trollkhmer news

សង្គមនិងជីវិត

ក្រសួងសុខាភិបាល រកឃើញអ្នកឆ្លងកូវីដ១៩ ចំនួន ៩នាក់ថ្មីបន្ថែមទៀតដែលជាករណីនាំចូល

ថ្ងៃទី ១៤ ខែ កក្តដា ឆ្នាំ ២០២០ ម៉ោង ០៨:៥៩

(ភ្នំពេញ)៖ ក្រសួងសុខាភិបាល បានប្រកាសឱ្យដឹងនៅព្រឹកថ្ងៃអង្គារ ទី១៤ ខែកក្កដា ឆ្នាំ២០២០នេះថា រកឃើញអ្នកកើតជំងឺកូវីដ១៩ ចំនួន ៩នាក់ថ្មីបន្ថែមទៀត ដែលជាករណីនាំចូលពីប្រទេសអារ៉ាប៊ីសាអូឌីត។យោងតាមសេចក្តីប្រកាសព័ត៌មានរបស់ក្រសួងសុខាភិបាល បានឱ្យដឹងថា អ្នកទើបរកឃើញកើតមានជំងឺកូវីដ១៩នេះ ជាអ្នកធ្វើដំណើរមកពីប្រទេសអារ៉ាប់ប៊ីសាអូឌីត កាលពីថ្ងៃទី១០ ខែកក្កដា ឆ្នាំ២០២០កន្លងទៅនេះ។ អ្នកជំងឺទាំង៩នាក់នេះ ត្រូវបានពិនិត្យរកឃើញជំងឺកូវីដ១៩ កាលពីថ្ងៃទី១៣ ខែកក្កដាម្សិលមិញ ហើយត្រូវបានបញ្ជូនទៅសម្រាកព្យាបាលនៅមណ្ឌលសុខភាពចាក់អង្រែ។អ្នកជំងឺទាំង៩នាក់នេះរួមមាន៖- បុរសជានជាតិខ្មែរអាយុ ២៤ឆ្នាំ មានអាស័យដ្ឋាននៅភូមិ១សង្កាត់ច្រាំងចំរះខណ្ឌឫស្សីកែវ រាជធានីភ្នំពេញ- បុរសជនជាតិខ្មែរអាយុ ២៥ឆ្នាំ មានអាស័យដ្ឋាននៅភូមិកំពង់ត្រឡាច ឃុំកំពង់ត្រឡាច ស្រុកកំពង់ ត្រឡាច ខេត្តកំពង់ឆ្នាំង- បុរសជនជាតិខ្មែរអាយុ ២៩ឆ្នាំ មានអាស័យដ្ឋាននៅភូមិទួលទោកឃុំកំពង់ហ្លួង ស្រុកពញ្ញាឮ ខេត្តកណ្ដាល- បុរសជនជាតិខ្មែរអាយុ ២៦ឆ្នាំ មានអាស័យដ្ឋាននៅភូមិដំណាក់ពពេល ឃុំគរ ស្រុកត្បូងឃ្មុំ ខេត្តត្បូងឃ្មុំ- បុរសជនជាតិខ្មែរអាយុ ២៧ឆ្នាំ មានអាស័យដ្ឋាននៅភូមិសោយ១ ឃុំប៊ុស១ ស្រុកក្រូចឆ្មារ ខេត្តត្បូងឃ្មុំ- បុរសជនជាតិខ្មែរអាយុ ២៨ឆ្នាំ មានអាស័យដ្ឋាននៅភូមិ៦ ឃុំរការខ្នុរ ស្រុកក្រូចឆ្មារខេត្តត្បូងឃ្មុំ- បុរសជនជាតិខ្មែរអាយុ ២៨ឆ្នាំ មានអាស័យដ្ឋាននៅភូមិស្វាយឃ្លាំង ឃុំទីភក្រូចឆ្មាររ ខេត្តត្បូងឃ្មុំ- បុរសជនជាតិខ្មែរអាយុ ២៦ឆ្នាំ មានអាស័យដ្ឋាននៅភូមិទួលសម្បត្តិ ឃុំ ថ្មីសំដុះ ស្ត្រីចក្រថ្នាក់ខេត្តត្បូងឃ្មុំ ។- បុរសជនជាតិខ្មែរអាយុ ៣០ឆ្នាំ មានអាស័យដ្ឋាននៅភូមិវិហារសម្បូរឃុំរកាពប្រាំ ស្រុកត្បូងឃ្មុំ ខេត្តត្បូងឃ្មុំក្រសួងសុខាភិបាលបញ្ជាក់ថា បុរសទាំង០៩នាក់ខាងលើ ជាអ្នកធ្វើដំណើរតាមជើងហោះហើរមកពីប្រទេសអារ៉ាប់ប៊ីសាអូឌី និងបានបន្តជើងហោះហើរ ពីប្រទេសម៉ាឡេស៊ី មកដល់កម្ពុជានៅថ្ងៃទី១០ ខែកក្កដា ឆ្នាំ២០២០ វេលាម៉ោង១៧:២៥នាទីល្ងាច។ វត្ថុសំណាកលើកទីពីររបស់ពួកគាត់ ដែលបានធ្វើវិភាគដោយវិទ្យាស្ថាន ប៉ាស្ទ័រកម្ពុជា ទទួលបានលទ្ធផលវិជ្ជមានវីរុសកូវីដ-១៩ នៅយប់ថ្ងៃទី១៣ ខែកក្កដា ឆ្នាំ២០២០ ហើយបច្ចុប្បន្ន អ្នកជំងឺទាំង ០៩នាក់ខាងលើនេះ ត្រូវបានដាក់ឱ្យសម្រាកព្យាបាលនៅមណ្ឌលសុខភាពចាក់ អង្រែ រាជធានីភ្នំពេញ។រីឯអ្នកដំណើរចំនួន៧០នាក់ ដែលធ្វើដំណើរតាមជើងហោះហើរជាមួយអ្នក វិជ្ជមានវីរុសកូវីដ-១៩ កំពុងត្រូវបានបន្តធ្វើចត្តាឡីស័កចំនួន១៤ថ្ងៃ នៅមណ្ឌលចត្តាឡីស័កជំពូរវ័ន្តមួយ ក្នុងរាជធានីភ្នំពេញ។ ក្នុងចំនួនអ្នកដំណើរ ៨០នាក់ ដែលបានធ្វើដំណើរមកពីប្រទេសអារ៉ាប់ប៊ីសាអូឌី គិតមកដល់ថ្ងៃនេះ មានអ្នកជំងឺកូវីដ-១៩ សរុបមានបុរសចំនួន២៤នាក់ ដែលបច្ចុប្បន្នកំពុងសម្រាក ព្យាបាលនៅមណ្ឌលសុខភាពចាក់អង្រែរាជធានីភ្នំពេញ។សូមជម្រាបថា គិតត្រឹមម៉ោង០៧៖០០ព្រឹក ថ្ងៃទី១៤ ខែកក្កដា ឆ្នាំ២០២០ នេះ កម្ពុជារកឃើញមានអ្នកមានជំងឺកូវីដ១៩ សរុបចំនួន១៦៥នាក់ (ស្ត្រី ៤០នាក់ និងបុរស ១២៥នាក់) ក្នុងនោះអ្នកព្យាបាលជាសះស្បើយ សរុបទូទាំងប្រទេស មានចំនួន ១៣៣នាក់ (ស្រី៣៩នាក់ និងបុរស៩៤នាក់) និង អ្នកសម្រាកព្យាបាលនៅក្នុងមន្ទីរពេទ្យរដ្ឋមានចំនួន៣២នាក់៕

ក្រសួងធនធានទឹក៖ ចាប់ពីថ្ងៃទី ១៥-២១ ខែកក្កដា ភ្លៀងនឹងបន្តធ្លាក់ពីកម្រិតខ្សោយទៅច្រើន

ថ្ងៃទី ១៤ ខែ កក្តដា ឆ្នាំ ២០២០ ម៉ោង ០៨:៥៥

(ភ្នំពេញ)៖ ក្រសួងធនធានទឹក និងឧតុនិយម ​​នៅថ្ងៃទី១៤ ខែកក្កដា ឆ្នាំ២០២០នេះ បានចេញសេចក្ដីជូនដំណឹង ស្ដីពី ស្ថានភាពធាតុអាកាស ចាប់ពីថ្ងៃទី១៥ ដល់ថ្ងៃទី ២១ ខែកក្កដា ឆ្នាំ២០២០។ក្រសួងបានឲ្យដឹងថា តាមរយៈនៃការប្រែប្រួលជាបន្តបន្ទាប់នៃស្ថានភាពអាកាសធាតុ សង្កេតឃើញថា នៅថ្ងៃទី ១៥-១៧ ខែកក្កដា ខ្យល់មូសុងនិរតីនឹងបក់ក្នុង ល្បឿនបង្គួរមកលើកម្ពុជា បន្ទាប់មកនៅថ្ងៃទី១៨ - ២១ ខែកក្កដា ខ្យល់មូសុងនិរតីនឹងចុះខ្សោយ។ នៅថ្ងៃទី ១៥-១៧ ខែកក្កដា នឹងអាចមានភ្លៀងធ្លាក់រាយប៉ាយក្នុងកម្រិតពីមធ្យមទៅបង្គរ ក្នុងនោះមានផ្នែកខ្លះនៃបណ្ដាខេត្តនៅភាគកណ្ដាល និងភាគខាងលើអាចមានភ្លៀងច្រើន។ បន្ទាប់ពីនោះ ភ្លៀងនឹងអាចធ្លាក់ថមថយមកក្នុងកម្រិតខ្សោយទៅមធ្យម។

អាហ្សង់ទីន លោតចូលក្រុមប្រទេសដែលមានករណីឆ្លង COVID-19 រាប់សែនករណី

ថ្ងៃទី ១៣ ខែ កក្តដា ឆ្នាំ ២០២០ ម៉ោង ១៤:៥១

(អាហ្សង់ទីន)៖ ក្រសួងសុខាភិបាលអាហ្សង់ទីន បានប្រកាសពីការរកឃើញ COVID-19 ថ្មីៗ ២,៦៥៧ករណីទៀត នារយៈពេញមួយថ្ងៃអាទិត្យម្សិលមិញ (ម៉ោងក្នុងតំបន់) ធ្វើឱ្យចំនួនករណីឆ្លងសរុបកើនដល់ ១០០,១៦៦ករណី និងហក់ចូលក្នុងចង្កោមប្រទេស ដែលមានករណីឆ្លងជំងឺរាតត្បាតសកលនេះ ដល់ខ្ទង់សែននាក់។ បើតាមក្រសួងសុខាភិបាលអាហ្សង់ទីន ពេញមួយថ្ងៃអាទិត្យម្សិលមិញដូចគ្នា អ្នកស្លាប់ដោយសារ COVID-19 ក៏បានកើនឡើងដល់ ១,៨៤៥នាក់ផងដែរ ខណៈអ្នកជំងឺជាង ៧០០នាក់កំពុងស្ថិតក្នុងការសង្គ្រោះបន្ទាន់។ ប្រទេសអាហ្សង់ទីនបានដាក់បំរាម​ហាមឃាត់លើជើងហោះហើរពាណិជ្ជកម្ម​រហូតដល់ថ្ងៃទី០១ ខែកញ្ញា ដើម្បីទប់ស្កាត់ការឆ្លងរាតត្បាត COVID-19 ដែលកំពុងលុកលុយយ៉ាងខ្លាំង​លើប្រទេសក្នុងតំបន់អាមេរិកឡាទីនមួយនេះ។ប៉ុន្តែទោះបីជាករណីឆ្លងនៅតែបន្តកើនឡើង ការបិទរដ្ឋធានី ប៊ុយណូសអ៊ែរែស (Buenos Aires) នឹងត្រូវបញ្ចប់នៅថ្ងៃសុក្រសប្ដាហ៍នេះ ខណៈអាជ្ញាធរអាហ្សង់ទីនកំពុងពិចារណាថា តើគួរតែបន្តរឹតត្បិតតទៅទៀត ឬក៏យ៉ាងណា។ បើតាមគេហទំព័រ Worldometers បច្ចុប្បន្នប្រទេសដែលមានករណីឆ្លង COVID-19 ចាប់ពីរាប់សែនដល់លានករណីមានចំនួន ២២ប្រទេស ក្នុងនោះអាហ្សង់ទីននៅលេងរៀងក្រោយគេ៕

មេក្លោងជួញដូរគ្រឿងញៀន៣នាក់ ថ្នាំញៀនជិត១គីឡូ និងវត្ថុតាងជាច្រើន ត្រូវកម្លាំងនគរបាលបង្ក្រាបនៅខេត្តក្រចេះ

ថ្ងៃទី ១៣ ខែ កក្តដា ឆ្នាំ ២០២០ ម៉ោង ១៣:១០

(ក្រចេះ)៖ កម្លាំងអធិការដ្ឋាននគរបាលក្រុងក្រចេះ សហការជាមួយការិយាល័យគ្រឿងញៀនខេត្ត ក្រោមបញ្ជារបស់លោកឧត្ដមសេនីយ៍ទោ លន់ សុផាត ស្នងការនគរបាលខេត្ត ក្រោមការសម្រប សម្រួលពីលោក កែវ សុជាតិ ព្រះរាជអាជ្ញាអមសាលាដំបូងខេត្ត នាព្រលប់ថ្ងៃទី១២ ខែកក្កដា ឆ្នាំ២០២០ បានចុះបង្ក្រាបករណីជួញដូរគ្រឿងញៀន ដោយឃាត់ខ្លួនជនសង្ស័យចំនួន៣នាក់ និងគ្រឿងញៀនចំនួន១១កញ្ចប់ (ជិត១គីឡូក្រាម) នៅភូមិព្រែកតាថឹង ឃុំបុសលាវ ស្រុកចិត្របុរី ខេត្តក្រចេះ។លោក អេង ហឿន អធិការនគរបាលក្រុងក្រចេះ បានបញ្ជាក់ប្រាប់ភ្នាក់ងារព័ត៌មាន Fresh News ប្រចាំខេត្តក្រចេះឱ្យដឹងនៅថ្ងៃទី១៣ ខែកក្កដា ឆ្នាំ២០២០នេះថា ជនសង្ស័យឈ្មោះ ឈាវ សុនា ជាមុខសញ្ញាចាស់ដែលកម្លាំងនគរបាលក្រុងតាមចាប់។ លុះដល់ថ្ងៃម្សិលមិញ កម្លាំងរបស់លោកបានសហការជាមួយការិយាល័យប្រឆាំងគ្រឿងញៀនខេត្ត បានឃាត់ខ្លួន ព្រមទាំងបក្ខពួកសរុប៣នាក់រួមមាន៖*ទី១៖ ឈ្មោះ ឈាវ ស៊ីណា ភេទប្រុស អាយុ២៦ឆ្នាំ មុខរបរមិនពិតប្រាកដ*ទី២៖ ឈ្មោះ ហ៊ួន ប៊ុនធិ ភេទប្រុស អាយុ១៨ឆ្នាំ មុខរបរមិនពិតប្រាកដ អ្នកទាំង២មានទីលំនៅ ភូមិព្រែកតាថឹង ឃុំបុសលាវ ស្រុកចិត្របុរី ខេត្តក្រចេះ*ទី៣៖ ឈ្មោះ ម៉ាន វ៉ា អាយុ៣២ឆ្នាំ មុខរបរមិនពិតប្រាកដ ទីលំនៅភូមិពង្រ ឃុំពង្រ ស្រុកឆ្លូង ខេត្តក្រចេះ។កម្លាំងនគរបាល ក៏បានដកហូតវត្ថុតាងរួមមាន៖ ម្ស៉ៅក្រាមពណ៌ស (សង្ស័យជាគ្រឿងញៀន) ចំនួន ១១កញ្ចប់ (ធំ០៩កញ្ចប់, តូច០២កញ្ចប់) ជិត១គីឡូក្រាម, ថ្នាំគ្រាប់ (សង្ស័យជាគ្រឿងញៀន) ចំនួន ១៦៩គ្រាប់ (ពណ៌ផ្កាឈូក ចំនួន១៦៨គ្រាប់ ពណ៌ខៀវ ចំនួន០១គ្រាប់), ជញ្ចីងសម្រាប់ថ្លឹងគ្រឿងញៀន ចំនួន០២គ្រឿង, ទុយោសម្រាប់ចូករំលែកគ្រឿងញន ចំនួន០២, ថង់សម្រាប់ច្រករំលែកគ្រឿងញៀនមួយចំនួន។បច្ចុប្បន្នជនសង្ស័យទាំង៣នាក់ និងវត្ថុតាង ត្រូវបានឃាត់ និងរក្សាទុកជាបណ្តោះអាសន្ន នៅអធិការដ្ឋាននគរបាលក្រុងក្រចេះ ដើម្បីកសាងសំណុំរឿងតាមនីតិវិធីច្បាប់៕

WHO ប្រកាសពីកំណត់ត្រាថ្មី ដែលពិភពលោកមានអ្នកឆ្លង COVID-19 ច្រើនបំផុតក្នុង ១ថ្ងៃ

ថ្ងៃទី ១៣ ខែ កក្តដា ឆ្នាំ ២០២០ ម៉ោង ១០:៤៤

(ហ្សឺណែវ)៖ អង្គការសុខភាពពិភពលោក (WHO) បានរាយការណ៍ពីការកើនឡើងនៃករណីឆ្លង COVID-19 ទូទាំងពិភពលោក ២៣០,៣៧០នាក់ក្នុងរយៈពេល ២៤ម៉ោងចុងក្រោយនេះ ដែលជាតួលេខខ្ពស់បំផុត មិនធ្លាប់មាននោះឡើយ គិតចាប់តាំងពីជំងឺនេះផ្ទុះឡើង។ នេះបើតាមការចេញផ្សាយ ដោយសារព័ត៌មាន CNA នៅព្រឹកថ្ងៃចន្ទ ទី១៣ ខែកក្កដា ឆ្នាំ២០២០។បើតាម WHO ពេញមួយថ្ងៃអាទិត្យម្សិលមិញ ករណីឆ្លង COVID-19 យ៉ាងគំហុកត្រូវបានរាយការណ៍នៅក្នុងប្រទេសប្រេស៊ីល សហរដ្ឋអាមេរិក ឥណ្ឌា និងអាហ្វ្រិកខាងត្បូង ខណៈអ្នកស្លាប់មាន ៥,០០០នាក់ក្នុងមួយថ្ងៃដូចគ្នា។ អង្គការ WHO កាលពីថ្ងៃទី១០ ខែកក្កដាកន្លងទៅ ក៏ធ្លាប់បានប្រកាសផងដែរពីការរកឃើញ ករណីឆ្លង COVID-19 ប្រចាំថ្ងៃចំនួន ២២៨,១០២នាក់។ ពេញមួយថ្ងៃអាទិត្យម្សិលមិញ សហរដ្ឋអាមេរិកមានអ្នកឆ្លង COVID-19 ៥៩,៧៤៧នាក់ ធ្វើឱ្យករណីឆ្លងសរុបកើនដល់ ៣.៤លានករណី ក្នុងនោះស្លាប់ ១៣៧,៧៨២នាក់ និងជាសះស្បើយឡើងវិញ ១.៥លាននាក់។ ចំណែកឯប្រេស៊ីលវិញ មានករណីឆ្លងសរុបកើនដល់ ១.៨លានករណី ក្នុងនោះ ៧២,១០០នាក់បានស្លាប់ និងជាសះស្បើយឡើងវិញ ១.២លាននាក់។គួរបញ្ជាក់ថា បើតាមគេហទំព័រ worldometers ចំនួនករណីឆ្លង COVID-19 នៅទូទាំងពិភពលោកបានកើនដល់ច្រើនជាង ១៣លានករណីហើយ ក្នុងនោះស្លាប់ ៥៧១,៥១៨នាក់ និងជាសះស្បើយឡើងវិញ ៧.៥លាននាក់៕

ចំនួនអ្នកឆ្លង COVID-19 លើពិភពលោកកើនដល់ជាង ១៣លាននាក់ ស្លាប់ជាង ៥៧ម៉ឺននាក់ និងជាសះស្បើយជាង ៧.៥លាននាក់

ថ្ងៃទី ១៣ ខែ កក្តដា ឆ្នាំ ២០២០ ម៉ោង ០៨:៥០

(បរទេស)៖ គិតត្រឹមម៉ោង ៧ព្រឹកថ្ងៃចន្ទ ទី១៣ ខែកក្កដា ឆ្នាំ២០២០នេះ ចំនួនអ្នកឆ្លងជំងឺ COVID-19 នៅទូទាំងពិភពលោក បានកើនឡើងដល់ ១៣,០២៦,៩៧៣នាក់ហើយ។ ក្នុងនោះអ្នកស្លាប់មានចំនួន ៥៧១,០៧៦នាក់ និងជាសះស្បើយឡើងវិញ ៧,៥៧៥,២០៨នាក់។យោងតាមទិន្នន័យពីគេហទំព័រអន្តរជាតិ Worldometer បានបង្ហាញថា ការរីករាលដាលនៃជំងឺកូវីដ១៩ នៅតែមានសភាពស្រួចស្រាវចំនួនអ្នកឆ្លង និងស្លាប់ថ្មីនៅតែមានចំនួនច្រើន។សហរដ្ឋអាមេរិក នៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ។ សហរដ្ឋអាមេរិក មានអ្នកឆ្លងជំងឺ COVID-19 ចំនួន ៣,៤១៣,០៧៩នាក់ ស្លាប់ចំនួន ១៣៧,៧៨២នាក់ និងជាសះស្បើយចំនួន ១,៥១៦,៧៧៤នាក់។ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺកូវីដ១៩ គឺប្រទេសប្រេស៊ីល។ ប្រេស៊ីលមានអ្នកឆ្លង ១,៨៦៦,១៧៦នាក់ ស្លាប់ចំនួន ៧២,១៥១នាក់ និងជាសះស្បើយ ១,២១៣,៥១២នាក់។ ប្រទេសឈរនៅចំណាត់ថ្នាក់ទី៣ គឺប្រទេសឥណ្ឌា។ ឥណ្ឌា មានអ្នកឆ្លង ៨៧៩,៤៦៦នាក់ ស្លាប់ ២៣,១៨៧នាក់ និងជាសះស្បើយ ៥៥៤,៤២៩នាក់។

ចិន ប្រកាសអាសន្នកម្រិតខ្ពស់បំផុត នៅទីក្រុងចំនួន៤ជាប់ទន្លេយ៉ាងសេ ខណៈមនុស្សស្លាប់-បាត់ខ្លួនកើនដល់ ១៤០នាក់

ថ្ងៃទី ១០ ខែ កក្តដា ឆ្នាំ ២០២០ ម៉ោង ១៥:២៩

(ប៉េកាំង)៖ ទីក្រុងធំៗចំនួន ០៤ ដែលស្ថិតនៅតាមបណ្តោយទន្លេយ៉ាងសេ (Yangtze) បានប្រកាសអាសន្នកម្រិតខ្ពស់បំផុត (ពណ៌ក្រហម) តែម្តង ដោយសារតែរយៈពេល ០២ថ្ងៃមកនេះភ្លៀងនៅតែបន្តធ្លាក់ឥតឈប់ឈរ និងកម្ពស់ទឹកបានកើនឡើងយ៉ាងគំហុកបន្ថែមទៀត។ នេះបើតាមការចេញផ្សាយដោយ CNA នារសៀលថ្ងៃសុក្រ ទី១០ ខែកក្កដា ឆ្នាំ២០២០។បណ្តាទីក្រុងដែលទើបប្រកាសអាសន្នខាងលើនេះរួមមាន ទីក្រុងសៀននីង (Xianning) និងជីងចូវ (Jingzhou) នៃខេត្តហ៊ូប៉ី (Hubei) និងទៅក្រុងណានឆាង (Nanchang) និងសាងរ៉ាវ (Shangrao) នៃខេត្តជាំងស៊ី (Jiangxi) ដែលសុទ្ធសឹងតែជាប់ដងទន្លេយ៉ាងសេ ស្ថិតនៅភាគកណ្តាល និងខាងកើតប្រទេសចិន។ បន្ថែមពីនេះច្រាំងទន្លេយ៉ាងសេ នៅចំណុចមួយចំនួនក៏នឹងអាចបាក់ផងដែរ។គួរបញ្ជាក់ថា គិតត្រឹមថ្ងៃសុក្រនេះតែម្តង គ្រោះមហន្តរាយទឹកជំនន់នៅចិន បានបង្កឲ្យមនុស្សស្លាប់ និងបាត់ខ្លួនកើនដល់ ១៤០នាក់ហើយ ខណៈទូរទស្សន៍រដ្ឋចិន CCTV បានចេញផ្សាយថា ការខាតបង់សេដ្ឋកិច្ច នៅក្នុងគ្រោះធម្មជាតិលើនេះ អាចស្ថិតនៅក្នុងរង្វង់ ៨.៦ពាន់លានដុល្លារអាមេរិក។ ក្រៅពីប្រទេសចិន ជប៉ុនក៏កំពុងទទួលរងគ្រោះធម្មជាតិធ្ងន់ធ្ងរដូចគ្នាដែរ ខណៈកូរ៉េខាងត្បូងដែលនៅជិតៗគ្នា ក៏កំពុងរងគ្រោះទឹកជំនន់ ប៉ុន្តែមិនទាន់ធ្ងន់ធ្ងរដូចចិន និងជប៉ុនឡើយ៕

សហរដ្ឋអាមេរិក រកឃើញអ្នកឆ្លង COVID-19 រហូតដល់ជាង​ ៦៥,០០០នាក់ក្នុង ១ថ្ងៃ

ថ្ងៃទី ១០ ខែ កក្តដា ឆ្នាំ ២០២០ ម៉ោង ១២:៥៩

(វ៉ាស៊ីនតោន)៖ នៅក្នុងរបាយការណ៍ស្តីអំពី COVID-19 ប្រចាំថ្ងៃព្រសហ្បតិ៍សប្តាហ៍នេះ (ម៉ោងនៅវ៉ាស៊ីនតោន) បានបង្ហាញថា ក្នុងរយៈពេលតែ ១ថ្ងៃប៉ុណ្ណោះ សហរដ្ឋអមេរិកបានកត់ត្រាករណីអ្នកឆ្លងថ្មីៗ រហូតទៅដល់ ៦៥,៥៥១ករណី ដែលជាអត្រាអ្នកឆ្លងប្រចាំថ្ងៃខ្ពស់បំផុត ពុំធ្លាប់មានពីមុនមកឡើយ បើគិតចាប់តាំងពីមានការផ្ទុះ និងរីករាលដាលជំងឺសកលមួយនេះ។ នេះបើតាមទិន្ធន័យរបស់សាកលវិទ្យាល័យ ចន ហប់ឃីនស៍ (Johns Hopkins) ដកស្រង់ដោយសារព័ត៌មាន CNA នាព្រឹកថ្ងៃសុក្រ ទី១០ ខែកក្កដា ឆ្នាំ២០២០។ការបំបែកកំណត់ត្រានេះ ត្រូវបានរកឃើញតែមួយថ្ងៃប៉ុណ្ណោះ បន្ទាប់ពីប្រទេសមហាអំណាចមួយនេះ ទើបតែបានបំបែកកំណត់ត្រាដូចគ្នានេះ កាលពីម្សិលមិញ។ ការផ្ទុះឡើងវិញនៃអត្រាអ្នកឆ្លងថ្មីនៅសហរដ្ឋអាមេរិក ដែលគេហៅថា «រលកទី២» នៅពេលនេះត្រូវបានគេមើលឃើញថា បណ្តាលមកពីការបើកទ្វាររដ្ឋនានាឡើងវិញលឿនពេក និងជាពិសេសនោះគឺបាតុកម្មផ្ទុះស្ទើរទូទាំងប្រទេស ចាប់តាំងពីចុងខែឧសភា។គួរបញ្ជាក់ថា គិតតាមតួលេខចុងក្រោយ សហរដ្ឋអាមេរិកមានករណីឆ្លង COVID-19 សរុបជាង ៣.២លានករណី ក្នុងនោះស្លាប់ជាង ១៣.៥ម៉ឺននាក់ និងជាសះស្បើយឡើងវិញជិត ១.៤លាននាក់៕

អភិបាលទីក្រុងសេអ៊ូល បាត់បង់ជីវិតដោយការធ្វើអត្តឃាតនៅលើភ្នំមួយក្បែរផ្ទះ​​របស់លោក

ថ្ងៃទី ១០ ខែ កក្តដា ឆ្នាំ ២០២០ ម៉ោង ០៩:៤៧

(សេអ៊ូល)៖ នៅទីបំផុតប៉ូលិសទីក្រុងសេអ៊ូលបានបញ្ជាក់ហើយថា លោកអភិបាល ផាក វ៉ុនស៊ូន (Park Won-soon) ពិតជាបានទទួលមរណភាពមែន ក្រោយពីកូនស្រីរបស់លោកបានរាយការណ៍ពីការបាត់ខ្លួន និងផ្ទុះការសង្ស័យថា លោកបានទៅធ្វើអត្តឃាត កាលពីថ្ងៃព្រហស្បតិ៍ម្សិលមិញ។ នេះបើតាមការចេញផ្សាយ ដោយទីភ្នាក់ងារព័ត៌មានយ៉ុនហាប់ នាព្រឹកថ្ងៃសុក្រ ទី១០ ខែកក្កដា ឆ្នាំ២០២០។ប៉ូលិសមួយរូបបានរកឃើញសាកសពរបស់លោកអភិបាលក្រុងសេអ៊ូល Park Won-soon នៅលើភ្នំមួយឈ្មោះប៊ូកាក់ (Bukak) ដែលស្ថិតនៅក្បែរៗលំនៅឋានរបស់លោកតែម្តង នៅវេលាម៉ោង ១២៖០១នាទីរំលងអធ្រាត្រឈានចូលថ្ងៃសុក្រនេះ។ សមត្ថកិច្ចបានសន្មត់ថា លោក Park Won-soon ទំនងជាបានធ្វើអត្តឃាត។ ប៉ុន្តែទោះជាយ៉ាងណា ការស៊ើបអង្កេតកំពុងបន្តធ្វើឡើង ដើម្បីស្វែងរកឬសគល់នៃរឿងនេះ។លោក Park Won-soon អាយុ ៦៤ឆ្នាំ បានរងការចោទប្រកាន់ និងស៊ើបអង្កេត ពាក់ព័ន្ធនឹងទង្វើបៀតបៀនផ្លូវភេទ ទៅលើស្ត្រីម្នាក់ដែលជាអតីតមន្ត្រីក្រោមឱវាទរបស់លោក។ ស្ត្រីម្នាក់នោះបានបញ្ជូនពាក្យបណ្តឹងមួយទៅប៉ូលិស ដើម្បីរៀបរាប់អំពីទង្វើមិនគួរគប្បី និងសារប្លែកៗរបស់លោក Park Won-soon ទៅកាន់រូបនាង។គួរបញ្ជាក់ថា កាលពីថ្ងៃល្ងាចថ្ងៃព្រហស្បតិ៍ម្សិលមិញនេះ កូនស្រីរបស់លោក Park Won-soon បានទៅប្តឹងប៉ូលិស អំពីការបាត់ខ្លួនរបស់លោក Park ក្រោយពីឪពុកខ្លួនបានបាត់ចេញពីផ្ទះរយៈពេលពី ៤ ទៅ ៥ម៉ោង។ កូនស្រីរបស់លោក ផាក បានបញ្ជាក់ថា ឪពុកនាងបានចាកចេញពីផ្ទះ នៅវេលាម៉ោង ១០៖៤៤នាព្រឹក និងបាត់ដំណឹងឈឹងមិនត្រឡប់វិញឡើយ៕