trollkhmer news

កីឡា

ត្រកូល Manchester ចាញ់ទាំងពីរ ក្នុងការប្រកួត EPL សប្ដាហ៍ទី៨ (មានវីដេអូ)

ថ្ងៃទី ០៧ ខែ តុលា ឆ្នាំ ២០១៩ ម៉ោង ១០:០៣

អង់គ្លេស៖ ត្រកូល Manchester ចាញ់ទាំងពីរ ក្នុងការប្រកួត EPL សប្ដាហ៍ទី៨  Manchester United នៅតែមិនទាន់អាចស្រោចស្រង់ទម្រង់លេងក្នុង Premier League រដូវកាលនេះនៅឡើយទេ បន្ទាប់ពីចាញ់ Newcastle United ក្រៅដី ១-០ ស្របពេលដែលក្រុមការពារតំណែងជើងឯក  ManCity បានបរាជ័យ ក្រោមថ្វីជើងក្រុម Wolves ២-០។ការប្រកួតនេះត្បិតតែក្រុមបិសាចក្រហមមានស្ថិតិគ្រប់គ្រងបាល់បានច្រើនជាងមែន តែ Newcastle ទៅវិញទេដែលមានឱកាសទាត់ចំគោលដៅច្រើន ពោលដល់ទៅ៥ដង។ គ្រាប់បាល់របស់ក្រុមសារិកាព្រៃកើតនៅនាទី៧២ ធ្វើបានដោយកីឡាករ Matthew Longstaff ។ ដោយខណៈ ManCity ត្រូវក្រុមភ្ញៀវចចកខ្មៅ Wolves មានឱកាសទាត់ចំគោលដៅ ២ជើង គឺរកគ្រាប់បាល់បាន ២គ្រាប់ដោយកីឡាករ Traore A។ បច្ចុប្បន្ន Man Utd ស្ថិតនៅលេខ១២ក្នុងតារាងពិន្ទុ លើក្រុមដែលស្ថិតនៅតំបន់កាត់ចោល Everton តែ២ពិន្ទុប៉ុណ្ណោះ ស្របពេលដែល ManCity ដាច់ពិន្ទុពីក្រុមលើកំពូលតារាង Liverpool កាន់តែច្រើនឡើង៕ 

Karius គិតថា គាត់នៅតែអាចមានអនាគតនៅហង្សក្រហម Liverpool

ថ្ងៃទី ០៥ ខែ តុលា ឆ្នាំ ២០១៩ ម៉ោង ១១:០៨

បរទេស៖ Loris Karius ជឿជាក់ថា គាត់នៅតែអាចមានអនាគតនៅហង្សក្រហម Liverpool បន្ទាប់ពីកុងត្រាខ្ចីជើងជាមួយក្លិប Besiktas នឹងបញ្ចប់។Karius បានចូលរួមជាមួយក្លិបទួរគីក្នុងកិច្ចសន្យាខ្ចីជើងរយៈពេលពីរឆ្នាំ កាលពីឆ្នាំមុន ដោយបានបង្ហាញខ្លួនចុងក្រោយសម្រាប់ក្រុម Liverpool អំឡុងការបង្កកំហុសនៅក្នុងការបរាជ័យវគ្គផ្តាច់ព្រ័ត្រនៃក្របខ័ណ្ឌ Champions League ឆ្នាំ ២០១៨ ចំពោះក្រុម Real Madrid ។លោក Karius បានប្រាប់កាសែតអង់គ្លេសតាមរយៈកាសែត The Guardian ថា៖ « ខ្ញុំមានជាប់កុងត្រាខ្ចីជើងរហូតដល់ដំណាច់នៃរដូវកាលនេះ ហើយបន្ទាប់មកនឹងឃើញខ្ញុំត្រលប់ទៅ Liverpool ឬកន្លែងផ្សេងទៀតនៅក្នុងប្រទេសអង់គ្លេស ឬក្នុងប្រទេសអាឡឺម៉ង់។ អ្នកមិនដឹងនោះទេ »។ យ៉ាងណាក៏ដោយអ្នកចាំទីរូបនេះមានកុងត្រាជាមួយក្រុមកំពួលតារាង Premier League រហូតដល់ឆ្នាំ ២០២១ ហើយ Karius មានអារម្មណ៍ថាគាត់នៅតែមានអនាគតនៅ Anfield ។

ក្រុមអេស្បាញប្រកាសបញ្ជីក្រុមសម្រាប់ខែនេះ ដែលផ្លាស់ប្ដូរកីឡាករដល់ទៅ ៨រូប

ថ្ងៃទី ០៥ ខែ តុលា ឆ្នាំ ២០១៩ ម៉ោង ១០:២២

អេស៉្បាញ៖ អេស្បាញបានប្រកាសបញ្ជីកីឡាករក្នុងក្រុមរបស់ពួកគេសម្រាប់ការប្រកួតនៅខែនេះជាមួយប្រទេសន័រវេស និងស្វីស ដោយសារ​ការរងរបួស និងទម្រង់លេង បានធ្វើឱ្យមានការផ្លាស់ប្តូរកីឡាករចំនួន ៨ រូបពីក្រុមកាលពីខែមុន។ Santi Cazorla ត្រលប់មកជួយម្ចាស់ជើងឯកអឺរ៉ុបចំនួនពីរដង រួមជាមួយ Raul Albiol ហើយ Juan Bernat ជំនួសខ្សែការពារស្លាបឆ្វេងដែលរងរបួស Jordi Alba ខណៈដែល Gerard Moreno ជំនួសកន្លែងរបស់ខ្សែប្រយុទ្ធ Paco Alcácer របស់ក្រុម Dortmund ។ Sergio Reguilon, Inigo Martínez, Pau Torres និង Luis Alberto គឺជាការបន្ថែមផ្សេងទៀត៕

របួសលើកនេះ David Alaba ត្រូវសម្រាកព្យាបាលយូរជាងមុន

ថ្ងៃទី ០៥ ខែ តុលា ឆ្នាំ ២០១៩ ម៉ោង ០៩:៤៨

 អាល្លឺម៉ង់៖ ការរងរបួសរបស់ David Alaba បានបង្កការឈឺក្បាលដល់ Bayern Munich ក្នុងក្របខ័ណ្ឌ Champions League ដែលត្រូវសម្រាកព្យាបាលរយៈពេលយូរជាងការរំពឹងទុក។កីឡាករសញ្ជាតិអូទ្រីសរូបនេះទើបតែវិលត្រឡប់ពីការរងរបួសសរសៃពួរ ប៉ុន្តែឥឡូវបានរបួសសារជាថ្មី បន្ទាប់ពីប្រជែងយកបាល់ជាមួយ Serge Aurier ក្នុងជ័យជម្នះ ៧-២ លើក្រុម Tottenham ។Bayern បានបញ្ជាក់នៅយប់ថ្ងៃសុក្រថា ការធ្វើតេស្តវេជ្ជសាស្រ្តលើ Alaba បានបង្ហាញថា គាត់បានបាក់ឆ្អឹងជំនី។ ទោះបីជាពួកគេមិនបានកំណត់ពេលវេលានៃការវិលត្រឡប់របស់ខ្សែការពារក៏ដោយ ក៏ក្លិបបានបញ្ជាក់ថាគាត់នឹងអវត្តមានយូរជាងមុន ដោយសារការរងរបួសនេះ។នេះជារឿងឈឺកក្បាលដ៏លំបាកសម្រាប់គ្រូបង្វឹក Niko Kovač ផងដែរ ដោយការចុះកុងត្រាជាមួយ Lucas Hernandez នៅមិនទាន់សម្របខ្លួនជាមួយក្រុមអ្វីដែរនៅពេលនេះ៕

Real គ្រោងបញ្ចេញកីឡាករ២រូប ដើម្បីទុកកន្លែងឱ្យខ្សែបម្រើរបស់ Spurs

ថ្ងៃទី ០៤ ខែ តុលា ឆ្នាំ ២០១៩ ម៉ោង ១៥:០៧

 អេស៉្បាញ៖ ទោះបីជា Real Madrid កំពុងស្ថិតនៅលើកំពូលតារាង LaLiga Santander ក៏ដោយ ក៏ក្រុមមួយនេះកំពុងតែតស៊ូក្នុងក្របខ័ណ្ឌ Champions League ហើយក្លិបគ្រោងនឹងព្យាយាម និងកែបញ្ហាទាំងនេះ ដោយដើរចូលទីផ្សារដោះដូរកីឡាករខែមករាម្ដងទៀត។ក្រុមយក្សអេស៉្បាញមួយនេះទិញកីឡាករច្រើនមក ហើយកាលពីទីផ្សារដោះដូរមុន  ហើយពេលនេះពួកគេនឹងចូលដើរផ្សារម្ដងទៀតដើម្បីទិញខ្សែបម្រើថ្មីមកពង្រឹងក្រុម ដូច្នេះហើយ Real ត្រូវបញ្ចេញកីឡាករយ៉ាងតិចពីរនាក់ពីក្រុមបច្ចុប្បន្ន ដោយ Mariano Diaz និង Brahim Diaz ទាំងពីរទំនងជាត្រូវបើកទ្វាឱ្យទៅលេងក្រុមថ្មីដើម្បីរកជម្រើសដំបូង។ការបើកផ្លូវឱ្យកីឡាករចេញ ពីរ បីនាក់បែបនេះនឹងបង្កើតឱកាសបន្ថែមសម្រាប់ខ្សែបម្រើកណ្តាល Christian Eriksen  និង Pogba  តែទោះយ៉ាងណាកិច្ចព្រមព្រៀងនាំយក ខ្សែបម្រើអន្តរជាតិបារាំងមួយនេះ មើលទៅមិនអាចធ្វើទៅបានទេ ដោយសារការទាមទារខ្ពស់ពីក្រុមបិសាចក្រហម។ដូច្នេះហើយខ្សែបម្រើវ័យ ២៧ឆ្នាំដែលជួយក្រុមមាន់ខ្នាយមាសឈានដល់វគ្គផ្ដាច់ព្រ័ត្រ UCL ជាជម្រើសល្អបំផុតសម្រាប់ Real  ខណៈកុងត្រារបស់កីឡាករនឹងផុតនៅដំណាច់នៃរដូវកាលនេះ៕

ទើបតែលេងបាន ៧ប្រកួតក្នុងលីហ្គ ManUtd កំណត់គោលដៅកីឡាករថ្មី ៤រូបមកពង្រឹងក្រុម

ថ្ងៃទី ០៤ ខែ តុលា ឆ្នាំ ២០១៩ ម៉ោង ១៤:៣៤

អង់គ្លេស៖ ក្រុមបិសាចក្រហម Manchester United នឹងកំណត់គោលដៅកីឡាករថ្មីចំនួន ៤រូប ពេលទីផ្សារដោះដូរកីឡាករ ២រដូវក្រោយ ខណៈដែលក្លិបបន្តរុះរើក្រុមរបស់ខ្លួន។ក្រុមរបស់លោក Ole Gunnar Solskjaer បានស៊ូទ្រាំនឹងការចាប់ផ្តើមដ៏ខកចិត្តចំពោះយុទ្ធនាការថ្មីនេះ ដោយទទួលបានជ័យជម្នះត្រឹមតែ ២ដង ប៉ុណ្ណោះក្នុងការប្រកួតលីហ្គ៧ លើក ហើយផែនការរបស់ពួកគេបានចាប់ផ្តើមរួចរាល់ហើយសម្រាប់ទីផ្សារដោះដូរកីឡាករនៅខែមករានេះ ខណៈដែលក្លិបកំពុងស្វែងរកកីឡាករថ្មី។យោងតាមព័ត៌មានពីកាសែត Manchester Evening News បានឱ្យដឹងថា ក្រុមបិសាចក្រហមចង់បន្ថែមខ្សែការពារស្លាប , ខ្សែបម្រើ និងខ្សែប្រយុទ្ធជួរមុខ ទៅក្នុងបញ្ជីរបស់ពួកគេ មុនពេលចាប់ផ្តើមរដូវកាលក្រោយ។ របាយការណ៍បាននិយាយថា ManUtd កំពុងឃ្លាំមើលខ្សែប្រយុទ្ធស្លាបអន្តរជាតិអង់គ្លេសវ័យក្មេង Jadon Sancho របស់ Borussia Dortmund ដោយជឿជាក់ថា គោលដៅមួយនេះចង់វិលត្រឡប់ទៅកាន់ទីក្រុង Manchester វិញ។ Ben Chilwell របស់ Leicester ត្រូវបានជឿជាក់ថា ជាជម្រើសមួយក្នុងការពង្រឹងតំបន់ការពារស្លាបរួមជាមួយមិត្តរួមក្រុម James Maddison និង Declan Rice របស់ West Ham ក៍ស្ថិតក្នុងចំណោមខ្សែបម្រើដែលត្រូវបានពិចារណា។ Manchester United បានចំណាយប្រាក់ជាង ១៤០ លានផោនក្នុងរដូវក្តៅនេះ ដើម្បីពង្រឹងក្រុមដោយនាំយក  Harry Maguire, Aaron Wan-Bissaka និង Daniel James ប៉ុន្តែពួកគេនៅមិនទាន់បានលទ្ធផលល្អ ៕

លោក Emery ប្រាប់ឱ្យ Ozil ប្រឹងប្រែងហ្វឹកហាត់ ដើម្បីដណ្តើមតំណែងមកវិញ

ថ្ងៃទី ០៤ ខែ តុលា ឆ្នាំ ២០១៩ ម៉ោង ១២:០៥

អង់គ្លេស៖ លោក Unai Emery គ្រូបង្វឹក Arsenal បង្ហើបថា Mesut Ozil ត្រូវប្រឈមនឹងការប្រជែង ដើម្បីដណ្តើមតំណែងនៅក្នុងក្រុមវិញ បន្ទាប់ពីឈ្នះក្រុម Standard Liege ក្នុងពានរង្វាន់ Europa League ។កីឡាករ Ozil មិនបានស្ថិតក្នុងបញ្ជីក្រុមនោះទេ ខណៈដែលក្រុមកាំភ្លើងធំបានឈ្នះក្នុងលទ្ធផល ៤-០ នៅឯកីឡដ្ឋាន Emirates។ កីឡាករវ័យ ៣០ឆ្នាំរូបនេះលេងបានតែ ២ដងប៉ុណ្ណោះក្នុងរដូវកាលនេះ នៅក្នុងការប្រកួតក្នុងលទ្ធផលស្មើ ២-២ នៅ Premier League នៅ Watford និងការប្រកួតយកឈ្នះក្លិប  Nottingham Forest ៥-០ នៃពានរង្វាន់ EFL Cup។នៅពេលត្រូវបានគេសួរថា ហេតុអ្វីបានជា Ozil មិនបានលេងក្នុងការប្រកួតជាមួយ Standard លោកបានប្រាប់សន្និសីទសារព័ត៌មានមួយថា៖ « ខ្ញុំកំពុងគិតគ្រប់ពេលដើម្បីសម្រេចចិត្តជ្រើសរើសកីឡាករឆ្នើមៗសម្រាប់ការប្រកួតនីមួយៗ ហើយកីឡាករឆ្នើមនៅក្នុងក្រុមត្រូវលេង និងជួយយើង។ ប្រសិនបើខ្ញុំសម្រេចថា មិនដាក់គាត់ឱ្យចូលលេងទេ ព្រោះខ្ញុំគិតថា កីឡាករម្នាក់ទៀតសមនឹងចូលលេង»។លោក Emery បានប្រាប់ឱ្យកីឡាករខិតខំប្រឹងប្រែងហ្វឹកហាត់ ដើម្បីឈ្នះកន្លែងសម្រាប់ការប្រកួតលីហ្គក្នុងដីនៅថ្ងៃអាទិត្យទល់នឹងក្លិប Bournemouth ៕

កីឡាករ Suarez ដកខ្លួនចេញពីការប្រកួតមិត្តភាពរបស់ក្រុមជម្រើសជាតិអ៊ុយរូហ្គាយ

ថ្ងៃទី ០៤ ខែ តុលា ឆ្នាំ ២០១៩ ម៉ោង ១១:២៦

អេស៉្បាញ៖ Luis Suarez នឹងខកខានការប្រកួតមិត្តភាពរបស់ក្រុមជម្រើសជាតិអ៊ុយរូហ្គាយដែលនឹងត្រូវប៉ះជាមួយប្រទេសប៉េរូ ជំនួសវិញដោយស្នាក់នៅក្នុងទីក្រុងបាសេឡូណាដើម្បីទទួលការព្យាបាល។កីឡាករវ័យ ៣២ ឆ្នាំរូបនេះមានឈ្មោះក្នុងបញ្ជីជម្រើសដំបូង ប៉ុន្តែនឹងខកខានការប្រកួតទាំងពីរនៅចុងខែនេះ ហើយក្លិបបាសេឡូណា និងក្រុមជម្រើសជាតិអ៊ុយរូហ្គាយបានប្រកាសនៅថ្ងៃព្រហស្បតិ៍នេះថា ខ្សែប្រយុទ្ធរូបនេះនឹងនៅតែស្ថិតក្នុងប្រទេសអេស្ប៉ាញជំនួសឱ្យការធ្វើដំណើរទៅប្រកួតមិត្តភាពនៅក្នុងទីក្រុងម៉ុនវីតវី និងលីម៉ា។សេចក្តីថ្លែងការណ៍របស់ក្រុមបាសេឡូណាបានសរសេរថា៖ « កីឡាករជម្រើសដំបូង Luis Suarez នឹងស្នាក់នៅក្នុងទីក្រុងបាសេឡូណាក្នុងអំឡុងពេលប្រកួតមិត្តភាព ដោយការព្រមព្រៀងគ្នារវាងសេវាកម្មវេជ្ជសាស្រ្តរបស់ក្លិប និងក្រុមរបស់អ៊ុយរូហ្គាយដែលជាផ្នែកនៃផែនការការងារផ្ទាល់ខ្លួនរបស់កីឡាករ ។Suarez រកបាន ៥ គ្រាប់ក្នុង ៧ ប្រកួតដើម្បីចាប់ផ្តើមរដូវកាលសម្រាប់ក្រុម Barcelona រួមទាំងការរកគ្រាប់បាល់បញ្ចូលទីក្នុងជ័យជម្នះ ២-១ នៅ Champions League កាលពីថ្ងៃពុធលើក្រុម Inter៕

មានរឿងអ៊ីចេះ! បានជា Aubameyang បង្ហោះ Twitter ថា​ឱ្យនាយកប្រតិបត្តិ Dortmund ជាតួកំប្លែង

ថ្ងៃទី ០៤ ខែ តុលា ឆ្នាំ ២០១៩ ម៉ោង ១០:៥៧

អង់គ្លេស៖ កីឡាករ Pierre-Emerick Aubameyang របស់ Arsenal បានបង្ហោះ Twitter ដើម្បីតបតទៅលោក Hans-Joachim Watzke ដែលជានាយកប្រតិបត្តិរបស់ក្លិបDortmund បានអះអាងថា ខ្សែប្រយុទ្ធហ្គាបុងរូបនេះ ចាកចេញពី Borussia Dortmund ព្រោះតែលុយ។ការអះអាងនេះ បានធ្វើឡើងនៅក្នុងបទសម្ភាសន៍សម្រាប់កាសែតអាឡឺម៉ង់ថា៖ « Pierre-Emerick Aubameyang ដែលលេងបានល្អនៅ Arsenal ប្រហែលជានឹងមានអារម្មណ៍កក់ក្តៅនៅពេលដែលគាត់ក្រឡេកមើលគណនីធនាគាររបស់គាត់ ប៉ុន្តែគាត់នឹងសោកសៅនៅពេលដែលត្រូវមើលការប្រកួត Champions League នៅលើកញ្ចក់ទូរទស្សន៍"។មិនយូរប៉ុន្មានផង Aubameyang ក៍បានឆ្លើយតបភ្លាមៗតាម Twitter ថា៖ « ប្រសើរជាងលោកដែរ ខ្ញុំមិនដែលនិយាយពីមូលហេតុដែលចាកចេញពី Dortmund នោះទេ លោក Watzke ។ អ្នកគឺជាមនុស្សត្លុកកំប្លែង ។ ខ្ញុំចាំបានថា នៅពេលដែលអ្នកនិយាយថា យើងមិនលក់ Ousmane [Dembele] បន្ទាប់មកអ្នកបានឃើញលុយជាង ១០០ លានផោន អ្នកគឺជាមនុស្សដំបូងគេដែលឃើញតែលុយនោះ។ សូមកុំនិយាយរឿងលុយ!!! ទុកឱ្យខ្ញុំបានសុខផង» ។ បញ្ជាក់ផងដែរថា ខ្សែប្រយុទ្ធវ័យ ៣០ ឆ្នាំរូបនេះបានផ្លាស់ទៅលេងនៅ Arsenal ពីក្លិបអាឡឺម៉ង់ក្នុងតម្លៃ ៥៦ លានផោនកាលពីខែមករាឆ្នាំ ២០១៨ កន្លងទៅ៕