trollkhmer news

សង្គមនិងជីវិត

ក្រសួងសុខាភិបាល៖ អ្នកជំងឺ ២ នាក់បានជាសះស្បើយ ខណៈមិនមានអ្នកឆ្លងកូវីដ១៩ ករណីថ្មីនោះទេ

ថ្ងៃទី ១២ ខែ មករា ឆ្នាំ ២០២១ ម៉ោង ០៩:០៣

(ភ្នំពេញ)៖ ក្រសួងសុខាភិបាល នៅព្រឹកថ្ងៃទី១២ ខែមករា ឆ្នាំ២០២១នេះ បានចេញសេចក្តីប្រកាសព័ត៌មានបញ្ជាក់ថា មិនមានរកឃើញអ្នកឆ្លងជំងឺកូវីដ១៩ ថ្មីនោះទេ ខណៈអ្នកជំងឺចំនួន២នាក់ថែមទៀត បានជាសះស្បើយ និងត្រូវបានអនុញ្ញាតឲ្យចេញពីមន្ទីរពេទ្យ។អ្នកជាសះស្បើយទាំង២នាក់នេះ គឺជាស្ត្រីជនជាតិខ្មែរ អាយុ៣៦ឆ្នាំ ស្នាក់នៅឃុំបឹងរាំង ស្រុកកំរៀង ខេត្តបាត់ដំបង បានធ្វើដំណើរមកពីប្រទេសថៃ មកដល់កម្ពុជានៅថ្ងៃទី២៨ ខែធ្នូ ឆ្នាំ២០២០ និងស្ត្រីជនជាតិខ្មែរ អាយុ៣៣ឆ្នាំ ស្នាក់នៅឃុំស្ទឹងកាច់ ស្រុកសាលាក្រៅ ខេត្តប៉ៃលិន បានធ្វើដំណើរមកពីប្រទេសថៃ មកដល់កម្ពុជា នៅថ្ងៃទី២៩ ខែធ្នូ ឆ្នាំ២០២០។ ស្ត្រីទាំង២នាក់នេះ ត្រូវបានព្យាបាលជាសះស្បើយ និងត្រូវបានអនុញ្ញាតឲ្យចេញពី មន្ទីរពេទ្យបង្អែកខេត្តបាត់ដំបង។សូមជម្រាបថា គិតត្រឹមម៉ោង៧៖០០នាទីព្រឹកថ្ងៃទី១២ ខែមករា ឆ្នាំ២០២១នេះ កម្ពុជាបានរកឃើញអ្នកឆ្លងជំងឺកូវីដ១៩ សរុបចំនួន ៣៩២នាក់ ក្នុងនោះអ្នកព្យាបាលជាសះស្បើយចំនួន ២៧៦នាក់ និងអ្នកជំងឺកំពុងសម្រាកព្យាបាលនៅមន្ទីរពេទ្យ ១៦នាក់៕

ឥណ្ឌូណេស៊ី មិនឲ្យជនបរទេសចូលក្នុងប្រទេស ១៤ថ្ងៃបន្ថែមទៀត ដើម្បីទប់ស្កាត់កូវីដ-១៩

ថ្ងៃទី ១១ ខែ មករា ឆ្នាំ ២០២១ ម៉ោង ១៤:១៣

(ហ្សាការតា)៖ ឥណ្ឌូណេស៊ី នៅថ្ងៃចន្ទនេះ បានសម្រេចចិត្តអូសបន្លាយការអនុវត្តវិធានការហាមជនបរទេសចូលមកក្នុងប្រទេសរបស់ខ្លួន រយៈពេល១៤ថ្ងៃ បន្ថែមទៀត ដើម្បីគ្រប់គ្រង និងទប់ស្កាត់ការឆ្លងរាតត្បាត COVID-19។បម្រាមលើជនបរទេស បានចូលជាធរមានម្ដងរួចមកហើយ កាលពីថ្ងៃទី០១ ខែមករាកន្លងទៅ ដោយមានរយៈពេល១៤ថ្ងៃដូចគ្នា ហើយការសម្រេចចិត្តបែបនេះ ទៀតសោត ធ្វើឡើងបន្ទាប់ពីអាជ្ញាធរឥណ្ឌូណេស៊ី បានដាក់បម្រាមលើអ្នកដំណើរមកពីចក្រភពអង់គ្លេស និងដាក់ចេញវិធានការរឹតត្បិតជាច្រើនលើអ្នកដំណើរ មកពីតំបន់អឺរ៉ុប រួមទាំងអូស្ត្រាលី សំដៅទប់ស្កាត់ការឆ្លងរាតត្បាតវីរុស COVID-19 ទម្រង់ថ្មី។ បម្រាមនេះដដែល គឺនឹងត្រូវអនុវត្តលើអ្នកដំណើរបរទេសទាំងអស់ តែម្ដង ដោយលើកលែងតែមន្ត្រីជាន់ខ្ពស់នៃរដ្ឋាភិបាលមកពីប្រទេសនានា តែប៉ុណ្ណោះ។គួរបញ្ជាក់ថា បើតាមគេហទំព័រ worldometers បច្ចុប្បន្ន ឥណ្ឌូណេស៊ី នៅតែជាប្រទេសរងគ្រោះធ្ងន់ធ្ងរជាងគេបំផុតដោយសារ COVID-19 នៅក្នុងតំបន់អាស៊ីអាគ្នេយ៍ ដោយមានអ្នកឆ្លង ៨២៨,០២៦នាក់ ក្នុងនោះស្លាប់ ២៤,១២៩នាក់ និងជាសះស្បើយឡើងវិញ ៦៨១,០២៤នាក់៕

ជប៉ុន រកឃើញវីរុសកូវីដ-១៩ទម្រង់ថ្មីផ្សេងទៀ លើក្រុមអ្នកដំណើរដែលមកពីប្រេស៉ីល

ថ្ងៃទី ១១ ខែ មករា ឆ្នាំ ២០២១ ម៉ោង ១៣:០៥

(តូក្យូ)៖ ក្រសួងសុខាភិបាលជប៉ុន កាលពីថ្ងៃអាទិត្យម្សិលមិញនេះ បានប្រកាសរកឃើញវីរុសកូរ៉ូណា (COVID-19) ទម្រង់ថ្មីនៅលើអ្នកដំណើរចំនួន ០៤នាក់ដែលបានធ្វើដំណើរមកពីរដ្ឋអាម៉ាហ្សូណាស់ (Amazonas) នៃប្រទេសប្រេស៊ីល។ បើតាមការបញ្ជាក់ពីក្រសួងសុខាភិបាលជប៉ុន ក្នុងចំណោមអ្នកដំណើរទាំង ០៤នាក់ដែលបានធ្វើដំណើរមកដល់អាកាសយានដ្ឋានហាណេដា (Haneda) នៃទីក្រុងតូក្យូកាលពីថ្ងៃទី០២ ខែមករា ឆ្នាំ២០២១កន្លងទៅនេះ បុរសម្នាក់មានបញ្ហាពិបាកដកដង្ហើម រីឯស្ត្រីវ័យ៣០ឆ្នាំម្នាក់ មានអាការៈឈឺក្បាលនិងឈឺបំពង់ក ចំណែកឯក្មេងប្រុសវ័យជំទង់ម្នាក់ទៀត មានអាការៈគ្រុនក្តៅ ខណៈក្មេងស្រីវ័យជំទង់ម្នាក់ទៀត មិនមានរោគសញ្ញាអ្វីទាំងអស់។ អ្នកដំណើរទាំងអស់ត្រូវបានដាក់ឲ្យស្ថិតនៅដាច់ដោយឡែកពីគេ នៅឯអាកាសយានដ្ឋាននៃទីក្រុងតូក្យូ។គួរបញ្ជាក់ថា វីរុសកូវីដ-១៩ទម្រង់ថ្មីខាងលើ ហាក់ខុសគ្នាពីវីរុសទម្រង់ថ្មីផ្សេងទៀត ដែលត្រូវបានរកឃើញដំបូងនៅចក្រភពអង់គ្លេស និងនៅអាហ្វ្រិកខាងត្បូង។ ដោយឡែក បើតាមប្រព័ន្ធផ្សព្វផ្សាយរដ្ឋជប៉ុន NHK ករណីឆ្លង COVID-19 សរុបនៅទូទាំងប្រទេស មានចំនួន ២៨៩,០០០ករណី ក្នុងនោះអ្នកស្លាប់ចំនួន ៤,០៦១នាក់៕

អ្នកឆ្លង COVID-19 លើលោកកើនដល់ជិត ៩១លាននាក់ ស្លាប់ជាង ១លាន ៩៤ម៉ឺននាក់ និងជាសះស្បើយជិត ៦៥លាននាក់

ថ្ងៃទី ១១ ខែ មករា ឆ្នាំ ២០២១ ម៉ោង ១០:០១

(បរទេស)៖ គិតត្រឹមម៉ោង ៨ព្រឹកថ្ងៃចន្ទ ទី១១ ខែមករា ឆ្នាំ២០២១នេះ ចំនួនអ្នកឆ្លងជំងឺ COVID-19 នៅទូទាំងពិភពលោក បានកើនឡើងដល់ ៩០,៦៨៧,៩៨៧នាក់ហើយ។ ក្នុងនោះអ្នកស្លាប់មានចំនួន ១,៩៤៣,០៩០នាក់ និងជាសះស្បើយឡើងវិញ ៦៤,៨១០,៩៦៩នាក់។យោងតាមទិន្នន័យពីគេហទំព័រអន្តរជាតិ Worldometer បានបង្ហាញថា ការរីករាលដាលនៃជំងឺកូវីដ១៩ នៅតែមានសភាពស្រួចស្រាវចំនួនអ្នកឆ្លង និងស្លាប់ថ្មីនៅតែមានចំនួនច្រើន។ សហរដ្ឋអាមេរិក នៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ។ សហរដ្ឋអាមេរិក មានអ្នកឆ្លងជំងឺ COVID-19 ចំនួន ២២, ៩១៧,៣៣៤នាក់ ស្លាប់ចំនួន ៣៨៣,២៧៥នាក់ និងជាសះស្បើយចំនួន ១៣,៤៨៣,៤៩០នាក់។ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺកូវីដ១៩ គឺប្រទេសឥណ្ឌា។ ឥណ្ឌាមានអ្នកឆ្លង ១០,៤៦៧,៤៣១នាក់ ស្លាប់ចំនួន ១៥១,១៩៨នាក់ និងជាសះស្បើយ ១០,០៩២,១៣០នាក់។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល។ ប្រេស៊ីល មានអ្នកឆ្លង ៨,១០៥,៧៩០នាក់ ស្លាប់ ២០៣,១៤០នាក់ និងជាសះស្បើយ ៧,១៦៧,៦៥១នាក់៕

ក្រសួងសុខាភិបាល៖ រកឃើញពលករខ្មែរម្នាក់ទៀតឆ្លងកូវីដ១៩ ខណៈអ្នកជំងឺ ៣នាក់ជាសះស្បើយ

ថ្ងៃទី ១១ ខែ មករា ឆ្នាំ ២០២១ ម៉ោង ០៩:០០

(ភ្នំពេញ)៖ ក្រសួងសុខាភិបាល នៅព្រឹកថ្ងៃទី១១ ខែមករា ឆ្នាំ២០២១នេះ បានប្រកាសរកឃើញពលករខ្មែរ ដែលត្រឡប់មកពីប្រទេសថៃម្នាក់ថែមទៀត ឆ្លងជំងឺកូវីដ១៩ ខណៈអ្នកជំងឺចំនួន០៣នាក់បានជាសះស្បើយ និងត្រូវបានអនុញ្ញាតឲ្យចេញពីមន្ទីរពេទ្យ។ពលករខ្មែរដែលធ្វើដំណើរ មកពីប្រទេសថៃឆ្លងកូវីដ១៩ គឺជាស្ត្រីជនជាតិខ្មែរ អាយុ២៨ឆ្នាំ មានអាសយដ្ឋានស្នាក់នៅភូមិដំបូកខ្ពស់ ឃុំអូរដំបង២ ស្រុកសង្កែ ខេត្តបាត់ដំបង បានធ្វើដំណើរមកពីប្រទេសថៃ មកដល់កម្ពុជា នៅថ្ងៃទី០៨ ខែមករា ឆ្នាំ២០២១ ហើយបច្ចុប្បន្នអ្នកជំងឺ ត្រូវបានដាក់ឱ្យសម្រាកព្យាបាល នៅមន្ទីរពេទ្យបង្អែកខេត្តបន្ទាយមានជ័យ។ ចំពោះអ្នកជំងឺជាសះស្បើយចំនួន ០៣នាក់រួមមាន៖១៖ ស្ត្រីជនជាតិខ្មែរ អាយុ ៥៦ឆ្នាំ មានអាសយដ្ឋាននៅបុរីប៉េងហួត ផ្លូវ៦០ម៉ែត រាជធានីភ្នំពេញ ជាភរិយារបស់អគ្គនាយកពន្ធធនាគារ ត្រូវបានព្យាបាលជាសះស្បើយ ដោយទទួលបានលទ្ធផលតេស្ត អវិជ្ជមានវីរុសកូវីដ-១៩ ចំនួន០២លើក ត្រូវបានអនុញ្ញាតឱ្យចេញពីមន្ទីរពេទ្យមិត្តភាពខ្មែរ-សូវៀត។២៖ ស្ត្រីជនជាតិខ្មែរអាយុ ២៨ឆ្នាំ មានអាសយដ្ឋានស្នាក់នៅភូមិស្វាយធំ ឃុំបឹងរាំងស្រុកកម្រៀង ខេត្តបាត់ដំបង បានធ្វើដំណើរមកពីប្រទេសថៃ មកដល់កម្ពុជានៅថ្ងៃទី៣១ ខែធ្នូ ឆ្នាំ២០២០។៣៖ ស្ត្រីជនជាតិខ្មែរអាយុ ២៤ឆ្នាំ មានអាសយដ្ឋានស្នាក់នៅភូមិស្វាយធំ ឃុំបឹងរាំងស្រុកកម្រៀង ខេត្តបាត់ដំបង បាន ធ្វើដំណើរមកពីប្រទេសថៃ មកដល់កម្ពុជានៅថ្ងៃទី៣១ ខែធ្នូ ឆ្នាំ២០២០។សូមកត់សម្គាល់ថា៖ ស្ត្រីទាំង០២នាក់ ខាងលើនេះ ត្រូវបានព្យាបាលជាសះស្បើយ ដោយទទួលបាន លទ្ធផលតេស្ត អវិជ្ជមានវីរុសកូវីដ-១៩ ចំនួន០២លើក ត្រូវបានអនុញ្ញាតឱ្យចេញពី មន្ទីរពេទ្យបង្អែកខេត្តបាត់ដំបង។គួរបញ្ជាក់ថា គិតត្រឹមម៉ោង៧៖០០នាទីព្រឹកថ្ងៃទី១១ ខែមករា ឆ្នាំ២០២១នេះ នៅកម្ពុជារកឃើញអ្នកឆ្លងជំងឺកូវីដ១៩ ចំនួន៣៩២នាក់ ក្នុងនោះអ្នកជាសះស្បើយចំនួន៣៧៤នាក់ និង១៨នាក់កំពុងសម្រាកព្យាបាលនៅមន្ទីរពេទ្យ៕

អ្នកឆ្លង COVID-19 លើលោកកើនដល់ជាង ៨៩លាននាក់ ស្លាប់ជាង ១លាន ៩២ម៉ឺននាក់ និងជាសះស្បើយជាង ៦៤លាននាក់

ថ្ងៃទី ០៩ ខែ មករា ឆ្នាំ ២០២១ ម៉ោង ១០:១១

(បរទេស)៖ គិតត្រឹមម៉ោង ៨ព្រឹកថ្ងៃសៅរ៍ ទី០៩ ខែមករា ឆ្នាំ២០២១នេះ ចំនួនអ្នកឆ្លងជំងឺ COVID-19 នៅទូទាំងពិភពលោក បានកើនឡើងដល់ ៨៩,៣៥៥,០៧១នាក់ហើយ។ ក្នុងនោះអ្នកស្លាប់មានចំនួន ១,៩២១,៩៩៥នាក់ និងជាសះស្បើយឡើងវិញ ៦៤,០០៧,២៦៣នាក់។យោងតាមទិន្នន័យពីគេហទំព័រអន្តរជាតិ Worldometer បានបង្ហាញថា ការរីករាលដាលនៃជំងឺកូវីដ១៩ នៅតែមានសភាពស្រួចស្រាវចំនួនអ្នកឆ្លង និងស្លាប់ថ្មីនៅតែមានចំនួនច្រើន។សហរដ្ឋអាមេរិក នៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ។ សហរដ្ឋអាមេរិក មានអ្នកឆ្លងជំងឺ COVID-19 ចំនួន ២២, ៤៥៦,៩០២នាក់ ស្លាប់ចំនួន ៣៧៨,១៤៩នាក់ និងជាសះស្បើយចំនួន ១៣,២៥៩,៩៤៩នាក់។ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺកូវីដ១៩ គឺប្រទេសឥណ្ឌា។ ឥណ្ឌាមានអ្នកឆ្លង ១០,៤៣២,៥២៦នាក់ ស្លាប់ចំនួន ១៥០,៨៣៥នាក់ និងជាសះស្បើយ ១០,០៥៥,៩៣៥នាក់។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល។ ប្រេស៊ីល មានអ្នកឆ្លង ៨,០១៥,៩២០នាក់ ស្លាប់ ២០១,៥៤២នាក់ និងជាសះស្បើយ ៧,១១៤,៤៧៤នាក់៕

ក្រសួងសុខាភិបាល៖ រកឃើញពលករខ្មែរម្នាក់វិជ្ជមានកូវីដ-១៩ ខណៈអ្នកជំងឺ ៣នាក់បានជាសះស្បើយ

ថ្ងៃទី ០៩ ខែ មករា ឆ្នាំ ២០២១ ម៉ោង ០៩:០៤

(ភ្នំពេញ)៖ ក្រសួងសុខាភិបាល នៅព្រឹកថ្ងៃទី០៩ ខែមករា ឆ្នាំ២០២១ បានចេញសេចក្តីប្រកាសព័ត៌មាន បញ្ជាក់ពីការរកឃើញអ្នកឆ្លងជំងឺកូវីដ១៩ ថ្មីម្នាក់ថែមទៀត ដែលជាពលករខ្មែរ ទើបធ្វើដំណើរត្រឡប់មកពីប្រទេសថៃ។នៅថ្ងៃនេះផងដែរ ក្រសួងក៏បានប្រកាសពីការព្យាបាល ជាសះស្បើយអ្នកជំងឺកូវីដ១៩ ចំនួន០៣នាក់ និងត្រូវបានអនុញ្ញាតឲ្យចេញពីមន្ទីរពេទ្យ។អ្នកឆ្លងជំងឺកូវីដ១៩ថ្មីនេះ គឺជាបុរសជនជាតិខ្មែរ អាយុ២៤ឆ្នាំ ស្នាក់នៅភូមិថ្នល់បត់ ឃុំភ្នំតូច ស្រុកមង្គល់បុរី ខេត្តបន្ទាយមានជ័យ បានធ្វើដំណើរមកពីប្រទេសថៃ មកដល់កម្ពុជានៅថ្ងៃទី០៤ ខែមករា ឆ្នាំ២០២១ ហើយបច្ចុប្បន្នអ្នកជំងឺត្រូវបាន ដាក់ឲ្យសម្រាកព្យាបាល នៅមន្ទីរពេទ្យបង្អែកខេត្តបន្ទាយមានជ័យ។ចំពោះអ្នកជាសះស្បើយទាំង៣នាក់រួមមាន៖១៖ ស្ត្រីជនជាតិខ្មែរ អាយុ២៦ឆ្នាំ ស្នាក់នៅឃុំអូរដំបង២ ស្រុកសង្កែ ខេត្តបាត់ដំបង បានធ្វើដំណើរមកពីប្រទេសថៃ មកដល់កម្ពុជានៅថ្ងៃទី០៣ ខែធ្នូ ឆ្នាំ២០២០ ត្រូវបានព្យាបាលជាសះស្បើយ អនុញ្ញាតឲ្យចេញពីមន្ទីរពេទ្យបង្អែកខេត្តបាត់ដំបង។២៖ ស្រ្តីជនជាតិខ្មែរ អាយុ២៦ឆ្នាំ ស្នាក់នៅភូមិដូង ឃុំកំរៀង ស្រុកកំរៀង ខេត្តបាត់ដំបង បានធ្វើដំណើរមកពីប្រទេសថៃ មកដល់កម្ពុជា នៅថ្ងៃទី២៩ ខែធ្នូ ឆ្នាំ២០២០ ត្រូវបានព្យាបាលជាសះស្បើយ អនុញ្ញាតឲ្យចេញពីមន្ទីរពេទ្យបង្អែកខេត្តបាត់ដំបង។៣៖ ស្ត្រីជនជាតិខ្មែរ-អាមេរិកាំង អាយុ៣៦ឆ្នាំ ស្នាក់នៅក្រុងតាខ្មៅ ខេត្តកណ្តាល បានធ្វើដំណើរមកពីអាមេរិក បន្តជើងហោះហើរនៅប្រទេសចិន (តៃវ៉ាន់) មកដល់កម្ពុជានៅថ្ងៃទី០១ មករា ឆ្នាំ២០២១ ត្រូវបានព្យាបាលជាសះស្បើយ និងអនុញ្ញាតឲ្យចេញពីមជ្ឈមណ្ឌលជាតិកម្ចាត់រោគរបេង និងហង់សិន។​សូមជម្រាបថា គិតមកត្រឹមម៉ោង៧៖០០នាទីព្រឹកថ្ងៃទី០៩ ខែមករា ឆ្នាំ២០២១នេះ កម្ពុជារកឃើញករណីឆ្លងកូវីដ១៩ សរុបចំនួន ៣៨៧នាក់ ក្នុងនោះ៣៦៥នាក់បានជាសះស្បើយ និងអ្នកជំងឺចំនួន២២នាក់ កំពុងសម្រាកព្យាបាលនៅមន្ទីរពេទ្យ៕

នាយករដ្ឋមន្រ្តីសិង្ហបុរីទទួលបានការចាក់វ៉ាក់សាំងកូវីដ-១៩ ដូសដំបូង

ថ្ងៃទី ០៨ ខែ មករា ឆ្នាំ ២០២១ ម៉ោង ១៣:២២

(សិង្ហបុរី)៖ នាយករដ្ឋមន្រ្តីសិង្ហបុរីលោក លី សៀនឡុង (Lee Hsien Loong) នៅថ្ងៃសុក្រនេះ ទើបតែបានទទួលការចាក់វ៉ាក់សាំងប្រឆាំងជំងឺ COVID-19 បន្ទាប់ពីប្រទេសសិង្ហបុរីបានចាប់ផ្តើមយុទ្ធនាការចាក់វ៉ាក់សាំង COVID-19 កាលពីចុងខែធ្នូ ឆ្នាំ២០២០។ នេះបើតាមការចេញផ្សាយដោយ សារព័ត៌មាន CNA នៅថ្ងៃសុក្រ ទី០៨ ខែមករា ឆ្នាំ២០២១។លោក លី សៀនឡុង បានប្រកាសដំណឹងខាងលើតាមរយៈការបង្ហោះសារមួយ នៅលើបណ្តាញសង្គម Facebook ដោយមានភ្ជាប់នូវឃ្លីបវីដេអូបង្ហាញពី សកម្មភាពលោកទទួលការចាក់វ៉ាក់សាំង នៅឯមន្ទីរពេទ្យសិង្ហបុរីមួយកន្លែង។ នាយករដ្ឋមន្រ្តីសិង្ហបុរីវ័យ៦៨ឆ្នាំរូបនេះ បានបន្ថែមថា មន្រ្តីជាន់ខ្ពស់ផ្នែកសុខាភិបាលលោក ខេនណេត ម៉ាក (Kenneth Mak) ក៏ទទួលបានការចាក់វ៉ាក់សាំងជាមួយលោកដែរ។គួរបញ្ជាក់ថា សិង្ហបុរីបានចាប់ផ្តើមយុទ្ធនាការចាក់វ៉ាក់សាំងរបស់ខ្លួន កាលពីចុងខែធ្នូ ឆ្នាំ២០២០ ប៉ុន្តែលោក លី បាននិយាយថា ការចាក់លក្ខណៈទ្រង់ទ្រាយកាន់តែធំសម្រាប់បុគ្គលិកសុខាភិបាល នឹងចាប់ផ្តើមនៅថ្ងៃសុក្រនេះ ហើយសម្រាប់ជនចាស់ជរានឹងចាប់ផ្តើមនៅខែក្រោយ។មកទល់ពេលនេះ សិង្ហបុរីបានអនុម័តឲ្យប្រើប្រាស់តែវ៉ាក់សាំង COVID-19 របស់ក្រុមហ៊ុន Pfizer-BioNTech មួយប៉ុណ្ណោះ ប៉ុន្តែក៏បានចុះកិច្ចព្រមព្រៀងជាមួយក្រុមហ៊ុនដទៃទៀតដូចជា Moderna និង Sinovac ដើម្បីទិញឲ្យវ៉ាក់សាំងឲ្យបានគ្រប់គ្រាន់ សម្រាប់ប្រជាជនប្រមាណ៥.៧លាននាក់របស់ខ្លួនផងដែរ៕

អាកាសធាតុនឹងចុះត្រជាក់ខ្លាំងដល់១១អង្សា ចាប់ពីថ្ងៃទី០៩ ស្អែកនេះដល់ថ្ងៃទី ១៧ ខែមករា ឆ្នាំ២០២១

ថ្ងៃទី ០៨ ខែ មករា ឆ្នាំ ២០២១ ម៉ោង ១០:៥៤

(ភ្នំពេញ)៖ ក្រសួងធនធានទឹក និងឧតុនិយម បានឱ្យដឹងថា ចាប់ពីថ្ងៃទី០៩ ដល់ថ្ងៃទី១៧ ខែមករា ឆ្នាំ២០២១នេះ សីតុណ្ហភាពនឹងចុះត្រជាក់ខ្លាំងមិនធ្លាប់មាន ដោយចុះត្រជាក់រហូតដល់ ១១អង្សា។បើតាមសេចក្តីប្រកាសព័ត៌មានរបស់ក្រសួងធនធានទឹកថ្ងៃទី០៨ ខែមករា ឆ្នាំ២០២១នេះ បានឱ្យដឹងថា ការចុះត្រជាក់នេះ បណ្តាលមកពីទ្រនុងសម្ពាធខ្ពស់ពីភាគខាងជើង បាននិងកំពុងធ្លាក់ចុះមកក្រោម នាំមកនូវធាតុត្រជាក់ពីតំបន់ស៊ីប៊ឺរី គួបផ្សំជាមួយខ្យល់មូសុងឦសានខ្លាំង។ ក្រសួងបានឱ្យដឹងថា តាមរយៈបាតុភូតនេះ នឹងធ្វើឱ្យតំបន់វាលទំនាប សីតុណ្ហភាពអប្បបរមានឹងអាចធ្លាក់ចុះមកនៅក្នុងរង្វង់ពី ១៣អង្សា ទៅ ១៥អង្សា លាយឡំជាមួយខ្យល់មធ្យម។ សម្រាប់រាជធានីភ្នំពេញ សីតុណ្ហភាពអប្បបរមានឹងអាចធ្លាក់ចុះមកនៅក្នុងរង្វង់ ១៦អង្សា។សម្រាប់តំបន់ជួរភ្នំដងរែក និងតំបន់ខ្ពង់រាបភាគឦសាន សីតុណ្ហភាពអប្បបរមានឹងអាចធ្លាក់ចុះមកនៅក្នុងរង្វង់ពី ១១អង្សា ទៅ ១៣អង្សា លាយឡំជាមួយខ្យល់ខ្លាំងផងដែរ។ ដោយឡែកតំបន់មាត់សមុទ្រ សីតុណ្ហភាពអប្បបរមានឹងអាចធ្លាក់ចុះមកនៅក្នុងរង្វង់ពី ១៧អង្សា ទៅ ១៩អង្សា។ នៅថ្ងៃទី១២ ខែមករា នៅលើផ្ទៃសមុទ្រមានខ្យល់បក់បោកខ្លាំង និងរលកសមុទ្រខ្ពស់ៗផងដែរ។ បើតាមក្រសួងធនធានទឹក និងឧតុនិយម ការចុះត្រជាក់នេះ គឺជាស្ថានភាពមួយមិនធ្លាប់មានពីមុនមកនោះឡើយសម្រាប់កម្ពុជា។ ក្រសួងធនធានទឹក បានអំពាវនាវសូមសាធារណជនជ្រាបជាព័ត៌មាន។ ជាពិសេសវីរៈកងទ័ពដែលរស់នៅ និងឈរជើងនៅតំបន់ជួរភ្នំដងរែក និងខ្ពង់រាបភាគឦសាន សូមបង្កើនការយកចិត្តទុកដាក់ថែរក្សាសុខភាពចំពោះអាកាសធាតុចុះត្រជាក់ខ្លាំងនេះ។ក្រសួងបានអំពាវនាវដល់ប្រជានេសាទ និងអ្នកធ្វើដំណើរតាមសមុទ្រទាំងអស់ បង្កើនការយកចិត្តទុកដាក់ប្រុងប្រយ័ត្នខ្ពស់ ដើម្បីចៀសវាងនូវគ្រោះថ្នាក់ផ្សេងៗ ដែលអាចកើតមានឡើងជាយថាហេតុ។ ក្រសួងធនធានទឹក និងឧតុនិយម ក៏បាននិងកំពុងបន្តតាមដានយ៉ាងយកចិត្តទុកដាក់លើបាតុភូតធម្មជាតិនេះ ហើយនឹងជម្រាបជូនព័ត៌មានជាបន្តបន្ទាប់ទៀត ក្នុងករណីអាកាសធាតុមានការប្រែប្រួល៕