trollkhmer news

សង្គមនិងជីវិត

ឪពុកចាប់រំលោភកូនស្រីបង្កើតជាច្រើនដង នៅស្រុកព្រៃនប់ ត្រូវកម្លាំងនគរបាលចាប់វាយខ្នោះ

ថ្ងៃទី ២១ ខែ មករា ឆ្នាំ ២០២០ ម៉ោង ១១:១៣

(ព្រះសីហនុ)៖ កម្លាំងនគរបាលស្រុកព្រៃនប់ ខេត្តព្រះសីហនុ បានចាប់វាយខ្នោះបុរសម្នាក់ជាឪពុក ដែលចាប់រំលោភកូនស្រីបង្កើតទើបតែអាយុ ១២ឆ្នាំ នៅភូមិទួលទទឹង១ ឃុំទួលទទឹង ស្រុកព្រៃនប់ កាលពីថ្ងៃទី២០ ខែមករា ឆ្នាំ២០២០។មន្ត្រីនគរបាលមូលដ្ឋានស្រុកព្រៃនប់ បានឲ្យដឹងថា ជនសង្ស័យឈ្មោះ មុំ ផាត់ណា អាយុ៤១ឆ្នាំ មានទីលំនៅភូមិទូលទទឹង១ ឃុំទួលទទឹង ស្រុកព្រៃនប់ បានចាប់រំលោភកូនស្រីបង្កើតរបស់ខ្លួនឈ្មោះ ផ.ច.រ.ស អាយុ ១២ឆ្នាំ មុខរបរ សិស្ស។មន្ត្រីមូលដ្ឋានរូបនោះបានបន្ថែមថា ពេលកំពុងរំលោភនៅក្នុងផ្ទះ ស្រាប់តែម្តាយជនរងគ្រោះទៅទាន់ ហើយភ្លាមៗក៏មកប្តឹងរាយការណ៍ជូនសមត្ថកិច្ចតែម្តង។ ជនរងគ្រោះរងគ្រោះ បានបញ្ជាក់ថា ឪពុករបស់ខ្លួនបានធ្វើសកម្មភាពចាប់រំលោភបានចំនួន ៥ដងដងរួចមកហើយ ហើយជនរងគ្រោះធ្លាប់និយាយប្រាប់ជីដូនរបស់ខ្លួនដែរតែគាត់មិនជឿ។បច្ចុប្បន្នជនសង្ស័យត្រូវបានឃាត់ខ្លួនបណ្តោះអាសន្ន នៅអធិការដ្ឋាននគរបាលស្រុកព្រៃនប់ និងចាត់វិធានការតាមនីតិវិធីច្បាប់៕

ចាប់ពីថ្ងៃនេះ ដល់ថ្ងៃទី ២៧ តំបន់មួយចំនួនក្នុងប្រទេសកម្ពុជានឹងចុះត្រជាក់ ក្នុងរយ:ពេល១សប្តាហ៍នេះ

ថ្ងៃទី ២១ ខែ មករា ឆ្នាំ ២០២០ ម៉ោង ០៩:៣៦

(ភ្នំពេញ)៖ តំបន់មួយចំនួននឹងចុះត្រជាក់ ក្នុងរយ:ពេល១សប្តាហ៍នេះ ចាប់ពីថ្ងៃទី២១ ដល់២៨ ខែមករា ឆ្នាំ២០២០។ នេះបេីតាមការព្យាករណ៍របស់ក្រសួងធនធានទឹក និងឧតុនិយម។ ក្រសួងធនធានទឹកបញ្ជាក់ថា តាមរយៈការតាមដានស្ថានភាពអាកាសធាតុជាប់ជាបន្ត សង្កេតឃើញថា៖ ឥទ្ធិពលជ្រលងសម្ពាធខ្ពស់ និងខ្យល់មូសុងឦសានខ្សោយ គ្របដណ្តប់លើកម្ពុជា។

ក្នុងឱកាសបុណ្យចូលឆ្នាំចិន-វៀតណាម ហាមដាច់ខាតនូវសកម្មភាព ៣ចំណុច ដើម្បីរក្សាសន្ដិសុខ សណ្ដាប់ធ្នាប់

ថ្ងៃទី ២០ ខែ មករា ឆ្នាំ ២០២០ ម៉ោង ១៦:៤៩

(ភ្នំពេញ)៖ រដ្ឋបាលរាជធានីភ្នំពេញ នៅថ្ងៃទី២០ ខែមករា ឆ្នាំ២០២០នេះ បានចេញសេចក្ដីជូនដំណឹង ស្ដីពីការរៀបចំសន្ដិសុខ សណ្ដាប់ធ្នាប់ និងរបៀបរៀបរយសាធារណៈ ក្នុងឱកាសបុណ្យចូលឆ្នាំថ្មី ប្រពៃណីចិន និងវៀតណាម ដែលនឹងប្រព្រឹត្តទៅចាប់ពីថ្ងៃទី២៤ ដល់ថ្ងៃទី២៧ ខែមករា ឆ្នាំ២០២០។ក្នុងសេចក្ដីជូនដំណឹងនេះ លោក ឃួង ស្រេង អភិបាលរាជធានីភ្នំពេញ បានដាក់ចេញនូវបំរាមចំនួន៣ចំណុច ដែលមិនឲ្យប្រជាពលរដ្ឋប្រព្រឹត្តនោះឡើយ ក្នុងន័យរក្សាសន្ដិសុខ សណ្ដាប់ធ្នាប់ សាធារណៈ រួមមាន៖*មិនឲ្យមានការដុតផាវ កាំជ្រូច ឬបង្កសំឡេងផ្ទុះគ្រប់ប្រភេទក្នុងឱកាសពិធីបុណ្យនេះ*មិនឲ្យលេងល្បែងគ្រប់ប្រភេទ ដែលមានលក្ខណៈស៉ីសង*រាល់ការហែក្បួនផ្សេងៗ ទាំងបែបសាសនា ឬប្រពៃណីដែលគ្មានការអនុញ្ញាតត្រូវហាមឃាត់។អភិបាលរាជធានីភ្នំពេញ ក៏បានដាក់បទបញ្ជាចាប់ពីពេលនេះតទៅ អាជ្ញាធរមានសមត្ថកិច្ចគ្រប់ថ្នាក់ត្រូវចាត់វិធានការឲ្យម៉ឹងម៉ាត់បំផុត កុំឲ្យមានការនាំចូលផាវ កាំជ្រូច ជាតិផ្ទុះគ្រប់ប្រភេទតាមច្រកចូលរាជធានីភ្នំពេញ និងត្រូវត្រួតពិនិត្យដកហូតវត្ថុទាំងនេះ ដែលមានតាំងលក់នៅគ្រប់ទីកន្លែងក្នុងរាជធានីភ្នំពេញ៕

បញ្ជូនសិស្សសាលាអន្តរទ្វីបអាមេរិកាំងម្នាក់ទៅតុលាការ ករណីហិង្សាបណ្តាលឲ្យស្លាប់សិស្សដូចគ្នាម្នាក់ នៅខណ្ឌបឹងកេងកង

ថ្ងៃទី ២០ ខែ មករា ឆ្នាំ ២០២០ ម៉ោង ១៦:២៨

(ភ្នំពេញ)៖ សមត្ថកិច្ចនគបាលព្រហ្មទណ្ឌបឹងកេងកង នៃស្នងការដ្ឋាននគរបាលរាជធានីភ្នំពេញ នៅរសៀលថ្ងៃទី២០ ខែមករា ឆ្នាំ២០២០នេះ បានបញ្ជូនខ្លួនយុវសិស្សសាលាអន្តរទ្វីបអាមេរិកាំងម្នាក់ ទៅតុលាការ ករណីហិង្សាបណ្តាលឲ្យស្លាប់សិស្សដូចគ្នាម្នាក់ នៅខណ្ឌបឹងកេងកង។ នេះបើតាមការបញ្ជាក់ពីមន្ត្រី សាលាដំបូងរាជធានីភ្នំពេញមកអង្គភាពព័ត៌មាន Fresh News។មន្ត្រីរូបនេះបានឲ្យដឹងថា ជនសង្ស័យឈ្មោះ ន.ល.ស ភេទប្រុស អាយុ ១៥ឆ្នាំ មុខរបរសិស្សសាលា អន្តរទ្វីប អាមេរិកាំង (AIS) ត្រូវបានបញ្ជូនទៅកាន់សាលាដំបូងរាជធានីភ្នំពេញ ដើម្បីប្រគល់ជូនតំណាងអយ្យការបើកការស៊ើបសួរ និងចោទប្រកាន់តាមច្បាប់ ពាក់ពន្ធ័ករណីហិង្សាបណ្តាលស្លាប់យុវសិស្សដូចគ្នា។គួរបញ្ជាក់ថា សិស្សសាលាអន្ដរទ្វីបអាមេរិកកាំង ២នាក់ បានវាយតប់គ្នាបណ្ដាលឲ្យភាគីម្ខាងស្លាប់ ពេលបញ្ជូនទៅមន្ទីរពេទ្យ។ ហេតុការណ៍នេះបានកើតឡើង នៅល្ងាចថ្ងៃទី១៨ ខែមករា ឆ្នាំ២០២០ នៅចំណុចផ្លូវ៤៣០ ភូមិ២ សង្កាត់ទំនប់ទឹក ខណ្ឌបឹងកេងកង រាជធានីភ្នំពេញ។របាយការណ៍របស់សមត្ថកិច្ច បានឲ្យដឹងថា នៅមុនពេលកើតហេតុ ជនរងគ្រោះរួមជាមួយមិត្តភក្តិ បានជិះម៉ូតូចេញពីសាលាអន្ដរទ្វីបអារមេរិចកាំង ទៅជួបជាមួយជនសង្ស័យ នៅផ្លូវ៤០២ សង្កាត់ទំនប់ទឹក ខណ្ឌបឹងកេងកង ដោយបានណាត់គ្នាវ៉ៃគ្នាជាមួយជនសង្ស័យ ព្រោះពួកគេមានទំនាស់ជាមួយគ្នារឿងហៅអាមឹង។សមត្ថកិច្ចបានបញ្ជាក់ទៀតថា បន្ទាប់ពីជួបគ្នាជនសង្ស័យបានវាយជនរងគ្រោះមួយដៃចំកណ្ដាលដើមទ្រូង ធ្វើឲ្យជនរងគ្រោះដួលម៉ូតូ ហើយភ្លាមនោះជនសង្ស័យបានជិះម៉ូតូម៉ាក Today គេចខ្លួនតែម្ដង។ បន្ទាប់មកជនរងគ្រោះត្រូវបានមិត្តភក្តិ ជូនទៅមន្ទីរពេទ្យមិត្តភាពខ្មែរ-សូវៀត ប៉ុន្ដែគ្រូពេទ្យប្រាប់ថា បានស្លាប់បាត់ហើយ។ជនរងគ្រោះក្នុងហេតុការណ៍នេះ ឈ្មោះ ស.ស.វ អាយុ ១៤ឆ្នាំ រៀនថ្នាក់ទី៩ឃ នៅសាលាអន្តរទ្វីបអាមេរិកាំង ស្នាក់នៅផ្ទះលេខ៤៣០ ផ្លូវ២៤BT ភូមិត្នោតជ្រុំ សង្កាត់បឹងទំពន់ ខណ្ឌមានជ័យ។ ដោយឡែក ជនសង្ស័យឈ្មោះ ន.ល.ស ជាសិស្សរៀននៅសាលាដូចគ្នា ស្នាក់នៅផ្ទះលេខ ៣A ផ្លូវ១២BT សង្កាត់បឹងទំពន់ទី១ ខណ្ឌមានជ័យ៕

ចិនគ្រោងហាមឃាត់មិនឱ្យប្រើប្រាស់ថង់ និងរបស់របរប្លាស្ទិកផ្សេងទៀតទូទាំងប្រទេស

ថ្ងៃទី ២០ ខែ មករា ឆ្នាំ ២០២០ ម៉ោង ១៤:៤៣

ចិនដែលជាប្រទេសប្រើប្រាស់ប្លាស្ទិកធំជាងគេមួយនៅលើពិភពលោកបានបង្ហាញពីផែនការកាត់បន្ថយការប្រើបាស់ថង់ប្លាស្ទិកទូទាំងប្រទេស។ប្រភេទថង់ដែលមិនងាយរលួយនឹងត្រូវហាមមិនឱ្យប្រើប្រាស់នៅក្នុងទីក្រុងធំៗនាចុងឆ្នាំ២០២០ និងនៅគ្រប់ទីក្រុង និងទីប្រជុំជននានានៅក្នុងឆ្នាំ ២០២២ ។ឧស្សាហកម្មភោជនីយដ្ឋាន ក៏នឹងត្រូវហាមឃាត់មិនឱ្យប្រើប្រាស់បំពងបឺតប្លាស្ទិកនៅចុងឆ្នាំ២០២០នេះផងដែរ។ចិនបានតស៊ូអស់រយៈពេលជាច្រើនឆ្នាំមកហើយ ដើម្បីដោះស្រាយបញ្ហាសំរាមដែលប្រជាជន ១,៤ ពាន់លាននាក់របស់ខ្លួនបានប្រើប្រាស់។ ទីលានចាក់សំរាមធំបំផុតរបស់ប្រទេសចិនដែលមានទំហំប្រហែល ១០០ដងនៃទីលានបាល់ទាត់ បានពេញប្រៀប ២៥ ឆ្នាំ មុនការរំពឹងទុក។ គ្រាន់តែនៅក្នុងឆ្នាំ ២០១៧ ចិនបានប្រមូលសំរាមក្នុងទីក្រុងចំនួន ២១៥ លានតោន។ ប៉ុន្តែតួលេខជាតិចំពោះការកែច្នៃឡើងវិញមិនមានទេ។នៅក្នុងឆ្នាំ ២០១០ ចិនបានផលិតកាកសំណល់ប្លាស្ទិកចំនួន ៦០លានតោន បន្ទាប់មកសហរដ្ឋអាមេរិកចំនួន ៣៨លានតោន។ នេះបើយោងតាមការចុះផ្សាយតាមប្រព័ន្ធអ៊ីនធឺណេតរបស់អង្គការ Our World in Data ដែលមានមូលដ្ឋាននៅសាកលវិទ្យាល័យ Oxford៕

ករណីឆ្លងវីរុសអាថ៌កំបាំងកើនឡើងដោយរីករាលដាលដល់ទីក្រុងផ្សេងទៀតក្នុងប្រទេសចិន

ថ្ងៃទី ២០ ខែ មករា ឆ្នាំ ២០២០ ម៉ោង ១៤:២៤

ចិន៖ អាជ្ញាធរចិនបានរាយការណ៍ពីករណីឆ្លងថ្មីចំនួន ១៣៩ករណី ក្នុងរយៈពេល ២ថ្ងៃ ដែលជាលើកដំបូងករណីឆ្លងវីរុសដ៏អាថ៌កំបាំងកើតមាននៅក្នុងប្រទេសចិន ក្រៅពីទីក្រុងវូហាន។ករណីឆ្លងថ្មីនេះ ត្រូវបានគេរកឃើញនៅក្នុងទីក្រុងវូហាន ទីក្រុងប៉េកាំង និងហ្សេនជិន។ កូរ៉េខាងត្បូងក៏បានរាយការណ៍ផងដែរពីករណីឆ្លងជាលើកដំបូងនៅថ្ងៃច័ន្ទនេះ បន្ទាប់ពីប្រទេសថៃ និងជប៉ុន។ ចំនួនករណីឆ្លងសរុប បច្ចុប្បន្នមានចំនួនលើសពី ២០០នាក់ ហើយ ៣នាក់បានស្លាប់ដោយសារជំងឺផ្លូវដង្ហើម។ ក្រុមអ្នកជំនាញនៅចក្រភពអង់គ្លេសបានប្រាប់ប៊ីប៊ីស៊ីថា ចំនួនអ្នកឆ្លងអាចមានចំនួនច្រើន ជាងចំនួនផ្លូវការដោយការប៉ាន់ស្មានអាចជិតដល់ ១៧០០នាក់។ ចិនបានសន្យាថា នឹងខិតខំប្រឹងប្រែងតាមដានមើលនៅក្នុងអំឡុងពេលនៃការប្រារព្ធពិធីបុណ្យចូលឆ្នាំថ្មីនៅសប្តាហ៍នេះ ស្របពេលមនុស្សរាប់លាននាក់នឹងធ្វើដំណើរទៅជួបជុំក្រុមគ្រួសាររបស់ពួកគេ៕

ជនបង្កទាំង ៧នាក់ ដែលផឹកស្រវឹងឈ្លោះកាប់ចាក់គ្នា នៅលើឧទ្យានជាតិព្រះមុនីវង្សបូកគោ បណ្តាលឲ្យស្លាប់ម្នាក់ នឹងបញ្ជូនទៅតុលាការនៅល្ងាចនេះ

ថ្ងៃទី ២០ ខែ មករា ឆ្នាំ ២០២០ ម៉ោង ១១:៥៨

(កំពត)៖ កម្មករម្នាក់ត្រូវកម្មករគ្នាឯងចាក់នឹងកាំបិតសម្លាប់ ដោយសារហូបគ្រឿងស្រវឹង ទាស់សម្តីគ្នា នៅលើឧទ្យានជាតិព្រះមុនីវង្សបូកគោ។ នេះបើតាមលោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត បញ្ជាក់ប្រាប់អង្គភាពព័ត៌មាន Fresh News។លោកឧត្តមសេនីយ៍ស្នងការ បានបញ្ជាក់ថា នៅល្ងាចថ្ងៃនេះ ជនដៃដល់ទាំង ៧នាក់ នឹងត្រូវបញ្ជូនទៅកាន់តុលាការ នាល្ងាចថ្ងៃទី២០ ខែមករា ឆ្នាំ២០២០នេះ ដើម្បិចាត់ការតាមច្បាប់។ ហេតុការណ៍នេះ បានកើតឡើងនៅយប់ថ្ងៃទី១៨ ខែមករា ឆ្នាំ២០២០ វេលាម៉ោង ២០៖៤០នាទី នៅក្នុងភោជនីយដ្ឋានទឹកធ្លាក់ លើឧទ្យានជាតិព្រះមុនីវង្សបូកគោ ស្ថិតក្នុងភូមិរលួស ឃុំបឹងទូក ស្រុកទឹកឈូ ខេត្តកំពត។លោកស្នងការបានឲ្យដឹងថា ក្រុមជនសង្ស័យ ១ក្រុម បានផឹកស៉ីឈ្លោះប្រកែកគ្នា រហូតធ្វើសកម្មភាពចាក់លើជនរងគ្រោះឈ្មោះ ធី សុធា ភេទប្រុស អាយុ ៣១ឆ្នាំ រស់នៅភូមិនាងគង្ហឹង សង្កាត់សំបូមាស ក្រុងកំពង់ចាម ខេត្តកំពង់ចាម រងរបួសធ្ងន់ចំនួន ២កន្លែង។ ជនរងគ្រោះ បានស្លាប់តាមផ្លូវពេលដឹកទៅសង្គ្រោះ។ក្រោយកើតហេតុនៅម៉ោង ២៣៖០០នាទី កម្លាំងសមត្ថកិច្ចបានឃាត់ក្រុមជនសង្ស័យចំនួន ៧នាក់៕

រថយន្ត៤គ្រឿងបុកគ្នា នៅស្រុកសំបូរ ខេត្តក្រចេះ បណ្តាលឲ្យឆេះ និងរបួសមនុស្ស៨នាក់

ថ្ងៃទី ២០ ខែ មករា ឆ្នាំ ២០២០ ម៉ោង ០៩:៣៣

(ក្រចេះ)៖ នៅវេលាម៉ោង១១យប់ថ្ងៃទី១៩ ខែមករា ឆ្នាំ២០២០ ស្ថិតនៅចំណុចផ្លូវជាតិលេខ៧ ភូមិអូព្រះ ឃុំអូរគ្រៀង ស្រុកសំបូរ ខេត្តក្រចេះ មានករណីគ្រោះថ្នាក់ចរាចរណ៍មួយកើតឡើង រវាងរថយន្តចំនួន៤គ្រឿង បុកគ្នាបណ្តាលឲ្យរបួសមនុស្ស៨នាក់។របាយការណ៍របស់ស្នងការដ្ឋាននគរបាលខេត្តក្រចេះ បានបញ្ជាក់ថាករណីនេះបានបណ្តាលឲ្យរថយន្តធុនធំមួយគ្រឿងឆេះ ហើយមនុស្សប្រុស៨នាក់ របួសក្នុងនោះរបួសធ្ងន់៣នាក់។ក្រោយកើតហេតុភ្លាមៗ ស្នងការនគរបាលខេត្តក្រចេះ លោកឧត្តមសេនីយ៍ទោ លន់ សុផាត បានដឹកនាំរថយន្តពន្លត់អគ្គិភ័យ ចុះអន្តរាគមន៍បាញ់ពន្លត់ទាន់ពេល៕

សេចក្ដីជូនដំណឹងពីក្រសួងបរិស្ថាន៖ ស្ថានភាពគុណភាពខ្យល់មិនទាន់ឈានដល់កម្រិតប៉ះពាល់ដល់សុខភាព គួរឱ្យព្រួយបារម្ភនៅឡើយទេ

ថ្ងៃទី ១៧ ខែ មករា ឆ្នាំ ២០២០ ម៉ោង ១៥:១៦

(ភ្នំពេញ)៖ នៅវេលាថ្ងៃត្រង់ទី ១៧ ខែមករា ឆ្នាំ២០២០នេះ ក្រសួងបរិស្ថាន បានចេញសេចក្តីជូនដំណឹងដល់សាធារណជនបានជ្រាបថា រហូតមកទល់ពេលនេះ ស្ថានភាពគុណភាពខ្យល់ នៅមិនទាន់ឈានដល់កម្រិតប៉ះពាល់ដល់សុខភាពគួរឱ្យព្រួយបារម្ភនៅឡើយទេ។ មន្ត្រីជំនាញនៃក្រសួងបរិស្ថានបាននិងកំពុងបន្តតាមដានលើគុណភាពខ្យល់បន្ថែមទៀត។ ការកើនឡើងកំហាប់និចល PM2.5 ក្នុងខ្យល់នេះមិនមែនមាននៅតែព្រះរាជាណាចក្រកម្ពុជាទេ ប៉ុន្តែនិន្នាការនៃកំណើននេះមាននៅក្នុងបណ្តាប្រទេសផ្សេងទៀតនៅក្នុងតំបន់។ ក្រសួងបរិស្ថាននឹងធ្វើការជូនដំណឹងជាបន្តបន្ទាប់ដល់សាធារណជនឱ្យបានជ្រាបអំពីការវិវឌ្ឍថ្មីៗជុំវិញស្ថានភាពគុណភាពខ្យល់នៅប្រទេសកម្ពុជា។ក្រសួងបរិស្ថានសូមគូសបញ្ជាក់ថា ការផ្សព្វផ្សាយព័ត៌មានទាំងឡាយទាក់ទងនឹងស្ថានភាពគុណភាពខ្យល់របស់ប្រទេសកម្ពុជាដែលមិនចេញពីប្រភពក្រសួងបរិស្ថានជាព័ត៌មានមិនផ្លូវការ។