trollkhmer news

ជិតបានចូលរៀនវិញហើយ! សម្ដេចឱ្យក្រសួងអប់រំ រៀបចំបើកសាលារៀនឡើងវិញ

ថ្ងៃទី ១៨ ខែ វិច្ឆិកា ឆ្នាំ ២០២០ ម៉ោង ១៤:៤០

ជិតបានចូលរៀនវិញហើយ! សម្ដេចឱ្យក្រសួងអប់រំ រៀបចំបើកសាលារៀនឡើងវិញ

សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងនៅព្រឹកទី ១៨ វិច្ឆិកា ២០២០ នេះថាការបិទបញ្ចប់ព្រឹត្តិការណ៍ ៣ វិច្ឆិកា នឹងធ្វើឡើងក្នុងពេលដ៏ខ្លីខាងមុខនេះ​។  សម្ដេចបញ្ជាក់ថា ការបិទព្រឹត្តិការណ៍ ៣ វិច្ឆិកា គឺសំដៅឱ្យក្រសួងអប់រំយុវជន និង កីឡា ក្រសួងការងារ និង បណ្តុះបណ្តាលវិជ្ជាជីវៈរៀបចំបើកសាលារៀន និង សាលាបណ្តុះបណ្តាលវិជ្ជាជីវៈឡើងវិញ ព្រមទាំងធ្វើឱ្យសភាពការណ៍គ្រប់ផ្នែកគ្រប់វិស័យវិលទៅរកភាពប្រក្រតីដូចមុនថ្ងៃ ៣ វិច្ឆកាឡើងវិញ តែការប្រយុទ្ធជាមួយកូវីដ-១៩នៅតែជាអាទិភាពនៃការងាររបស់យើងទាំងអស់គ្នាដដែល ។



ក្នុងពេលរង់ចាំការធ្វើតេស្តចំពោះបងប្អូនផ្សេងទៀត សម្ដេច ហ៊ុន សែន នឹងប្រកាសជូនជ្រាបថាព្រឹត្តិការណ៍ ៣ វិច្ឆិកានឹងត្រូវបិទបញ្ចប់ការធ្វើចត្តាឡីស័កតាមពេលវេលាដូចខាងក្រោម៖

១.សម្រាប់ថ្ងៃ១៩ វិច្ឆិកា ២០២០ មានរាជធានីភ្នំពេញចំនួន ១៥៦៩ នាក់ (មានជនជាតិហុងគ្រីចំនួន ៥នាក់) ដោយរាប់ទាំងអ្នកវិជ្ជមាន ៤ នាក់ ក្នុងនោះជាសះស្បើយ ១ នាក់ និង ៣ នាក់កំពុងព្យាបាលនៅមន្ទីរពេទ្យមិត្តភាពខ្មែរ.សូវៀតដែលមានទាំងអគ្គរដ្ឋទូតហុងគ្រីម្នាក់ផង ។ ខេត្តកណ្តាលចំនួន ៦៧ នាក់ ខេត្តពោធិសាត់ចំនួន ៤០ នាក់ ខេត្តព្រៃវែងចំនួន ២៣ នាក់ ខេត្តកំពង់ធំចំនួន ៣ នាក់។

២.សម្រាប់ថ្ងៃ ២១ វិច្ឆិកា ២០២០ គឺខេត្តកំពង់ឆ្នាំងចំនួន ១១ នាក់។

៣.សម្រាប់ថ្ងៃ ២៣ វិច្ឆិកា មានខេត្តកែប ចំនួន ១៨ នាក់ ខេត្តព្រះសីហនុចំនួន ៤០ នាក់ ខេត្តកំពង់ចាមចំនួន ១ នាក់។

៤.សម្រាប់ថ្ងៃ ២៥ វិច្ឆិកា ២០២០មានខេត្ត ព្រះវិហារចំនួន ២០ នាក់ ខេត្តរតនគិរីចំនួន ១០ នាក់៕

ប្រភព​ : freshnewsasia