trollkhmer news

គយព្រលានយន្ដហោះអន្ដរជាតិភ្នំពេញ ចាប់ជនជាតិចិន ៣នាក់ ក្រោយនាំលុយចូលកម្ពុជា៩០ម៉ឺនដុល្លារ ដោយគ្មានប្រភពច្បាស់លាស់

ថ្ងៃទី ១០ ខែ កក្តដា ឆ្នាំ ២០១៩ ម៉ោង ១០:១៤

គយព្រលានយន្ដហោះអន្ដរជាតិភ្នំពេញ ចាប់ជនជាតិចិន ៣នាក់ ក្រោយនាំលុយចូលកម្ពុជា៩០ម៉ឺនដុល្លារ ដោយគ្មានប្រភពច្បាស់លាស់

ភ្នំពេញ៖ កម្លាំងការិយាល័យគយ នៅព្រលានយន្ដហោះអន្ដរជាតិភ្នំពេញ សហការជាមួយកម្លាំងនគរបាលអន្ដោប្រវេសន៍ ប៉ុស្ដិ៍ច្រកទ្វារអន្ដរជាតិភ្នំពេញ បានចាប់ខ្លួនជនជាតិចិន៣នាក់ ក្រោយនាំលុយចូលមកប្រទេសកម្ពុជាចំនួន ៩០មុឺនដុល្លារ ដោយគ្មានប្រភពច្បាស់លាស់ នៅល្ងាចថ្ងៃទី០៩ ខែកក្កដា ឆ្នាំ២០១៩នេះ។



មន្ដ្រីការិយាល័យគយព្រលានយន្ដហោះអន្ដរជាតិភ្នំពេញ បានប្រាប់បណ្ដាញព័ត៌មាន Fresh News ឲ្យដឹងថា ជនជាតិចិនដែលសមត្ថកិច្ចចាប់ខ្លួននោះរួមមាន ទី១៖ឈ្មោះ Huang Canming អាយុ ២៧ឆ្នាំ និងទី២៖ឈ្មោះ Yang Yongwei អាយុ ២៦ឆ្នាំ ពួកគេធ្វើដំណើរចេញពីទីក្រុងហុងកុង ប្រទេសចិន មកអាកាសយានដ្ឋានអន្ដរជាតិភ្នំពេញ តាមជើងយន្ដហោះលេខ LQ971 និងទី៣៖ឈ្មោះ Zizheng Zheng អាយុ ៣២ឆ្នាំ (ជាអ្នកមកចាំទទួលនៅភ្នំពេញ)។



ប្រភពព័ត៌មានដដែល ក្រោយធ្វើការត្រួតពិនិត្យ និងបានរកឃើញក្រដាសប្រាក់ដែលជនសង្ស័យ ដាក់ក្នុងកាបូបយួរដៃចំនួន៣ ដែលមានទឹកប្រាក់សរុប ៩០០,០០០ដុល្លារ ដោយអ្នកដំណើរមិនបានប្រកាសជូនដំណឹងដល់មន្ដ្រីគយ និងរដ្ឋាករ លើលិខិតរាយការណ៍គយនោះឡើយ។ ការនាំចូលក្រដាសប្រាក់ទាំងនេះមានចំនួនច្រើន មិនមានប្រភពច្បាស់លាស់ និងមិនបង្ហាញពីគោលដៅច្បាស់លាស់របស់ប្រាក់ ទើបការិយាល័យត្រួតពិនិត្យគយអាកាសយានដ្ឋានអន្ដរជាតិភ្នំពេញ បានសម្រេចឃាត់ខ្លួនតែម្ដង។



សូមបញ្ជាក់ថា រយៈពេល ៣ថ្ងៃនេះ មន្ត្រីគយបង្ក្រាបបទល្មើសនាំលុយដុល្លារល្មើសច្បាប់ ចូលបាន ២ករណីហើយ ដោយនៅថ្ងៃទី០៧ ខែកក្កដា ឆ្នាំ២០១៩ ម្សិលម្ងៃ បង្ក្រាបនៅព្រលានយន្ដហោះអន្តរជាតិខេត្តសៀមរាប ដោយចាប់ខ្លួនជនជាតិកូរ៉េ ២នាក់ រឹបអូសយកប្រាក់ដុល្លារ បានជាង ២លានដុល្លារ។



យោងតាមរបាយការណ៍សមត្ថកិច្ចបានបង្ហាញថា កាលពីម្សិលម្ងៃ ជនជាតិកូរ៉េខាងត្បូងដែលរងការចាប់ខ្លួននោះ បានធ្វើដំណើរតាមជើងហោះហើរលេខ UO-706 (HKG-REP) មកពីទីក្រុងហុងកុង ប្រទេសចិន៕


ប្រភព​ : freshnews