trollkhmer news

សង្គមនិងជីវិត

ក្រសួងសុខាភិបាល រកឃើញអ្នកឆ្លងកូវីដ១៩ ថ្មីម្នាក់ទៀតដែលធ្វើដំណើរមកពីប្រទេសអារ៉ាប់ប៊ីសាអូឌី

ថ្ងៃទី ១៦ ខែ កក្តដា ឆ្នាំ ២០២០ ម៉ោង ០៩:២៣

(ភ្នំពេញ)៖ ក្រសួងសុខាភិបាល នៅព្រឹកថ្ងៃទី១៦ ខែកក្កដា ឆ្នាំ២០២០នេះ បានចេញសេចក្តីប្រកាសព័ត៌មាន ស្តីពីការរកឃើញករណីវិជ្ជមានវីរុសកូវីដ-១៩ ថ្មី ចំនួន០១នាក់ទៀត លើបងប្អូនខ្មែរដែលធ្វើដំណើរត្រឡប់មកពីប្រទេសអារ៉ាប់ប៊ីសាអូឌី កាលពីថ្ងៃទី១០ ខែកក្កដា ឆ្នាំ២០២០កន្លងទៅ។ក្រសួងសុខាភិបាលបានឲ្យដឹងថា អ្នកជំងឺកូវីដ១៩ ដែលទើបរកឃើញនេះ ជាបុរសជានជាតិខ្មែរអាយុ ២៥ឆ្នាំ មានអាស័យដ្ឋាន នៅសង្កាត់ច្រាំងចំរះខណ្ឌឫស្សីកែវ រាជធានីភ្នំពេញ។ បុរសនេះ ជាអ្នកធ្វើដំណើរតាមជើងហោះហើរមកពីប្រទេសអារ៉ាប់ប៊ីសាអូឌី និងបានបន្តជើងហោះហើរពីប្រទេសម៉ាឡេស៊ី មកដល់កម្ពុជានៅថ្ងៃទី១០ ខែកក្កដា ឆ្នាំ២០២០ វេលាម៉ោង១៧៖២៥នាទីល្ងាច។ វត្ថុសំណាកលើកទីបីរបស់ពួកគាត់ ដែលបានធ្វើវិភាគដោយវិទ្យាស្ថានប៉ាស្ទ័រកម្ពុជា ទទួលបានលទ្ធផល វិជ្ជមានវីរុសកូវីដ-១៩ នៅយប់ថ្ងៃទី១៥ ខែកក្កដា ឆ្នាំ២០២០ ហើយ បច្ចុប្បន្នអ្នកជំងឺខាងលើនេះ ត្រូវបានដាក់ឱ្យសម្រាកព្យាបាល នៅមណ្ឌលសុខភាពចាក់អង្រែ រាជធានីភ្នំពេញ។ក្រសួងសុខាភិបាលបានបញ្ជាក់ទៀតថា ចំពោះអ្នកដំណើរចំនួន៦៩នាក់ ដែលធ្វើដំណើរតាមជើងហោះហើរជាមួយអ្នកវិជ្ជមានកូវីដ-១៩ កំពុងត្រូវបានបន្តធ្វើចត្តាឡីស័កចំនួន១៤ថ្ងៃ នៅមណ្ឌលចត្តាឡីស័កជំពូរវ័ន្ត ក្នុងរាជធានីភ្នំពេញ។សូមជម្រាបថា គិតត្រឹមម៉ោង០៧៖០០ព្រឹក ថ្ងៃទី១៦ ខែកក្កដា ឆ្នាំ២០២០ នៅកម្ពុជាបានរកឃើញអ្នកជំងឺកូវីដ១៩ សរុបចំនួន១៦៦នាក់ (ស្ត្រី ៤០នាក់ និងបុរស ១២៦នាក់) ចំនួនអ្នកព្យាបាលជាសះស្បើយ សរុបទូទាំងប្រទេសមានចំនួន ១៣៣នាក់ (ស្រី ៣៩នាក់ និងបុរស ៩៤នាក់) អ្នកសម្រាកព្យាបាលនៅក្នុងមន្ទីរពេទ្យរដ្ឋ មានចំនួន៣៣នាក់៕

EDC ជូនដំណឹងពីការរអាក់រអួលផ្គត់ផ្គង់ចរន្ត នៅតំបន់មួយចំនួនពីថ្ងៃទី១៦-១៩ ខែកក្កដា ដើម្បីអនុវត្តការងារជួសជុលដំឡើងបរិក្ខារ

ថ្ងៃទី ១៦ ខែ កក្តដា ឆ្នាំ ២០២០ ម៉ោង ០៨:៤៨

(ភ្នំពេញ)៖ អគ្គិសនីកម្ពុជា (EDC) បានចេញសេចក្តីជូនដំណឹង ស្តីពីការអនុវត្តការងារជួសជុល ផ្លាស់ប្តូរ តម្លើងបរិក្ខារនានា និងរុះរើគន្លងខ្សែបណ្តាញអគ្គិសនី របស់អគ្គិសនីកម្ពុជា ដើម្បីបង្កលក្ខណៈងាយស្រួលដល់ការដ្ឋានពង្រីកផ្លូវ រយៈពេល៤ថ្ងៃ ចាប់ពីថ្ងៃទី១៦ ដល់ថ្ងៃទី១៩ ខែកក្កដា ឆ្នាំ២០២០ នៅតំបន់មួយចំនួនទៅតាមពេលវេលា និងទីកន្លែង នៅរាជធានីភ្នំពេញ និងខេត្តកណ្ដាល។ទោះជាមានការខិតខំថែរក្សា មិនឲ្យមានការប៉ះពាល់ដល់ការផ្គត់ផ្គង់អគ្គិសនីធំដុំ ប៉ុន្តែការផ្គត់ផ្គង់ចរន្តអគ្គិសនី នៅតំបន់មួយចំនួន អាចនឹងមានការរអាក់រអួលខ្លះៗ ជៀសមិនផុតដែលអគ្គិសនីកម្ពុជា ស្នើសុំអភ័យទោសទុកជាមុន៕

ប្រទេសរុស្ស៊ី រាយការណ៍ពីការឆ្លងកូរ៉ូណាវីរុសករណីថ្មីចំនួន ៦.៤២២ ករណីបន្ថែមទៀត

ថ្ងៃទី ១៥ ខែ កក្តដា ឆ្នាំ ២០២០ ម៉ោង ១៦:០០

ប្រទេសរុស្សុី បានរាយការណ៍ពីការឆ្លងកូរ៉ូណាវីរុសករណីថ្មីចំនួន ៦.៤២២  ករណីបន្ថែមទៀតដែលនាំឲ្យចំនួននៃការឆ្លងសរុបកើនដល់ ៧៤៦.៣៦៩ ដែលជាចំនួនខ្ពស់បំផុតទី ៤ នៅលើពិភពលោក។មន្ត្រីនិយាយថាមនុស្សសរុបចំនួន ១៥៦ នាក់បានស្លាប់ដោយវីរុសនេះក្នុងរយៈពេល ២៤ ម៉ោងកន្លងមកនេះដែលនាំឱ្យចំនួនអ្នកស្លាប់កើនឡើងដល់ ១១.៧៧០ នាក់៕

ក្រសួងសុខាភិបាល៖ ស្ថានភាពជំងឺគ្រុនឈាមនៅកម្ពុជា ៦ខែកន្លងមកនេះមានការថយចុះ ៨៨%

ថ្ងៃទី ១៥ ខែ កក្តដា ឆ្នាំ ២០២០ ម៉ោង ១៣:៤៧

(ភ្នំពេញ)៖ ក្រសួងសុខាភិបាល បានប្រកាសថា នៅរយៈពេល៦ខែ ឆ្នាំ២០២០ ពោលគឺចាប់ពីខែមករា ដល់ខែមិថុនាកន្លងមកនេះ ស្ថានភាពជំងឺគ្រុនឈាមនៅកម្ពុជា បានថយចុះប្រមាណ៨៨% បើធៀបនឹងរយៈពេលដូចគ្នា កាលពីឆ្នាំមុន។សេចក្តីប្រកាសរបស់ក្រសួងសុខាភិបាល បានឲ្យដឹងថា ស្ថានភាពជំងឺគ្រុនឈាមនៅទូទាំងប្រទេស៖ ជំងឺគ្រុនឈាមក្នុងរយៈពេលពីខែមករា - មិថុនា ក្នុងឆ្នាំ ២០២០ មានចំនួនសរុប ៣.៣៣៩ករណី និងស្លាប់ចំនួន៤ករណី (អត្រាស្លាប់ ០,០៣%)។ ក្នុងអំឡុងប្រាំមួយខែដើមឆ្នាំ២០២០នេះ គឺករណីជំងឺគ្រុនឈាមបានថយចុះប្រមាណជា ៨៨% បើប្រៀបធៀបជាមួយឆ្នាំ ២០១៩ ក្នុងរយៈពេលដូចគ្នាដែលមាន ២៨.២៨៥ករណី និងស្លាប់ ៣២នាក់។គួរបញ្ជាក់ផងដែរថា ករណីជំងឺគ្រុនឈាមបាន ថយចុះនៅទូទាំងប្រទេសនាដើមឆ្នាំ២០២០ តែករណីមានរាយប៉ាយដុំៗតាមភូមិសាស្ត្រប្រជុំជនមួយចំនួន ពិសេសនៅរាជធានីភ្នំពេញ ខេត្តព្រះសីហនុ ប៉ៃលិន សៀមរាប កណ្ដាល កំពង់ធំ តាកែវ មណ្ឌលគិរី រតនគិរី និងខេត្តព្រះវិហារ៕

ថៃ អនុញ្ញាតឲ្យអាជីវករខ្មែរបើករថយន្តចូល៥០គ្រឿង ដើម្បីដឹកទំនិញចេញ

ថ្ងៃទី ១៥ ខែ កក្តដា ឆ្នាំ ២០២០ ម៉ោង ១២:៥៨

(បន្ទាយមានជ័យ)៖ លោក ង៉ោ ម៉េងជ្រួន អភិបាលរងខេត្តបន្ទាយមានជ័យ បានប្រាប់អង្គភាព Fresh News ថា ដោយមានការព្រមព្រៀងគ្នា ភាគីថៃបានអនុញ្ញាតឲ្យអាជីវករខ្មែរបើករថយន្តចូល ទៅដឹកទំនិញចំនួន៥០គ្រឿង ចាប់ពីថ្ងៃទី១៥ ខែកកដ្កា ឆ្នាំ២០២០ ហើយក្នុងរថយន្ត១គ្រឿង មានមនុស្សតែ២នាក់ ក្នុងនោះមានអ្នកបើក និងព្រូ។លោក ង៉ោ ម៉េងជ្រូន បានបញ្ជាក់ថា អ្នកបើកបររថយន្ត និងអ្នករួមដំណើរសូមអនុវត្តតាមច្បាប់ឆ្លងដែន ពោលត្រូវបង្ហាញឯកសារចេញ និងចូលប្រទេសរហូតទាល់តែបានធ្វើលិខិតបញ្ជាក់ពីទំនិញ និងបញ្ជាក់ពីកន្លែងចំណត និងទីតាំងបញ្ជូនទំនិញឲ្យបានជាក់លាក់។លោកបានបញ្ជាក់ឲ្យដឹងទៀតថា ចំពោះអ្នកធ្វើដំណើរចូលមកដឹកទំនិញ ត្រូវមានអ្នកបើកម្នាក់ និងអ្នករួមដំណើរម្នាក់ ហើយត្រូវអនុវត្តតាមការណែនាំរបស់ក្រសួងសុខាភិបាល រួមមាន៖ ត្រូវពាក់ម៉ាសឲ្យបានជាច្រចាំ, វាស់កំដៅសិនទើបអនុញ្ញាតឲ្យធ្វើដំណើរឆ្លងកាត់, រាយនាមអ្នកបើកយានយន្ត លិខិតបញ្ជាក់ពីការបញ្ជូនទំនិញ ឯកសារឆ្លងដែនមានលិខិតឆ្លងដែនបណ្ណព្រំដែន និងបណ្ណឆ្លងដែនបណ្ណោះអាសន្ន។លោកបានបញ្ជាក់ថា រថយន្តទាំង៥០គ្រឿងនោះ ត្រូវគោរពតាមពេលវេលាដែលត្រូវឆ្លងកាត់ ចាប់ពីម៉ោង ៨ព្រឹក ហើយធ្វើដំណើរត្រឡប់មកវិញនៅវេលាម៉ោង១ថ្ងៃត្រង់ ក្នុងមួយថ្ងៃជាកំហិត យាន្តយន្តចេញចូលមិនលើសពី៥០គ្រឿងជាដាច់ខាត។បើតាមលោក ង៉ោ ម៉េងជ្រួន ចំពោះប្រជាជនកម្ពុជាដែលចូលមកដឹកទំនិញក្នុងមួយថ្ងៃៗ សូមចូលតាមផ្លូវដែលបានកំណត់ជូន និងអនុញ្ញាតឲ្យស្ថិតក្នុងបរិវារវេនរបស់ខ្លួនប៉ុណ្ណោះ ព្រមទាំងមានការកំណត់ពេលវេលាជាក់លាក់ សម្រាប់ដឹកជញ្ជូនទំនិញឲ្យទាន់តាមពេលវេលាកំណត់។លោកថា ចំពោះម្ចាស់តូបទំនិញ មុននឹងធ្វើដំណើរត្រឡប់ទៅវិញសូមពិនិត្យ និងបិទប្រព័ន្ធភ្លើងឲ្យបានត្រឹមត្រូវ មុននឹងចាកចេញខ្លាចមានអគ្គិភ័យឆាបឆេះ ប្រសិនបើមានការល្មើសនឹងច្បាប់ ឬបទបញ្ជាភ្នាក់ងារប្រតិបត្តិមានតួនាទីប្រចាំការ និងធ្វើការបញ្ឈប់សកម្មភាពនេះភ្លាមៗ៕

អ្នកឆ្លង COVID-19 លើពិភពលោកកើនដល់ជាង ១៣.៤លាននាក់ ស្លាប់ជាង ៥៨ម៉ឺននាក់ និងជាសះស្បើយជាង ៧.៨លាននាក់

ថ្ងៃទី ១៥ ខែ កក្តដា ឆ្នាំ ២០២០ ម៉ោង ១០:២៥

(បរទេស)៖ គិតត្រឹមម៉ោង ៧ព្រឹកថ្ងៃពុធ ទី១៥ ខែកក្កដា ឆ្នាំ២០២០នេះ ចំនួនអ្នកឆ្លងជំងឺ COVID-19 នៅទូទាំងពិភពលោក បានកើនឡើងដល់ ១៣,៤៤៥,២៩៩នាក់ហើយ។ ក្នុងនោះអ្នកស្លាប់មានចំនួន ៥៨០,២៣០នាក់ និងជាសះស្បើយឡើងវិញ ៧,៨៣១,២០០នាក់។យោងតាមទិន្នន័យពីគេហទំព័រអន្តរជាតិ Worldometer បានបង្ហាញថា ការរីករាលដាលនៃជំងឺកូវីដ១៩ នៅតែមានសភាពស្រួចស្រាវចំនួនអ្នកឆ្លង និងស្លាប់ថ្មីនៅតែមានចំនួនច្រើន។សហរដ្ឋអាមេរិក នៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ។ សហរដ្ឋអាមេរិក មានអ្នកឆ្លងជំងឺ COVID-19 ចំនួន ៣,៥៤៣,៩១០នាក់ ស្លាប់ចំនួន ១៣៩,១១៩នាក់ និងជាសះស្បើយចំនួន ១,៥៩០,៦៦៣នាក់។ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺកូវីដ១៩ គឺប្រទេសប្រេស៊ីល។ ប្រេស៊ីលមានអ្នកឆ្លង ១,៩៣១,២០៤នាក់ ស្លាប់ចំនួន ៧៤,២៦២នាក់ និងជាសះស្បើយ ១,២១៣,៥១២នាក់។ ប្រទេសឈរនៅចំណាត់ថ្នាក់ទី៣ គឺប្រទេសឥណ្ឌា។ ឥណ្ឌា មានអ្នកឆ្លង ៩៣៧,៤៨៧នាក់ ស្លាប់ ២៤,៣១៥នាក់ និងជាសះស្បើយ ៥៩៣,០៨០នាក់៕

មនុស្ស ១៥នាក់ស្លាប់ និងរាប់សិបនាក់បាត់ខ្លួននៅក្នុងគ្រោះទឹកជំនន់ នៅឥណ្ឌូណេស៊ី

ថ្ងៃទី ១៥ ខែ កក្តដា ឆ្នាំ ២០២០ ម៉ោង ០៨:៥៥

(ហ្សការតា)៖ មនុស្សយ៉ាងហោច១៥នាក់ បានស្លាប់ និងរាប់សិបនាក់ផ្សេងទៀត កំពុងបាត់ខ្លួននៅឡើយ នៅថ្ងៃអង្គារនេះ បន្ទាប់ពីគ្រោះទឹកជំនន់ លាយឡំជាមួយល្បាប់ភក់បានកប់ផ្ទះប្រជាជនរាប់រយខ្នង នៅឯខេត្ត Sulawesi ប្រទេសឥណ្ឌូណេស៊ី។ ប្រតិបត្តិការជួយសង្រ្គោះ និងតាមស្វែងរកអ្នកបាត់ខ្លួនកំពុងបន្តធ្វើឡើង ខណៈកម្រិតទឹកទន្លេចំនួនបី នៅក្នុងតំបន់ North Luwu កើនឡើងរឹតតែខ្លាំង ដោយសារភ្លៀងធ្លាក់ខ្លាំង។ បើតាមអាជ្ញាធរឥណ្ឌូណេស៊ី ប្រជាជន ២,០០០នាក់ ត្រូវបានជម្លៀសទៅកាន់ជំរុំស្នាក់នៅបណ្ដោះអាសន្ន ប៉ុន្តែទឹកជំនន់ និងល្បាប់ភក់ បាននិងកំពុងបង្កឧបសគ្គដល់ការចែកជំនួយសង្រ្គោះបន្ទាន់។គួរជម្រាបថា កាលពីដើមឆ្នាំ២០២០ ភ្លៀងធ្លាក់ខ្លាំង ក៏ធ្លាប់បានបង្កជាគ្រោះទឹកជំនន់ និងរអិលបាក់ដីផងដែរ ដោយបានផ្ដាច់ជីវិតមនុស្សជាង ៧០នាក់ នៅក្នុង និងនៅតំបន់ជុំវិញរដ្ឋធានីហ្សាការតា៕

ចិន រកឃើញអ្នកឆ្លង COVID-19 ថ្មី ៥ ករណី ខណៈទីក្រុងប៉េកាំង គ្មានករណីឆ្លង ៨ ថ្ងៃជាប់ៗគ្នា

ថ្ងៃទី ១៤ ខែ កក្តដា ឆ្នាំ ២០២០ ម៉ោង ១៤:០៤

(ប៉េកាំង)៖ អាជ្ញាធរសុខាភិបាលចិន នៅថ្ងៃអង្គារ ទី១៤ ខែកក្កដា ឆ្នាំ២០២០នេះ បានប្រកាសពីការរកឃើញករណីឆ្លងថ្មីៗ នៃជំងឺ COVID-19 ចំនួន០៥ករណីបន្ថែមទៀត ដែលសុទ្ធសឹងតែជាប្រភេទករណីនាំចូលពីបរទេសទាំងអស់។ នេះបើយោងតាមការចេញផ្សាយដោយសារព័ត៌មាន CNA។បើតាមការបញ្ជាក់របស់គណៈកម្មការជាតិសុខាភិបាលចិន ករណីឆ្លងថ្មីៗទាំងអស់ខាងលើ គឺសុទ្ធតែជាប់ពាក់ព័ន្ធនឹងអ្នកដំណើរចូលមកប្រទេសចិន ខណៈទីក្រុងប៉េកាំង ដែលធ្លាប់រាយការណ៍ពីករណីឆ្លងជាចង្កោមថ្មីនោះ មិនមានករណីឆ្លងថ្មីនោះទេ សម្រាប់របាយការណ៍ថ្ងៃអង្គារនេះ និង៨ថ្ងៃជាប់ៗគ្នា។គិតត្រឹមថ្ងៃអង្គារនេះ ប្រទេសចិនមានករណីឆ្លងសរុប ៨៣,៦០៥ ករណី ដោយក្នុងនោះចំនួនអ្នកស្លាប់នៅរក្សាបានត្រឹម ៤,៦៣៤ នាក់ដដែល ពោលគឺគ្មានអ្នកស្លាប់ ឡើយសូម្បីតែម្នាក់ សម្រាប់រយៈពេលជាច្រើនសប្តាហ៍ចុងក្រោយនេះ៕

ករណីឆ្លង COVID-19 នៅប្រេស៊ីលកើនជិត ២លាននាក់ហើយ

ថ្ងៃទី ១៤ ខែ កក្តដា ឆ្នាំ ២០២០ ម៉ោង ១១:៣៩

ប្រទេសប្រេស៊ីលបានរាយការណ៍ថា ខ្លួនមានករណីឆ្លង COVID-19 សរុបចំនួន ១,៨៨៤,៩៦៧ករណីក្នុងនោះអ្នកជំងឺ ៧២,៨៨៣នាក់បានស្លាប់។ នេះបើតាមការចេញផ្សាយ ដោយទីភ្នាក់ងារព័ត៌មានស៊ីនហួរ នៅព្រឹកថ្ងៃអង្គារ ទី១៤ ខែកក្កដា ឆ្នាំ២០២០។ក្រសួងសុខាភិបាលប្រេស៊ីលបានឱ្យដឹងថា កាលពីថ្ងៃចន្ទសប្តាហ៍នេះ ខ្លួនបានរកឃើញករណីឆ្លងថ្មីចំនួន ២០,២៨៦ករណី និងអ្នកជំងឺ ៧៣៣នាក់ បន្ថែមទៀតបានស្លាប់ ហើយគិតមកទល់ពេលនេះមនុស្សចំនួន ១,១៥៤,៨៣៧ នាក់បានជាសះស្បើយ។គួរបញ្ជាក់ថា សៅប៉ូឡូជារដ្ឋដែលមានចំនួនប្រជាជានប្រហែលជា ៤៥លាននាក់ ច្រើនជាងគេនៅប្រទេសប្រេស៊ីល ហើយក៏រដ្ឋរងផលប៉ះពាល់ខ្លាំងបំផុត ដែលរ៉ាប់រងករណីឆ្លងសរុបចំនួន ៣៧៤,៦០៧ករណី ក្នុងនោះ ១៧,៩០៧នាក់បានស្លាប់ ចំណែកឯទីក្រុងរីយ៉ូ មានករណីឆ្លងសរុបចំនួន ១៣២,០៤៤ករណី ក្នុងនោះ ១១,៤៧៤នាក់បានស្លាប់ និង ទីក្រុង សៀរ៉ា (Ceara) មានករណីឆ្លងសរុបចំនួន ១៣៧,២០៦ករណី ក្នុងនោះ ៦,៩៤៧នាក់បានស្លាប់។ បច្ចុប្បន្ននេះប្រេស៊ីលជាប្រទេសដែលមានករណីឆ្លង និង ចំនួនអ្នកស្លាប់ច្រើនលំដាប់ទី ២ នៅលើពិភពលោកបន្ទាប់ពីសហរដ្ឋអាមេរិក៕