trollkhmer news

សង្គមនិងជីវិត

ក្រសួងអប់រំ ឲ្យបើកដំណើរការឡើងវិញ នូវអាជីវកម្មក្លិបហាត់ប្រាណ និងការប្រកួតលីហ្គក្រុមជម្រើសជាតិ

ថ្ងៃទី ៣១ ខែ ធ្នូ ឆ្នាំ ២០២០ ម៉ោង ១៤:១៧

(ភ្នំពេញ)៖ ក្រសួងអប់រំ យុវជន និងកីឡា នៅថ្ងៃទី៣១ ខែធ្នូ ឆ្នាំ២០២០នេះ បានចេញសេចក្តីជូនដំណឹង ស្ដីពី ការបើកដំណើរការឡើងវិញ នូវអាជីវកម្មក្លឹបហាត់ប្រាណ និងលេងកីឡាដើម្បីសុខភាព ការប្រកួតលីគ និងការប្រមូលផ្ដុំ របស់ក្រុមជម្រើសជាតិជាជំហានៗ។ នេះបើតាមសេចក្ដីជូនដំណឹង ដែលបណ្ដាញព័ត៌មាន Fresh News ទទួលបាននៅថ្ងៃនេះ។ក្នុងសេចក្ដីជូនដំណឹង បានឲ្យដឹងថា ក្រោយព្រឹត្តិការណ៍សហគមន៍ ២៨ វិច្ឆិកា ត្រូវបានបញ្ចប់ក្រសួងអនុញ្ញាតឲ្យបើកដំណើរការឡើងវិញ នូវអាជីវកម្ម ក្លឹបហាត់ប្រាណ និងលេងកីឡាដើម្បីសុខភាព ការប្រកួតលីគ និងការប្រមូលរបស់ក្រុមជម្រើសជាតិជាជំហានៗ ដើម្បីលើកកម្ពស់សុខភាព និងការហាត់ហ្វឹកហ្វឺន ពង្រឹងបច្ចេកទេស និងគុណផលរបស់កីឡាករ កីឡាការិនីសម្រាប់ត្រៀមលក្ខណៈឆ្ពោះទៅការប្រកួតកីឡាស៊ីហ្គេមលើកទី៣១ ឆ្នាំ២០២១ នៅប្រទេសវៀតណាម និងការប្រកួតកីឡាស៊ីហ្គេមលើកទី៣២ ឆ្នាំ២០២៣ នៅប្រទេសកម្ពុជា ដោយត្រូវគោរពតាមវិធានសុវត្តិភាព សុខភាព របស់ក្រសួងសុខាភិបាល ឲ្យបានត្រឹមត្រូវ និងម៉ឺងម៉ាត់។ ក្រសួងអប់រំ សង្ឃឹម និងជឿជាក់ថា លោក លោកស្រីប្រធានសហព័ន្ធកីឡាជាតិ អាជីវកម្មក្លឹបហាត់ប្រាណ និងអង្គភាពពាក់ព័ន្ធទាំងអស់ នឹងចូលរួមសហការអនុវត្តនូវវិធានការការពាររបស់ក្រសួងសុខាភិបាល ប្រកបដោយការទទួលខុសត្រូវខ្ពស់៕

ប្រទេសថៃ រកឃើញអ្នកឆ្លងកូវីដ-១៩ ជិត ២០០នាក់បន្ថែមទៀតក្នុងនោះភាគច្រើនជា ករណីឆ្លងក្នុងសហគមន៍

ថ្ងៃទី ៣១ ខែ ធ្នូ ឆ្នាំ ២០២០ ម៉ោង ១៣:០៩

(បាងកក)៖ ក្រុមការងារគ្រប់គ្រងស្ថានការណ៍ COVID-19 នៅក្នុងប្រទេសថៃបានអះអាងថា នៅក្នុងរយៈពេល ២៤ម៉ោងកន្លងទៅនេះ អ្នកឆ្លងជំងឺ COVID-19 សរុប ១៩៤នាក់ទៀតត្រូវបានរកឃើញ ក្នុងនោះភាគច្រើនបំផុត គឺជាករណីឆ្លងក្នុងសហគមន៍។ អាជ្ញាធរថៃបានឲ្យដឹងទៀតថា ក្នុងចំណោមករណីឆ្លងទាំង ១៩៤នាក់នោះ គឺមាន ១៣នាក់ជាករណីនាំចូលពីក្រៅប្រទេស និង ១៨១នាក់ទៀត គឺជាករណីឆ្លងក្នុងស្រុកតែម្តង ហើយក៏មានករណីដែលជាប់ពាក់ព័ន្ធនឹង ការឆ្លងរាតត្បាតនៅក្នុងទីផ្សារលក់គ្រឿងសមុទ្រ នៃខេត្តសាមុតសាខន (Samut Sakhon) ភាគនិរតីប្រទេសនេះផងដែរ។យោងតាមគេហទំព័រ Worldometers ប្រទេសថៃពេលនេះមានករណីឆ្លង COVID-19 សរុប ៦,៨៨៤នាក់ ក្នុងនោះស្លាប់ ៦១នាក់ និងជាសះស្បើយវិញ ៤,២៤០នាក់។ អាជ្ញាធរថៃក៏កំពុងបង្កើនការទប់ស្កាត ពលករចំណាកស្រុកខុសច្បាប់ នៅតាមព្រំដែនរបស់ខ្លួនផងដែរ ជាពិសេសព្រំដែនមីយ៉ាន់ម៉ា ក៏ព្រោះតែប្រទេសជិតខាងថៃមួយនេះ កំពុងផ្ទុះករណីឆ្លង COVID-19 ខ្លាំងនៅឡើយ៕

EDC ជូនដំណឹងពីការរអាក់រអួលផ្គត់ផ្គង់ចរន្ត នៅតំបន់មួយចំនួន ចាប់ពីថ្ងៃនេះ ដល់ថ្ងៃទី០៣ ខែមករា

ថ្ងៃទី ៣១ ខែ ធ្នូ ឆ្នាំ ២០២០ ម៉ោង ១០:០៤

(ភ្នំពេញ)៖ អគ្គិសនីកម្ពុជា (EDC) បានចេញសេចក្តីជូនដំណឹង ស្តីពីការអនុវត្តការងារជួសជុល ផ្លាស់ប្តូរ តម្លើងបរិក្ខារនានា និងរុះរើគន្លងខ្សែបណ្តាញអគ្គិសនី របស់អគ្គិសនីកម្ពុជា ដើម្បីបង្កលក្ខណៈងាយស្រួលដល់ការដ្ឋានពង្រីកផ្លូវ រយៈពេល៤ថ្ងៃ ចាប់ពីថ្ងៃនេះ ដល់ថ្ងៃទី០៣ ខែមករា ឆ្នាំ២០២១ នៅតំបន់មួយចំនួន ក្នុងទីក្រុងភ្នំពេញ និងខេត្តកណ្ដាលទៅតាមពេលវេលា និងទីកន្លែង។ទោះជាមានការខិតខំថែរក្សា មិនឲ្យមានការប៉ះពាល់ដល់ការផ្គត់ផ្គង់អគ្គិសនីធំដុំ ប៉ុន្តែការផ្គត់ផ្គង់ចរន្តអគ្គិសនី នៅតំបន់មួយចំនួន អាចនឹងមានការរអាក់រអួលខ្លះៗ ជៀសមិនផុតដែលអគ្គិសនីកម្ពុជា ស្នើសុំអភ័យទោសទុកជាមុន៕

ក្រសួងសុខាភិបាល៖ រកឃើញអ្នកវិជ្ជមានកូវីដ១៩ ចំនួន ២នាក់ជាពលករខ្មែរធ្វើដំណើរមកពីប្រទេសថៃ

ថ្ងៃទី ៣១ ខែ ធ្នូ ឆ្នាំ ២០២០ ម៉ោង ០៩:១៤

(ភ្នំពេញ)៖ ក្រសួងសុខាភិបាល នៅព្រឹកថ្ងៃទី៣១ ខែធ្នូ ឆ្នាំ២០២០នេះ បានចេញសេចក្តីប្រកាសព័ត៌មានបញ្ជាក់ពីការ រកឃើញករណីវិជ្ជមានវីរុសកូវីដ១៩ លើពលករដែលធ្វើដំណើរមកពីប្រទេសថៃ ចំនួន២នាក់ ខណៈករណីជាសះស្បើយមិនមាននោះទេ។អ្នកទាំង២នាក់ដែលទើបរកឃើញឆ្លងជំងឺកូវីដ១៩ នោះរួមមាន៖១៖ ស្ត្រីជនជាតិខ្មែរ អាយុ៣៦ឆ្នាំ ស្នាក់នៅឃុំបឹងរាំង ស្រុកកំរៀង ខេត្តបាត់ដំបង បានធ្វើដំណើរមកពីប្រទេសថៃ មកដល់កម្ពុជានៅថ្ងៃទី២៨ ខែធ្នូ ឆ្នាំ២០២០ ហើយបច្ចុប្បន្នអ្នកជំងឺ ត្រូវបានដាក់ឲ្យសម្រាកព្យាបាល នៅមន្ទីរពេទ្យបង្អែកខេត្តបាត់ដំបង។២៖ ស្ត្រីជនជាតិខ្មែរ អាយុ៣៣ឆ្នាំ ស្នាក់នៅឃុំស្ទឹងកាច់ ស្រុកសាលាក្រៅ ខេត្តប៉ៃលិន បានធ្វើដំណើរមកពីប្រទេសថៃ ដល់កម្ពុជានៅថ្ងៃទី២៩ ខែធ្នូ ឆ្នាំ២០២០ ហើយបច្ចុប្បន្នអ្នកជំងឺ ត្រូវបានដាក់ឲ្យសម្រាកព្យាបាល នៅមន្ទីរពេទ្យបង្អែកខេត្តបាត់ដំបង។សូមជម្រាបថា គិតត្រឹមម៉ោង៧៖០០នាទីព្រឹកថ្ងៃទី៣១ ខែធ្នូ ឆ្នាំ២០២០នេះ កម្ពុជាបានរកឃើញអ្នកឆ្លងកូវីដ១៩ សរុបចំនួន ៣៦៦នាក់ ក្នុងនោះព្យាបាលជាសះស្បើយសរុបចំនួន ៣៦១នាក់ និងអ្នកជំងឺ៥នាក់ កំពុងទទួលការព្យាបាលនៅមន្ទីរពេទ្យ៕

ប្រទេសថៃ រកឃើញអ្នកឆ្លងកូវីដ-១៩ រហូតដល់ ២៥០នាក់ថ្មីទៀត ដែលភាគច្រើនជាករណីឆ្លងក្នុងសហគមន៍

ថ្ងៃទី ៣០ ខែ ធ្នូ ឆ្នាំ ២០២០ ម៉ោង ១៥:៤៩

(បាងកក)៖ ក្រសួងសុខាភិបាលថៃនៅថ្ងៃពុធ ទី៣០ ខែធ្នូ ឆ្នាំ២០២០នេះ បានប្រកាសពីការរកឃើញអ្នកឆ្លង COVID-19 ចំនួន ២៥០នាក់បន្ថែមទៀត នៅក្នុងរយៈពេល ២៤ម៉ោងចុងក្រោយនេះ ធ្វើឱ្យចំនួនករណីឆ្លងសរុបទូទាំងប្រទេស កើនឡើងដល់ ៦,៦៩០ករណី។ នេះបើតាមការចេញផ្សាយ ដោយសារព័ត៌មាន Bangkok Post។បើតាមក្រសួងសុខាភិបាលថៃ នៅក្នុងចំណោមករណីឆ្លងថ្មីខាងលើទាំង ២៥០នាក់ ក្នុងនោះរួមមាន ២៤១នាក់ជាករណីឆ្លងក្នុងសហគមន៍, ម្នាក់ជាពលករចំណាកស្រុកខុសច្បាប់ មកពីមីយ៉ាន់ម៉ា និង ០៨នាក់ជាករណីនាំចូល។ លើសពីនេះទៅទៀត ក្នុងចំណោមករណីឆ្លងទាំងអស់ទៀតសោត ក៏មានអ្នកឆ្លង ០៩នាក់ ត្រូវបានគេរាយការណ៍ថា មានជាប់ពាក់ព័ន្ធនឹងផ្សារលក់គ្រឿងសមុទ្រ ក្នុងខេត្តសាមុតសាខន (Samut Sakhon) ភាគនិរតីប្រទេសផងដែរ។គួរបញ្ជាក់ថា បច្ចុប្បន្នថៃមានអ្នកឆ្លង COVID-19 សរុប ៦,៦៩០នាក់ ក្នុងនោះអ្នកស្លាប់ ៦១នាក់ និងជាសះស្បើយឡើងវិញ ៤,២១២នាក់ ឬស្មើនឹង ៦២.៩ភាគរយ។ អាជ្ញាធរថៃក៏កំពុងបង្កើនការទប់ស្កាត ពលករចំណាកស្រុកខុសច្បាប់ នៅតាមព្រំដែនរបស់ខ្លួនផងដែរ ជាពិសេសព្រំដែនមីយ៉ាន់ម៉ា ក៏ព្រោះតែប្រទេសជិតខាងថៃមួយនេះ កំពុងផ្ទុះករណីឆ្លង COVID-19 ខ្លាំងនៅឡើយ ដោយគិតត្រឹមថ្ងៃពុធនេះ មីយ៉ាន់ម៉ាមានករណីឆ្លងសរុប ១២៣,១៥៣ករណី ក្នុងនោះស្លាប់ ២,៦៣៦នាក់ និងជាសះស្បើយវិញជាង ១០៥,២៧៩នាក់៕

ក្រសួងធនធានទឹក៖ ចាប់ពីថ្ងៃស្អែកដល់ថ្ងៃទី០៣ ខែមករា ធាតុអាកាសនឹងចុះត្រជាក់ខ្លាំងសាជាថ្មី

ថ្ងៃទី ៣០ ខែ ធ្នូ ឆ្នាំ ២០២០ ម៉ោង ១០:២៥

(ភ្នំពេញ)៖ ក្រសួងធនធានទឹក និងឧតុនិយម បានចេញសេចក្តីប្រកាសព័ត៌មាន ស្តីពីស្ថានភាពធាតុអាកាសនៅកម្ពុជា ប្រចាំសប្តាហ៍ចាប់ពីថ្ងៃទី៣០ ខែធ្នូ ដល់ថ្ងៃទី០៥ ខែមករា ឆ្នាំ២០២០។ក្រសួងបានបញ្ជាក់ថា ព្រះរាជាណាចក្រកម្ពុជា និងទទួលឥទ្ធិពលពីសម្ពាធខ្ពស់ប្រទេសចិន ដែលរំកិលចុះមកក្រោម និងខ្យល់មូសុងឦសាន។ ស្ថានភាពបែបនេះ នឹងធ្វើឲ្យធាតុអាកាសចុះត្រជាក់សាជាថ្មី ចាប់ពីថ្ងៃទី៣១ ខែធ្នូ ដល់ថ្ងៃទី៣ ខែមករា៖១៖ បណ្តាខេត្តនៅតំបន់វាលទំនាបកណ្តាល ៖* ខេត្តប៉ៃលិន ខេត្តបន្ទាយមានជ័យ ខេត្តសៀមរាប និងខេត្តបាត់ដំបង សីតុណ្ហភាពអប្បបរមាមានពី ១៦-១៨°C និងអតិបរមា មានពី២៥-២៧°C ។* បណ្តាខេត្តដទៃទៀត សីតុណ្ហភាពអប្បបរមា មានពី១៩-២១°C និងអតិបរមា មានពី ២៦-២៨°C ។២៖ បណ្តាខេត្ត ជាប់ជួរភ្នំដងរែក និងខ្ពង់រាបឦសាន ៖* សីតុណ្ហភាពអប្បបរមា មានពី ១៤-១៦ °C* សីតុណ្ហភាពអតិបរមា មានពី ២៦-២៨ °C៣៖ តំបន់មាត់សមុទ្រ ៖* សីតុណ្ហភាពអប្បបរមា មានពី ២២-២៤ °C* សីតុណ្ហភាពអតិបរមា មានពី ២៧-២៩ °Cជាមួយគ្នានេះ ក្រសួងអំពាវនាវដល់បងប្អូនប្រជាពលរដ្ឋ ពិសេសវីរៈកងទ័ព និងនគរបាលឈរជើងនៅតំបន់ជួរភ្នំដងរែក និងខ្ពង់រាបភាគឦសាន ថែរក្សាសុខភាព។ ដោយឡែកសម្រាប់ប្រជានេសាទ និងអ្នកដំណើរសមុទ្រសូមប្រុងប្រយ័ត្នចំពោះល្បឿនខ្យល់ខ្លាំង និងរលកសមុទ្រខ្ពស់៕

ក្រសួងសុខាភិបាល៖ អ្នកជំងឺមា្នក់បានជាសះស្បើយ ខណៈមិនមានអ្នកឆ្លងកូវីដ១៩ ករណីថ្មីនោះទេ

ថ្ងៃទី ៣០ ខែ ធ្នូ ឆ្នាំ ២០២០ ម៉ោង ០៩:១៤

(ភ្នំពេញ)៖ ក្រសួងសុខាភិបាល នៅព្រឹកថ្ងៃទី៣០ ខែធ្នូ ឆ្នាំ២០២០នេះ បានចេញសេចក្តីប្រកាសព័ត៌មានបញ្ជាក់ពីការមិនមានរកឃើញអ្នកឆ្លងជំងឺកូវីដ១៩ ថ្មីនោះទេ ខណៈអ្នកជំងឺម្នាក់ទៀតបានជាសះស្បើយ ត្រូវបានអនុញ្ញាតឲ្យចេញពីមន្ទីរពេទ្យ។អ្នកជាសះស្បើយគឺជាបុរសជនជាតិខ្មែរ អាយុ៣៧ឆ្នាំ ស្នាក់នៅសង្កាត់បឹងកក់២ ខណ្ឌទួលគោក រាជធានីភ្នំពេញ បានទៅហាង Zando សាខាបឹងកេងកង កាលពីយប់ថ្ងៃទី២៨ ខែវិច្ឆិកា ឆ្នាំ២០២០ ត្រូវបានជាសះស្បើយ និងត្រូវបានអនុញ្ញាតឲ្យចេញពី មន្ទីរពេទ្យមិត្តភាពខ្មែរ-សូវៀត។សូមជម្រាបថា គិតត្រឹមម៉ោង៧៖០០នាទីព្រឹកថ្ងៃទី៣០ ខែធ្នូ ឆ្នាំ២០២០នេះ កម្ពុជារកឃើញអ្នកឆ្លងជំងឺកូវីដ១៩ សរុបចំនួន៣៦៤នាក់ ក្នុងនោះអ្នកព្យាបាលជាសះស្បើយ ចំនួន៣៦១នាក់ និងអ្នកជំងឺ៣នាក់កំពុងសម្រាកព្យាបាលនៅមន្ទីរពេទ្យ។ សម្រាប់អ្នកជាប់ពាក់ព័ន្ធព្រឹត្តិការណ៍ «សហគមន៍២៨វិច្ឆិកា» វិញ រកឃើញវិជ្ជមានចំនួន ៤១នាក់ ក្នុងនោះបានជាសះស្បើយ៣៩នាក់ និង២នាក់ទៀតកំពុងសម្រាកនៅមន្ទីរពេទ្យ៕

ឥណ្ឌា រកឃើញវីរុសកូវីដ-១៩ទម្រង់ថ្មី លើអ្នកដំណើរ៦នាក់ដែលមកពីចក្រភពអង់គ្លេស

ថ្ងៃទី ២៩ ខែ ធ្នូ ឆ្នាំ ២០២០ ម៉ោង ១៥:៣៦

(ញូដេលី)៖ ប្រទេសឥណ្ឌានៅថ្ងៃអង្គារនេះ បានរកឃើញវីរុសកូរ៉ូណា (COVID-19) ទម្រង់ថ្មី នៅលើមនុស្ស៦នាក់ ដែលទើបវិលត្រឡប់មកពីចក្រភពអង់គ្លេស ក្នុងអំឡុងប៉ុន្មានសប្តាហ៍ចុងក្រោយនេះ។ នេះបើយោងតាមការចេញផ្សាយដោយសារពត៌មាន CNA នៅថ្ងៃអង្គារ ទី២៩ ខែធ្នូ ឆ្នាំ២០២០។ក្រសួងសុខាភិបាលឥណ្ឌា បានគូសបញ្ជាក់នៅក្នុងសេចក្តីថ្លែងការណ៍មួយថា អ្នកជំងឺទាំង០៦នាក់នោះ ត្រូវបានដាក់ឲ្យនៅដាច់ដោយឡែកពីគេ ខណៈអ្នកដែលរួមដំណើរជាមួយពួកគេ កំពុងត្រូវស្ថិតនៅក្រោមការរក រីឯ អ្នកដែលបានធ្វើប្រាស្រ័យទាក់ទងជិតស្និទ្ធជាមួយពួកគេ ក៏ត្រូវបានតម្រូវឲ្យធ្វើចត្តាឡីស័កផងដែរ។ប្រទេសឥណ្ឌាបានផ្អាករាល់ជើងហោះហើរទាំងអស់ដែលធ្វើដំណើរទៅ និងមកពីចក្រភពអង់គ្លេស រហូតដល់ចុងខែធ្នូនេះ ប៉ុន្តែអ្នកដំណើរប្រហែល ៣៣,០០០នាក់ បានធ្វើដំណើរចូលមកដល់តាំងពីចុងខែវិច្ឆិកាមកម្លេះ មុនពេលការហាមឃាត់ត្រូវបានធ្វើឡើង។ ក្នុងចំណោមការមកដល់នោះ អ្នកដំណើរ ១១៤នាក់ត្រូវបានរកឃើញថា ឆ្លងវីរុស COVID-19 នេះ ហើយសំណាករបស់ពួកគេ ក៏កំពុងត្រូវបានពិនិត្យរកមើលវីរុស COVID-19 ទម្រង់ថ្មី ដែលបានរាលដាលនៅក្នុងតំបន់អឺរ៉ុប និងអាស៉ីផងដែរ។គួរបញ្ជាក់ថា រហូតមកទល់ពេលនេះ ប្រទេសឥណ្ឌា បានកត់ត្រាពីករណីឆ្លង COVID-19 សរុបនៅទូទាំងប្រទេសជាង ១០.២២លានករណី ក្នុងនោះមានអ្នកស្លាប់ជាង ១៤ម៉ឺននាក់ និងជាសះស្បើយជាង ៩.៨លាននាក់។ ប្រទេសឥណ្ឌា គឺជាប្រទេសដែលមានករណីឆ្លង COVID-19 ខ្ពស់ជាងគេលំដាប់ទី២នៅលើពិភពលោក បន្ទាប់ពីសហរដ្ឋអាមេរិកដែលមានករណីឆ្លងជាង ១៩.៧៨លានករណី៕

ថៃ រកឃើញអ្នកឆ្លងកូវីដ-១៩ ១៥៥នាក់បន្ថែមទៀត, ឆ្លងសរុបកើនដល់ ៦,៤៤០នាក់

ថ្ងៃទី ២៩ ខែ ធ្នូ ឆ្នាំ ២០២០ ម៉ោង ១៤:៣៧

(បាងកក)៖ ក្រសួងសុខាភិបាលថៃ នៅថ្ងៃអង្គារ ទី២៩ ខែធ្នូ ឆ្នាំ២០២០នេះ បានប្រកាសពីការរកឃើញអ្នកឆ្លង COVID-19 ១៥៥នាក់បន្ថែមទៀត ក្នុងរយៈពេល២៤ម៉ោង ចុងក្រោយនេះ ធ្វើឱ្យចំនួនអ្នកឆ្លងសរុបទូទាំងប្រទេសកើនដល់ ៦,៤៤០នាក់។ នេះបើតាមការចេញផ្សាយដោយសារព័ត៌មាន Bangkok Post។បើតាមក្រសួងសុខាភិបាលថៃ នៅក្នុងចំណោមករណីឆ្លងថ្មីខាងលើទាំង១៥៥នាក់ ក្នុងនោះរួមមាន១៣៤នាក់ ជាករណីឆ្លងក្នុងសហគមន៍, ១១នាក់ជាពលករចំណាកស្រុក និង១០នាក់ ជាករណីនាំចូល។ បន្ថែមពីលើនេះ ក្នុងចំណោមករណីឆ្លងទាំងអស់ទៀតសោត ក៏មានអ្នកឆ្លង១២នាក់ ត្រូវបានគេរាយការណ៍ថាមានជាប់ពាក់ព័ន្ធនឹងផ្សារលក់គ្រឿង សមុទ្រក្នុងខេត្ត Samut Sakhon ផងដែរ។គួរបញ្ជាក់ថា បច្ចុប្បន្ន ថៃមានអ្នកឆ្លង COVID-19 សរុប ៦,៤៤០នាក់ ក្នុងនោះអ្នកស្លាប់កើនដល់៦១នាក់ ក្រោយអ្នកស្លាប់ថ្មីម្នាក់ត្រូវបានប្រកាសនៅថ្ងៃអង្គារនេះ និងជាសះស្បើយ ឡើងវិញ ៤,១៨៤នាក់៕