trollkhmer news

កីឡា

ក្រុមបាល់ទាត់ Brentford និងក្រុមការពារតំណែងជើងឯក Man City កក់កៅអីវគ្គ ៤ក្រុមនៃ League Cup ក្រោយយកឈ្នះគូប្រជែងរៀងៗខ្លួនរួចមក

ថ្ងៃទី ២៣ ខែ ធ្នូ ឆ្នាំ ២០២០ ម៉ោង ១០:៥៣

(ក្រុងឡុងដ៍)៖ ក្រុមបាល់ទាត់ Brentford និងក្រុមការពារតំណែងជើងឯក Manchester City បានដឹកដៃគ្នាដើម្បីឡើងទៅវគ្គពាក់កណ្តាលផ្តាច់ព្រ័ត្រនៃពានរង្វាន់លំដាប់ទី៣ អង់គ្លេស League Cup (Carabao Cup) ក្រោយពេលយកឈ្នះគូប្រជែង Newcastle United និង Arsenal រួចមក។ក្រុមមកពីក្របខណ្ឌទី២ អង់គ្លេស Championship, Brentford បានទម្លាក់ក្រុមដែលកំពុងលេងនៅ Premier League, Newcastle United ក្នុងលទ្ធផល ១-០ នៃការប្រកួតវគ្គ ៨ក្រុមចុងក្រោយនៅ League Cup រដូវកាលនេះ បញ្ចប់ការទន្ទឹងរង់ចាំអស់រយៈពេល ១៣១ឆ្នាំ ដើម្បីឡើងទៅវគ្គ Semi final ក្នុងពានលំដាប់ទី៣ នេះ។កីឡាករ Josh Dasilva ជាអ្នករកបានគ្រាប់ជ័យជម្នះនៅនាទី៦៦ ដែលជាគ្រាប់ទី២ របស់គេផងនៅ League Cup នេះ ក្រោយពេលរកបាន ១គ្រាប់ក្នុងជ័យជម្នះ ២-០ របស់ Brentford ទៅលើ Southampton កាលពីក្នុងវគ្គ ១៦ក្រុមទៀតផង។ដូចគ្នានោះដែរ Manchester City ដែលជាក្រុមការពារតំណែងជើងឯកផងនោះ ក៏បានទម្លាក់ក្រុមកាំភ្លើងធំ Arsenal ចេញពី League Cup ផងដែរ តាមរយៈយកឈ្នះ ៤-១ នៅទឹកដី Emirates ពីការធ្វើបានគ្រាប់បាល់បើកឆាកតាំងពីនាទីទី៣ មកម្ល៉េះរបស់ខ្សែប្រយុទ្ធ Gabriel Jesus ពីការបញ្ជូនរបស់ Zinchenko។ Jesus បានខកខានរកគ្រាប់បាល់ឲ្យក្រុមរបស់លោក Pep Guardiola យូរមកហើយ គិតចាប់តាំងពីក្រុមមេឃខៀវប៉ះ Liverpool នាថ្ងៃទី០៨ ខែវិច្ឆិកា ឆ្នាំ២០២០។មិត្តរួមក្រុម Riyad Mahrez, Phil Foden និង Laporte ក៏ចូលរួមរកបានម្នាក់ ១គ្រាប់បន្តបន្ទាប់ផងដែរនៅនាទី៥៤ នាទី៥៩ និងនាទី៧៣ នៅពេលដែលខ្សែប្រយុទ្ធអន្តរជាតិបារាំង Lacazette រកបានតែ ១គ្រាប់ឲ្យក្រុមរបស់លោក Mikel Arteta ដែលកំពុងតែដុនដាបផងដែរក្នុងលីគកំពូល Premier League រដូវកាលនេះ៕

Lucas Digne កីឡាករជួរមុខរបស់ក្លិបបាល់ទាត់ Everton រូបនេះស្ថិតក្នុងបញ្ជីគោលដៅធំរបស់ Man City នៅទីផ្សារដោះដូរខែមករាខាងមុខនេះ

ថ្ងៃទី ២៣ ខែ ធ្នូ ឆ្នាំ ២០២០ ម៉ោង ១០:១៤

បរទេស៖ បើយោងតាមគេហទំព័រ Dailymail បានឲ្យដឹងថាលោកគ្រូបង្វឹក Pep Guardiola កំពុងតែចាប់អារម្មណ៍ចង់បានខ្សែការពារ Lucas Digne ពីក្លិប Everton មករួមជាមួយ Manchester City នៅទីផ្សារដោះដូរខែមករាខាងមុខនេះ។គួរបញ្ជាក់ដែរថាលោក Pep Guardiola ចង់បាន Digne មកជួយពង្រឹងជើងក្រោមខាងឆ្វេងរបស់ Man City ខណៈដែលកីឡាករ Benjamin Mendy និង Oleksandr Zinchenko តែងតែជួបបញ្ហារបួសជាញឹកញាប់។ មែនទែនទៅតារាសញ្ជាតិបារាំងវ័យ២៧ឆ្នាំរូបនេះនៅសល់កុងត្រាជាមួយ​ Everton រហូតដល់ឆ្នាំ២០២៣ឯណោះ។ ហើយប្រសិនបើក្លិបលោក Carlo Ancelotti មួយនេះសម្រេចចិត្តឲ្យរូបគេចាកចេញនៅខែមករាខាងមុខមែននោះ Man City នឹងត្រូវចំណាយប្រមាណ៣៣លានអឺរ៉ូ (ឬ៤០លានដុល្លារ) ដើម្បីយករូបគេទៅលេងនៅទឹកដី Etihad ៕

Real Madrid បានប្រកាសឱ្យ Iker Casillas ចូលរួមជាមួយមូលនិធិ នឹងក្នុងនាមជាជំនួយការអគ្គនាយកក្នុងក្លិប Real Madrid

ថ្ងៃទី ២៣ ខែ ធ្នូ ឆ្នាំ ២០២០ ម៉ោង ០៩:៥២

អេស្បា៉ញ៖ Real Madrid ប្រកាសថា Iker Casillas ចូលរួមជាមួយមូលនិធិ Real Madrid ក្នុងនាមជាជំនួយការអគ្គនាយក។ Iker Casillas គឺជាកីឡាករជើងខ្លាំងរបស់ Real Madrid គាត់តំណាងឱ្យគុណតម្លៃនៃក្លិបរបស់យើងនិងជាអ្នកចាំទីល្អបំផុតក្នុងប្រវត្តិសាស្ត្ររបស់ក្លិបបាល់ទាត់ Real Madrid ។Iker Casillas បានឈ្នះពានរង្វាន់ចំនួន១៩ ក្នុងកំឡុងពេល ២៥ឆ្នាំដែលគាត់បានការពារអាវលេខ១ របស់ក្លិបរួមមាន ពាន European Cups ៣លើក , Club World Cups ៣លើក , European Super Cups ២លើក , ពានលីគ ៥លើក , ពាន King's Cups ២លើក និង Spanish Super Cups ៤លើក ៣, World Super Cup ២លើក ។ នៅប្រទេសព័រទុយហ្កាល់ជាមួយក្លិប Porto បានឈ្នះពានលីគ ២ដង ១ដងពាន Super Cup ។ ជាមួយក្រុមអេស្បា៉ញលេងបានក្រុមជម្រើសជាតិ ១៦៧ដង និងធ្លាប់ឈ្នះការប្រកួតបាល់ទាត់ពិភពលោក ១ដង ពានរង្វាន់អឺរ៉ុប European Cups ២ ដងនិងបាន U-២០ ១ដង។យ៉ាងណាមិញ សម្រាប់ក្រុម Real Madrid វាពិតជាកិត្តិយសណាស់ដែលបានទទួលកីឡាករដ៏ឆ្នើមម្នាក់របស់ខ្លួនត្រឡប់មកផ្ទះវិញ។ អាជីពជាកីឡារបស់ Iker Casillas ត្រូវបានគេទទួលស្គាល់ជាមួយនឹងពានរង្វាន់ដែលមានកិត្យានុភាពដោយព្រះអង្គម្ចាស់ ពានរង្វាន់អេស្ការីយ៉ាសម្រាប់កីឡាកិត្តិយសមេដាយមាសនៃព្រះរាជពិធីកីឡានិងមេដាយមាសរបស់សហគមន៍ Madrid ៕

ទីបំផុត Lionel Messi បានបំបែកកំណត់ត្រារបស់ Pele បានហើយ ដោយស៊ុតបាល់បញ្ចូលទីច្រើនជាងគេចំនួន ៦៤៤គ្រាប់ នៅក្នុងក្លិបតែមួយ

ថ្ងៃទី ២៣ ខែ ធ្នូ ឆ្នាំ ២០២០ ម៉ោង ០៩:២៩

អេស្ប៉ាញ៖ ក្នុងជំនួបរវាងក្រុមអ្នកមានបុណ្យ Barcelona ជាមួយនឹងក្រុម Real Valladolid កាលពីយប់ថ្ងៃអង្គារ៍ កន្លងទៅនេះកីឡាករខ្សែប្រយុទ្ធឆ្នើម Lionel Messi បានបំបែកកំណត់ត្រាថ្មីរបស់ខ្លួនដោយស៊ុតបាល់បញ្ចូលទីច្រើនជាងគេចំនួន ៦៤៤គ្រាប់ នៅក្នុងក្លិបតែមួយ ហើយបានវ៉ាដាច់គ្រាប់បាល់របស់អតីតវីរបុរសបាល់ទាត់លោក Pele ដែលមានត្រឹម ៦៤៣គ្រាប់ ជាមួយក្រុម Santos របស់ប្រទេសប្រេស៊ីល។សម្រាប់ការប្រកួតកាលពីយប់ថ្ងៃអង្គារ៍ កន្លងទៅនេះកីឡាករសញ្ជាតិអាហ្សង់ទីន Lionel Messi បានស៊ុតបញ្ចូលទីមួយគ្រាប់ ហើយជួយឲ្យក្រុមអ្នកមានបុណ្យ Barcelona យកជ័យជម្នះទៅលើក្រុម Real Valladolid ក្នុងលទ្ធផល ៣-០។ក្រោយបញ្ចប់ការប្រកួតទល់នឹងក្រុម Real Vallaodid កីឡាករ Lionel Messi បានបង្ហោះសារមួយឃ្លាទៅក្នុងប្រព័ន្ធផ្សព្វផ្សាយសង្គមថា “មុនពេលដែលខ្ញុំចូលប្រលូកជាកីឡាករអាជីពបាល់ ខ្ញុំពុំដែលគិតនោះទេថាចង់បំបែកកំណត់ត្រារបស់កីឡាករផ្សេងណាម្នាក់ ប៉ុន្តែខ្ញុំគ្រាន់តែមានក្ដីស្រមៃថានឹងក្លាយជាកីឡាករដែលល្អជាងគេនៅក្នុងពិភពលោកបាល់ទាត់”៕

វីដេអូ! Messi ស៊ុតមួយជើងឆ្វេងយកឈ្នះ Real Valladolid និងបំបែកកំណត់ត្រាមួយដែល Ronaldo គ្មានថ្ងៃធ្វើបាន

ថ្ងៃទី ២៣ ខែ ធ្នូ ឆ្នាំ ២០២០ ម៉ោង ០៩:១៦

អេស្ប៉ាញ៖ កាលពីថ្ងៃអង្គារឈានចូលថ្ងៃពុធ វេលាម៉ោង៤ទាបភ្លឺកន្លងទៅនេះ ក្រុមអ្នកមានបុណ្យ Barcelona បានធ្វើដំណើរទៅកីឡដ្ឋាន Jose Zorrilla ដើម្បីជួបជាមួយក្រុមម្ចាស់ផ្ទះ Valladolid ដែលជាការប្រកួតក្នុងក្របខណ្ឌ La Liga។ ទោះមិនលេងនៅក្នុងទឹកដី Camp Nou ក៏ Barcelona បានយកឈ្នះក្រុមម្ចាស់ផ្ទះ ក្នុងលទ្ធផល ៣ ទល់នឹង ០ ខណៈអ្នកចាំទី Marc Andres Ter Stegen អាចរក្សា Clean Sheet បាន។គ្រាប់បាល់ទី១កើតឡើងនៅនាទីទី២១ ក្រោយខ្សែការពារម្ចាស់អាវលេខ១៥ Clement Lenglet ហក់តែតបញ្ចូលទីដោយមានការបញ្ជូនបាល់មួយជើងពីខ្សែប្រយុទ្ធ Lionel Messi ដែលបាល់នោះត្រូវអ្នកចាំទី Masip ទះចេញដែរតែក្រឡាច់ទើប Barcelona បើកឆាកនាំមុខក្រុមម្ចាស់ផ្ទះបានសម្រេច។មិនយូរប៉ុន្មាន ស្រាប់តែនៅនាទីទី ៣៥ ខ្សែការពារសញ្ជាតិអាមេរិក Sergino Dest អូសបាល់កាត់ខ្សែការពារ Valladolid ពីស្លាបខាងស្តាំហើយបោះវាបញ្ជូនឲ្យ ខ្សែប្រយុទ្ធអាវលេខ៩ Martin Braithwaite ទើបរូបគេដាក់ថែមមួយជើងទៀតចូលទីយ៉ាងស្អាតផុតដៃអ្នកចាំទី ធ្វើឲ្យ Barcelona កាន់តែមានសង្ឃឹមក្នុងការយកឈ្នះ។តង់ទី២បានចាប់ផ្ដើម នៅនាទីទី៦២ ខ្សែការពារ Jordi Alba ប៉ះទង្គិចជាមួយខ្សែបម្រើ Pablo Hervias របស់ Valladolid បណ្ដាលឲ្យគេហូរឈាមត្រង់ចិញ្ចើមទើប Alba ទទួលបានកាតលឿងពីអជ្ញាកណ្ដាល។​ គ្រាប់ទី៣ បិទឆាកការប្រកួតកើតឡើងនៅនាទីទី៦៥ Pedri Gonzalez ដែលជាខ្សែប្រយុទ្ធវ័យក្មេង ប្រើក្បាច់ផាយបាល់ទៅក្រោយពញ្ញាក់កីឡាកររបស់ Valladolid ធ្វើឲ្យបាល់ជាប់ជើង Messi ទើបគេបណ្ដើរបាល់លឿនស្លេវដែលខ្សែការពារ Valladolid រត់តាមសឹងមិនទាន់ មុននឹងស៊ុតមួយជើងឆ្វេងយកបាល់កោង ទម្លុះសំណាញ់ទីយកជោគយកជ័យឲ្យក្លិបឈ្នះ Valladolid ក្នុងលទ្ធផល ៣ ទល់នឹង ០។នៅចុងម៉ោង ខ្សែប្រយុទ្ធ Jorge de Frutos មានឱកាសបានស៊ុត Free Kick ដែរតែបាល់ហោះផុតសំណាញ់ទី និងរក្សាលទ្ធផលនោះរហូតចប់ការប្រកួត។​ ស្ថិតិនៃការប្រកួតរវាងក្រុមទាំងពីរគឺ Barcelona អាចគ្រប់គ្រងបាល់បានដល់ទៅ ៦១% ខណៈ Valladolid បានតែ៣៩% ហើយចំពោះការស៊ុតចំគោលដៅវិញគឺ Barca ស៊ុតបាន១០ដង ឯ Valladolid ស៊ុតបាន ៥ដង។អ្វីដែលគួរឲ្យកត់សម្គាល់ក្នុងការប្រកួតនេះគឺ គ្រាប់ទី៣ ដែលស៊ុតដោយខ្សែប្រយុទ្ធសញ្ជាតិអាហ្សង់ទីន Lionel Messi ជាគ្រាប់បាល់ទី៦៤៤ ហើយដែលរូបគេស៊ុតឲ្យក្លិបអ្នកមានបុណ្យ Barcelona ធ្វើឲ្យគេបំបែកកំណត់ត្រាយកឈ្នះវីរបុរសប្រេស៊ីល Pele ដែលស៊ុតបានតែ៦៤៣គ្រាប់ឲ្យក្លិប Santos ហើយកំណត់ត្រានេះ Ronaldo ដែលជាគូប្រជែងរបស់​ Messi បំបែកមិនបានឡើយ។

ក្តៅៗ! Liverpool ប្រកាសថានឹងមិនលក់កីឡាករ Mohamed Salah របស់ខ្លួនឡើយ

ថ្ងៃទី ២២ ខែ ធ្នូ ឆ្នាំ ២០២០ ម៉ោង ១៦:៥២

អង់គ្លេស៖ យោងតាមការរាយការណ៍ ក្លិបហង្សក្រហម Liverpool គ្មានគម្រោងចង់បើកដៃឲ្យខ្សែប្រយុទ្ធសញ្ជាតិអេហ្ស៊ីប Mohamed Salah ចាកចេញពីក្លិបនោះឡើយ ទោះបីជារូបគេមិនសប្បាយចិត្តនឹងមានកំពុងមានកំហឹងយ៉ាងណាក៏ដោយ។ប្រភពពីអតីតមិត្តរួមក្រុមនៅជម្រើសជាតិអេហ្ស៊ីប និងជាមិត្តជិតដិតម្នាក់របស់ Salah ឈ្មោះ Mohamed Aboutrika បានបង្ហើបថា Salah មិនសប្បាយចិត្តនឹងការស្នាក់នៅ Anfield នោះឡើយហើយក្លិបកំពុងសម្លឹងចង់លក់គេប៉ុន្តែយ៉ាងណាមិញ ក្លិបបាននិយាយហើយថាមិនបើកផ្លូវឲ្យ Salah ចាកចេញដូចព័ត៌មានចចាមអារ៉ាមទេ។ក្រោយផ្ទុះព័ត៌មានខ្សឹបខ្សៀវមិនយូរប៉ុន្មាន កីឡាករវ័យ២៨ឆ្នាំរូបនេះបានបង្ហោះរូបភាពដែលគេថតទាំងស្នាមញញឹមនៅថ្ងៃច័ន្ទនេះ ហើយយោងតាម Sunsport បានឲ្យដឹងថាលោកគ្រូបង្វឹក Jurgen Klopp កំពុងពេញចិត្តទម្រង់លេងរបស់ Salah និងគ្មានផែនការចង់លក់រូបគេឡើយខណៈកុងត្រាតារាឆ្នើមរូបនេះនឹងផុតកំណត់នៅរដូវក្ដៅឆ្នាំ២០២៣ ឯណោះ។កាលពីពេលថ្មីៗនេះ Salah ក៏បានបង្ហើបថាគេមានគំនិតចង់ទៅលេងនៅក្លិបយក្សទាំងពីរនៅអេស្ប៉ាញគឺ Real Madrid និង Barcelona ធ្វើឲ្យអតីតមិត្តរួមក្រុមរបស់គេនៅជម្រើសជាតិអេហ្ស៊ីប បានបង្ហើបប្រាប់ BeIN Sport ថា៖ ខ្ញុំបាននិយាយជាមួយ Salah តាមទូរស័ព្ទពីរឿងពាក់ព័ន្ធនឹងស្ថានភាពរបស់គេនៅ Liverpool ហើយគេមិនសូវសប្បាយចិត្តទេ ប៉ុន្តែវាមិនបានប៉ះពាល់ដល់ទម្រង់លេងរបស់គេនៅលើទីលាននោះឡើយ។ខ្ញុំដឹងថា Salah មិនសប្បាយចិត្តនឹងស្នាក់នៅជាមួយ Liverpool នោះឡើយដែលគេក៏បានបង្ហើបពីហេតុផលមួយចំនួនដែលនាំឲ្យគេមានអារម្មណ៍បែបនេះតែវាជារឿងសម្ងាត់ ខ្ញុំមិនអាចទម្លាយចេញជាសាធារណៈបានទេ តែហេតុផលមួយដែលគេមិនសប្បាយចិត្តគឺមកពីមិនបានធ្វើជាប្រធានក្រុមទល់នឹង Midtjylland នោះឯង។គួរបញ្ជាក់ផងដែរថាក្នុងការប្រកួតទល់នឹង Mitdtjylland នេះគឺលោកគ្រូ Klopp បានឲ្យស្លាកប្រធានក្រុមទៅខ្សែការពារ Trent Alexander-Arnold ជំនួសវិញ។ យ៉ាងណាមិញ គ្រួសាររបស់ Salah សុទ្ធតែបានដាក់ចិត្តដាក់កាយរស់នៅ ទីក្រុង Liverpool ហើយនិងគ្មានគម្រោងប្ដូរទៅរស់នៅឯណាផ្សេងទៀតឡើយដែលនោះជាកត្តាធំមួយទប់ Salah កុំឲ្យចាកចេញទៅក្លិបផ្សេង៕

Juventus ចាប់ផ្ដើមចង់បាន Memphis Depay ដូចក្លិបបាល់ទាត់ Barcelona ដែរហើយ

ថ្ងៃទី ២២ ខែ ធ្នូ ឆ្នាំ ២០២០ ម៉ោង ១៦:០៨

អឺរ៉ុប៖ យោងតាមសេចក្ដីរាយការណ៍បានឲ្យដឹងថា ក្លិបអ្នកមានបុណ្យ Barcelona ត្រូវប្រឈមនឹងការប្រកួតប្រជែងជាមួយក្លិបសេះបង្កង់ Juventus ក្នុងការផ្ទេរយកខ្សែប្រយុទ្ធនៅលីគកំពូលបារាំងកីឡាករ Memphis Depay។លោក Ronald Koeman ដែលធ្លាប់បង្វឹក Depay កំឡុងពេលដឹកនាំក្រុមជម្រើសជាតិហូឡង់ បានចាត់ទុកខ្សែប្រយុទ្ធក្រុម Lyon រូបនេះ ជាគោលដៅនាំចូលតាំងពីរដូវក្ដៅមកម្ល៉េះ ប៉ុន្តែការផ្ទេរបានបរាជ័យ។ កុងត្រារបស់ ​Depay ជាមួយក្រុម Lyon នឹងផុតកំណត់នាដំណាច់រដូវកាលនេះ ដូច្នេះតម្លៃខ្លួនរបស់គេ នៅទីផ្សារខែមករាខាងមុខ អាចនឹងធូរថ្លៃត្រឹម៤,៥ លានផោន (ឬប្រមាណ ៦លានដុល្លារ)។យោងតាមកាសែត Sport Diario បានឲ្យដឹងថា Barca នៅមិនទាន់ច្បាស់ថានឹងផ្ទេរយក Depay នៅខែក្រោយ ឬរង់ចាំផុតកុងត្រានៅរដូវក្ដៅ ប៉ុន្តែពេលនេះ ពួកគេទទួលបានការចូលប្រកួតប្រជែងយកខ្សែប្រយុទ្ធជម្រើសជាតិហូឡង់ ពីក្លិប Juventus ដែរហើយ។អ្នកចាត់ការក្រុម Juventus លោក Andrea Pirlo ចង់បានខ្សែបានខ្សែប្រយុទ្ធម្នាក់ទៀត ដើម្បីមកបំពេញជម្រើសទី៤ ក្នុងគម្រោងរបស់លោក ចាប់ដៃគូលេងជាមួយកីឡាករ Cristiano Ronaldo, Paulo Dybala និង Alvaro Marata ខណៈ Depay កំពុងស្ថិតក្នុងការពិចារណារបស់គ្រូបង្វឹកសញ្ជាតិអ៊ីតាលី។ ក្រៅពី Depay ក្លិបជើងឯក Serie A រដូវកាលមុនមួយនេះ ក៏កំពុងតាមដានយ៉ាងយកចិត្តទុកដាក់ទៅលើខ្សែប្រយុទ្ធកណ្ដាលរបស់ក្រុម Napoli កីឡាករ Arkadiusz Milik ផងដែរ៕

Lewandowski ថា អាចនឹងមករួមក្រុមជាមួយ Manchester United នៅរដូវកាលក្រោយ

ថ្ងៃទី ២២ ខែ ធ្នូ ឆ្នាំ ២០២០ ម៉ោង ១៥:៥២

បរទេស៖ ខ្សែប្រយុទ្ធរបស់ Bayern Munich កីឡាករ Robert Lewandowski បានបង្ហើបថារូបគេបានជួបពិភាក្សាជាមួយលោក Sir Alex Ferguson ជុំវិញការផ្លាស់ទៅលេងនៅ Manchester United កាលពីឆ្នាំ ២០១២ ម្តងរួចមកហើយ ដោយហេតុតែជាប់កុងត្រារបស់ក្លិប Dortmund ទើបរូបគេពិបាកចាកចេញ។កីឡាករសញ្ជាតិប៉ូឡូញរូបនេះត្រូវបានផ្សារភ្ជាប់ជាមួយនឹងការផ្លាស់ប្តូរទៅកាន់ទឹកដី Old Trafford ខណៈដែលនៅឯ Borussia Dortmund ជាកន្លែងដែលរូបគេបានចំណាយពេលបួនរដូវកាល។ ទោះយ៉ាងណាការផ្លាស់ប្តូរនេះមិនបានសម្រេចបានដូចចិត្តហើយបានចូលរួមជាមួយគូប្រជែងក្នុងស្រុករបស់ Dortmund គឺក្លិប Bayern លើការផ្ទេរដោយឥតគិតថ្លៃក្នុងឆ្នាំ ២០១៤ ពីក្លិបបាល់ទាត់ Borussia Dortmund។Lewandowski ត្រូវបានគេទទួលស្គាល់ថាជាកីឡាករឆ្នើមប្រចាំឆ្នាំរបស់ FIFA សម្រាប់ឆ្នាំ ២០២០ ប៉ុន្តែអាជីពរបស់គាត់អាចដើរខុសផ្លូវប្រសិនបើប្រធានក្លិប BVB មិនបានបិទផ្លូវចាកចេញទៅលេងនៅ Premier League ។ នៅឯក្លិប Bayern កីឡាករវ័យ ៣២ ឆ្នាំរូបនេះបានឈ្នះពានរង្វាន់ Bundesliga ចំនួន ៦ លើកនិងទទួលបានពានរង្វាន់កំពូលរបស់បាល់ទាត់អឺរ៉ុបកាលពីរដូវកាលមុននៅពេលដែលក្លិបនេះទទួលបានលទ្ធផលប្រសើរជាង PSG ដោយបានឈ្នះពានរង្វាន់ Champions League ។Lewandowski បានបង្ហើបឱ្យដឹងថា Thierry Henry ដ៏អស្ចារ្យរបស់ក្រុម Arsenal គឺជាអាយដលរបស់គាត់នៅពេលគាត់នៅក្មេង។ បាននិយាយថាអ្នកដែលខ្ញុំកោតសរសើរនោះគឺ Alessandro Del Piero និង Thierry Henry សូម្បីតែ Roberto Baggio ដែលខ្ញុំបានឃើញលេងនៅពេលខ្ញុំនៅក្មេង។ ប៉ុន្តែអ្វីដែលធ្វើឱ្យខ្ញុំស្រមៃឃើញនោះគឺកីឡដ្ឋានធំនិងបរិយាកាសរបស់ពួកគេ។យ៉ាងណាមិញ ចង់ចាកចេញពី Bundesliga ទៅលេងក្នុងក្របខណ្ឌ Premier League ជាយូមកហើយ ដោយបានខកខានមិនអាចមកកាន់ទឹកដីអង់គ្លេស អស់ជាច្រើនឆ្នាំ កីឡាករ Lewandowski បានត្រៀមខ្លួនរួចជាស្រេចក្នុងការចាកចេញពីទឹកដី Bayern Munich មកអង់គ្លេសនៅខែក្រោយនេះ ក្នុងនាមជាកីឡាកររបស់ក្លិបបិសាចក្រហម Manchester United ៕

ហេតុតែចង់បានពានមួយនេះ ទោះថ្លៃយ៉ាងណា PSG នៅតែទិញកីឡាករ Lionel Messi ពីក្លិបបាល់ទាត់ Barcelona

ថ្ងៃទី ២២ ខែ ធ្នូ ឆ្នាំ ២០២០ ម៉ោង ១៥:០៣

បរទេស៖ យោងតាមគេហទំព័រ beIN SPORTS បានឱ្យដឹងថា ម្ចាស់ក្លិបបាល់ទាត់ PSG បានស្រមៃជាយូរមកហើយក្នុងការបន្ថែមកីឡាករ Messi ចូលទៅក្នុងក្រុមរបស់ខ្លួនម្នាក់ទៀត បើទោះបីជា Messi មានអាយុច្រើនក៏ទម្រង់លេងរបស់កីឡាករអាហ្សង់ទីន រូបនេះនៅតែជាមហិច្ឆតាមួយរបស់ពួកគេរួមជាមួយនឹងក្តីរំពឹងការលើកពាន ពេលដែលមាន Messi ក្នុងក្រុម។កីឡាករឆ្នើម Lionel Messi បច្ចុប្បន្នមានវ័យ ៣៣ឆ្នាំ ដោយរូបគេបានឈ្នះពានកីឡាករល្អបំផុត Ballon d’Or ចំនួន៦សម័យកាល កីឡាកររូបនេះមិនទាន់បានចេញមុខថ្លែងបញ្ជាក់ពាក់ព័ន្ធនឹងអនាគតរបស់គេជាមួយ Barcelona ឡើយ ខណៈដែលកុងត្រារបស់គេនឹងផុតកំណត់នៅចុងរដូវកាលនេះ។ ជាពិសេសថ្មីៗនេះរូបគេបានបំបែកកំណត់ត្រាថ្មីដោយស៊ុតបញ្ចូលទីឲ្យក្រុម Barcelona បានចំនួន ៦៤៣គ្រាប់។ Messi បានសម្រេចចិត្តរួចហើយថានឹងនៅបន្តជាមួយក្រុម Barcelona ហើយរូបគេនឹងជួយឲ្យក្រុមមួយនេះឈ្នះពានយ៉ាងតិចមួយមុននឹងរូបគេចាកចេញ។Thomas Tuchel គ្រូបង្វឹកក្លិបបាល់ទាត់ PSG បានប្រាប់ថា បើ Messi មិនសុខចិត្ត ខាងយើងព្រមឱ្យតម្លៃដូច Neymar ម្ចាស់ក្លិបព្រមឱ្យថ្លៃគុណជាពីរក៏ព្រមយកដែរ ឱ្យតែកីឡាកររូបនេះចាក់ចេញពី Barcelona មកលេងឱ្យ PSG នៅរដូវកាលក្រោយនេះមែន។  យ៉ាងណាមិញ PSG មានលុយទិញកីឡាករថ្លៃច្រើន ហើយក៏មានក្តីរំពឹងពីកីឡាករទាំងអស់នោះផងដែរ។ ចង់បានកីឡាករ Messi មកក្នុងរឿងតែមួយទេគឺពាន Champions League ដែលម្ចាស់ក្លិបចង់បានជាយូរឆ្នាំណាស់មិនហើយតែ PSG មិនអាចធ្វើបាន។ តាមឱ្យដឹងថា ម្ចាស់ក្លិបបាល់ទាត់ PSG ចាំពាក្យថាចាកចេញពីក្លិប ចេញមកពី Messi អស់ជាច្រើនឆ្នាំមកហើយ។ ក្តីស្រមៃរបស់ក្លិបចង់ទិញកីឡាករ Messi មករួមក្រុមដើម្បីឈ្នះពាន Champions League ពានក្នុងលីគ និងពានផ្សេងៗទៀតដែលក្លិប PSG ចង់បាន ក្តីស្រមៃតែមួយគត់របស់ក្លិបនេះ គ្រប់យ៉ាងដើម្បីពានដែលក្លិបមិនទាន់បាន៕