trollkhmer news

សង្គមនិងជីវិត

ក្រសួងធនធានទឹក៖ ចាប់ពីថ្ងៃទី២៨ ខែមេសា ដល់ ថ្ងៃទី០៤ ខែឧសភា ឆ្នាំ២០២១ នឹងមានភ្លៀងធ្លាក់រាយប៉ាយពីមធ្យមទៅច្រើន

ថ្ងៃទី ២៧ ខែ មេសា ឆ្នាំ ២០២១ ម៉ោង ០៩:១៩

(ភ្នំពេញ)៖ ក្រសួងធនធានទឹក និងឧតុនិយម នៅថ្ងៃទី២៧ ខែមេសា ឆ្នាំ២០២១នេះ បានចេញសេចក្តីជូនដំណឹង ស្តីពីស្ថានភាពធាតុអាកាស នៅកម្ពុជា ចាប់ពីថ្ងៃទី២៨ ខែមេសា ដល់ថ្ងៃទី០៤ ខែឧសភា ឆ្នាំ២០២១។ក្រសួងបញ្ជាក់ថា ជ្រលងសម្ពាធទាបឥណ្ឌា កាន់តែបង្កើនឥទ្ធិពលគ្របដណ្តប់មកលើព្រះរាជាណាចក្រកម្ពុជា ជាមួយនឹងខ្យល់ប្តូរទិសបណ្តើរៗ មកពីនិរតី ដែលជាសញ្ញាបង្ហាញថា រដូវវស្សានឹងចាប់នៅសប្តាហ៍ទី១ នៃខែឧសភាខាងមុខនេះ។ ស្ថានភាពបែបនេះ នឹងធ្វើឲ្យកម្ពុជា អាចនឹងមានភ្លៀងធ្លាក់រាយប៉ាយ ក្នុងកម្រិតធម្យទៅច្រើន តាមតំបន់។ជាមួយនឹងធាតុអាកាសបែបនេះ ក្រសួងធនធានទឹក នៅតែបន្តអំពាវនាវដល់បងប្អូនប្រជាពលរដ្ឋ ប្រុងប្រយ័ត្នចំពោះបាតុភូផ្គររន្ទះ និងខ្យល់កន្ត្រាក់ ដែលអាចកើតមានជាពិសេស នៅបណ្តាខេត្តនៃទំនាបកណ្តាល៕

ឥណ្ឌា៖ រកឃើញអ្នកឆ្លងជំងឺកូវីដ-១៩ ចំនួន ៣៥២,៩៩១នាក់ និងអ្នកជំងឺ ២,៨១២នាក់ស្លាប់

ថ្ងៃទី ២៦ ខែ មេសា ឆ្នាំ ២០២១ ម៉ោង ១៤:០៨

(ញូដេលី)៖ ថ្ងៃចន្ទ ទី២៦ ខែមេសា ឆ្នាំ២០២១នេះ គឺជាថ្ងៃទី៥ហើយដែលឥណ្ឌា បានប្រកាសពីការរកឃើញអ្នកឆ្លង COVID-19 ក្នុងចំនួនច្រើនបំផុតលើស ៣០០,០០០ករណីក្នុងមួយថ្ងៃ និងជាកំណត់ត្រាខ្ពស់បំផុតថ្មីមួយទៀត សម្រាប់ពិភពលោកទាំងមូលផងដែរ។ នេះបើតាមការចេញផ្សាយ ដោយសារព័ត៌មាន CNA។កំឡុងពេលតែ ២៤ម៉ោងកន្លងទៅនេះប៉ុណ្ណោះ អ្នកឆ្លងជំងឺ COVID-19 រហូតដល់ ៣៥២,៩៩១នាក់ត្រូវបានរាយការណ៍ ខណៈអ្នកជំងឺ ២,៨១២នាក់ទៀត បានបាត់បង់ជីវិត។ ក្រោយការបូកសរុបទិន្នន័យថ្មីៗនេះ ធ្វើឲ្យចំនួនករណីឆ្លង COVID-19 សរុបនៅឥណ្ឌាកើនដល់ ១៧.៣លាននាក់ ក្នុងនោះអ្នកជំងឺជាង ១៩៥,០០០ស្លាប់ និង ១៤.៣លាននាក់ជាសះស្បើយឡើងវិញ។បើតាមស្ថានការណ៍បច្ចុប្បន្ន ស្ទើរតែគ្រប់មន្ទីរពេទ្យនៅតាមរដ្ឋរងគ្រោះធ្ងន់ធ្ងរ កំពុងតែដង្ហោយរកជំនួយ ជាពិសេសគឺឧស្ម័នអុកស៊ីសែន និងឧបករណ៍ជំនួយការដកដង្ហើម។ យ៉ាងណាក៏ដោយ បណ្តាប្រទេសមួយចំនួនដូចជា សហរដ្ឋអាមេរិក អាល្លឺម៉ង់ អង់គ្លេស និងសិង្ហបុរី ហើយឆាប់ៗនេះក៏នឹងមានសហភាពអឺរ៉ុបថែមទៀត កំពុងតែដុតដៃដុតជើង ដើម្បីដឹកជញ្ជូនជំនួយទាំងនេះទៅឥណ្ឌា។គួរបញ្ជាក់ថា កាលពីថ្ងៃអាទិត្យម្សិលមិញនេះ នាយករដ្ឋមន្ត្រីឥណ្ឌាលោក ណារិដ្រា ម៉ូឌី បានជំរុញឲ្យប្រជាជនទាំងអស់ បង្កើនការប្រុងប្រយ័ត្ន និងចូលរួមចាក់វ៉ាក់សាំងបង្ការ COVID-19 ស្ថិតនៅចំពោះមុខស្ថានការណ៍ ឆ្លងរាតត្បាតដ៏អាក្រក់ ដែលតាមមន្ទីរពេទ្យនានា មិនអាចទទួលអ្នកជំងឺបានទៀតនោះឡើយ។ ស្ថានការណ៍នៅឥណ្ឌាពេលនេះ គឺប្រជាជនមួយចំនួនដែលគ្មានគ្រែ ឬបន្ទប់សម្រាប់គេងព្យាបាលក្នុងមន្ទីរពេទ្យ ពួកគេត្រូវបង្ខំចិត្តស្ថិតនៅក្រៅអគារមន្ទីរពេទ្យ និងខ្លះនៅអង្គុយ ឬគេងនៅតាមសួនច្បារ ដោយដៃកាន់បំពង់អុកស៊ីសែន ដើម្បីព្យាយាមជួយសង្គ្រោះជីវិតខ្លួនឯង។ បន្ថែមពីនេះ ក៏មានអ្នកជំងឺជាច្រើននាក់បានបាត់បង់ជីវិត ដោយសារតែគ្មានជំនួយអុកស៊ីសែនផងដែរ៕

ថៃ៖ រកឃើញអ្នកឆ្លងកូវីដ-១៩ ជាង ២,០០០ករណីក្នុងពេល ១ថ្ងៃ

ថ្ងៃទី ២៣ ខែ មេសា ឆ្នាំ ២០២១ ម៉ោង ១៥:២៧

(បាងកក)៖ អាជ្ញាធរគ្រប់គ្រងស្ថានការណ៍ COVID-19 នៅប្រទេសថៃ CCSA បានរាយការណ៍នៅថ្ងៃសុក្រសប្តាហ៍នេះថា អ្នកឆ្លងជំងឺនេះរហូតដល់ ២,០៧០នាក់ទៀតត្រូវបានរកឃើញ និងអ្នកជំងឺ ០៤នាក់ទៀតបាត់បង់ជីវិត នៅក្នុងរយៈពេល ២៤ម៉ោងកន្លងទៅ ហើយនេះគឺជាចំនួនអ្នកឆ្លងដ៏អាក្រក់ថ្មីមួយទៀត ដែលប្រទេសអាស៊ានមួយនេះទើបជួបប្រទះ។ នេះបើតាមការចេញផ្សាយ ដោយសារព័ត៌មាន The Nation នារសៀលថ្ងៃសុក្រ ទី២៣ ខែមេសា ឆ្នាំ២០២១។ក្នុងចំណោមករណីឆ្លង COVID-19 ថ្មីៗទាំង ២,០៧០នោះ ០៨នាក់ជាករណីនាំចូល, ៧៤០នាក់នៅទីក្រុងបាងកក, ២៣៧នាក់នៅខេត្តឈៀងម៉ៃ, ១២៥នាក់នៅខេត្តឈុនបុរី និង ៧៩នាក់នៅខេត្តសាមុតប្រាកាន។ ក្រោយការបូកសរុបទិន្នន័យថ្មីៗនេះ ធ្វើឲ្យចំនួនអ្នកឆ្លង COVID-19 ទូទាំងប្រទេសថៃកើនដល់ ៥០,១៨៣ករណី ក្នុងនោះមានអ្នកស្លាប់ ១២១នាក់ និងជាសះស្បើយវិញ ៣០,១៨៩នាក់ ខណៈអ្នកជំងឺជិត ២០,០០០នាក់ទៀត កំពុងស្ថិតក្នុងការព្យាបាល។គួរបញ្ជាក់ថា នាយករដ្ឋមន្ត្រីថៃលោក ប្រាយុទ្ធ ចាន់អូចា កាលពីដើមសប្តាហ៍នេះ បានសម្រេចចិត្តមិនទៅចូលរួម កិច្ចប្រជុំកំពូលអាស៊ាននៅក្នុងទីក្រុងហ្សាការតា ប្រទេសឥណ្ឌូណេស៊ីឡើយ ព្រោះតែលោកចង់ស្ថិតនៅក្នុងប្រទេសថៃ ដើម្បីគ្រប់គ្រងស្ថានការណ៍ COVID-19 ដែលកំពុងវិវឌ្ឍកាន់តែធ្ងន់ធ្ងរ។ សម្រាប់យុទ្ធនាការចាក់វ៉ាក់សាំងបង្ការ COVID-19 វិញ គិតត្រឹមថ្ងៃសុក្រនេះ ថៃបានចាក់វ៉ាក់សាំងសរុប ៩៦៤,៨២៥ដូសហើយជូនប្រជាជន៕

ឥណ្ឌា៖ រកឃើញអ្នកឆ្លងកូវីដ-១៩ជាង ៣៣០,០០០នាក់ក្នុងរយៈពេល ១ថ្ងៃ

ថ្ងៃទី ២៣ ខែ មេសា ឆ្នាំ ២០២១ ម៉ោង ១៣:៣៤

(ញូដេលី)៖ នេះជាថ្ងៃទី២ហើយបន្ទាប់ពីថ្ងៃព្រហស្បតិ៍ម្សិលមិញ ដែលឥណ្ឌាបានរកឃើញអ្នកឆ្លង COVID-19 រហូតដល់លើស ៣០០,០០០នាក់ក្នុងមួយថ្ងៃ និងជាកំណត់ត្រាអាក្រក់ថ្មីបំផុតមួយទៀត ទាំងសម្រាប់ប្រទេសអាស៊ីខាងត្បូងមួយនេះផង និងពិភពលោកទាំងមូលផង។ នេះបើតាមការចេញផ្សាយ ដោយសារព័ត៌មាន CNA នារសៀលថ្ងៃសុក្រ ទី២៣ ខែមេសា ឆ្នាំ២០២១។នៅថ្ងៃសុក្រនេះ អាជ្ញាធរសុខាភិបាលឥណ្ឌាបានប្រកាសពីការរកឃើញអ្នកឆ្លង COVID-19 សរុប ៣៣២,៧៣០នាក់ និងអ្នកជំងឺ ២,២៦៣នាក់ទៀតបាត់បង់ជីវិត នៅក្នុងរយៈពេលតែ ២៤ម៉ោងប៉ុណ្ណោះ។ នេះជាចំនួនករណីឆ្លង COVID-19 ប្រចាំថ្ងៃខ្ពស់បំផុត ដែលមិនមានប្រទេសណាមួយក្រៅពីឥណ្ឌា ធ្លាប់បានជួបប្រទះនោះឡើយ។គួរបញ្ជាក់ថា ក្រោយការបូកសរុបទិន្នន័យថ្មីខាងលើនេះ ធ្វើឲ្យចំនួនករណីឆ្លង COVID-19 សរុបនៅឥណ្ឌាកើនដល់ជាង ១៦,២៥៧,០០០ករណី ក្នុងនោះមានអ្នកស្លាប់់ជិត ១៨៧,០០០នាក់ និងជាសះស្បើយវិញប្រមាណ ១៣.៦៤លាននាក់ ខណៈអ្នកជំងឺ ២.៤២លាននាក់ទៀតកំពុងសម្រាកព្យាបាល។ការឆ្លងរាតត្បាតជំងឺ COVID-19 រលកថ្មីនៅឥណ្ឌាពេលនេះ ត្រូវបានគេស្តីបន្ទោសទៅលើ វិធានការទប់ស្កាត់មិនបានតឹងរ៉ឹង ពីសំណាក់រដ្ឋាភិបាល, ការប្រមូលផ្តុំគ្នាប្រារព្ធពិធីសាសនាប្រចាំឆ្នាំ, ការធ្វើយុទ្ធនាការឃោសនានៃបក្សនយោបាយ និងជាពិសេសគឺការរាតត្បាតវីរុស COVID-19 បំប្លែងខ្លួនថ្មី៕

អ្នកឆ្លង COVID-19 លើលោកកើនដល់ជិត ១៤៥លាន ៣២ម៉ឺននាក់ ស្លាប់ជាង ៣លាននាក់ និងជាសះស្បើយជាង ១២៣លាន ៣០ម៉ឺននាក់

ថ្ងៃទី ២៣ ខែ មេសា ឆ្នាំ ២០២១ ម៉ោង ១០:១២

(បរទេស)៖ គិតត្រឹមម៉ោង ៨ព្រឹកថ្ងៃសុក្រ ទី២៣ ខែមេសា ឆ្នាំ២០២១នេះ ចំនួនអ្នកឆ្លងជំងឺ COVID-19 នៅទូទាំងពិភពលោក បានកើនឡើងដល់ ១៤៥,៣២២,៥៥៣នាក់ហើយ។ ក្នុងនោះអ្នកស្លាប់មានចំនួន ៣,០៨៤,៩៩៥នាក់ និងជាសះស្បើយឡើងវិញ ១២៣,៣០៩,៥០៧នាក់។យោងតាមទិន្នន័យពីគេហទំព័រអន្តរជាតិ Worldometer បានបង្ហាញថា ការរីករាលដាលនៃជំងឺកូវីដ១៩ នៅតែមានសភាពស្រួចស្រាវចំនួនអ្នកឆ្លង និងស្លាប់ថ្មីនៅតែមានចំនួនច្រើន។ សហរដ្ឋអាមេរិក នៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ។ សហរដ្ឋអាមេរិក មានអ្នកឆ្លងជំងឺ COVID-19 ចំនួន ៣២, ៦៦៩,១២១នាក់ ស្លាប់ចំនួន ៥៨៤,២២៦នាក់ និងជាសះស្បើយចំនួន ២៥, ២៣៦,៦៥៨នាក់។ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺកូវីដ១៩ គឺប្រទេសឥណ្ឌា។ ឥណ្ឌាមានអ្នកឆ្លង ១៦,២៥៧,៣០៩នាក់ ស្លាប់ចំនួន ១៨៦,៩២៨នាក់ និងជាសះស្បើយ ១៣,៦៤១, ៦០៦នាក់។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល។ ប្រេស៊ីល មានអ្នកឆ្លង ១៤,១៧២,១៣៩នាក់ ស្លាប់ ៣៨៣,៧៥៧នាក់ និងជាសះស្បើយ ១២,៦៧៣, ៧៨៥នាក់៕

ក្រសួងសុខាភិបាល៖ អ្នកជំងឺ ១៣០នាក់បានជាសះស្បើយ ខណៈរកឃើញអ្នកឆ្លងកូវីដ១៩ ករណីថ្មីចំនួន ៤៤៦នាក់ថែមទៀត

ថ្ងៃទី ២២ ខែ មេសា ឆ្នាំ ២០២១ ម៉ោង ១៤:៥១

(ភ្នំពេញ)៖ ក្រសួងសុខាភិបាល នៅថ្ងៃទី២២ ខែមេសា ឆ្នាំ២០២១នេះ បានបញ្ជាក់ពីការបន្តរកឃើញអ្នកឆ្លងកូវីដ១៩ ថ្មី ចំនួន ៤៤៦នាក់ថែមទៀត ដែលភាគច្រើនជាអ្នករស់នៅរាជធានីភ្នំពេញ ខណៈអ្នកជំងឺចំនួន ១៣០នាក់ បានជាសះស្បើយ និងអនុញ្ញាតឲ្យចេញពីមន្ទីរពេទ្យ។សេចក្តីប្រកាសព័ត៌មាន បានបញ្ជាក់ថា អ្នកឆ្លងទាំង៤៤៦នាក់ សុទ្ធសឹងជាករណីឆ្លងក្នុងសហគមន៍២០កុម្ភៈ ដែលរួមមានរាជធានីភ្នំពេញ៣៣១នាក់, ខេត្តបន្ទាយមានជ័យ ១នាក់, ខេត្តបាត់ដំបង ១នាក់, ខេត្តកំពង់ចាម ១នាក់, ខេត្តព្រៃវែង ១នាក់, ខេត្តកំពង់ស្ពឺ ២នាក់, ខេត្តស្វាយរៀង ១នាក់, ខេត្តតាកែវ ៥នាក់, ខេត្តកណ្តាល ២១នាក់ និងខេត្តព្រះសីហនុ ៨២នាក់។សម្រាប់អ្នកជាសះស្បើយទាំង១៣០នាក់វិញ គឺមាន៣នាក់ជាអ្នកដំណើរមកពីក្រៅប្រទេស និងចំនួន ១២៧នាក់ផ្សេងទៀត សុទ្ធសឹងជាអ្នកឆ្លងក្នុងសហគមន៍ នៃព្រឹត្តិការណ៍២០កុម្ភៈ ដោយទទួលទ្ធផលធ្វើតេស្តអវិជ្ជមាន២លើក ត្រូវបានអនុញ្ញាតឲ្យចេញពីមន្ទីរពេទ្យ ប៉ុន្តែត្រូវបន្តធ្វើចត្តាឡីស័ក១៤ថ្ងៃ ដើម្បីតាមដានសុខភាព។សូមជម្រាបថា គិតត្រឹមម៉ោង៧ព្រឹក ថ្ងៃទី២២ ខែមេសា ឆ្នាំ២០២១នេះ កម្ពុជាបានរកឃើញអ្នកឆ្លងសរុបចំនួន ៨ ១៩៣នាក់ ក្នុងនោះករណីសហគមន៍២០កុម្ភៈ ចំនួន ៧ ៦៤៨នាក់, អ្នកជាសះស្បើយចំនួន ២ ៩២៤នាក់, អ្នកកំពុងសម្រាកព្យាបាលចំនួន ៥ ២០៤នាក់, អ្នកស្លាប់ចំនួន ៥៩នាក់ និងស្លាប់ដោយជំងឺផ្សេង ពេលកំពុងព្យាបាលកូវីដ១៩ចំនួន ៦នាក់៕

ឥណ្ឌា៖ រកឃើញអ្នកឆ្លងកូវីដ-១៩លើស ៣០០,០០០នាក់ក្នុង១ថ្ងៃ និងអ្នកជំងឺ ២,១០២នាក់ស្លាប់

ថ្ងៃទី ២២ ខែ មេសា ឆ្នាំ ២០២១ ម៉ោង ១៣:២៦

(ញូដេលី)៖ ប្រទេសឥណ្ឌាបានរាយការណ៍ពីអ្នកជំងឺ COVID-19 រហូតដល់ ២,១០២នាក់ទៀតបាត់បង់ជីវិត និងអ្នកឆ្លងចំនួន ៣១៥,៨០២នាក់ទៀត ត្រូវបានធ្វើតេស្តរកឃើញ តែក្នុងរយៈពេល ២៤ម៉ោងកន្លងទៅនេះប៉ុណ្ណោះ។ នេះបើតាមការចេញផ្សាយដោយសារព័ត៌មាន CNA នារសៀលថ្ងៃព្រហស្បតិ៍ ទី២២ ខែមេសា ឆ្នាំ២០២១។តួលេខឆ្លង និងស្លាប់ដោយសារ COVID-19 ប្រចាំថ្ងៃខាងលើនេះ គឺជាកំណត់ត្រាខ្ពស់បំផុតថ្មីមួយទៀតសម្រាប់ឥណ្ឌា ស្ថិតនៅចំពោះមុខការ lockdown រដ្ឋធានីញូដេលីរហូតដល់ថ្ងៃចន្ទសប្តាហ៍ក្រោយ និងការអំពាវនាវពីសំណាក់ លោកនាយករដ្ឋមន្ត្រី ណារិដ្រា ម៉ូឌី ឲ្យពលរដ្ឋចូលរួមជាមួយអាជ្ញាធរ ដើម្បីទប់ស្កាត់ការឆ្លងរាតត្បាតដ៏អាក្រក់លើកនេះ។បញ្ហាចម្បងធំមួយសម្រាប់ប្រទេស ដែលមានប្រជាជនសរុបជាង ១,៣០០លាននាក់មួយនេះ គឺការខ្វះខាតមន្ទីរពេទ្យ គ្រឿងបរិក្ខាពេទ្យ និងអុកស៊ីសែនផ្គត់ផ្គង់នៅទូទាំងប្រទេស ជាពិសេសនៅតាមបណ្តារដ្ឋភាគខាងត្បូង និងភាគកណ្តាលប្រទេស ដែលកំពុងរងការរាតត្បាតជំងឺ COVID-19 ខ្លាំងក្លាជាងគេ។គួរបញ្ជាក់ថា ក្រោយការបូកសរុបទិន្នន័យបន្ថែមខាងលើ នាំឲ្យចំនួនករណីឆ្លង COVID-19 សរុបនៅឥណ្ឌាកើនដល់ជិត ១៦លានករណី ក្នុងនោះមានអ្នកស្លាប់ ១៨៤,៦៧២នាក់ និងជាសះស្បើយឡើងវិញ ១៣.៤៥លាននាក់។ ការឆ្លងរាតត្បាតយ៉ាងគំហុកត្រូវបានគេមើលឃើញ ចាប់តាំងពីក្រុមអ្នកកាន់សាសនាហិណ្ឌូទូទាំងប្រទេសឥណ្ឌា ចាប់ផ្តើមប្រារព្ធពិធីបុណ្យ គុម មេឡា (Kumbh Mela) ដែលតែងតែមានការជួបជុំគ្នាយ៉ាងកកុញ ហើយវានឹងមានរយៈពេល ពេញមួយខែមេសានេះតែម្តង៕

ខេត្តតាកែវ៖ រកឃើញ និងបង្ហាញអត្តសញ្ញាណអ្នកកើតកូវីដចំនួន ៤នាក់ក្រោយរកឃើញនៅស្រុកបាទី

ថ្ងៃទី ២២ ខែ មេសា ឆ្នាំ ២០២១ ម៉ោង ១០:១២

(តាកែវ)៖ ស្នងការដ្ឋាននគរបាលខេត្តតាកែវ នៅថ្ងៃទី២២ ខែមេសា ឆ្នាំ២០២១នេះ បានបង្ហាញអត្តសញ្ញាណអ្នកកើតកូវីដ១៩ចំនួន៤នាក់បន្ថែមទៀត ក្រោយរកឃើញនៅស្រុកបាទី ហើយពួកគេទាំង៤នាក់ ត្រូវបានបញ្ជូនទៅសម្រាកព្យាបាលនៅមន្ទីរបង្អែកស្រុកបាទីរួចហើយ។ប្រធានមន្ទីរសុខាភិបាលខេត្តតាកែវលោកវេជ្ជបណ្ឌិត នុត ស៊ីណាត បានឲ្យនៅព្រឹកថ្ងៃទី២២ ខែមេសាថា មន្រ្តីសុខាភិបាលបានធ្វើតេស្តរកឃើញអ្នកផ្ទុកជំងឺកូវីដ១៩ចំនួន៤នាក់បន្តទៀតនៅក្នុងស្រុកបាទី។ លោកប្រធានមន្ទីរបានថ្លែងបន្តថា អ្នកផ្ទុកជំងឺកូវីដ៤នាក់ គឺត្រូវរកឃើញនៅក្នុងឃុំ៤របស់ស្រុកបាទី រួមមាន៖ ឃុំក្រាំងធ្នង់ ដែលអាជ្ញាធរបានបិទខ្ទប់ភូមិមួយកាលពីម្សិលមិញ ឃុំកណ្ដឹង ឃុំពត់ស និងឃុំត្រពាំងសាប។ លោក ភួន ឈីម អភិបាលស្រុកបាទី ក៏បានថ្លែងថា អ្នកជំងឺកឺកូវីដ១៩ទាំង៤នាក់ ត្រូវបានបញ្ជូនមកព្យាបាលនៅមន្ទីរពេទ្យបង្អែកស្រុកបាទី ដោយឡែកបងប្អូនប្រជាពលរដ្ឋដែលពាក់ព័ន្ធផ្ទាល់ត្រូវយកសំណាកទៅធ្វើតេស្តរកមេរោគកូវីដ១៩ ហើយអាជ្ញាធក៏បានណែនាំពួកគាត់ឲ្យធ្វើចត្តាឡីស័កឲ្យបានត្រឹមត្រូវ តាមការណែនាំរបស់មន្រ្តីសុខាភិបាលផងដែរ។ស្នងការដ្ឋាននគរបាលខេត្តបានបញ្ជាក់ថា នៅថ្ងៃទី២១ ខែមេសា ឆ្នាំ២០២១ ក្រុមគ្រូពេទ្យបានរកឃើញករណីវិជ្ជមានជំងឺកូវីដ១៩ ផ្ទុកលើប្រជាពលរដ្ឋខ្មែរចំនួន០៤នាក់រួមមាន៖ទី១៖ ឈ្មោះ កែវ ប៊ុនណា អាយុ៥៨ឆ្នាំ រស់នៅភូមិហនុមាណជើង ឃុំក្រាំងធ្នង់ ស្រុកបាទីទី២៖ ឈ្មោះ ឌួង រ៉ាន់ អាយុ៤២ឆ្នាំ រស់នៅភូមិទន្លេបាទី ឃុំក្រាំងធ្នង់ ស្រុកបាទីទី៣៖ ឈ្មោះ សរ សារ៉េត អាយុ៤២ឆ្នាំ រស់នៅភូមិឱភាសាំង ឃុំកណ្តឹង ស្រុកបាទីទី៤៖ ឈ្មោះ ឆិល នឿន អាយុ៤១ឆ្នាំ រស់នៅភូមិត្រពាំងត្រាវ ឃុំពត់សរ ស្រុកបាទី។បើតាមរបាយការណ៍ អ្នកជំងឺទាំង៤នាក់ខាងលើ ជាអ្នកប៉ះពាល់ដោយប្រយោលជាមួយឈ្មោះ ខាត់ អ៊ីរ៉ាក់ ភេទប្រុស អាយុ៥១ឆ្នាំ រស់នៅភូមិក្រាំងធ្នង់ ឃុំក្រាំងធ្នង់ ស្រុកបាទី ដែលរកឃើញវិជ្ជមានកូវីដ១៩ កាលពីថ្ងៃទី១៩ ខែមេសា ឆ្នាំ២០២១។ បច្ចុប្បន្នអាជ្ញាធរ និងក្រុមគ្រូពេទ្យ កំពុងចុះស្រាវជ្រាវរកអ្នកពាក់ព័ន្ធជាមួយ បុគ្គលទាំង០៤នាក់ខាងលើបន្ថែមទៀត៕

ថៃ៖ បន្តរកឃើញអ្នកឆ្លងកូវីដ-១៩ ករណីថ្មីចំនួន១,៤៥៨នាក់ និងស្លាប់ ២ករណីទៀត

ថ្ងៃទី ២១ ខែ មេសា ឆ្នាំ ២០២១ ម៉ោង ១៤:២៤

(បាងកក)៖ អាជ្ញាធរថៃនៅថ្ងៃពុធនេះ បានប្រកាសពីការរកឃើញអ្នកឆ្លងថ្មីៗនៃជំងឺ COVID-19 ចំនួន ១,៤៥៨នាក់ និងស្លាប់០២ករណី។ នេះបើតាមការចេញផ្សាយដោយ សារព័ត៌មាន Nation Thailand នៅថ្ងៃពុធ ទី២១ ខែមេសា ឆ្នាំ២០២១។ក្នុងចំណោមករណីឆ្លងថ្មីៗខាងលើ មាន៣៦៥នាក់ ត្រូវបានរកឃើញនៅក្នុងរាជធានីបាងកក ដែលជាចំនួនច្រើនជាងគេ ហើយបន្ទាប់មក គឺ១៣៤ករណី ត្រូវបានរកឃើញនៅខេត្ត Chiang Mai, ៨០ករណីនៅខេត្ត Chonburi និង ៦៩ករណីនៅខេត្ត Nonthaburi។ ចំណែកឯ ករណីអ្នកជំងឺ០២នាក់ដែលទើបតែស្លាប់ ក្នុងនោះមានម្នាក់ជាស្រ្តីអាយុ៥៦ឆ្នាំ នៅបាងកក និងម្នាក់ទៀតជាបុរសអាយុ៣២ឆ្នាំ នៅ Nonthaburi។គួរបញ្ជាក់ថា គិតត្រឹមថ្ងៃពុធនេះ ករណីឆ្លង COVID-19 សរុបនៅទូទាំងប្រទេសថៃ បានកើនដល់ ៤៦,៦៤៣នាក់ ក្នុងនោះមាន អ្នកជាសះស្បើយ២៩,៣៧១នាក់ និងស្លាប់១១០នាក់។ រីឯយុទ្ធនាការចាក់វ៉ាក់សាំងបង្ការជំងឺនេះវិញ គឺថៃបានចាក់សរុបចំនួន ៧១២,៦១០ដូស៕