trollkhmer news

កម្សាន្ត

ថ្ងៃដាក់សម្ពោធរឿងថ្មីរបស់ Miley Cyrus ត្រូវបង្ហាញខ្លួនដើរលើកម្រាលព្រំក្រហមតែម្នាក់ឯង ដោយគ្មានវត្តមានស្វាមីនៅក្បែរ

ថ្ងៃទី ១៣ ខែ កុម្ភះ ឆ្នាំ ២០១៩ ម៉ោង ១១:៣៧

អាមេរិក៖ កាលពីម្សិលមិញនេះ ត្រូវជាថ្ងៃដាក់សម្ពោធខ្សែភាពយន្តថ្មី "Isn Not It Romantic" ដែលចូលរួមសម្ដែងដោយរបស់តារាស្រី Miley Cyrus និងស្វាមីរបស់នាងលោក Liam Hemsworth នៅក្នុងទីក្រុង Los Angeles។ នៅក្នុងព្រឹត្តិការណ៍នោះដែរ បានឃើញថា Miley Cyrus បានបង្ហាញវត្តមានរបស់ខ្លួន ដើរលើកម្រាលព្រំពណ៌ក្រហម ជាមួយនឹងឈុតរ៉ូបសម្លៀកបំពាក់ ពណ៌ផ្កាឈូកវែងអន្លាយ ស្រស់ស្អាត និងមានភាពទាក់ទាញអ្នកជុំវិញខ្លួនអោយតាមសម្លឹងមកដាក់ភ្នែក ប៉ុន្តែបែរជាមិនមានវត្តមានរបស់ស្វាមី ដឹកដៃបណ្ដើរមកជាមួយគ្នាទៅវិញ។ដោយមិនឃើញវត្តមានរបស់ Liam Hemsworth ជាស្វាមីមិនបានអញ្ជើញចូលរួមជាមួយគ្នា នៅក្នុងនោះដែរ តារាស្រី Miley Cyrus ក៏បានបកស្រាយបញ្ជាក់ប្រាប់អំពីមូលហេតុទៅកាន់អ្នកគាំទ្រទាំងអស់របស់អ្នកទាំងពីរ នៅលើ Twitter អំពីអវត្តមានរបស់ស្វាមី ដោយសារតែ លោកបានកំពុងតែសម្រាកព្យាបាលនៅមន្ទីរពេទ្យ ទើបខកខានមិនអាចមកចូលរួមបាន មកដល់ពេលនេះ មិនទាន់ដឹងច្បាស់ទេថា មានបញ្ហាអ្វីនោះទេ។ ទោះបីជាយ៉ាងណា នាងនៅតែមានមោទនភាពចំពោះស្វាមីរបស់នាងជាទីបំផុត ហើយអ្នកទាំងពីរ ពិតជាសប្បាយរីករាយជាខ្លាំង ដែលរឿងរបស់ពួកគេបានចូលរួមសម្ដែង ត្រូវបានដាក់បញ្ចាំង ទាំងនេះជាសេចក្ដីរំភើបរបស់ពួកគេ។

Solar សមាជិកMAMAMOO ធ្វើឲ្យអ្នកក្នុងបណ្ដាញអ៊ីនធឺណេត ខកចិត្តមិនស្ទើរទេ ពេលឃើញសម្រស់នៅខាងក្រៅ

ថ្ងៃទី ១៣ ខែ កុម្ភះ ឆ្នាំ ២០១៩ ម៉ោង ១០:៣៤

កូរ៉េខាងត្បូង៖ ថ្មីៗនេះ រូបភាពជាច្រើនសន្លឹករបស់តារាចម្រៀងស្រី Solar សមាជិកMAMAMOO បានវាយលុកខ្លាំងនៅលើបណ្ដាញអ៊ីនធឺណេតរបស់កូរ៉េ ដោយការបង្ហាញខ្លួនខុសប្រក្រតីនៅឯព្រលានយន្តហោះ ដើម្បីធ្វើដំណើរទៅកាន់ប្រទេសថៃរបស់តារាស្រីរូបនេះ បានធ្វើឲ្យគ្រប់គ្នាមានការភ្ញាក់ផ្អើលយ៉ាងខ្លាំង ជាមួយនឹងរូបសម្រស់ធ្លាក់ចុះ និងជាមួយការតុបតែងខ្លួនរបស់នាង នៅពេលនោះ។ ជាការពិតណាស់ Solar សមាជិកMAMAMOO តារាស្រីរូបនេះ ត្រូវបានគេចាត់ទុកថា ជាតារាស្រីស្អាតមួយរូបរបស់ K-Pop ក្នុងចំណោមតារាស្រីល្បីៗជាច្រើទៀត ដែលមានរូបភាពស្រស់ស្អាត និងមានភាពទាក់ទាញខ្លាំងបំផុត។ ប៉ុន្តែដោយសារតែ ការបង្ហាញខ្លួនជាមួយនឹងរូបសម្រស់ពិត ការតុបតែងបែបសាមញ្ញធម្មតា ធ្វើឲ្យតារាស្រីរូបនេះ ទទួលរងនូវពាក្យរិះគន់មិនតិចនោះទេពីសំណាក់អ្នកនិយមលេងបណ្ដាញអ៊ីនធឺណេត បានលើកឡើងស្រដៀងៗគ្នាពីរូបសម្រស់ខាងក្នុង​ និងខាងក្រៅរបស់ Solar មានភាពខុសគ្នាខ្លាំងស្ទើរមិនគួរឲ្យជឿនឹងភ្នែក។ បើទោះជាមានពាក្យរិះគន់លើរូបសម្រស់តាមរយៈរូបភាពដែលបានចុះផ្សាយលើសារព័ត៌មានយ៉ាងណាក៏ដោយ។ Solar នាងក៏នៅតែទទួលបានការសរសើរពីសំណាក់ហ្វេនផេករបស់នាង ដដែល ជាមួយនឹងរូបភាពស្រស់ស្អាត នៅឯព្រលានយន្តហោះដូចគ្នា ដែលពួកគេតាមផ្ដិតយកបាន។

នី រតនា ព្រមាន​ចាត់វិធានការ​តាម​ច្បាប់ និង​ទទូច​ដល់​ជន​ខិលខូច កុំក្លែង​បន្លំ Facebook និង Youtube របស់​ខ្លួន

ថ្ងៃទី ១៣ ខែ កុម្ភះ ឆ្នាំ ២០១៩ ម៉ោង ០៩:១៨

ភ្នំពេញ៖ តារាចម្រៀងប្រុស នី រតនា ក្រោយពីត្រលប់មកពីក្រេបទឹកឃ្មុំជាមួយភរិយាវិញ ស្រាប់តែនៅពេលនេះលោកបានចេញមុខមកប្រកាសព័ត៌មានមួយទាក់ទងនឹងបណ្តាញសង្គម Facebook និងYoutube ដោយបច្ចុប្បន្ន មានជនខិលខូចជាច្រើនប្រើប្រាស់ឈ្មោះបង្ហោះរូបភាព និងបង្ហោះព័ត៌មានផ្ទាល់ខ្លួននានារបស់លោក គ្មានការអនុញ្ញាត តាមរយៈការបង្កើតគណនីក្លែងបន្លំ ដើម្បីផលប្រយោជន៍ផ្ទាល់ខ្លួន។ លោក នី រតនា ស្នើឲ្យបញ្ឈប់សកម្មភាពទាំងនេះ ជាបន្ទាន់ បើពុំដូច្នេះទេ លោកនឹងមានវិធានការតាមផ្លូវច្បាប់។បើយោងតាមផេកផ្លូវការ របស់លោក នី រតនា បានសរសេរសារយ៉ាងដូច្នេះថា «សូមជម្រាបដំណឹងដល់បងប្អូន និងបណ្តាអ្នកគាំទ្រខ្ញុំបាទទាំងអស់ មេត្តាជ្រាបថា គណនីហ្វេសប៊ុក, Page, និង channel youtube មួយចំនួន ខាងក្រោមនេះ (នៅមានច្រើនទៀត) មិនមែនជាគណនីរបស់ខ្ញុំបាទនោះទេ។ ខ្ញុំមានផេកផ្លូវការតែមួយគត់ គឺផេកមួយនេះដែលមានចំនួនអ្នក like ជិត ៤០ ម៉ឺននាក់ និងគណនីហ្វេសប៊ុកពិតរបស់ខ្ញុំ មានតែមួយគត់គឺ NY Ratana HM។ សម្រាប់ channel YouTube ពិតប្រាកដរបស់ខ្ញុំបាទ គឺ https://www.youtube.com/channel/UCsEZ46A_eZEufaSvHelQJHw»។ លោក នី រតនា បានសរសេរបន្តថា «ដូច្នេះខ្ញុំបាទ មិនទទួលខុសត្រូវរាល់សកម្មភាពទាំងឡាយ របស់គណនី ហ្វេសប៊ុក និងផេកក្លែងក្លាយទាំងនេះនោះទេ ហើយខ្ញុំសូមស្នើសុំ ដល់លោកដែលយកឈ្មោះខ្ញុំ ទៅប្រើក្នុង គោលបំណងបម្រើផលប្រយោជន៍ផ្ទាល់ខ្លួន មេត្តាបញ្ឈប់សកម្មភាពនេះ និងប្តូរឈ្មោះចេញ កុំយកឈ្មោះ របស់ខ្ញុំ ទៅប្រើនាំឲ្យមានការយល់ច្រឡំ ដល់អ្នកគាំទ្ររបស់ខ្ញុំទៀត។ បើជាអ្នកគាំទ្ររបស់ខ្ញុំ សូមប្រើឈ្មោះថា Fan មិនមែន ប្រើឈ្មោះរបស់ខ្ញុំ ហើយដើរតួជាខ្ញុំ ផុសព័ត៌មានពីខ្ញុំ ដោយគ្មានការអនុញ្ញាតនោះទេ»។លោក នី រតនា បន្តថា «ក្នុងករណីនៅតែបន្តសកម្មភាពនេះទៀត ខ្ញុំនឹងចាត់វិធានការទៅតាមការគួរហើយ។ សូមបងប្អូនជួយស៊ែរដើម្បីឲ្យសាំមីខ្លួនគាត់បានឃើញផង។ សូមអរគុណសម្រាប់ការគាំទ្ររបស់បងប្អូន ទាំងអស់គ្នាមកលើរូបខ្ញុំបាទ នី រតនា»។គួរជម្រាបថា លោក នី រតនា បច្ចុប្បន្នកំពុងទទួលបានប្រជាប្រិយភាពខ្លាំង គួរឲ្យសម្គាល់ ខណៈរាល់បទចម្រៀងរបស់លោក ចេញមកមួយបទៗ គឺត្រូវបានទស្សនិកជនគាំទ្រយ៉ាងខ្លាំង ហើយបើងាកមករឿងរ៉ាវផ្ទាល់ខ្លួនវិញ ប្រៀបបាននឹងរឿងភាគអ៊ឹចឹង ពោលគឺទស្សនិកជនតាមដានជាប់រហូត។ យ៉ាងណាមិញ ចំពោះការចេញមុខ មកប្រកាសជាសាធារណៈ នូវការក្លែងបន្លំគណនីបណ្តាញសង្គមនៅពេលនេះ គឺគេសង្កេតឃើញថា ពិតជាច្រើន មែន ដែលមានផេក ឬហ្វេសប៊ុក និង Youtube របស់ នី រតនា តែមិនដឹងមួយណាឲ្យប្រាកដ ដូច្នេះ វាបានបង្កភាព លំបាកដល់ ហ្វេនៗរបស់ នី រតនា ក្នុងការតាមដានសកមក្មភាពរបស់លោក។អ្វីដែលសំខាន់ ដើម្បីទប់ស្កាត់ការភ័ន្តច្រឡំនានា និងករណីខុសឆ្គងនានា នៅពេលខាងមុខ ទើបលោក នី រតនា ចេញមកបញ្ជាក់ថា មួយណាជាគណនីពិតរបស់លោក និងស្នើឲ្យជនខិលខូចទាំងនោះបញ្ឈប់ការបន្លំ ធ្វើជារូប លោកតទៅទៀត៕

បាត់មុខយូរ Selena Gomez ត្រឡប់មកវិញភ្លាម ទាក់ទាញការចាប់អារម្មណ៍ពីអ្នកគាំទ្ររាប់លាននាក់

ថ្ងៃទី ១២ ខែ កុម្ភះ ឆ្នាំ ២០១៩ ម៉ោង ១៥:៥៩

អាមេរិក៖ កាលពីម្សិលមិញនេះ តារាចម្រៀងស្រី Selena Gomez បានបង្ហោះរូបភាពរបស់ខ្លួនជាមួយនឹងមិត្តភក្ដិ ទៅកម្សាន្តលើឆ្នេរខ្សាច់យ៉ាងសប្បាយរីករាយ ជាលើកដំបូងលើប្រព័ន្ធផ្សព្វផ្សាយ ក្រោយពីបានចាកចេញពីមន្ទីរពេទ្យចិត្តសាស្រ្ត ដែលនាងបានសម្រាកព្យាបាលជំងឺផ្លូវចិត្តអស់រយៈពេលជាច្រើនខែ។គ្រាន់តែរូបភាពដ៏សប្បាយរីករាយរបស់ Selena ជាមួយនឹងមិត្តភក្ដិរបស់នាង បង្ហោះឡើងមកទាន់បានប៉ុន្មានផង បានឃើញថា ចំនួនការចូលចិត្តលើរូបភាពរបស់តារាស្រីរូបនេះ កើនឡើងរហូតដល់ទៅ ៦លាននាក់ក្នុងរយៈពេល ៣ម៉ោងប៉ុណ្ណោះ ព្រមទាំងមានការចែករំលែកតៗគ្នាជាច្រើនពេញលើបណ្ដាញអ៊ីនធឺណេត។គួររម្លឹកផងដែរថា ក្នុងខែតុលា កាលពីឆ្នាំមុននេះ Selena Gomez ត្រូវបានទទួលការសម្រាកព្យាបាលនៅឯមន្ទីរពេទ្យចំនួន ២ លើក ដោយសារតែ សម្ពាធឈាមធ្លាក់ចុះ អាចប្រហែលជាមានផលប៉ះពាល់ពីការវះកាត់តម្រងនោមរបស់នាងពីមុន និងជំងឺផ្លូវចិត្ដផងដែរ កាលពីឆ្នាំ ២០១៧។

Jessica ប្លែកសម្រស់ខ្លាំង ធ្វើឲ្យអ្នកគាំទ្រខ្លួន មើលមិនចង់ស្គាល់

ថ្ងៃទី ១២ ខែ កុម្ភះ ឆ្នាំ ២០១៩ ម៉ោង ១៤:៥៨

កូរ៉េខាងត្បូង៖ កាលពីពេលថ្មីៗនេះ តារាស្រីរបស់កូរ៉េ Jessica Jung បានមានវត្តមានអញ្ជើញចូលរួមជាតារាកិត្តិយស ផងដែរ នៅក្នុងព្រឹត្តិការណ៍ការបង្ហាញម៉ូដស្លៀកបំពាក់ក្នុងទីក្រុងញូវយ៉ក។ ក្រោយពីបានបង្ហាញវត្តមាន ក្នុងព្រឹត្តិការណ៍លំដាប់អន្តរជាតិមួយនេះរួចមក Jessica ត្រូវបានក្រុមអ្នកគាំទ្រកូរ៉េ និងអន្តរជាតិរបស់នាងជាច្រើន បានចាប់អារម្មណ៍យ៉ាងខ្លាំងទៅលើរូបសម្រស់ស្អាតប្លែករបស់តារាចម្រៀងស្រីរូបនេះ។ រូបភាពជាច្រើនរបស់នាង ត្រូវបានអ្នកគាំទ្ររាប់លាននាក់នៅលើបណ្ដាញអ៊ីនធឺណេត ផ្ដោតការយកចិត្តទុកដាក់យ៉ាងខ្លាំង ពីរូបសម្រស់ដ៏ស្រស់ទាក់ទាញរបស់តារាស្រីជនជាតិកូរ៉េរូបនេះ តាមរយៈការផ្សព្វផ្សាយពីសារព័ត៌មានបរទេស បង្ហាញពីរូបសម្រស់ពីមុន និងបច្ចុប្បន្ន គឺពិតជាប្លែកស្អាតដាច់ឆ្ងាយពីគ្នាគួរឲ្យកត់សម្គាល់ ទាំងរូបរាង និងសម្រស់មុខមាត់៕

អាយុជិត៣០ពិតមែន! តែសម្រស់របស់ Yoona នៅតែស្រស់ស្អាតក្មេងជាងវ័យដដែរ

ថ្ងៃទី ១២ ខែ កុម្ភះ ឆ្នាំ ២០១៩ ម៉ោង ១១:២៩

កូរ៉េខាងត្បូង៖ កាលពីរសៀលម្សិលមិញនេះ តារាចម្រៀងស្រី Yoona សមាជិកក្រុមនារី SNSD បានបង្ហាញខ្លួនជាថ្មីម្ដងទៀត នៅឯព្រលានយន្តហោះអន្តរជាតិ Incheon ជាមួយនឹងរូបសម្រស់ស្រស់ស្អាត យ៉ាងទាក់ទាញ។ក្នុងការបង្ហាញខ្លួនជាសាធារណៈរបស់ Yoona ពិតជាធ្វើឲ្យអ្នកគាំទ្ររបស់នាងជាច្រើន លើកសរសើរពីភាពស្រស់ស្អាតរបស់តារាស្រី ប្រចាំផលិតកម្ម SM រូបនេះយ៉ាងខ្លាំង ដោយនៅតែរក្សាបាននូវរូបសម្រស់ស្អាតក្មេងជាងវ័យ ដដែរ។ រូបភាពជាច្រើនសន្លឹករបស់តារាស្រីរូបនេះ មិនចាំបាច់ប្រើប្រាស់ក្នុងស្ទូឌីយោថតនោះទេ ដែលត្រូវបានក្រុមអ្នកសារព័ត៌មាន ក៏ដូចជាអ្នកគាំទ្ររបស់នាង បានប្រម៉ាញ់ផ្ដិតយកបានភ្លាមៗ ខណៈនាងបង្ហាញខ្លួន នៅឯព្រលានយន្តហោះអន្តរជាតិក្នុងប្រទេសនោះ បានធ្វើការចែករំលែកពេញលើបណ្ដាញអ៊ីនធឺណេតរបស់កូរ៉េ ជាមួយនឹងរូបភាពស្រស់ៗស្អាតនៅខាងក្រៅ។

ថេណា ចេញ​មុខ​បកស្រាយ​ ​ក្រោយ​ចម្រៀង​របស់​ខ្លួន​រង​ការ​រិះគន់​ខ្លាំងៗ ព្រម​ទាំង​ដកចេញ​ពី​ Youtube ផង​ដែរ

ថ្ងៃទី ១២ ខែ កុម្ភះ ឆ្នាំ ២០១៩ ម៉ោង ១០:២០

ភ្នំពេញ៖ ប៉ុន្មានម៉ោងមុននេះ មហាជនបាននាំគ្នា ធ្វើការរិះគន់យ៉ាងចាស់ដៃ ទៅលើបទចម្រៀងរ៉េបថ្មីរបស់ លោក ថេណា ដែលមានចំណងជើង ថា «អេម» ព្រមទាំងទស្សនិកជនមួយចំនួន បានអំពាវនាវទៅក្រសួងវប្បធម៌ ឱ្យចាត់វិធានការ ព្រមានតារាចម្រៀងរូបនេះទៀតផង ដោយសារក្នុងបទចម្រៀងរបស់លោក មានបង្គប់ខ្លឹមសារ មិនសមរម្យ និយាយពីរឿងលើគ្រែជាមួយមិត្តស្រី ជាសាធារណៈ ដែលធ្វើឱ្យមហាជនទូទៅ ទទួលយកមិនបាន។ ទន្ទឹមគ្នានេះ មិនបង្អង់យូរ លោក ថេណា ក៏បានចេញមុខមកបកស្រាយភ្លាមៗ ដើម្បីការពារចម្រៀងរបស់ខ្លួន ថាគ្មានអ្វីខុសឆ្គង តែយ៉ាងណា ក្រោយអានការបកស្រាយហើយនោះ មហាជនភាគច្រើន បានបោះពាក្យ ទៅវិញថា «ស្តាប់មិនចូលត្រចៀក»។ក្រោយមានការរិះគន់ខ្លាំងៗ ពីមហាជន ម្ចាស់បទ «អេម» ថេណា បានសរសេរសារបង្ហោះលើផេកផ្ទាល់ខ្លួនថា «សុំទោស ទៅដល់អ្នកទាំងអស់គ្នា ដែលមិនពេញចិត្តនៅចម្រៀងមួយបទនេះខ្ញុំដឹងថាប៉ារូវាខ្លាំង តែចម្រៀងបែបនេះ មិនមែនមានតែខ្ញុំទេ ដែលធ្វើបងប្អូនមានចម្រៀងបរទេស ចម្រៀងខ្មែរថៃ និងប្រទេសច្រើនណាស់ដែល rap ប៉ារូបែបនេះខ្លាំងជាងខ្ញុំផង សិល្បៈនៃការ rap វាតែងតែមានពាក្យធ្ងន់ខ្លះ ហើយបងប្អូនហើយខ្ញុំក៏បានដាក់ logo ដែលខ្ញុំគូរង្វង់សហ្នឹងហើយដាក់ថា 18+ ទៀតហើយខ្ញុំគ្រាន់តែជាអ្នកធ្វើភ្លេងតាម internet តែប៉ុណ្ណោះមិនមែនអ្នកចម្រៀងផ្លូវការឯណា ហើយបទនេះពួកខ្ញុំធ្វើលែងទុកស្ដាប់ជាមួយមិត្តភ័ក្ដិខ្ញុំតែប៉ុណ្ណោះ តែក៏ឃើញ fans របស់ខ្ញុំគាត់ចូលចិត្តក៏បង្ហោះ ទៅមិនបានលក់លើកទីផ្សានោះទេខ្ញុំដឹងថាទោះនិយាយយ៉ាងមិចក៏នៅតែមានកំហុស ព្រោះមនុស្សមានការគិតខុសគ្នា តែចង់បកស្រាយប្រាប់អ្នកទាំងអស់គ្នា អគុណបាទ»។ យ៉ាងណាមិញ បន្ទាប់ពីតារាប្រុសរូបនេះ ចេញមុខបកស្រាយ មានទស្សនិកជនភាគតិចណាស់ ដែលគាំទ្រការបកស្រាយ ក៏ដូចជាគាំទ្រស្តាប់ចម្រៀងរបស់ ថេណា ខណៈមានទស្សនិកជនភាគច្រើនទៀត ពោលគឺសឹងតែ ៩៩ ភាគរយ នៅតែបន្តរិះគន់ សម្តែងការមិនពេញចិត្ត និងនៅតែទទួចឱ្យក្រសួងវប្បធម៌ ចាត់វិធានការ ដុះក្អែល ក្រុមរ៉េប ឥតសីលធម៌ចេញម្តង មិនថាតែសម្រាប់ តារាប្រុស ថេណា ទេ គឺតារារ៉េបពីរ បីនាក់ផ្សេងទៀត។ ដោយទស្សនិកជន ប្រកាន់នូវជំហរថា បើសិល្បៈខ្មែរ បណ្តោយឱ្យក្រុមរ៉េបអស់នេះ រ៉េបតាមតែអំពើបែបនេះ អត្ថន័យ អសីលធម៌ ជេ ហែកកេរ្តិ៍គ្នាតទៅទៀត សិល្បៈខ្មែរ និងធ្លាក់តម្លៃចុះពុំខាន៕

ខាន់ ជេមស៍ ចាប់​ដៃគូ​ធ្វើ​ចម្រៀង ជាមួយ​កូនខ្មែរ​អាមេរិក​ម្នាក់ ដើម្បី​ដណ្ដើម​ទីផ្សារ​សិល្បៈ (មានវីដេអូ)

ថ្ងៃទី ១២ ខែ កុម្ភះ ឆ្នាំ ២០១៩ ម៉ោង ០៩:២០

ភ្នំពេញ៖ តារាចម្រៀងប្រុស លោក ខាន់ ជេមស៍ ថ្មីៗនេះ បានចាប់អារម្មណ៍យ៉ាងខ្លាំង ពីសំណាក់ទ្សសនិកជន ខណៈដែលគេប្រទះឃើញ បទចម្រៀងមួយបទរបស់លោក បញ្ចេញនៅក្នុងផលិតកម្មសាន់ដេ ដែលមានចំណងជើងថា «My first love» គឺបទចម្រៀងរបស់លោក និងមានការច្រៀងរួមគ្នា ជាមួយតារាចម្រៀងប្រុសវ័យក្មេងមួយរូបទៀត ដែលត្រូវបានគេស្គាល់ថា ជាកូនខ្មែរ អាមេរិកគឺលោក មុត វ៉ៃ ធ្វើបទចម្រៀង ដើម្បីវាយលុកទីផ្សារ ចម្រៀងនៅកម្ពុជា។ជាមួយគ្នានេះ លោក ខាន់ ជេមស៍ បានថ្លែងប្រាប់បន្តថា កូនខ្មែរអាមេរិក ដែលលោក ខាន់ ជេមស៍ បានចាប់ដៃគូ ជាមួយក្នុងផលិតកម្មសាន់ដេ នោះមានឈ្មោះថា មុត វ៉ៃ (Mout wei) រស់នៅក្នុង រដ្ឋកាលីហ្វញ៉ា ដែល ម្ដាយឪពុករបស់តារាចម្រៀងរូបនេះ ជាខ្មែរមានកំណើត នៅខេត្តបាត់ដំបង លោកបានស្គាល់ មុត វ៉ៃ ៧ឆ្នាំមុន គ្រាលោកចេញទៅច្រៀងលើទឹកដីអាមេរិក។ផ្ដើមពីអ្នកគាំទ្រ ហើយមានទេពកោសល្យសិល្បៈពីកំណើតផង កូនខ្មែរកាត់អាមេរិកម្នាក់នេះ តែងតែចង់មកធ្វើ ជាអ្នកសិល្បៈចម្រៀងនៅស្រុកខ្មែរ ទើបលោក ខាន់ ជេមស៍ផ្ទាល់ ក៏មានបំណងសាកល្បង ចាប់ដៃជាមួយគ្នាតែម្ដង មួយវិញទៀត មុត វ៉ៃ ក៏ជាមនុស្សម្នាក់ដែលមានទេពកោសល្យសិល្បៈពីកំណើត ចេះជំនាញធ្វើភ្លេង រាំ និងច្រៀងជាដើម ហើយថែមទាំងមានក្រុមសិល្បៈមួយក្រុម នៅសហរដ្ឋ អាមេរិក ផងដែរ។បទថ្មីដែរច្រៀងរួម គ្នាបាន១បទហើយ គឺបទ «My first love» ដែលជាបទញាក់ ដែលច្រៀងរហូតទៅដល់ទី៣ភាសា ពោលរួមមានដូចជា ភាសាខ្មែរ អង់គ្លេស និង ថៃ ដែលទើបនឹងចេញនៅក្នុងផលិតកម្ម សាន់ដេ ក្នុងពេលថ្មីនៗ។ ចំពោះបទចម្រៀង១បទនេះ ខាន់ ជេមស៍ ប្រាប់ឲ្យដឹងបន្ថែមថា ខ្លួនបាននាំដៃគូរូបនេះឡើងច្រៀង តាមកម្មវិធីប្រគំតន្ត្រីធំៗ មួយចំនួនមកហើយ ហើយក៏ទទួលបានការគាំទ្រខ្លាំង គួរឲ្យកត់សម្គាល់។តាមគម្រោង បទចម្រៀងដំបូងដែលលោក និងមុត វ៉ៃ គ្រោងនឹងផលិតជា MV ក្នុងពេលឆាប់ៗនេះផងដែរ។ ដោយឡែក ក្រៅពីការផលិតជា បទចម្រៀង ច្រៀងរួមគ្នាហើយនោះ លោក ខាន់ ជេមស៍ បង្ហើបថា កូនខ្មែរសញ្ជាតិអាមេរិករូបនេះ ក៏គ្រោងនឹងបង្កើតជាក្លឹបរាំ នៅស្រុកខ្មែរខណៈដែលលោកក៏ជាគ្រូបង្រៀនរាំ១រូប លើទឹកដីអាមេរិកមុនពេលដែលមកធ្វើជាដៃគូច្រៀង ជាមួយលោក ខាន់ជេមស៍។ម្ចាស់បទ «បុប្ផាក្រពុំ» រូបនេះបានថ្លែងប្រាប់បន្តថា ខ្លួនពិតជាសប្បាយចិត្តខ្លាំងណាស់ នៅពេលបានចាប់ដៃគូជាមួយលោក មុត វ៉ៃ និងបានបំពេញបំណងដែលកូនខ្មែរអាមេរិករូបនេះចង់ក្លាយខ្លួនទៅជាតារាចម្រៀង នៅក្នុងប្រទេសកម្ពុជា ថែមទៀត ។លោក ខាន់ ជេមស៍ បានធ្វើការរំពឹងយ៉ាងមុតមាំថា កិច្ចសហការគ្នាជាលើកដំបូង ក្នុងការធ្វើបទចម្រៀង នឹងទទួលបានជោគជ័យព្រមទាំងមានការគាំទ្រពីទស្សនិកជន ផងដែរ។ មិនតែប៉ុណ្ណោះ លោកក៏នឹងបន្តផលិតស្នាដៃ បទចម្រៀងឲ្យបានច្រើនជាបន្តបន្ទាប់ទៀត ដើម្បីបម្រើអារម្មណ៍ទស្សនិកជនទទឹមគ្នានេះដែរ ខាន់ ជេមស៍ ក៏បានស្នើទៅទស្សនិកជន មេត្តាបន្តគាំទ្រពួកគេទាំងពីរ ដើម្បីជាកម្លាំងចិត្តក្នុងការផលិតបទចម្រៀង និងស្នាដៃសិល្បៈផ្សេងៗជាបន្តបន្ទាប់ទៀត ដើម្បីកាន់តែធ្វើឲ្យសិល្បៈចម្រៀង នៅក្នុងប្រទេសកម្ពុជា មានភាពរីកចម្រើនទៅមុខកាន់តែខ្លាំងឡើង៕

ថេណា រង​ការ​រិះគន់​ពី​មហាជន​ក្រោយ​ពេល​ចេញ​​បទ «អេម»

ថ្ងៃទី ១២ ខែ កុម្ភះ ឆ្នាំ ២០១៩ ម៉ោង ០៩:០៧

ភ្នំពេញ៖ តារាចម្រៀង Original លោក ថេណា ស្របពេលដែលបានទម្លាយផ្សព្វផ្សាយនូវបទចម្រៀងថ្មីរបស់ ខ្លួនមានចំណងជើងថា អេម មិនទាន់បានប៉ុន្មានផងក៏ស្រាប់តែផ្ទុះការរិះគន់ពីទស្សនិកជាច្រើនលើទង្វើររ៉េបបទ នេះមានអត្ថន័យរៀបរាប់ពីរឿងរ៉ាវនៅលើគ្រែជាមួយមនុស្សស្រី។ ជាការកត់សម្គាល់ បន្ទាប់ពីបទនេះត្រូវបាន បញ្ចេញផ្សព្វផ្សាយនៅលើបណ្តាញសង្គមយូធូបមិនទាន់បានមួយដង្ហើមចង្រិតផង តារាចម្រៀងលោក ថេណា ក៏ស្រាប់តែរងព្រនង់រិះគន់របស់មហាជនមិនសំចៃមាត់ ដោយក្នុងនោះក៏មានការស្នើរឲ្យក្រសួងត្រូវចាត់វិធានការក្តៅលើតារាចម្រៀងលោក ថេណា ផងដែរ។ដោយឡែកអ្នកនាង ចន ច័ន្ទលក្ខិណា ដែលជាប្រធានសមាគមសិល្បករខ្មែរក៏បានប្រតិកម្មលើរឿងនេះផង នោះ។ បើចាប់អារម្មណ៍មកមើលខ្លឹមសាររបស់តារាស្រីអ្នកនាង ចន ច័ន្ទលក្ខិណា បានលើកឡើងថា «ទទួល យកអត់បានទេអូន រឿងអាម៉ាស់របស់មនុស្សស្រីណាអូន ។ ខ្លាំងអស្ចារ្យណាស់ប្អូនប្រុសដែលយករឿងលើ គ្រែ របស់ប្អូននិងមនុស្សស្រីមកអួតជាសាធាណៈអោយគេដឹងថាប្អូនពិតជាជាប់ចិត្តនិង និង ពូកែ នូវទង្វើស កម្មភាពបែបនោះរបស់មនុស្សស្រី»។អ្នកនាង ចន ច័ន្ទលក្ខិណា បន្តថា «បងសូមសរសើរអូនដែលក្លាហានរឿងបែបនេះជាច្បាប់ធម្មជាតិដែល បង្កើតមនុស្ស និង សត្វអោយមានតម្រេកតណ្ហាតែមនុស្សម្នាក់ៗគេមិននិយាយជាសាធារណះនោះទេ ព្រោះ ជារឿងកេរ្តិ៍ខ្មាស់របស់មនុស្សទាំងបីភេទ។ ហើយអូនមានគិតទេថាទង្វើបែបនេះអ្នកម្តាយ និង បងស្រី ប្អូនស្រី របស់ប្អូនក៏ធ្លាប់មានដែរ ហើយបើឪពុក ឬ ដៃគូររួមភេទរបស់ពួកគាត់លើកយកទង្វើរសកម្មភាពរួមភេទរបស់ អ្នកទាំងនោះមកនិយាយជាសាធារណៈវិញតើអូនមានអារម្មណ៍បែបណា?បងសូមទោសចំពោះហ្វេនៗរបស់ប្អូនប្រុសផង»។សូមបញ្ជាក់ថាការផ្ទុះប្រតិកម្មរិះគន់និងបង្ហាញការមិនពេញចិត្តលើតារាប្រុសលោកថេណា របស់មហាជន នៅលើបណ្តាញសង្គមហ្វេសប៊ុក ខាងលើនេះបានកើតឡើងភ្លាមៗស្របពេលដែលតារាប្រុសរូបនេះបាន បញ្ចេញបទចម្រៀងរ៉េបរួមគ្នាជាមួយលោក YT មានចំណងជើងថា អេម ដែលអត្ថន័យចម្រៀងនេះបានបង្កប់ អត្ថន័យហែកហួរមនុស្សស្រីរឿងឡើងលើគ្រែជាមួយគ្នាគួរឲ្យស្អប់ខ្ពើម៕