trollkhmer news

សង្គមនិងជីវិត

លេងសើចពេកហើយ! យន្តហោះមួយគ្រឿងបង្ខំចិត្តបត់ក្បាលត្រលប់ក្រោយ ដោយសារតែស្រ្តីម្នាក់ភ្លេចកូន

ថ្ងៃទី ១២ ខែ មិនា ឆ្នាំ ២០១៩ ម៉ោង ១២:១០

យន្តហោះដឹកអ្នកដំណើរមួយគ្រឿង ត្រូវបានគេរាយការណ៍ថា បានបង្ខំចិត្តបើកត្រលប់ក្រោយទៅកាន់អាកាសយានដ្ឋានអារ៉ាប៊ីសាអូឌីតវិញ បន្ទាប់ពីស្ត្រីម្នាក់ភ្លេចកូនរបស់គាត់ទីនោះ។ជើងហោះហើររបស់ប្រទេសអារ៉ាប៊ីសាអូឌីតពីទីក្រុងជេដដា កំពុងធ្វើដំណើរទៅកាន់ទីក្រុងគូឡាឡាំពួប្រទេសម៉ាឡេស៊ី ភ្លាមនោះ ស្ត្រីម្នាក់ទើបតែដឹងខ្លួនថា បាត់កូនរបស់គាត់ និងបានប្រាប់ដល់ក្រុមនាវិក។អ្នកបើកបរ បានស្នើសុំការអនុញ្ញាតឱ្យវិលត្រឡប់ទៅកាន់ក្រុងជេដាដាវិញពីអ្នកត្រួតពិនិត្យចរាចរណ៍ផ្លូវអាកាស។ នេះបើយោងតាមប្រព័ន្ធផ្សព្វផ្សាយអារ៉ាប់បានរាយការណ៍យោងតាមសារព័ត៌មាន Gulf News បានឱ្យដឹងថា ស្ត្រីរូបនេះបានទុកកូននៅច្រកចេញដំណើរនៅព្រលានយន្តហោះអន្តរជាតិ King Abdul Aziz៕

ព្រឹកនេះសមត្ថកិច្ចបញ្ជូន ឧកញ៉ា គិត ធាង ទៅតុលាការក្រុងភ្នំពេញ ដើម្បីសាកសួរពាក់ព័ន្ធនឹងគ្រឿងញៀន នៅរ៉ុក

ថ្ងៃទី ១២ ខែ មិនា ឆ្នាំ ២០១៩ ម៉ោង ១០:៤៩

ភ្នំពេញ៖ កម្លាំងសមត្ថកិច្ចនគរបាលរាជធានីភ្នំពេញ នៅព្រឹកថ្ងៃទី១២ ខែមីនា ឆ្នាំ២០១៩នេះ បានបញ្ជូន លោកឧកញ៉ា គិត ធាង ម្ចាស់ក្លឹបកម្សាន្តរ៉ុក ទៅកាន់តុលាការក្រុងភ្នំពេញហើយ ដើម្បីសាកសួរពាក់ព័ន្ធនឹងគ្រឿងញៀននៅរ៉ុក ដែលបង្រ្កាបបានកាលពីខែមុន។ឧកញ៉ា​ គិត​ ធាង ម្ចាស់ក្លឹបកំសាន្តរ៉ុក ត្រូវបានសមត្ថកិច្ចនាំខ្លួនទៅកាន់ស្នងការដ្ឋានរាជធានីភ្នំពេញ កាលពីល្ងាច ថ្ងៃទី១១ ខែមីនា ឆ្នាំ២០១៩ ទៅតាមដីការបស់តុលាការ បន្ទាប់ពីសមត្ថកិច្ចបានទៅដល់ផ្ទះរបស់លោក នៅខណ្ឌទួលគោក រាជធានីភ្នំពេញ។ នេះបើតាម នាយឧត្តមសេនីយ៍ នេត សាវឿន អគ្គស្នងការនគរបាលជាតិ ដែលបញ្ជាក់ប្រាប់អង្គភាពព័ត៌មាន Fresh News។នាយឧត្តមសេនីយ៍​ នេត សាវឿន បានថ្លែងថា៖ «កម្លាំងនៃអគ្គស្នងការដ្ឋាននគរបាលជាតិ បានអនុវត្តតាមដីការបស់តុលាការ ដោយនាំខ្លួនលោកឧកញ៉ា គិត ធាង (ម្ចាស់ក្លឹបកំសាន្តរ៉ុក) នៅវេលាម៉ោង៦ល្ងាចថ្ងៃទី១១ ខែមីនា ឆ្នាំ២០១៩ ទៅកាន់ស្នងការដ្ឋាននគរបាលរាជធានីភ្នំពេញ ដើម្បីសាកសួរពាក់ព័ន្ធរឿងគ្រឿងញៀន នៅមជ្ឈមណ្ឌលកំសាន្តរ៉ុក។ នៅពេលនេះលោកឧកញ៉ា គិត ធាង កំពុងត្រូវបានសាកសួរនៅស្នងការដ្ឋាននគរបាលរាជធានីភ្នំពេញ»។ចំណាត់ការរបស់សមត្ថកិច្ច និងតុលាការ ក្នុងការនាំខ្លួបានធ្វើឡើង បន្ទាប់ពីសម្តេចតេជោ ហ៊ុន សែន នាយករដ្ឋមន្រ្តីកម្ពុជា ក្នុងពិធីប្រគល់សញ្ញាបត្រជូន និស្សិតសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច (RULES) កាលពីព្រឹកថ្ងៃទី១១ ខែមីនា បានបញ្ជាឱ្យកម្លាំងសមត្ថកិច្ចទាំងអស់ តាមស្វែងរកមេខ្លោងគ្រឿងញៀន នៅក្លឹបកម្សាន្តរ៉ុក (Rock) ឱ្យឃើញ ហើយត្រូវចាត់វិធានការតាមច្បាប់ឱ្យបានម៉ឺងម៉ាត់៕

ឆេះផ្ទះ​ល្វែង​ស្តុក​ទុក​​គ្រឿង​អគ្គិសនី​​មួយ​កន្លែង ​បណ្ដាល​ឲ្យ​រងការខូចខាត​សម្ភារៈ​មួយ​ចំនួន ​និងអ្នកជិតខាង​ម្នាក់​រង​របួស

ថ្ងៃទី ១២ ខែ មិនា ឆ្នាំ ២០១៩ ម៉ោង ១០:៣៣

ភ្នំពេញ​៖​ ផ្ទះ​ល្វែង​ស្តុក​ទុក​​គ្រឿង​អគ្គិសនី​​មួយ​កន្លែង​ ត្រូវ​បាន​អគ្គីភ័យ​ឆាប​ឆេះ​បណ្ដាល​ឲ្យ​រងការខូចខាត​សម្ភារៈ​មួយ​ចំនួន ​និង​អ្នកជិតខាង​ម្នាក់រង​របួស​ ហេតុការណ៍​នេះ​បាន​បង្កឲ្យភ្ញាក់ផ្អើល​ឡើង​ នាវេលា​ម៉ោង​ជាង​៩យប់​ថ្ងៃ​ទី​១១​ ខែមិនា​ ឆ្នាំ​២០១៩ ដែល​មាន​ទីតាំង​នៅ​តាម​បណ្ដោយ​ផ្លូវ​៣៤៨ កែង​ផ្លូវ​លេខ​១៤៣ ស្ថិត​ក្នុង​សង្កាត់​បឹង​កេងកងទី​៣​ ​ខណ្ឌ​ចំការមន​ ​រាជធានី​ភ្នំពេញ​។ប្រជាពលរដ្ឋ​ដែល​បាន​ឃើញ​ហេតុការណ៍​បាន​ប្រាប់​ឲ្យ​ដឹង​ថា ​នៅ​មុន​ពេល​កើតហេតុ​គេ​បាន​ឃើញ​ផ្សែង​ខ្មួលខ្មាញ់​ចេញ​ពី​ក្នុង​​ផ្ទះ​ ដែល​ស្តុប​គ្រឿង​អគ្គិសនី​យ៉ាង​ខ្លាំង​ ភ្លាម​ៗ​នោះ ​អ្នក​ដែល​បាន​ឃើញ​ហេតុការណ៍​បាន​ស្រែក​ហៅ​ឆោឡោ​ ដើម្បី​ឲ្យ​ប្រជាពលរដ្ឋ​ជួយ​ទាក់ទង​ទៅ​សមត្ថកិច្ចមូលដ្ឋាន​ ដើម្បី​ធ្វើ​ការ​​សហការគ្នាជាមួយនឹងសមត្ថកិច្ចជំនាញផ្នែកពន្លត់អគ្គិភ័យឲ្យចុះមកធ្វើការអន្តរាគមន៍ជាបន្ទាន់​ផង​ដែរ​។ មិន​បាន​ប៉ុន្មាន​ផង​ស្រាប់​តែ​ឃើញ​មាន​រថយន្ត​ពន្លត់​អគ្គីភ័យ​ជា​ច្រើន​​គ្រឿង​មក​ដល់ ​ហើយ​ធ្វើ​ការ​បាញ់​ពន្លត់​ដោយ​ប្រើ​ប្រាស់​រថយន្ត​ពន្លត់​អគ្គិភ័យ​អស់​ទឹក​ជា​ច្រើន​គ្រឿង​ ទើប​រលត់​ជា​ស្ថាពរ​នៅ​វេលា​ម៉ោង​១១យប់​។សូម​បញ្ជាក់​ផង​ដែរ​ថា​ ហេតុការណ៍​អគ្គិភ័យ​ខាង​លើ​​នេះ ​ត្រូវ​បាន​រថយន្ត​ពន្លត់​អគ្គិភ័យ​ជា​ច្រើន​គ្រឿង ​បានចេញមកជួយអន្តរាគមន៍បាញ់ពន្លត់​អស់​ជា​ច្រើន​គ្រឿង ​ទើបអាច​ទប់ស្កាត់​នៃ​ការ​ឆេះនេះ ​​មិន​ឲ្យ​រាលដាល​ទៅ​កន្លែង​​ផ្សេង​ទៀត​ ហើយ​ហេតុ​ការណ៍​នេះបណ្តាល​ឲ្យ​​មានអ្នកជិតខាង​ម្នាក់​​បាន​រង​របួស​​ បាន​រថយន្ត​សង្គ្រោះ​បន្ទាន់​ដឹក​យក​ទៅ​សង្គ្រោះ​ភ្លាមៗ​នៅ​ឯ​មន្ទីរពេទ្យ​ ចំណែក​ឯ​​សម្ភា​រៈ​មួយ​ចំនួន​ ដែលនៅ​ជាន់​ខាង​លើ​ត្រូវ​​បាន​ឆាបឆេះ​គ្មាន​សល់​អ្វី​ឡើយ​​។ដោយឡែក សម្រាប់ដើមចងដែលបង្កឲ្យមានគ្រោះអគ្គិភ័យ នេះនៅពុំទាន់ត្រូវបាន​សមត្ថកិច្ច​ប្រាប់​ឲ្យដឹងនោះទេ ព្រោះកំពុងធ្វើការស្រាវជ្រាវ៕​

តិចថាមិនប្រាប់! បើមិនចង់ខូចសុខភាព កុំគេងបែរទៅខាងស្ដាំឱ្យសោះ

ថ្ងៃទី ១២ ខែ មិនា ឆ្នាំ ២០១៩ ម៉ោង ១០:១២

ប្រសិនបើអ្នកសួរគេ ថាតើគេគេងបែរទៅខាងណា ប្រហែលពាក់កណ្តាលនឹងឆ្លើយថា ខាងស្ដាំ។ អ្នកជំនាញផ្នែកដំណេក មិនណែនាំឱ្យមនុស្សគេងផ្អៀងទៅចំហៀងស្ដាំទេ ព្រោះវាមានផលប៉ះពាល់អវិជ្ជមានដល់សុខភាពរបស់យើង និងជាពិសេសការរំលាយអាហារ និងធ្វើឱ្យយើងគេងមិនលក់។ ផ្ទុយទៅវិញ ការគេងចំហៀងខាងឆ្វេង នឹងជួយបង្កើនការរំលាយអាហារ និងដោះស្រាយបញ្ហាដូចជា ក្រហាយទ្រូង ជាដើម។ធ្វើឱ្យប្រសើរឡើងនូវសុខភាពបេះដូងការគេងចំហៀងខាងឆ្វេង នឹងជួយដល់របត់នៃទឹករងៃ ដែលនៅជិតបេះដូងបំផុត ហើយជួយឱ្យវាដំណើរការល្អជាងមុន។ យូរៗទៅ វានឹងធ្វើឱ្យប្រសើរឡើងនូវដំណើរការបេះដូងរបស់អ្នក។ គាំទ្រដល់ប្រព័ន្ធឡាំហ្វាទិចមិនសូវបានគេលើកមកនិយាយញឹកញាប់ ដូចជាប្រព័ន្ធភាពស៊ាំឡើយ ប៉ុន្តែវាជាផ្នែកដ៏សំខាន់បំផុតសម្រាប់សុខភាពទូទៅរបស់យើង។ ការគេងចំហៀងខាងឆ្វេង នឹងបង្ហូរប្រព័ន្ធឡាំហ្វាទិច និងជួយដល់ចលនាកូនកណ្តុរនៅជុំវិញខ្លួនរបស់អ្នក ជួយលុបបំបាត់ជាតិពុល និងធ្វើឱ្យសុខភាពប្រសើរឡើង។ជួយព្យាបាលក្រហាយទ្រូងដូចដែលយើងបានរៀបរាប់រួចហើយ ការគេងចំហៀងខាងឆ្វេង គឺល្អសម្រាប់ការរំលាយអាហារ ហើយវានឹងជួយអ្នកបន្ថយការក្រហាយទ្រូង និងបញ្ហាប្រព័ន្ធរំលាយអាហារផ្សេងៗ។បញ្ឈប់ការស្រមុកក្រៅពីជាការរំខានដល់ដៃគូ ការស្រមុក គឺជាកត្តាហានិភ័យសម្រាប់បញ្ហាបេះដូងផងដែរ។ វាពិបាកក្នុងការបញ្ឈប់ ប៉ុន្តែការគេងចំហៀងខាងឆ្វេង នឹងជួយអ្នកបញ្ឈប់ការគេស្រមុក និងកាត់បន្ថយបញ្ហាផ្សេងទៀត៕

អគ្គិភ័យបំផ្លាញផ្ទះមួយខ្នង និងរោងកម្មករ ទាំងយប់នៅសង្កាត់ស្វាយប៉ាក ខណ្ឌឫស្សីកែវ បំផ្លាញសម្ភារអស់ទឹកប្រាក់ជិត៤ម៉ឺនដុល្លារ

ថ្ងៃទី ១១ ខែ មិនា ឆ្នាំ ២០១៩ ម៉ោង ១៧:០៦

(ភ្នំពេញ)៖ មានករណីអគ្គិភ័យមួយបានកើតឡើង នៅត្រង់ចំណុចផ្លូវបេតុង ក្រុម៧ ភូមិលូ សង្កាត់ស្វាយប៉ាក ខណ្ឌឫស្សីកែវ ដែលបានបំផ្លាញផ្ទះមួយខ្នង និងរោងស្នាក់នៅរបស់កម្មករមួយផងដែរ គិតជាទឹកប្រាក់នៃខូចខាតអស់ជិត៤ម៉ឺនដុល្លារអាមេរិក។ ហេតុការណ៍នេះ ​កើតឡើងនៅម៉ោង០២៖៣០នាទីទាបភ្លឺ ថ្ងៃទី១១ ខែមីនា ឆ្នាំ២០១៩ ហើយបានរលត់ទៅវិញទាំងស្រុង នៅម៉ោង០៣៖២០នាទី ​ក្រោយមានកិច្ចអន្តរាគមន៍ជួយសង្គ្រោះ​ពីអាជ្ញាធរ និងសមត្ថកិច្ច។បើតាមរបាយការណ៍របស់ លោកវរសេនីយ៍ទោ គល់ យី អធិការនគរបាលខណ្ឌឫស្សីកែវ ដែលផ្ញើជូនលោក ជា ពិសី អភិបាលខណ្ឌ​ បានបញ្ជាក់ថា ចំពោះគ្រោះអគ្គិភ័យខាងលើនេះ នូវពុំទាន់ដឹងពីមូលហេតុនោះទេ និងកំពុងស្រាវជ្រាវជាបន្ដបន្ទាប់តាមនីតិវិធី។លោកអធិការបានបញ្ជាក់ថា អគ្គិភ័យបានបំផ្លាញ​ផ្ទះសង់ពីឈើប្រក់ស័ង្កសី ចំនួន០១ខ្នង មានទំហំ១៤ម៉ែត្រ គុណ​០៨ម៉ែត្រ និងរោងកម្មករស្នាក់នៅ ទំហំ​២ម៉ែត្រ គុណ៨ម៉ែត្រ ធ្វើពីឈើប្រក់ស័ង្កសី​ មានម្ចាស់ផ្ទះឈ្មោះ សាន សុខជា អាយុ៦៩ឆ្នាំ ​ដែលបានជួលផ្ទះបន្តឲ្យឈ្មោះ ឡេ យ៊ាំងតុង អាយុ៥៥ឆ្នាំ មួយចំហៀង បណ្ដាលឲ្យរងការខូចខាត ម៉ូតូសង់កូរ៉េចាស់​០១គ្រឿង និងសម្ភារប្រើប្រាស់មួយចំនួនក្នុងផ្ទះ។គ្រោះអគ្គិភ័យនេះ ពុំបានឆាបឆេះរីករាលដាលឆ្លងជាទ្រុងទ្រាយធំឡើយ ដោយមានកិច្ចអន្តរាគមន៍ទាន់ពេល​ពីរថយន្ដរបស់ការិយាល័យ បង្ការ ពន្លត់អគ្គីភ័យ រាជធានីភ្នំពេញ ដើម្បីបាញ់ពន្ល​ត់ជាបន្តបន្ទាប់​ចំនួន០៦គ្រឿង ក្នុងនោះ​រថយន្ដរដ្ឋខណ្ឌឫស្សីកែវ០១គ្រឿង និងបានរលត់ទៅវិញទាំងស្រុង ក្នុងពេលកន្លះម៉ោងក្រោយ ដែល​មិនបណ្ដាលឲ្យប្រជាពលរដ្ឋណាម្នាក់រងគ្រោះថ្នាក់នោះទេ៕​

ឃាត់ខ្លួនជនជួញដូរគ្រឿងញៀនម្នាក់ ដកហូតគ្រឿងញៀនជិត១គីឡូក្រាម!

ថ្ងៃទី ១១ ខែ មិនា ឆ្នាំ ២០១៩ ម៉ោង ១៦:៤៤

(​ភ្នំពេញ​)​៖​ កម្លាំងជំនាញ នៃមន្ទីរ​ប្រឆាំង​គ្រឿងញៀន ​(​​ក​៥)​ សហការជាមួយសមត្ថកិច្ច​នគរបាល​ខណ្ឌ​ច្បារ​អំពៅ​ ​ដឹកនាំ​ដោយ​លោក​វរសេនីយ៍ទោ​ ជាវ​ វ​ណ្ណា​ នាយការិយាល័យ​ បាន​ចុះ​បង្ក្រាប​ករណី​ជួញដូរ ​ដោយ​ខុសច្បាប់​នូវ​សារធាតុ​ញៀន​ នៅ​ចំណុច​ដី​ឡូត៍​​មួយកន្លែង សង្កាត់​ព្រែក​ឯង​ ខណ្ឌ​ច្បារ​អំពៅ​ ឃាត់ខ្លួន​ជនសង្ស័យម្នាក់ ​រឹបអូស​វត្ថុ​តាង​គ្រឿងញៀន​ ក្រាមប្រភេទមេតំហ្វេតាមីន (ICE) ០១​ក​ញ្ចា​ប់​ធំ។​​ នេះបើតាមមន្ត្រីនគរបាលជាន់ខ្ពស់ មន្ទីរប្រឆាំងគ្រឿងញៀន ប្រាប់បណ្តាញព័ត៌មាន Fresh News នៅថ្ងៃទី ១១ ខែមីនា ឆ្នាំ២០១៩នេះ។មន្ត្រីនគរបាលដដែលបញ្ជាក់ថា ការចុះបង្ក្រាបនេះបានធ្វើឡើងនៅថ្ងៃ​ទី​៩​ ខែមីនា​ ឆ្នាំ​២០១៩​ វេលា​ម៉ោង​១៤​៖​៣០​នាទី ដោយឃាត់បាននៅចំណុចដី​ឡូត៍​គ្មាន​លេខ​ ផ្លូវ​ថៃ​ហ្គ័​រ​ ភូមិ​ទួល​តា​ចាន់​ សង្កាត់​ព្រែក​ឯង​ ខណ្ឌ​ច្បារ​អំពៅ ដែលជនសង្ស័យមាន ឈ្មោះ ភុំ​ កក្កដា​ ភេទ​ប្រុស​ អាយុ​២៨​ឆ្នាំ​ ជនជាតិ​ខ្មែរ​ មុខរបរ​ មិន​ពិតប្រាកដ​ ស្នាក់​នៅ​បន្ទប់​ជួល​ សង្កាត់​ស្ទឹង​មាន​ជ័យ​១​ ខណ្ឌមានជ័យ​ និងដកហូតវត្ថុតាង​គ្រឿងញៀន​ ក្រាមប្រភេទមេតំហ្វេតាមីន (ICE) ០១​ក​ញ្ចា​ប់​ធំ ស្មើនឹង៩៦០.២៦ក្រាមផងដែរ៕​

សម្តេចតេជោ ហ៊ុន សែន បញ្ជាឱ្យសមត្ថកិច្ចតាមចាប់មេខ្លោងគ្រឿងញៀននៅក្លឹបកម្សាន្ត Rock ហើយចាត់វិធានការតាមផ្លូវច្បាប់

ថ្ងៃទី ១១ ខែ មិនា ឆ្នាំ ២០១៩ ម៉ោង ១០:១៣

(ភ្នំពេញ)៖ នៅព្រឹកថ្ងៃចន្ទ ៦កើត ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១១ ខែមីនា ឆ្នាំ២០១៩នេះ ក្នុងឱកាសដែលសម្តេចបានអញ្ជើញប្រគល់សញ្ញាបត្រជូន និស្សិតសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច (RULES) ជាង៣ពាន់នាក់ បានបញ្ចប់ការសិក្សាដោយជោគជ័យ ដែលពិធីនេះធ្វើឡើងនៅមជ្ឈមណ្ឌលកោះពេជ្រ។នៅក្នុងពិធីនោះសម្តេចតេជោ ហ៊ុន សែន បានសម្តែងភាពរីករាយ ដែលសមត្ថកិច្ចបានបង្រ្កាបសំបុកគ្រឿងញៀនដ៏ធំមួយនៅក្នុង ក្លឹបកម្សាន្តរ៉ុក កាលពីខែមុន។ ហើយបានបញ្ជាឱ្យកម្លាំងសមត្ថកិច្ចទាំងអស់តាមស្វែងរកមេខ្លោងគ្រឿងញៀន នៅក្លឹបកម្សាន្តរ៉ុក (Rock) ឱ្យឃើញ ហើយត្រូវចាត់វិធានការតាមច្បាប់ឱ្យបានម៉ឺងម៉ាត់។សម្តេចបាននិយាយថា៖ «ឆ្លងកាត់អាកន្លែងចង្រៃមួយនោះ ដែលទើបនឹងរកឃើញថ្មីៗ អារ៉ុក (Rock)។ យើងក៏មានការភ្ញាក់ផ្អើលដែរ ហេតុអ្វីក៏តំបន់មួយនេះទៅជាកន្លែងបំផ្លាញដល់សេចក្តីសុខរបស់ប្រជាជន ខ្ញុំពិតជាមានការរីករាយណាស់ ដែលនគរបាលរបស់យើងបានបង្រ្កាបទាន់ពេលវេលា គួរតែបង្រ្កាបឱ្យបានមុនហ្នឹងទៅទៀត ប៉ុន្តែយើងទើបតែបង្ក្រាបបាន ជិតក្បែរសាលាបែរជាមានកន្លែងគ្រឿងញៀនមិនតូចនៅកន្លែងនេះ។ សម្ដេចបានបន្តទៀតទេ «ដូច្នេះសង្ឃឹមថា ក្រសួងមហាផ្ទៃ នឹងបន្តចាត់វិធានការ លើបញ្ហានេះបូកជាមួយការដំណើរការក្តីរបស់តុលាការ ត្រូវតែម៉ឺងម៉ាត់ ជាមួយនឹងការមិនវិលត្រឡប់ នៃអំពើពាលាអាវ៉ាសែ សម្រាប់កន្លែងមួយនេះ ដែលត្រូវដាក់ទោសទណ្ឌឱ្យបានធ្ងន់ធ្ងរ ហើយស្វែងរកឱ្យដល់ទីជម្រៅ នូវមេខ្លោងរបស់វានៅកន្លែងណា មិនមែនរករឿងកម្មករតូចតាចទេ ប៉ុន្តែរឿងវាជ្រៅទៅពីនេះ អញ្ចឹងត្រូវរកឱ្យឃើញ ព្រោះអ្វីដែលមាននៅក្នុងដៃរួចទៅហើយ គឺជាមធ្យោបាយដើម្បីឈានទៅរកការជីករឹសគល់ នៃអ្នកជួញគ្រឿង ក៏ដូចជាអ្នកដែលពាក់ព័ន្ធក្នុងសំណុំរឿងមួយនេះ»។

អាសូរពន់ពេក! ក្មេងស្រីកម្មករឡឥដ្ឋអាយុ៩ឆ្នាំ ចូលដៃក្នុងម៉ាស៊ីនកិនឥដ្ឋដាច់ដៃខាងស្ដាំត្រឹមក្លៀក

ថ្ងៃទី ១១ ខែ មិនា ឆ្នាំ ២០១៩ ម៉ោង ០៩:៤២

(កណ្ដាល)៖ ក្មេងស្រីវ័យ៩ឆ្នាំម្នាក់ ដែលមានឪពុកម្ដាយជាកម្មករឡឥដ្ឋ ហើយខ្លួនក៏ធ្វើជាកម្មករដូចឪពុកម្ដាយដែរនោះ បានជួបហេតុការណ៍ដ៏អកុសលមួយ ​ដោយចូលដៃក្នុងម៉ាស៊ីនកិនឥដ្ឋបណ្ដាលដាច់ដៃខាងស្ដាំត្រឹមក្លៀក គួរឲ្យអាសូរចិត្តពន់ពេកឥតឧបមា។ ហេតុការណ៍ដ៏គួរឲ្យរន្ធត់នេះ បានកើតឡើងនៅថ្ងៃទី០៩ ខែមីនា ឆ្នាំ២០១៩ ​ចំណុចសិប្បកម្មឡឥដ្ឋភូមិព្រះប្រសប់ ឃុំព្រះប្រសប់ ស្រុកខ្សាច់កណ្ដាល ខេត្តកណ្ដាល​។របាយការណ៍របស់មន្ដ្រីនគរបាលមូលដ្ឋានបានឲ្យដឹងថា ក្មេងស្រីជនរងគ្រោះឈ្មោះ ឆេង ស្រីភ័ក្រ ​អាយុ​០៩​ឆ្នាំ ​​មានទីលំនៅភូមិថ្មី ឃុំក្រឡា ស្រុកកំពង់សៀម ខេត្តកំពង់ចាម (របួសដាច់ដៃខាងស្តាំត្រឹមក្លៀក) ដែលមានឪពុកឈ្មោះ ឆេង ប៊ុនហំ អាយុ​៣៧​ឆ្នាំ មុខរបរ​កម្មករឡឥដ្ឋ និងម្តាយឈ្មោះ ឃឹម ចាន់ណា អាយុ​៣៣​ឆ្នាំ​ មុខរបរ​កម្មករឡឥដ្ឋ មានទីលំនៅភូមិឃុំជាមួយគ្នា។សមត្ថកិច្ចបានបន្ដថា ​រយៈពេល​០៦ឆ្នាំ​មកហើយ ឈ្មោះ ឆេង ប៊ុនហំ និងប្រពន្ធ-កូន បានមកស្នាក់នៅ​ធ្វើការជាកម្មករឡឥដ្ឋ​ឲ្យថៅកែឈ្មោះ លាង ស្រ៊ុន នៅភូមិព្រះប្រសប់ ឃុំព្រះប្រសប់។ លុះនៅថ្ងៃកើតហេតុ ឈ្មោះ ឆេង ប៊ុនហំ និងប្រពន្ធ បានបញ្ឆេះម៉ាស៊ីនកិនឥដ្ឋ ដោយឈ្មោះ ឆេង ប៊ុនហំ ជាអ្នកចាក់ដីបោះចូលម៉ាស៊ីន ឯឈ្មោះ ឃឹម ចាន់ណា ជាប្រពន្ធ និងកូនស្រីឈ្មោះ ឆេង ស្រីភ័ក្រ ជាអ្នកកាត់ឥដ្ឋចេញពីម៉ាស៊ីន និងរៀបឥដ្ឋដាក់លើរទេះ។មួយសន្ទុះក្រោយមក ពេលឥដ្ឋពេញរទះ ឈ្មោះ ឆេង ប៊ុនហំ បានអូសរទះយកឥដ្ឋទៅរៀបហាលថ្ងៃ ប៉ុន្ដែពេលឈ្មោះ ឆេង ប៊ុនហំ កំពុងរៀបឥដ្ឋដាក់ហាល ស្រាប់តែឃើញកូនស្រីឈ្មោះ ឆេង ស្រីភ័ក្រ ចូលដៃខាងស្តាំទៅក្នុងម៉ាស៊ីនកិនឥដ្ឋ ឃើញដូចនោះឈ្មោះ ឆេង ប៊ុនហំ និងកម្មករឡឥដ្ឋនៅក្បែរនោះ បាននាំជនរងគ្រោះ បញ្ជូនទៅមន្ទីរពេទ្យបង្អែកស្រុក បន្ទាប់មកមន្ទីរពេទ្យបង្អែកស្រុក បានបញ្ចូនជនរងគ្រោះទៅព្យាបាលនៅពេទ្យឯរាជធានីភ្នំពេញ។សូមជម្រាបថា ហេតុការណ៍បែបនេះ មិនមែនទើបតែកើតមាននោះទេ ពោលគេសង្កេតឃើញថា ការចូលដៃក្នុងម៉ាស៊ីនកិនឥដ្ឋ តែងតែកើតឡើងជាញឹកញាប់ ដូច្នេះគេសង្ឃឹមថា សមត្ថកិច្ចពាក់ព័ន្ធនឹងពង្រឹងលើការងារនេះ ដើម្បីជៀសវាងកើតមានករណីនេះម្ដងហើយម្ដងទៀត ដែលនាំឲ្យជនរងគ្រោះធ្លាក់ខ្លួនពិការ និងមានវិប្បដិសារីអស់មួយជីវិត៕

មិនដឹងនិយាយថាម៉េច! ឈ្មោះនាយករដ្ឋមន្រ្តីប៉ុនណាប៉ុនណី បែរជាអាជ្ញាធរខេត្តកំពង់ឆ្នាំង សរសេរខុស

ថ្ងៃទី ០៩ ខែ មិនា ឆ្នាំ ២០១៩ ម៉ោង ១១:៥៣

ខេត្តកំពង់ឆ្នាំង៖ ស្របពេល ពិធីបុណ្យទន្លេលើកទី៥ នាថ្ងៃទី១៥ដល់ថ្ងៃទី១៧ខែមីនា ក្នុងខេត្តកំពង់ឆ្នាំង ខិតជិតមកដល់។ គេរំពឹងថា នឹងមានភាពជោគជ័យនាំមកនូវភាពរីករាយដល់ពលរដ្ឋក្នុងខេត្តផង និងទាក់ទាញភ្ញៀវទេសចរណ៍ផងដែរនោះ។មិនទាន់នឹងបានអីផង បែរជាអាជ្ញាធរមានភាពខ្វះចន្លោះដោយសូម្បីតែឈ្មោះថ្នាក់ដឹកនាំ សម្ដេចតេជោ ហ៊ុន សែន នាយករដ្ឋមន្ដ្រីប៉ុនណាប៉ុនណី ក៏សរសេរខុសដែរ គឺសរសេរ ថា សម្ដេចតេជោហ៊ុន សេន ទៅវិញ។គួរបញ្ជាក់ថា ឃ្លានេះត្រូវបានក្រុមការងារខេត្តកំពង់ឆ្នាំសរសេរដាក់នៅលើក្លោងទ្វារដ៏ធំ កាត់ទទឹងផ្លូវ ដែលប្រជាពលរដ្ឋឆ្លងកាត់ខេត្តនេះអាចមើលឃើញមើលឃើញច្បាស់ក្រលែត៕