ឌីជេល្បីឈ្មោះម្នាក់ទទួលមរណភាព ក្រោយធ្វើតេស្តវិជ្ជមានចំពោះកូវីដ១៩
(បរទេស)៖ ឌីជេចាស់វស្សារ និងជាពិធីករវិទ្យុក្នុងទីក្រុង New Orleans គឺ Black N Mild បានទទួលមរណភាពក្នុងវ័យ៤៤ឆ្នាំ បន្ទាប់ពីបានធ្វើតេស្ត ឃើញវត្តមានចំពោះកូវីដ១៩។ បើតាមការិយាល័យ Parish coroner ក្នុងទីក្រុង New Orleans បានបញ្ជាក់ នៅថ្ងៃសុក្រ ទី២០ ថាឌីជេ Black N Mild ដែលមានឈ្មោះកំណើតថា Oliver Stokes Jr បានទទួលមរណភាពកាលពីថ្ងៃព្រហស្បត្តិ៍ បន្ទាប់ពីឆ្លងកូវីដ១៩។បើយោងតាមមន្ទីសុខាភិបាលប្រចាំទីក្នុង New Orleans បានឲ្យដឹងថា លោក Stokes មានជំងឺប្រចាំកាយជាយូរមកហើយ ប៉ុន្តែមិនដឹងថា ស្ថានភាពជំងឺប្រចាំកាយរបស់លោក ស្ថិតក្នុងលក្ខខណ្ឌណានោះឡើយ។ Stokes ត្រូវបានគេរាយការណ៍ថា មានអាការៈគ្រុនក្តៅ ហើយបានចាកចេញពីកន្លែងធ្វើការ នៅថ្ងៃទី៩ ខែមីនា ដោយមិនបានត្រឡប់មកធ្វើការវិញទេ។គួរជម្រាបថា លោក Storkes ត្រូវបានគេដឹងថា ជាអ្នកនាំយកតន្រ្តីបែបលោត ឬបែប hip hop ឬក៏ហៅម្យ៉ាងទៀតថា bounce music ឲ្យមានក្នុងកម្មវិធីផ្សាយរបស់វិទ្យុ។ លោកគឺជាឌីជេដំបូង នៅក្នុងប្រវត្តិសាស្រ្ត Nola ដែលមានកម្មវិធីវិទ្យុ បញ្ចូលជាមួយតន្ត្រីបែប hip hop ឬ Nola Bounce។ នេះបើតាមអ្វីដែលលោក Stokes ផ្ទាល់បានបង្ហោះក្នុងបណ្តាញសង្គមកាលពីខែកុម្ភៈកន្លងទៅ៕
ប្រទេសចិនគ្មានករណីឆ្លងវីរុសកូរ៉ូណាក្នុងតំបន់សម្រាប់ថ្ងៃទី ៣ តែករណីឆ្លងនាំចូលពីបរទេសមានការកើនឡើង
ប្រទេសចិនបានរាយការណ៍ថា គ្មានករណីឆ្លងវីរុសកូរ៉ូណានៅតាមមូលដ្ឋាន ៣ថ្ងៃជាប់គ្នាហើយ ខណៈដែលការឆ្លងជំងឺប្រចាំថ្ងៃទាក់ទងនឹងអ្នកធ្វើដំណើរមកពីប្រទេសផ្សេងៗបានបន្តកើនឡើង។គណៈកម្មការសុខាភិបាលជាតិរបស់ចិនបានឱ្យដឹងថា មានករណីឆ្លងវីរុសថ្មីចំនួន ៤១ ករណីកាលពីថ្ងៃសុក្រសុទ្ធតែជាអ្នកនាំចូលពីបរទេស (ជាអ្នកដែលចូលមកប្រទេសចិន ឬអាចហៅបានថា ជាករណីនាំចូលជំងឺ COVID-19 ដែលត្រូវបានអាជ្ញាធរចិនធ្វើតេស្តរកឃើញ) ។ ចំនួននេះបានធ្វើឱ្យចំនួនករណីនាំចូលសរុបកើនដល់ ២៦៩ ករណី ហើយតារាងខ្ពស់ជាងគេគឺនៅទីក្រុងប៉េកាំងដែលមានករណីនាំចូលថ្មីចំនួន ១៤ ខណៈទីក្រុងសៀងហៃ និងខេត្តចំនួន ៦ ទៀតក៏បានកំណត់អត្តសញ្ញាណករណីបែបនេះដែរ។អាជ្ញាធរសុខាភិបាលបាននិយាយនៅក្នុងសេចក្តីថ្លែងការណ៍មួយនៅថ្ងៃសៅរ៍ថា ចំនួននេះបានធ្វើឱ្យចំនួនករណីដែលបានបញ្ជាក់នៅក្នុងប្រទេសចិនកើនឡើងដល់ ៨១.០០៨ នាក់៕
អ៉ីតាលី កាន់តែធ្ងន់ធ្ងរ! ក្នុងមួយថ្ងៃមនុស្ស ៦២៧នាក់ថ្មីទៀតស្លាប់ដោយសារជំងឺ Covid-19
(អ៉ីតាលី)៖ ចំនួនមនុស្សស្លាប់ដោយសារតែវីរុសកូរ៉ូណាថ្មី (COVID-19) នៅក្នុងប្រទេសអ៉ីតាលី បានកើនឡើងដល់៤០៣២នាក់ ក្រោយពីអ្នកជំងឺ៦២៧នាក់ថ្មីទៀត បានស្លាប់នៅក្នុងរយៈពេលតែមួយថ្ងៃប៉ុណ្ណោះ ដែលអត្រាមរណនេះជាតួលេខខ្ពស់បំផុតមិនធ្លាប់មាននៅក្នុងប្រទេសអ៉ីតាលី។ នេះបើយោងតាមសារព័ត៌មាន AP ចេញផ្សាយនាយប់ថ្ងៃទី២០ ខែមីនា ឆ្នាំ២០២០។គិតត្រឹមល្ងាចថ្ងៃសុក្រ ទី២០ ខែមីនា ឆ្នាំ២០២០នេះ COVID-19 ដែលត្រូវបានអង្គការសុខភាពពិភពលោក WHO ប្រកាសចាត់ទុកជា «ជំងឺរាតត្បាតជាសកល» បានវាយលុកចូលដល់ប្រទេស និងដែនដីសរុបចំនួន ១៨២ ហើយនៅទូទាំងសកលលោក ពោលវាបានសាយភាយពាសពេញ ទ្វីបទាំងអស់លើភពផែនដី លើកលែងតែទ្វីបទឹកកកអង់តាក់ទិកមួយប៉ុណ្ណោះ។ ជំងឺរាតត្បាតដ៏កាចសាហាវមួយនេះ វាបានចម្លងទៅមនុស្សសរុបចំនួន ២៦៥,៨៦៧ករណី ដែលក្នុងនោះ ១១,១៨០នាក់ស្លាប់ និង ៩០,៦០៣នាក់ ជាសះស្បើយនៅទូទាំងសកលលោក៕
សម្ដេចក្រឡាហោម ស ខេង៖ អ្នកបន្ដបំផុសព័ត៌មានមិនពិតរឿង COVID-19 នឹងត្រូវទទួលខុសត្រូវចំពោះមុខច្បាប់
(ភ្នំពេញ)៖ ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ សម្ដេចក្រឡាហោម ស ខេង នៅព្រឹកថ្ងៃទី២០ ខែមីនា ឆ្នាំ២០២០នេះ បានប្រកាសពីវិធានការ និងការទទួលខុសត្រូវចំពោះមុខច្បាប់ជាធរមាន ចំពោះជនអគតិទាំងឡាយណា ដែលនៅតែគឃ្លើនបន្ដបង្ហោះព័ត៌មានប្រឌិតរឿងវីរុស COVID-19 ធ្វើឲ្យចលាចលក្នុងសង្គម។ក្នុងកិច្ចសម្ភាសន៍ជាមួយអ្នកសារព័ត៌មាន ក្រោយបញ្ចប់កិច្ចប្រជុំស្ដីពីវិធានការណ៍ការពារជំងឺ COVID-19 នៅទីស្ដីការក្រសួងមហាផ្ទៃ សម្ដេចក្រឡាហោម ស ខេង បានគូសបញ្ជាក់ថា មកដល់ពេលនេះ បានរីករាលដាលពេញពិភពលោក ហើយប្រទេសកម្ពុជាក៏មានការកើនឡើងនូវអ្នកដែលមានផ្ទុក COVID-19 នេះផងដែរ ដូច្នេះពេលនេះមិនមែនជាពេល ត្រូវជះទឹកដាក់គ្នាទេ ពោលត្រូវតែរួមគ្នាទប់ស្កាត់។សម្ដេចក្រឡាហោម ស ខេង បានថ្លែងយ៉ាងដូច្នេះថា «ក្នុងករណីថា ព័ត៌មានវាអត់មានទេ រួចហើយគាត់បំផុសដែលខ្ញុំសុំថា សុំមេត្តាកាត់បន្ថយ ហើយឈានទៅលុបបំបាត់ ដើម្បីយើងរួមគ្នាការពារជីវិត សង្គមរបស់យើង [...] តាមច្បាប់យើងជាធរមាន អ្នកទាំងឡាយណាដែលនៅតែប្រើប្រាស់វោហាសាស្ដ្រ ដែលវានាំឲ្យច្របូកច្របល់ ត្រូវទទួលខុសត្រូវចំពោះមុខច្បាប់»។ជាមួយគ្នានេះ សម្ដេចក្រឡាហោម ស ខេង បានស្នើសុំកុំឲ្យមានការរើសអើងអ្នកដែលមានផ្ទុកវីរុស COVID-19 នៅប្រទេសកម្ពុជា ដោយហេតុថា ជំងឺនេះកើតគ្រប់ជាតិសាសន៍ទាំងអស់។ សម្ដេចក៏បានបញ្ជាក់ថា ក្នុងសេចក្ដីណែនាំរបស់ក្រសួងមហាផ្ទៃ ទៅថ្នាក់ខេត្តក៏បានបញ្ជាក់ចំណុចនេះផងដែរថា មិនត្រូវឲ្យមានការរើសអើងនោះឡើយ។គួរជម្រាបថា កន្លងទៅនាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ ធ្លាប់បានអះអាងថា រហូតមកដល់ពេលនេះ សមត្ថកិច្ចបានឃាត់ខ្លួនមនុស្ស៣នាក់ហើយ ដែលបង្ហោះព័ត៌មានបំពុលតាមបណ្ដាញសង្គម ខណៈ២នាក់ ត្រូវបានបញ្ជូនទៅតុលាការ និងម្នាក់ទៀតត្រូវអប់រំណែនាំ។សូមបញ្ជាក់ថា គិតត្រឹមយប់ថ្ងៃទី១៩ ខែមីនា ឆ្នាំ២០២០ កម្ពុជាបានរកឃើញអ្នកឆ្លងជំងឺកូវីដ១៩ ចំនួន៤៧ករណីហើយ ក្នុងនោះមានប្រុស៤៣នាក់ និងនារីចំនួន៤នាក់ ខណៈដែលក្រសួងសុខាភិបាល កំពុងបន្តស្វែងរក និងធ្វើតេស្តលើអ្នកពាក់ព័ន្ធផ្សេងទៀត។ រាជរដ្ឋាភិបាល បានបង្កើតគណៈកម្មាធិការជាតិប្រយុទ្ធប្រឆាំងនឹងជំងឺកូវីដ ខណៈក្រសួងស្ថាប័នមួយចំនួន ចាប់ផ្តើមដាក់វិធានការទប់ស្កាត់ចំពោះការឆ្លងរីករាលដាល កូវីដផងដែរ៕
ប្រទេសរុស្ស៊ីចាប់ផ្តើមសាកល្បងគំរូវ៉ាក់សាំងការពារ COVID-19 ទៅលើសត្វ
មូស្គូ៖ អ្នកវិទ្យាសាស្ត្រផ្នែកសុខភាពអតិថិជនរបស់រុស្ស៊ីបាននិយាយនៅថ្ងៃសុក្រថា អ្នកវិទ្យាសាស្ត្ររុស្ស៊ីបានចាប់ផ្តើមសាកល្បងគំរូនៃវ៉ាក់សាំងដែលមានសក្តានុពលប្រឆាំងនឹងវីរុសកូរ៉ូណាថ្មីទៅលើសត្វនៅក្នុងមន្ទីរពិសោធន៍មួយនៅខេត្តស៊ីបេរី (Siberia)។ពួកគេបានឱ្យដឹងថា អ្នកវិទ្យាសាស្ត្រនៅមជ្ឈមណ្ឌល Vektor State virology and Biotechnology Center នៅទីក្រុង Novosibirsk បានបង្កើតគំរូវ៉ាក់សាំងដោយផ្អែកលើវេទិកាបច្ចេកវិទ្យាចំនួន ៦ ផ្សេងគ្នា ហើយបានចាប់ផ្តើមធ្វើតេស្ត៍កាលពីថ្ងៃច័ន្ទដើម្បីព្យាយាមអនុវត្តថាតើវាមាន (ប្រសិទ្ធិភាព និងកម្រិត) ណាដែលអាចត្រូវបានគេប្រើ។ ប្រទេសរុស្ស៊ីបានរាយការណ៍ថា មានករណីឆ្លងវីរុសកូរ៉ូណាចំនួន ១៩៩ ករណីមកទល់ពេលនេះ គឺតិចជាងបណ្តាប្រទេសអ៊ឺរ៉ុបជាច្រើនទៀត ប៉ុន្តែតួលេខនេះបានកើនឡើងយ៉ាងខ្លាំងក្នុងរយៈពេលប៉ុន្មានថ្ងៃថ្មីៗនេះ។ ហើយមានមនុស្សម្នាក់គត់ដែលត្រូវបានគេធ្វើរោគវិនិច្ឆ័យថា ស្លាប់ដោយសារវីរុសនេះ៕
វៀតណាមទើបរកឃើញអ្នកឆ្លង COVID-19 ៩នាក់ទៀត ធ្វើឲ្យចំនួនសរុបកើនដល់៨៥នាក់!
(ហាណូយ)៖ ក្រសួងសុខាភិបាលវៀតណាមបានឱ្យដឹងថា ចំនួនអ្នកឆ្លង COVID-19 នៅទូទាំងប្រទេសបានកើនដល់ ៨៥នាក់ហើយ បន្ទាប់ពីអ្នកឆ្លងថ្មី ០៩ករណី ត្រូវបានរាយការណ៍ពេញមួយថ្ងៃព្រហស្បតិ៍ម្សិលមិញ។ នេះបើតាមការចេញផ្សាយដោយ ទីភ្នាក់ងារព័ត៌មានចិនស៊ីនហួរ នៅព្រឹកថ្ងៃសុក្រ ទី២០ ខែមីនា ឆ្នាំ២០២០។អ្នកឆ្លងថ្មីទាំង ០៩ករណីខាងលើ ក្នុងនោះរួមមានជនជាតិអាមេរិកកាំងម្នាក់ កំពុងរស់នៅក្នុងទីក្រុងហូជីមិញ (Ho Chi Minh) និងដែលធ្លាប់ធ្វើដំណើរទៅកាន់ប្រទេសថៃ ហើយត្រឡប់មកប្រទេសវៀតណាមវិញ ដោយជិះនៅលើជើងហោះមួយមកពីប្រទេសតួកគី។ ចំណែកឯអ្នកឆ្លង ០៨នាក់ទៀត គឺជាជនជាតិវៀតណាមក្នុងនោះមាន មាននិស្សិតទៅរៀនក្រៅប្រទេស ០៤នាក់ ទើបត្រឡប់មកពីអង់គ្លេស និងម្នាក់ទៀត ទើបត្រឡប់មកពីប្រទេសបារាំង ហើយ ០៣នាក់មកពីអង់គ្លេស ឆ្លងកាត់តាមទីក្រុងឌូបៃ។បើតាមក្រសួងសុខាភិបាលវៀតណាម មនុស្ស ១២២នាក់ ដែលសង្ស័យឆ្លង COVID-19 កំពុងអនុវត្តវិធានការនៅដាច់ដោយឡែកពីគេ ខណៈជិត ៤២,០០០នាក់កំពុងទទួលការត្រួតពិនិត្យជាបន្តបន្ទាប់ គិតត្រឹមថ្ងៃព្រហស្បតិ៍ម្សិលមិញ ខណៈមនុស្ស ១៦នាក់ក្នុងចំណោមអ្នកឆ្លង ៨៥ករណីបានជាសះស្បើយ៕
អេស្បាញបិទទ្វារសណ្ឋាគារទាំងអស់ ដោយសារការស្លាប់ដោយមេរោគឆ្លងកើនឡើង
អេស៉្បាញ៖ កាលពីថ្ងៃព្រហស្បតិ៍ រដ្ឋាភិបាលអេស្បាញបានបញ្ជាឱ្យបិទសណ្ឋាគារទាំងអស់នៅក្នុងប្រទេស ហើយបានសន្យាថា នឹងអនុវត្តវិធានការពិសេសនៅតាមមណ្ឌលថែទាំ បន្ទាប់ពីមានការកើនឡើងនូវករណីវីរុសកូរ៉ូណា និងការស្លាប់នៅក្នុងប្រទេស។ក្រុមមន្រ្តីបានរាយការណ៍ថា ការស្លាប់បានកើនឡើងជាងមួយភាគបី កាលពីថ្ងៃព្រហស្បតិ៍ដែលឈានដល់ ៧៦៧ នាក់ ខណៈដែលចំនួនករណីឆ្លងបានកើនឡើងមួយភាគបួនដល់ ១៧.១៤៩ ដែលធ្វើឱ្យអេស្បាញក្លាយជាប្រទេសដែលរងគ្រោះខ្លាំងជាងគេទី ២ នៅអឺរ៉ុប បន្ទាប់ពីប្រទេសអ៊ីតាលី។ រដ្ឋាភិបាលបានចេញបទបញ្ជាឱ្យគ្រប់សណ្ឋាគារ និងកន្លែងស្នាក់នៅសំរាប់ភ្ញៀវទេសចរផ្សេងទៀតត្រូវបិទក្នុងរយៈពេលប្រាំពីរថ្ងៃដើម្បីធានានូវការរីករាលដាលនៃជំងឺរាតត្បាតនេះ។អេស្បាញដែលជាប្រទេសដែលមានភ្ញៀវទេសចរចូលទស្សនាច្រើនជាងគេលំដាប់ទី ២ នៅលើពិភពលោកក្នុងឆ្នាំ ២០១៨ បានបិទព្រំដែនដីរបស់ខ្លួនរួចរាល់ហើយ លើកលែងតែការត្រលប់ទៅវិញនៃប្រជាជនរបស់ខ្លួន៕
អភិបាលខេត្តកំពង់ចាម ប្រាប់បងប្អូនខ្មែរឥស្លាម សូមកុំឲ្យជឿលើព័ត៌មានមិនពិតពាក់ព័ន្ធនឹង COVID-19
(កំពង់ចាម)៖ អភិបាលខេត្តកំពង់ចាមលោក អ៊ុន ចាន់ដា ក្នុងពិធីជួបប្រជុំជាមួយតំណាងបងប្អូនខ្មែរឥស្លាមប្រចាំខេត្តកំពង់ចាម នៅថ្ងៃទី១៩ ខែមីនា ឆ្នាំ២០២០ បានថ្លែងថា ពេលថ្មីៗ នេះ ឃើញមានជនបំពុលសង្គម ដើម្បីប្រយោជន៍បុគ្គល និងបក្ខពួក បានយកប្រធានបទ Covid-19 មកផ្សព្វផ្សាយតាមបណ្ដាញសង្គម ក្នុងបំណងបំបែកបំបាក់ឱ្យមានការ រើសអើង រវាងបងប្អូនខ្មែរឥស្លាម និងប្រជាពលរដ្ឋខ្មែរ។លោកអភិបាលខេត្តបានថ្លែងបន្តថា ដោយមានព័ត៌មានបំពុលបែបនោះ សូមបងប្អូនកុំជឿតាម ការញុះញង់របស់ជនអគតិទាំងនោះ ពោលគ្រប់បញ្ហា សូមបងប្អូនទំនាក់ទំនងព័ត៌មានមកថ្នាក់ដឹក នាំរដ្ឋ ឬថ្នាក់ដឹកនាំក្នុងជួរសាសនាដើម្បីស្វែងរកព័ត៌មានពិត។ម្យ៉ាងទៀត បងប្អូនត្រូវតាមដានជាប្រចាំរាល់សន្និសីទសារព័ត៌មានរបស់ក្រសួងសុខាភិបាល ដែលបានចេញសេចក្តីជូនដំណឹងជាប្រចាំ ហើយព័ត៌មានដែលផ្សាយចេញ ពីក្រសួងសុខាភិបាលទើបជាព័ត៌មានពិត។លោកអភិបាលខេត្តក៏បានថ្លែង លើកទឹកចិត្តដល់បងប្អូនខ្មែរឥស្លាមនៅក្នុងខេត្តកំពង់ចាម សូមតាំងសតិអារម្មណ៍ឱ្យបានហ្នឹងនរ ព្រោះថា មកដល់ម៉ោងនេះ យើងត្រូវការសាមគ្គី ការលើកទឹកចិត្តគ្នាដើម្បី ឲ្យបងប្អូនយើងចេះប្រមូលផ្តុំកម្លាំងប្រឆាំងនឹង Covid-19 ឲ្យទទួលបានជោគជ័យ។យ៉ាងណាក៏ដោយ មកដល់ម៉ោងនេះ ប្រទេសកម្ពុជាយើង បានគ្រប់គ្រងស្ថានការណ៍បានជាធម្មតានៅឡើយ។ ទន្ទឹមនឹងនេះ រដ្ឋាភិបាល បានសម្រេចបង្កើតគណៈកម្មការទប់ស្កាត់ Covid-19 ដោយ មានសមាសភាពសម្ដេចតេជោ ហ៊ុន សែន ប្រមុខដឹកនាំជាប្រធានក្នុងប្រតិបត្តិការនេះទៀតផង។ ហើយថ្មីៗនេះ រដ្ឋាភិបាលក៏បានសម្រេចលើកពេលកម្មវិធីជួបជុំធំៗទាំងអស់ និងបិទ ក្លឹបកំសាន្តនានា ដើម្បីធានាបាននូវសុខសុវត្ថិភាពជូនបងប្អូនប្រជាពលរដ្ឋយើងផងដែរ៕
ចិន៖ ថ្ងៃទី២ ដែលគ្មានករណីឆ្លង COVID-19 ក្នុងស្រុក តែករណីនាំចូលនៅតែមាន
ការឆ្លងមេរោគវីរុសកូរ៉ូណានាំចូលចិនពីបរទេស (ជាអ្នកដែលចូលមកប្រទេសចិន ឬអាចហៅបានថា ជាករណីនាំចូលជំងឺ COVID-19 ដែលត្រូវបានអាជ្ញាធរចិនធ្វើតេស្តរកឃើញ) ទទួលបានកំណត់ត្រាថ្មីប្រចាំថ្ងៃ ខណៈពេលដែលអ្នកធ្វើដំណើរឆ្លងដល់ខេត្តមួយចំនួនដែលមិនធ្លាប់មានពីមុនមក ដោយបង្ខំឱ្យអាជ្ញាធរទប់ស្កាត់យ៉ាងតឹងរឹង។ ប្រទេសចិនបានបង្កើនវិធានការណ៍ដើម្បីការពារប្រឆាំងនឹងការឆ្លងពីប្រទេសក្រៅ ដោយសារមេរោគនេះឆ្លងរាលដាលពាសពេញពិភពលោក ដោយមានការព្រួយបារម្ភថាអ្នកដំណើរអាចបង្កឱ្យមានការឆ្លងរាលដាលដល់ខេត្តផ្សេងៗដូចជា នៅក្វាងទុង ៨ នាក់ នៅស៊ាងហៃ និង ៦ នាក់នៅប៉េកាំង។ គណៈកម្មការសុខភាពជាតិរបស់ប្រទេសចិនបាននិយាយថា ប្រទេសចិនមានករណីថ្មីនាំចូលចំនួន ៣៩ ករណីកាលពីថ្ងៃព្រហស្បតិ៍។ ប៉ុន្តែគ្មានករណីឆ្លងថ្មីនៃជំងឺ COVID-19 ត្រូវបានរាយការណ៍នោះទេ កាលពីថ្ងៃព្រហស្បតិ៍ម្សិលមិញ នៅទូទាំងប្រទេសចិន ខណៈទីក្រុងវូហានវិញទាំងករណីឆ្លងថ្មី និងករណីសង្ស័យអំពីការឆ្លង COVID-19 ក៏គ្មាននោះដែរ។នៅក្នុងរបាយការណ៍ថ្មីចុងក្រោយនេះ NHC ក៏បានបញ្ជាក់ផងដែរថា ក្នុងចំណោមអ្នកឆ្លងវីរុសកូរ៉ូណាថ្មី ឬ COVID-19 ទាំងអស់ចំនួន ៨០,៩៦៧ ករណីខាងលើនៅទូទាំងចិនដីគោក មានអ្នកជំងឺចំនួន ៣,២៤៨នាក់ បានស្លាប់បាត់បង់ជីវិត។
