័នសារព័ត៌មានដោយលើកហេតុផលសាមញ្ញពីរឿងពុករលួយ ។
ទឹកជំនន់សម្លាប់មនុស្ស ៥នាក់នៅភាគខាងត្បូងអាល្លឺម៉ង់
ទីភ្នាក់ងារសារព័ត៌មានចិនស៊ីនហួបានឱ្យដឹងថា មនុស្ស ៥នាក់បានស្លាប់ដោយសារទឹកជំនន់នៅក្នុងរដ្ឋ Bavaria ភាគខាងត្បូងប្រទេសអាល្លឺម៉ង់។របាយការណ៍ប៉ូលិសរដ្ឋ Bavarian បានឱ្យដឹងថា ស្ត្រី៤នាក់ត្រូវបានបញ្ជាក់ថាស្លាប់កាលពីយប់ថ្ងៃពុធក្នុងស្រុក Rottal Inn ក្នុងពេលដែលសាកសពជនរងគ្រោះទី៥ ត្រូវបានរកឃើញនៅរសៀលថ្ងៃព្រហស្បតិ៍នេះ។បើតាមរបាយការណ៍បញ្ជាក់ថា នៅមានមនុស្សជាច្រើនទៀតកំពុងបាត់ខ្លួន។ និងថា សិស្សសាលាជាង១០នាក់ដែលបានជាប់នៅក្នុងសាលារៀនមួយកន្លែងរយៈពេលមួយយប់ថ្ងៃពុធត្រូវបានអនុញ្ញាតឱ្យត្រឡប់ទៅផ្ទះវិញ។ប៉ូលិសក្នុងតំបន់បានឱ្យដឹងថា បេសកកម្មបន្ទាន់របស់ពួកគេគឺស្វែងរកអ្នកដែលបាត់ខ្លួន និងបញ្ជាក់ថា ការផ្គត់ផ្គង់ទឹកនិងអគ្គិសនីនឹងដំណើរការធម្មតាវិញក្នុងរយៈពេលពីរបីថ្ងៃទៀត។គួរបញ្ជាក់ថា មន្ត្រីជាង ១០០ នាក់មកពីស្ថាប័នប៉ូលិស ទាហាន និងភ្នាក់ងារសង្គ្រោះបន្ទាន់ និងបុគ្គលិកស្ម័គ្រចិត្តជាង២០០០នាក់កំពុងជួយក្នុងប្រតិបត្តិការផ្តល់ជំនួយ និងសង្គ្រោះ។ អាជ្ញាធរបានព្យាករណ៍ថា ភ្លៀងនឹងបន្តធ្លាក់ក្នុងរយៈពេលពីរបីថ្ងៃទៀត៕
ទីតាំងទទួលប្តូរ និងពន្យារប័ណ្ណបើកបរ នៅផ្សារទំនើប AEON MALL ចាប់ផ្តើមសាកល្បងចាប់ពីថ្ងៃទី០២មិថុនានេះ
ភ្នំពេញ៖ ផែនការទទួល ប្តូរ និងពន្យារប័ណ្ណបើកបរ នៅផ្សារទំនើប AEON MALLរាជធានីភ្នំពេញ ពេល នេះបានរៀបចំរួចរាល់ហើយ ដោយសាកល្បងនៅថ្ងៃទី០២មិថុនានិងដំណើរការជាផ្លូវការ ចាប់ពីថ្ងៃ ទី០៦មិថុនា២០១៦តទៅប្រសិនបើមិនមានការរាំងស្ទះអ្វីនោះទេ ។លោកមាស ចន្ថា ប្រធានអង្គភាពផ្តល់បណ្ណ័បើកបរ និងសុវត្ថិភាពចរាចរណ៏ផ្លូវគោក នៃមន្ទីរសាធារណៈការនិងដឹកជញ្ជូនរាជធានីភ្នំពេញ បានឲ្យដឹងថា ដំណើរការសាកល្បងពេលនេះទទួលលទ្ឋផលល្អប្រសើរ ដែលនឹងអាចដាក់អោយដំណើរការសាកល្បងចាប់ពីថ្ងៃទី០២មិថុនានេះ និងចាប់ដំណើរការជាផ្លូវការចាប់ពីថ្ងៃទី០៦មិថុនាតែម្តង នោះប្រសិនបើមិនមានការាំងស្ទះអ្វីទេ ហើយការប្តូរសេវាទីនេះមានប្តូរ ពន្យាបណ្ណ័បើកបរជូនប្រជាពលរដ្ឋ សម្រាប់២៥រាជធានី ខេត្ត នៅទូទាំងប្រទេស ជារៀងរាល់ថ្ងៃ ចាប់ពីម៉ោង៧ព្រឹកដល់ម៉ោង១០យប់ ។លោកមាស ចន្ថា បានបញ្ជាក់ថា ការប្តូរ និងពន្យារប័ណ្ណបើកបរ ដែលរៀបចំឡើងដោយក្រសួងសាធារណការនេះ មានលក្ខណៈទំនើប គឺបំរើសេវារហ័សទាន់ចិត្តក្នុងរយៈពេលតែ២០នាទីប៉ុណ្ណោះនេះប្រសិនបើប្រជាពលរដ្ឋមានឯកសារគ្រប់គ្រាន់ ចំណែកតំលៃវិញសម្រាប់រថយន្តតូច៤ម៉ឺនរៀលក្នុងនោះពិនិត្យសុខភាព១ម៉ឺនរៀល និងរថយន្តធំលើសនេះតែបន្តិចនោះទេ ។សួមបញ្ជាក់ថា កាលរាត្រី ថ្ងៃទី៣១ ឧសភា កន្លងមក លោក ចាន់ តារា អគ្គនាយកដឹកជ្ញជូនក្រសួងសាធារណការនិងដឹកជញ្ជូន អមដោយលោក សាំ ពិសិដ្ឋ ប្រធានមន្ទីរសាធារណការរាជធានីភ្នំពេញ និងមន្ត្រីជំនាញជាច្រើនរូបទៀត បានអញ្ជើញចុះពិនិត្យពីដំណើរការសាកល្បងនៃការប្តូរ ពន្យារប័ណ្ណបើកបរនៅផ្សារ AEON MALLបន្ទាប់ពីតម្លើងគ្រឿងបរិក្ខារ កុំព្យូទ័រ ប្រព័ន្ឋ ITរួចដែលពេលនេះកំពុងហ្វឹកហាត់មន្ត្រីបម្រើការនៅទីនោះ ដើម្បីដំណើរការសាកល្បង ៕
កក្រើកឡើងវិញ! ម្សិលមិញចោរចូលប្លន់់ផ្ទះវេរប្រាក់ Wing មួយកន្លែងនៅកណ្តាលរាជធានីភ្នំពេញ
មានករណីចោរប្លន់ផ្ទះបើករបររកស៊ីផ្ទេរប្រាក់ វីង មួយកន្លែងស្ថិតនៅម្តុំធនាគារកម្ពុជា ផ្លូវលេខ១៣០ សង្កាត់ផ្សារកណ្តាលទី២ ខណ្ឌដូនពេញ ដែលករណីនេះបានកើតឡើងតាំងពីម្សិលមិញ ថ្ងៃទី ១ ខែមិថុនា ឆ្នាំ ២០១៦ ។ ជនសង្ស័យបីរូបបានធ្វើដំណើរមកដល់ផ្ទះវីងខាងលើនោះ ដោយមានមនុស្ស ២នាក់ចូលធ្វើសកម្មភាពបន្លំជាផ្ញើរលុយនៅក្នុងផ្ទះជាមួយជនរងគ្រោះ ចំណែកឯជនសង្ស័យមួយនាក់ទៀតបានឈររងចាំនៅក្រៅ ។ គ្មានសេចក្តីរាយការណ៍ណាមួយបញ្ចាក់ពីចំនួនទឹកប្រាក់ដែលត្រូវបាតបង់នោះទេ ហើយបើមើលតាមវីឌីអូក្នុងកាមេរ៉ាសុវត្ថិភាពបានអោយឃើញផ្ទះវីងនោះគឺរកស៊ីដោយមិនមានធ្វើទូអោយបានត្រឹមត្រូវបន្តិចសោះឡើយ ដោយទុកស្ថិននៅកណ្តាលផ្ទះកណ្តាលវាល បង្កលក្ខណៈងាយស្រួលដល់ក្រុមចោរ។ គួររំលឹកផងដែរថាសកម្មភាពប្លន់តាមផ្ទះដែលមានរបររកស៊ីវេរលុយ វីង នេះគឺស្ងាត់មួយរយៈមកហើយ ប៉ុន្តែទើបកក្រើកឡើងវិញម្សិលមិញនៅកណ្តាលរាជធានីភ្នំពេញតែម្តង ដែលមិនមានការរំខានដល់សមត្ថកិច្ចបន្តិចសោះឡើយ។
