trollkhmer news

ថៃរកឃើញអ្នកឆ្លង COVID-19 ១០៣នាក់ថ្មី ខណៈអ្នកបាត់បង់ជីវិតកើន ៤នាក់

ថ្ងៃទី ០៣ ខែ មេសា ឆ្នាំ ២០២០ ម៉ោង ១៥:០៥

ថៃរកឃើញអ្នកឆ្លង COVID-19 ១០៣នាក់ថ្មី ខណៈអ្នកបាត់បង់ជីវិតកើន ៤នាក់


(បាងកក)៖
 អាជ្ញាធរសុខាភិបាលថៃនាថ្ងៃសុក្រនេះ បានប្រកាសពីការរកឃើញអ្នកឆ្លង COVID-19 ចំនួន១០៣នាក់ថែមទៀត ហើយអ្នកជំងឺ ០៤នាក់ក៏ទើបតែបានបាត់បង់ជីវិតផងដែរ។ នេះបើតាមការដកស្រង់ការផ្សាយចេញពី ទីភ្នាក់ងារព័ត៌មាន Reuters នៅថ្ងៃសុក្រ ទី០៣ ខែមេសា ឆ្នាំ២០២០។

យោងតាមលោក Taweesin Wisanuyothin អ្នកនាំពាក្យមជ្ឈមណ្ឌលទទួលបន្ទុកស្ថានការណ៍ COVID-19 របស់រដ្ឋាភិបាលថៃ ប្រការនេះធ្វើ​ឲ្យចំនួនអ្នកឆ្លងសរុបនៅប្រទេសថៃ បានកើនដល់១,៩៧៨នាក់ រីឯស្លាប់កើនដល់១៩នាក់។ ចំណែកអ្នកដែលបានជាសះស្បើយវិញមាន​៥៨១នាក់។ លោក Taweesin បានបញ្ជាក់ថា អ្នកជំងឺដែលស្លាប់គឺជាបុរសជនជាតិថៃទាំងអស់ ក្នុងនោះម្នាក់អាយុ៥៩ឆ្នាំ ដែលធ្វើការនៅលើ​រថភ្លើងមួយខ្សែ ហើយ៣នាក់ទៀតអាយុចន្លោះ៧២-៨៤ឆ្នាំ មានជាប់ពាក់ព័ន្ធការចូលរួមទស្សនាការប្រកួតប្រដាល់មួយ នៅទីក្រុងបាងកក ដែលជាប្រភពនៃការឆ្លងរាលដាលដ៏ធំមួយ នៅក្នុងប្រទេសថៃ។

គួរជម្រាបថា ខណៈកំពុងបន្តស្ថិតក្រោមគ្រាមានអាសន្ន ចាប់ពីយប់ថ្ងៃសុក្រនេះ ថៃនឹងចាប់ផ្តើមអនុវត្តបម្រាមគោចរនាវេលាយប់ ដែលមាន​រយៈពេល៦ម៉ោង គឺចន្លោះម៉ោង១០៖០០នាទីយប់ ដល់ម៉ោង០៤៖០០នាទីទាបភ្លឺ នៅទូទាំងប្រទេសតែម្តង ដើម្បីកាត់បន្ថយការឆ្លងរាលដាល​នៃ COVID-19៕





ប្រភព​ : freshnewsasia